DAHIL sa labis na pagkaantig ng puso ni Jordan sa tagpong nasaksihan ay hindi niya namalayang nagtubig ang kaniyang mga mata. Wala mang kahit na anong narinig ay sapat na ang nakita niyang pagyayapos ng dalawang taong kanina pa minamatyagan upang mabatid na maganda ang pinagtapusan ng pag-uusap ng mga ito. Agad niyang hinubad ang suot na brown aviator sunglasses upang mapunasan ang pumatak na luha, sa sandaling maramdaman ang pag-agos niyon sa kaniyang pisngi.
Naroon din siya sa sementeryo, ang parehong lugar kung nasaan si Maddie at ang daddy nito.
Mula nang maghiwalay sila ng dating kasintahan ay nakaugalian na talaga niyang magpabalik-balik doon sa tuwing sasapit ang buwan ng Mayo—kung kailan namayapa ang ina nito—dahil natitiyak niyang alinman sa susunod na sampung araw ay susulpot i
