اني طبعا خجلت كلش وخفت وركض رحت لغرفتي اللي كال عليها الحجي وجانت كلشي بيها كأنما اني عايشة بيها طول عمري فتحت دولاب الملابس وجان مليان ملابس كلة ماركات والوان مختلفة حتى ببيت ابوية ماجان عندي هلكد ملابس وكلها التاكات عليها احذية برف الأحذية من كل الأنواع يعني ماكو احلى من هيج ولا بعمري كلة جنت احلم بهلكد غراض وذهب واشياء... ووحدة بعمري مستحيل متفرح بهيج شغلات لا أصلا تطير من الفرح. بدلت هدومي ووخرت المكياج وجان اكو حمام بغرفتي من الزجاج فدخلت غسلت ووخرت كل المكياج ولبست هدوم جديدة وجان سيت بجامة والفوك أبو التعلاكة بلون ماروني حرير وأول مرة البس هيج هدوم بس جان شعور حلو حسيت نفسي صرت مرة وكعدت كدام المراية مثل الممثلات عود امشط بشعري واحط مرطب للبشرة واحجي وية المراية عود دا اغورها كتلها: شوفيني ولج شحلاتني كل هذا الي حتى احلى من غرفتي ببيت اهلي وضحكت بعدين جنت ضايجة فقررت اباوع مسلسل لحد ما انعس وجانت الساعه 9 ونص بالليل. فتحت التلفزيون وجانت مسلسل تركي على وحدة من القنوات فكعدت اباوع طبعا تلفزيوني جبير ومعلك على الحايط وحتى بي سبيكرات ما اعرف شلون استعملهن بس جانن كلش فيكة بالغرفة. المهم ظليت اباوع تلفزيون لحد ما نمت على روحي وما كعدت غير على صوت الباب مالتي ينفتح بعصبية وصوت صياح يهز الغرفة. فتحت عيني ولن الحجي مغوار فوك راسي عصبي نار وعيونة حمر