NAPAKADILIM SA LOOB ng bahay 886, ngunit agad ko nang naramdaman na hindi ako nag-iisa kahit wala man akong makitang iba. Nagsilbi kong liwanag ang ilaw sa aking palad na itinutok ko sa paligid upang makita ang kung ano mang posibleng atakehin ako. Iyon na agad ang naisip ko, na nasa panganib ako bago pa man ako higupon ng bahay papasok dito. Dahil itim na enerhiya nga ang bumabalot sa lugar na ito. Mga evil ghost.
Humakbang ako habang nakaangat ang aking mga palad at palinga-linga ako sa paligid. At hindi lang mga kaluluwa ang kasama ko rito, may naramdaman akong tao na nasa paligid?
Biglang nagliwanag sa kabuuan ng bahay, may mga itim na kandilang isa-isang nagsindihan na nakakalat sa paligid. At sa harap ko, tumambad ang nakataling dalaga, si Elena. May takip ang kanyang bibig. At sa
