“Anak, ako na muna rito. Magpahinga ka muna,” ani Regina sa anak na si Bettina.
Mahigit dalawang buwan na ang nakalipas mula nang matagpuan nila si JE, pero wala pa ring pagbabago sa kalagayan nito. Hindi pa rin ito nagigising.
“Hindi, ‘Nay, ako na ho. Baka kayo naman ang mapaano. Ilang araw na rin kayong naririto at kasama kong nagbabantay,” aniya at sinulyapan ang asawa. Animo'y payapa lang itong natutulog kung titingnan.
“Ikaw ang baka magkasakit sa ginagawa mo. Ni hindi ka masyadong natutulog. Palagi lang na’kay JE ang atensyon mo. Nag-aalala na ako, pati na ang itay mo. Paano na kung pati ikaw magkasakit? Paano na si Kuatro?” nag-aalalang wika nito.
Iniwan muna niya sa kaniyang pamilya si Kuatro, upang matutukan ang pag-aasikaso kay JE. At hindi niya naisip ang sinabing iyon ng k
