"SAMANTHA, Samantha!" tawag sa akin ng landlady na kabababa pa lang sa sinasakyang taxi. Kita ko ang pagmamadali sa kilos niya na tila ba may isang napaka-importante siyang sasabihin.
"Bakit po, Madam?" magalang kong sagot. Nakasanayan ko na rin kasing tawagin siyang Madam dahil lahat ng umuupa rito ay gano'n ang tawag sa kaniya.
Medyo naghahabol pa siya ng kaniyang hininga nang makalapit na siya sa akin. May katabaan kasi siya at nasa 50's na, kaya madali na lamang siyang mapagod at kapusan ng hininga kapag medyo tumatakbo.
"N-Naalala ko kasi kahapon na gusto mong makahanap ng trabahong nababagay sa 'yo, di ba? 'Yong trabahong hindi masyadong mabigat para sa isang kagaya mong nagdadalang tao, tama?" medyo hinihingal pa rin na sabi niya.
Napatango ako. Kahapon kasi, matapos kong magpu
