MADALING-ARAW na ay gising na gising pa rin ang diwa ni Alex. Tulog na lahat ang mga kasama niya sa kubo, siya na lang ang nag-iisang gising at nakatitig nang tagusan sa atip ng kubo. Madalas ay mahimbing ang tulog niya sa lugar, kaya nga mas pinipili niyang guluhin ang pag-iisa ni Uncle Ico sa kubo. Dati ay kapayapaan ang hatid sa kanya ng tunog ng kalikasan sa hatinggabi—mabilis siyang nakakatulog.
Ngunit iba ang sandaling iyon. Kahit anong pag-iiba ng posisyon ang gawin ni Alex ay mailap ang antok. Ang dating tunog ng kalikasan na kapayapaan ang hatid sa kanya, ngayon ay tila tino-torture siya para lalong hindi siya makatulog!
Hindi dapat pero mayamaya pa ay binubugbog na niya sa isip si Attorney Harold Virgil. Ang abogado lang naman ang sumira sa gabi niya!
Mariin niyang ipinikit an
