Acutus’ POV
Hindi ako makapaniwala sa mga nangyayari. Nang muli akong umapak dito sa Stamen, ang buong akala ko ay ang pagbabalik ng nakaraan ngunit nasorpresa ako nang matagpuan ang buong palasyo sa pamamalakad ni Herus. Inakala ko noong una na kakampi na ni Herus si Nitidus ngunit mali ako. Ngunit ano nga ba ang pinaplano ni Nitidus? Bakit ipinagkaloob niya ang kwintas ng Tractatio sa kamay ng isang mapanganib na nilalang? Hanggang ngayon ay hindi ko mahinuha ang binabalak nito. Hindi ko lubos na maisip kung ano ang kahihinatnan ng kasunduan nilang dalawa. Ligtas bang makipagkasundo sa kagaya ni Herus? Bakit malakas ang loob ni Nitidus na susunod ito sa napagkasunduan nilang dalawa gayong ang layon niyon ay pakawalan ang isa sa mga alagad nito gayundin ang singsing ng Rudimenta?
