ALIGAGA si Lorice habang nasa lobby. Kasama niya si Gaia na nagpupunas ng mga mesang iniwan ng kanilang mga customers. Ilang beses na rin siyang napabuntong-hininga kapag naiisip ang biglaang pagbisita sa kanila kagabi ni Bettina.
Dalawang taon niya ring nakasama si Lucas hindi lang sa loob ng café na ito kundi sa iba pang misyon ng Black Moon pero palaging sumasagi sa kanyang isipan ang sikretong hanggang ngayon ay pinaghahawakan nilang tatlo para sa kaligtasan ng lalaki.
Ngayong malapit na sa kanila si Temyong, napag-iisipan niya nang sabihin sa boss ang totoong dahilan kung bakit sila nasa Kim Sarang’s. Napag-usapan na nilang tatlo iyon kagabi at handa ang dalawang lalaki na sagutin ang mga katanungan ni Lucas kung sakali mang ipatawag ang mga ito.
Tumayo nang tuwid si Lorice at h
