KUMUKUTI-KUTITAP ANG LIWANAG na mayroong iba’t ibang kulay mula sa loob ng bulwagan hanggang sa labas ng palasyo. Maging ang mga pagkaing inihanda ay espesyal para sa isang natatanging gabi. Ang mga ilaw na iyon ay simbolo ng kasiyahan at napakalaking bagay na kailangang ipagdiwang.
“Nakamamangha talaga ang galing mo sa mahika,” tinuran ni Elenor kay Vidal. “Ngunit kinakabahan pa rin ako sa mga maaaring mangyari mamaya. Nakita mo ba ang mga ngiti ni Oruza simula kaninang umaga? Umaasa siya. Tiyak na labis siyang masasaktan.”
“Wala tayong magagawa, hindi tayo ang nagpasya. Iyon ang bagay na dapat ay maunawaan niya,” tugon naman ni Vidal habang nakamasid sa ilang kawal na nagbabantay sa paligid ng korona.
“Ang ipinangangamba ko lamang ay baka tuluyan siyang maligaw ng landas,” pangamba ni
