Alam kong ang laki kong tanga kung papaniwalaan ko ang bulok niyang rason na halatang inimbento niya lang naman para aking paniwalaan, pero ewan ko ba at natagpuan ko na lang ang aking puso na pinapatawad na naman siya at pinipiling sa huling pagkakataon pa ay muling paniwalaan ang kung anong mga pinagsasabi niya sa akin. Na kahit hati ang aking nararamdaman doon ay pinili ko pa rin ang makasama niya, ang yakapin siya at muling magpabulag sa labis na pagmamahal ko para sa kanya. Huling pagkakataon na sinabi ko na noong nasa resort kami, ngunit hanggang ngayon ay huling pagkakataon pa rin iyon. Wala naman sigurong mawawala kung magiging mapagbigay at mabait na naman ako ngayon sa kanya. Isang beses pa na pagbibigyan ko ang aking puso na maging tanga sa kanya nang dahil sa lintik na pag-ibig
