"Matagal ka na po bang mahilig sa mga halaman?"
Napahinto si Lola Remejos matapos ko itong itanong. Ibinaba muna nito ang tabo na pinapandilig niya kanina.
Narito ako sa bahay niya. Himala nga na ang bait-bait na talaga sa akin. Samantalang noon halos ibato na niya sa akin ang paso, lalo na kapag trip na trip ko ang orchids niya.
Wala si Orwa ngayon kaya wala akong kasama sa bahay, ang boring kaya kung doon lang ako mag-isa. Tutal bumait na ang matandang 'to sa akin, siguro naman p'wede na akong makipagdaldalan sa kaniya.
"Bata pa lang ako mahilig na ako sa mga halaman, lalo na sa orchids." Tumango-tango lang ako sa sinabi niya.
Naalala ko tuloy si lola noon. Marami siyang halaman sa bakuran namin, pero wala ng natira. Hindi ko naman kayang alagaan ang iba, lalo na may trabaho ako.
