"I won! I won!" sigaw ni Issy nang mauna itong makarating sa kabilang dulo ng swimming pool. Itinaas pa nito ang mga kamay at napakaluwang ng pagkakangiti. Hinawi nito ang buhok na nakakalat sa mukha saka tumingin sa ina at kay Melinda. "I did it!"
"I lose," mahinang tugon ni Lianne na nakangiti rin. Tatlong segundo lang ang pagitan nilang dalawa ni Issy. Kung sinuwerte siya ay siya sana ang nanalo. Nagkaroon pa naman sila ng pustahan kanina at agad niya iyong sinang-ayunan nang hindi man lang inaalam kung ano ang kapalit.
Naghilamos ng mukha si Lianne habang nakalubog pa rin ang kalahati ng katawan sa tubig. Isang dipa lang ang layo niya kay Issy na ngayon ay tuwang-tuwa pa rin sa kaniyang pagkapanalo.
"That was so close!" saad ni Felicia na may hawak ng timer. Tila nanghihinayang it
