“Tulala ka na naman. Sinabi ko sa iyo, Adelaida, sunggaban mo na agad ang pagkakataong ibinigay sa iyo, pero pinakawala mo pa! Hay, naku! Kung hindi lang kita kaibigan, kanina ko pa naiuntog ang ulo mo sa mesa,” sermon sa kaniya ni Gabby.
Naroon silang dalawa sa working table nito, ipinakikita nito sa kaniya ang mga natapos na nitong designs. Iyon kasi ang ipapasa nila sa J.K. Production kaya kailangang busisiin nila iyong mabuti.
“Kasalanan mo ito!” angil niya saka muling itinuon ang atensyon sa mga ipinakikita nito sa kaniya.
“At ako na naman ang sinisi mo? Ikaw itong nakatabi na, hinalikan pa, tinanong— subalit nakuha pang tumanggi. Ano’ng klaseng pag-iisip mayroon ka?! God! Mr. Eversmann is a perfect guy for you. Pakawalan mo na ang sarili mo sa nakaraan mo, okay?!” Pinandilatan si
