Chapter 77
*Abby*
Maingat na nilagay ni Tere sa lamesa ang mga pinamalengke namin. “Ano po bang lulutuin, señorita?” Tanong niya at sinilip ang laman ng mga plastic.
“Lumpiang shanghai at sinigang na baboy,” sagot ko.
Binabagabag pa rin ako ng nangyari sa palengke kanina. Hindi na niya ako kinibo hanggang sa makauwi kami. Baka iniisip niya ay totoo ang hinala niyang magkikita kami ni Kevin kaya hindi ko sila pinapasama. Nagkataon lang naman ‘yon. Masisisi ko ba siya kung nakita niya ngang nandoon si Kevin. Mabigat akong bumuntong-hininga.
“Ako na po diyan,” saad naman ni Tere.
“Ako na, Tere. Gusto ko siyang ipagluto ng tanghalian,” nakangiting saad ko kahit na hindi ako mapakali kakaisip kay Jason. Baka sakaling sa masarap na tanghalian ako makabawi para mapawi ang galit niya sa’kin
