"Bahala ka sa trip mo, Kuya Ed," sagot niyang hindi man lang tuminag sa pagkakadapa sa kama. Wala talaga siyang balak bumangon pero napangiti siya nang mayamaya ay narinig niyang sinasabayan nito ang lumang kanta.
"Noong nakilala mo ang una mong sinta, umapaw ang saya. Siya'y ibang iba, sinasamsam ang bawat gunita..."
"Ang lalim," hindi niya napigilang komento. Acoustic version ang kanta. Sa hula niya ay ni-revived.
"Hindi mo malimutan kung kailan nagsimulang matuto kung paano magmahal. 'Di mo malimutan kung kailan mo natikman ang una mong halik, yakap na napakahigpit..." patuloy na kanta nito.
"Kaninong version 'yan?"
"Noel Cabangon."
"Title?"
"Pag-ibig. Tapat na tagasuporta ako ng OPM," sagot nito, sa boses ay nahulaan niyang nakangiti. Itinuloy uli ang pagkanta. "Nang tayo'y magk
