"Kanina ka pa ba riyan?" tanong ni Elvira nang makita si Uno pagbaba niya ng hagdan. Tahimik lamang itong nakatayo at mukhang kanina pa sa kan'ya naghihintay.
"Pasensya na kung ngayon lang kami natapos ni Lena. Tinapos lang namin ang unang aralin sa Economics," pagdadahilan ni Elvira.
Sigurado si Elvira na magkasulubong na naman ang mga kilay ni Uno dahil natagalan siya sa loob ng silid ni Lena. Ang usapan kasi nila ay dalawang oras lamang siya magtuturo kay Lena sa loob ng isang araw. Kapag nalaman ni Uno na wala siya ni anumang naituro kay Lena, tiyak na magbubuga ito ng apoy at sangkaterbang sermon na naman ang aabutin niya mula rito.
Nagpasya si Elvira na ipagpaliban na muna ang pagtuturo sa araw na ito dahil ayaw niyang dumagdag pa sa mga iniisip ni Lena lalo na't batid niya na ma
