Acutus' POV
"Acutus, napapansin ko kanina ka pa walang imik. Tila yata malalim ang iniisip mo." Napalingon ako kay Ginoong Lux nang lumapit siya sa akin. Malalim na ang gabi at ang lahat ng mga kasama namin ay tulog na subalit nananatili pa rin akong gising. Buong akala ko ay natutulog na rin si Ginoong Lux ngunit nananatili pa rin pala siyang gising at nagmamasid. "May bumabagabag ba sa 'yo?"
"Ganito pala ang pakiramdam kapag ang taong dati ay malapit sa 'yo at laging nariyan sa tabi mo ay bigla na lang magbago at tuluyan ka na lang niyang hindi maalala." Napakunot ang aking noo at tahimik na pinagmasdan si Nitidus na tahimik na nahihimbing. "Ang bilis ng mga pangyayari. Parang kailan lang ay namomroblema pa ako kung sino ba ang dapat kong piliin kina Vis at Nitidus. Halos hindi mawalay
