HINDI NA namalayan ni Marga ang naging pag-usad ng sinasakyan. Nagulat pa siya nang lingunin at sabihan ng drayber. Noon niya na lang napansing nasa tapat na sila ng paaralang pinapasukan.
"Mam, narito na po tayo sa school. Diyan po ba kayo nagtutu--"
"H-ha? A e, oho. Salamat ho," aniya bago bumaba.
Halos liparin niya ang gate ng paaralan. Nagkukumahog din siyang naglakad papasok. Ngiti na lang ang naisagot niya sa guwardiya at sa mga magulang na bumati sa kanya.
"Nakakahiya. Kay bago-bago ko pa lang e, nale-late na," bulong niya nang makitang nakapila na ang mga mag-aaral sa tabi ng mga guro ng bawat pangkat. At ang mga estudyante niya, nagkakagulo nga sa pila gaya ng inaalala niya. Sinisinop naman ng ibang teacher ang mga ito. Sinasaway sa harutan at inililinya nang tuwid sa kanilan
