"O, e, di pack up na," saad ni Katrina nang minsang magkita sila sa isang fast food chain. Lunch break kasi nito at nagkataon naman na may bibilhin siya sa drugstore. Nagayaya ito na mag-lunch sila na agad naman niyang pinaunlakan.
Kumagat ito ng fried chicken na parang walang pakialam sa mga taong nakapaligid sa kanila. Halos isubo na kasi nito ang isang hiwa ng manok at sinabayan pa ng kanin. "Hindi mo 'yon kawalan, kundi kawalan ng walanghiya mong asawa."
Napailing na lang siya. Sanay na sanay si Katrina magsalita habang may laman ang bibig. College pa lang sila ay gano'n na ang kaibigan. Tila palaging nagmamadali maging sa pagkain. Minsan pa nga ay pinagsasabay nito ang pagkain at pagre-review. Kaya tuloy nasasabihan ito noon na jologs dahil sa ugaling iyon.
"Alam mo, Beshie, kung
