“SAYANG, wala ako noong nagkabati kayo ni Sir Delfin!” tuwang-tuwang bulalas ni Steffi kay Maddie. “Kung kasama n’yo sana ako, na-video-han ko kayo!”
Kunot-noo niya itong nilingon, kaya napilitan din itong itigil ang boluntaryong pagsusuklay sa mahaba niyang buhok.
“Kailangan talaga, may video?!” kunwaring nagtataray na sabi niya.
“Aba, s’yempre, Miss Maddie!” Nagkibit-balikat ito bago magaan siyang hinawakan sa mga balikat para pihitin paharap muli sa salamin. “‘Yung mga ganoong makabagbag-damdaming happenings sa life, dapat talaga idino-document.”
Sinulyapan niya ang repleksyon nito sa salamin at doon ito pinaningkitan ng mga mata. “Ikaw talaga! Kahit kailan, napakarami mong alam.”
“Naman! Ako pa ba?” Binungisngisan siya nito. “Pero seryoso, Miss Mads, I’m so happy for you!”
Hindi
