Kinabukasan ay nagtataka si Leon nang hindi pa gumigising ang kanyang panganay gayong hindi naman nito ugali ang magising ng tanghali na.
"Ba't hindi pa gising ang ate mo?" tanong ni Leon sa nakababata niyang anak habang nadatnan niya itong naghahanda ng kanilang agahan.
"Baka tulog pa, Pa," maagap namang sagot ng anak.
Nasanay na kasi siyang kapag gigising siya sa umaga ay makikita na niya si Nayume na katuwang ni Mia sa paghahanda ng kanilang almusal. Naisip din niya na baka nga pagod ang kanyang anak at napasarap ang tulog nito.
"Ate?" tawag ni Mia sa kanyang kapatid nang buksan niya ang kwarto nito upang gisingin ito dahil baka male-late na ito sa trabaho.
"Ate?" muli niyang tawag dito at nakita lamang niya ang kanyang kapatid na nakatagilid patalikod sa kanyang kinatatayuan.
