Malayo man ay narinig pa rin ni Mang Berto ang malulutong na halakhakan ng mga kabataan. Mukhang nagkakatuwaan ang mga ito. Kapag ganitong oras ay malimit na huni lamang ng mga kuliglig at kulisap ang tanging musikang kanyang naririnig sa gabi. Subalit iba ngayon.
Iika-ika siyang lumabas ng kanyang kubo upang silipin kung kanino nagmumula ang maingay na k'wentuhan at tawanan. Dapat ay iwasan na talaga niya ang pagkain ng munggo. Lalo lamang siya sinusumpong ng rayuma sa kanyang tuhod.
Nang siya ay makalabas, agad niyang natanaw ang lumalagablab na baga sa malayong dalampasigan. Ilang mga kabataan ang nakapaligid rito at tila nagkakatuwaan.
Kinuha niya ang kanyang sombrerong yari sa buri. Mas maiging tingnan niya kung sino ang mga ito. Ngayong may sirenong nagkukubli sa tagong k'weba, ma
