NAPABUNTONG-hininga si Moira habang pinipigil ang sarili na lingunin sina Slater at Kaye. Bahagya nang nangangawit ang leeg niya sa pagpipigil na mapatingin sa dating nobyo. Naiinis kasi siya sa paraan ng pagtingin nito sa kanya kapag nagsasalubong ang kanilang mga mata; at hindi rin niya maintindihan kung bakit parang naba-bothered siya sa mga tingin nito.
Kahit na kausap niya ang isa sa mga seniors niya ay naririnig pa rin niya ang usapan nina Slater at Kaye. Naiinis sa kaibigan, pero hindi siya sigurado kung bakit. Dahil ba sa lantarang pagpapapansin nito kay Slater o dahil sa closeness ng dalawa?
So what kung close silang dalawa? Ano namang pakialam ko doon? naisaloob niya. Naiinis at nag-aalala lang ako sa pinaggagagawa ni Kaye. Ayoko lang ma-fall siya sa lalaking tulad ni Slater.
