صغيرة باعوني

الفصل الاول اني قصتي يمكن تشوفوها طبيعيه بس هي اكثر من الظاهر واني قررت احجيها مو حتى ا**ب تعاطف الناس وياي لا بس نشرتها حتى الناس تأخذ موعظة منها. اتمنى قصتي تكون مص*ر الهام لهواء اهل يزوجون بناتهم زواج مو صحيح سواء الاهل مجبورين بسبب الحاجة المادية او الدين او امور عشائرية او ببساطة لان همة ما مهتمين بنوعية الزوج الي راح بنتهم تعيش وياه عمرها كله وتقضي سنوات حياتها تحت ظله ورة ما يقرون هاي القصة يعيدون النظر بالخيارات المتاحة كدامهم ويفهمون ان البنت امانة وورة ما تصير وية رجال وينقفل عليها باب هي بعدها امانتهم همة ولازم يتأكدون ما تتعرض للاذية من قبل زوجها او اهل زوجها. بالبداية اعرفكم بنفسي اني بنين وبس مراح اكول اسم ابوي او عشيرتي اكتفي حاليا بالاسم فقط ورغم ان اهلي قد يكونون همة سبب بمشكلتي الى احجيها الكم بس اني احب اكول ان الامر كان غير مقصود ابدا. راح احجيلكم عن زواجي الاول الي جان صدمة ما اعتقد ان احد انصدمها بحياته مو بس الي لا لاهلي ايضا. طبعا اني بنت خير وتربيت ببيت عز. ابوي جان تاجر اقمشة جبير كلش ببغداد وهذا الحجي من انولدت لحد ما صرت بعمر المراهقة وامي مرة محترمة جانت معلمة علوم لسنوات هواي ودرست المرحلة الابتدائية بس تركت التعليم قبل كم سنة لان ما محتاجين للفلوس فبطلت وقررت تحط كل تركيزها على تربيتنا اني واخواني. عائلتنا تتكون من ولد اثنين واني البنت الوحيدة واخر العنقود ولاني البنت الوحيدة كان الكل مدللني وطلباتي تتنفذ وخوتي ايضا كانوا مدللين لكن اني اكثرهم والدي كان ميرفضلي طلب ووالدتي كانت متخليني اشيل الورقة من الارض. يعني ما اعرف شنو تنظيف او كراب واخوتي يموتون علية وغرفتي وحدي بيها كل اللي تتمنى أي بنية بالحياة الوانها اني اختاريتها وملابسي كلها شبه جديدة لان ما الحك البس شئ اله تنزل مودة شي ثاني فاروح اشتري وسريري عليه لعباتي من لمن جنت صغيرة. ورة ما نجحت من السادس ابتدائي للمتوسطة طلعت وية امي وكهدية من ابوية لان نجحت بتفوق قرر يبدلي اثاث غرفتي كلة اشتريت جرباية جديدة وكنتور جديد وكل البردات والجراجف جبناهة من محل ابوية وخيطناهة تفصال اللي اني اختاريته من احسن الاقمشة. طبعا هسة الكل يتعجب شلون بنية صغيرة هيج تكدر تسوي بس هو هذا الدلال اللي اني مدللته. بالنسبة لاخوتي الولد مثل ما ذكرت اكبر مني وبسنوات هواي بيناتهم سنة فرق والاثنين انقبلوا بجامعات خارج بغداد بمحافظات بعيدة عافونا وسكنوا بالمحافظات بفترة الدراسة وهذا الكلام اني كنت بالاول المتوسط. فصار البيت كلة الي اسرح وامرح بي شلون ما اريد براحتي عايشة بخير ابوية ودلالة. وهذا الحال كان اشبه بالحلم الجميل رغم اني ما كنت اتصور ان هو حلم لكن الان واني اتكلم احسة حلم وانتهى. مثل كل الاحلام الحلوة ما داملي الحلم الجميل وحياتنا انقلبت راسا على عقب. والدي خسر محله وتجارته كلها بين يوم وليلة بحريق تماس كهربائي اكل البضاعة كلها والفلوس الي بقاصة المحل والمصيبة ان والدي كان حاط فلوسة كلها بالبضاعه الجديدة الجايبهة من تركيا واحتركت كلها. ابوية من وصله الخبر ما تحمل انهار وصار بي سكته قلبية وانتقل للمستشفى ووية انهيار ابوية انهار عالمي كله وعالم امي وعالم العائلة كلها انهار. أتذكر ساعة الي وصلنا خبر الحريق كنت اني اتابع برنامج على القنفة وامي بالمطبخ واجانة اتصال من صاحب ابوية بالسوق. رفعت امي الخط وعلى على بالها الخبر المدمر: -شلون عيني؟ شلون؟ ما صدقت امي الي دتسمعه. رادت تسمعه مرتين تلاثة يلة تصدقة. تركت البرنامج من شفت نبرة امي المصدومة ورحتلها. وكفت بصفها عيني علهيا مرعوبة خايفة وقلبي صار بين رجلية من سمعت اسم ابوية: -الحجي شبي لا عفية خوية لا تكولها شلون يعني المحل اكلته النار شلون؟ البارحة جان مابي شئ؟ شلون احترك؟ تماس؟ والحجي وين جان؟ ياربي دخيلك؟ شلون الحجي بالمستشفى؟ وكع التليفون من ايد امي وظلت تلطم على وجهها فاقدة ما مصدقة. اخذت التليفون حتى افهم الموضوع لكن الخط كان مقفول. سألت امي ودموعي بدون ما اعرف الموضوع ترست عيوني: -شنو يمة؟ شصار فهميني؟ ابوية شبي؟ باوعتلي وهي ساندة ظهرها على الحايط تبجي متألمة بحالة انكار وتصديق بنفس الوقت: -محل ابوج احترك تماس كهربائي. ونقلوا ابوج للمستشفى .. اووووف، عشنا اصعب ايام بحياتنا. ايام تعيسة مجهولة وتخوف ودموعي ما نشفت ودموع امي خلصت وخايفين على صحة ابوية ظلينا بالمستشفى ما نفارقة ندعي ليل ونهار يطلع من هالشدة الي هو بيها واخوتي اجو من الجامعات تركوها بعز الامتحانات في سبيل يظلون قرب ابوية العائلة كلها جانت بحالة انهيار وخوف على صحة ابوية ابوية عمود البيت اذا انهار العمود تنهار الخيمة وياه. ورة اسبوع يلة تحسنت حالة ابوية بقدر ضئيل ومن شفنة هذا التحسن ارتاحينا شوية ما قطعنا الدعاء ولا الصلاة بس شوية تحسنت حالتنا النفسية. ومن جهة ثانية ماجنة نعرف مقدار الخسارة الي صابتنه لان كل كل الحسابات والفلوس بيد ابوية بس مع هذا كان القلق مالينا بسبب ضياع المحل والتجارة الي نعرف كلش زين كلها راحت وية المحل. تعاسة ذيج الايام ما تنوصف ابوية اذا صار عليه شئ منو الي راح يتكفل بينا واحنة متعلمين على الدلال وحتى اخوتي الكبار بهذا العمر ما يشتغلون ياخذون مصاريف جامعاتهم من ابوية ما فد يوم حسوا همة بحاجة يشتغلون بعمر صغير لان ابوية جان كدامنة كانه راح يعيش العمر كلة وعلى غفلة خسرنة فلوسنة وصحة ابوية تدمرت وانتهت. ما صدقنا ان حالة ابوية تحسنت وكتبلة الطبيب على خروج من المستشفى ومن طلع من المستشفى كانت حالته تبجي الصخر وت**ر الخاطر وزنه صار نص الي كان وصار ضعيف بشكل مو طبيعي شعره بين يوم وليلة انقلب لونه ابيض ولحيته الي كان دائما يهتم بيها ويمشطها ويشذبها ويعطرها صارت طويلة وكانه زاد على عمره 100 سنة من كثر الهم الي حمله على اكتافه والخوف من المستقبل وضياع تعب العمر برمشة عين. المحل ما ظل منه شي ولا قابل للاصلاح ولا كان بمقدورنا نسترجع من البضاعة او الفلوس الي كانت بدخله اي شئ كله ضاع وبقينا بلا راعي لان ابوية ما يقدر يشتغل بسبب المرض. قرروا اخوتي يتركون الجامعه حتى يشتغلون ويعيلونه بهاي الفترة لكن ابوية رفض رفض قاطع وطلب منهم يرجعون للجامعه احسن ما تضيع عليهم السنة ويحاولون يعوضون الايام الي خسروها. حاولوا هواي ان يقنعون والدي يوافق يشتغلون بهاي الفترة على الاقل لحد ما يقدر والدي يرجع التجارة ويوقف على رجلية لكن والدي رفض واخوتي ما ي**رون لوالدي كلمة بالحقيقة كلنا ما ن**ر لوالدي كلمة ولذلك اذعنوا ورجعوا للجامعات مالتهم ما بيدهم اي شئ. ضاع المحل وما بقى عدنة مص*ر رزق فظلينا ناكل بالفلوس الي والدي خازنيها وابوية ميحجي شيء بس ساكت ومهموم وقللنا مصاريفنا كلش بطلب من ابوية. كلما ابوعله اشوف نظرة الحزن بعينة ومشغول دائما باله اكيد يفكر شلون راح يرجع يوكف على رجليه من ثاني وورة فترة تحديدا بالعطلة جمع والدي امي واخوتي من كانوا بالبيت وصارت اللمة بدوني والفضول دفعني اتنصت عليهم. الكل كان خايف من نبرة ابوية الجدية وطبعا كان لابد من ان يجي هاليوم الي والدي يكعد هالكعدة الجدية ويفتح موضوع الفلوس مع العائلة بعدما يقيم الاوضاع لوحدة. كال ابوية والكل منتبه ومتنبه: -اليوم جبتكم احجي وياكم بموضوع الفلوس. اني مديون بمبلغ جبير. عادي وطبيعي التجار يتداينون حتى يشترون بضاعة واكيد يوفون الدين بعدا يبيعون البضاعة وعادة والدي ندري بي ما يداين مبالغ كبيرة لكن من كمل كلامه الكل ظل باهت مرعوب من المبلغ وهالشي ماكان صار بالوقت الماضي لكن هذا المبلغ مع وضعنا الجديد يعتبر جدا كبير. كمل والدي: -اني مديون 10 ملايين دينار ولازم اوفيهم باسرع وقت. لا مليون ولا مليونين لا ابوية مديون عشر ملايين. بهتوا اخوتي ولطمت عمي على ص*رها برعب وسألته: - شلون هيج انطلبت وعلى شنو واحنة حالتنه جانت كلش زينة؟ رد ابوية عليها هالمرة نبرته الجدية تلبسها الخجل: -الشغل صارلة فترة متدهور والسوق واكف وماركات جديدة دتخل السوق الناس تريد تغيير والمحل بدة شغلة يقل. الكل ساكت يسمع لابوية وهو يحجي شئ بالحالات الطبيعية ما كان شاركه ويانة وكان واضح عليه ان هو خجلان لان يتكلم عن مشاكله المالية ويانة وعمره ماسواها: -اتداين من تاجر صديقي اعرفة ويعرفني من ايام الطفولة وقبل ينطيني المبلغ حتى بلا ضمانات لان عندة ثقة بية ويعرفني. واشتريت البضاعة الاخيرة بالفلوس الي اتداينتها وجانت املي الاخير حتى ارجع المحل لسابق عهدة بس ... اتحشرج صوته وهو يكمل: -قدر الله وماشاء حصل. كلشي راح ومنين ما افكر بيها ما تضبط وياي. انصدمت امي ظلت ساكته من كبر الصدمة وتأثيرها عليها. يعني هسة رسميا احنة مفلسين ومديونين والحياة الي جنة عايشيها مستحيل ترجع ولازم ندبر امورنا بالي بقى عدنا ونترك كل شئ تعودنا عليه هالشي مو هين على امي ابد. بقت ساكته ما عبرت عن مشاعرها لان اي شي راح تقوله حيزيد من هم ابوية فالي صار مو بيده والي حيصير خارج عن ارادته. هو هم رجال كبير تبهذل تالي عمره. بعد هذا الاجتماع الدامي للقلب اني ظليت كلما انفرد ابوية وية امي لو وية واحد من اخوتي من يكونون متواجدين بالبيت اتنصت عليهم لان محد يريد يشاركني بالمصايب الي دتمر علينا. ورة يومين انفرد ابوية بامي وسمعتهم يتكلمون كلام عمرة ما خطر على بالي. ابوية قال: -يمكن لام نبيع هذا البيت ونشتري بيت اصغر احنة بيتنة كلش جبير بي حديقة داير مدايرة وكانها بستان صغير، وعدنة بالحديقة نخل واشجار نارنج ونبك ورمان وتينة وحدة جبيرة رغم هي متطلع تين والبيت طابقين وكل طابق بي 4 غرف وحمام كامل والصالة جبيرة كلش تكفي العزايم والحفلات الي تسويها العائلة وكراج سيارة ابوية واثاث البيت كله خشب اصلي مزخرف وزوالي ايرانية فاخرة والتحفيات امي مختارتها بايدها وبعض الامور تجينا من سفريات ابوية للدول من يروح يستورد وهواي هدايا ثمينة تجينا وبالمقابل احنة نودي هدايا ثمينة ايضا. يعني كل هذا اذا انباع البيت اكيد حيضيع جزء منه. امي كالت لابوية وهي بعد شوية وتبجي: - يمعود كول غيرها شنبيع بيتنا العايشين بي صارلنة عمر وشلون وين نروح؟ رد عليها ابوية وحاول يبين اصراره على الموضوع بس بطريقة هادئة حتى ما يأذيها اكثر ما هي متأذية: - نشوف النة بيت اصغر واحنة 5 نفرات والولد مو هنا اغلب السنة نشوفلنة بيت فد 100 متر وهنا نشوفة بنفس هاي المنطقة.. وبباقي الفلوس بلكي اقدر ابدي التجارة من جديد ونوكف على رجلنة مرة ثانية وراها نرتب حياتنا ونرجع اي شئ يضيع. امي اكيد تأثرت بكلام والدي وكانت تتمنى مايبيع البيت ولا يتصرف باي شي يخصة لان هي ظلت ترتب وتجمع بي عمرها كله بعدين هي متعلمة تستضيف ناسها وحبايبها وجيرانها وصديقاتها دائما بالبيت حفلاتها وقراياتها وتجمعاتها شلون يعني تقدر تغير نظامها الي عائت بي طول السنوات الي فاتت بين يوم وليلة صعب عليها. اكيد حسيت بامي ومرارتها وحياتها الى على وشك تتبدل وتنكلب راسا على عقب واني صغيرة رحت لغرفتي ابجي لان مابيدي اسوي شي حتى اعين امي وابوية بمحنتهم، وظليت ابجي واحجي وية رب العالمين:- -يارب لو خالقني ولد جان هسة وكفت وية ابوية بمحنته ورحت اشتغلت وجبتله فلوس. مستحيل اعوفة بهذا الوضع ومستحيل اشوف دمعة امي واصبر. طبعا تفكير طفلة صغيرة ساذجة اتصور ان بامكاني اطلع ابوية من الازمة مالته لو رحت واشتغلت كانما الفلوس الي راح اربحها من اي شغل اسوي راح تكفيني اني حتى تكفي عائلتي. ولو جنت بعمر اكبر جان شفت اخوتي الأكبر مني رغم كل المأساة اللي صارت وبعدهم يأخذون فلوسهم من ابوية الحاير باللكمة وهو الي منعهم يشتغلون خوفا عليهم وعلى مستقبلهم ولان متعود هو الي يتكفل بالعائلة وماراد هالشي يتغير على الاقل يحاول قدر استطاعته يحل من المشكلة بشكل يحفظ ماء وجه العائلة. وافقت امي مابيدها شئ وراحت هي وابوية يشوفون شخص يساعدهم يبيع البيت وكاموا ناس يومية يجون يشوفوا ويروحون. وسعره طبعا كلش غالي على هواي ناس ولذلك اغلب اللي اجو يشوفون البيت جانوا ميرجعون رغم المجاملات واعجابهم بالبيت ويكولون حلو وجبير ووراهة يروحون وبعد محد يسمع بيهم والرجال الي مسئول عن بيع البيت يكول لابوية السعر عالي لازم تنزلة وابوية مصر على السعر لحد ورة شهر ابوية استسلم وقرر ينزل السعر لان قربنة نخلص فلوسنة اللي خازنيها وشغلة ثانية الناس الي ابوية متداين منهم فلوس كاموا يطالبون بالفلوس وجان ماخذها عليها فائدة وهيج كملت السبحة. ورة ما نزلنة السعر كاموا يجون ناس اكثر من قبل بس هم يشوفون ويروحون وتعبنة كلش وكانت الحاجة و العوز واضحين على ابوية وحتى اكلنة صار مو مثل قبل؛ ولحم صرنة ناكل مرة بالاسبوع. كانت عطلة اخر السنة واخوتي رجعوا وابوية قرر يبدي يبيع باثاث البيت حتى نكدر ناكل، وهيج عرفنة كلنة واتاكدنة ان حالتنة ما اكو أي امل ترجع مثل قبل ابد ابد. واخوتي بدوا يدورون على شغل بس هم ما كانوا مرزوقين مثل ابوية وايدهم مترهم على أي شغله شما حاولوا يبطلون من اول يومين. اخر شي اخوية الجبير قرر يشتغل بمحل ميكانيكي سيارات وية أبو صديقة اللي انقهر علي ووافق يروح يعلمه الصنعه وينطي يوميتة كل يوم وراح اخوية وصبر الرجال كلش هواي على اخوية وحاول يعلمه الشغل؛ ولان اخوية بزر نستله ما تعلم على أي شغل واخر شي وبيوم من الأيام اجانة صانع الرجال الميكانيكي يركض وحالته حالة وكال اخوية وكع شيء ثقيل على رجلة وان**رت وجابوا للبيت وطبيب وتجبير وانخبصنة مرة ثانية وحالتنة انت**ت وامي انهارت بجي ليل ونهار دموعها ما فارقت خدها وابوية المسكين صار ميحجي الا للضرورة وكل وقتة يسبح ويقرة ادعية وقرر ينزل سعر البيت اكثر حتى ينباع لان بدينة نتداين مرة ثانية والوضع صار كلش موزين. وبنص كل هذا الوضع الموزين نمنة بالليل وكعدنة واذا ابوية وعلى وجهه ابتسامة يكول: -الحمد لله كلشي بامر الله راح يصير احسن اني واخوتي واحد ظل يباوع بوجه الثاني و اي شئ ما افتهمنه من كلام ابوية. بس سمعنة ابوية يكول : - البيت انباع وبالسعر اللي اني رايدة اول شي الحمد لله. والدين هم ان شاء الله يندفع وحتى ما مجبورين نطلع من البيت امي سألت ابوية وهي مصدومة بس صدمة فرح يعني: -شلون يعني حجي بس لا التليفون اللي اجاك البارحة هو اللي حل كلشي بس فهمني شلون حجي؟ الظاهر والدي استلم تليفون الليلة الي مضت وما قال لاي احد عن مضمون الاتصال لكن هو هذا الاتصال الي غر حياته. ظل طول الليل صاحي يفكر بالاتصال وحتى يقدر يقيم الوضع ويقرر على اساس نتيجة التقييم. الظاهر ابوية وصل لنتيجة راح يتخدم الجميع وتطلعنا من مشكلتنا ويوافق على العرض الي اجاه بالاتصال. ابوية جاوبها وعلى وجهه ابتسامة عريضة ويباوعلي بسعادة: -الله رزقنة ببنية وحدة و2 ولد وعلى ايدها انحلت كل مشاكلنه جنة دناكل ريوك واني جنت دا اشرب جاي وجان اسمع ابوية يمدح بية وطبعا فرحت كلش بس كلشي ما افتهمت وابوية ما وضح اكثر. على كل حال وضعنا تحسن هواي وابوية وامي صارت حالتهم احسن من الأول وحتى حالة اخوي الجبير تحسنت وورة أسبوع رجع بيتنة مثل الأول وابوية اجر محل بمنطقة الكاظمية وفتح مشروع بيع ملابس وحالتنة استقرت نوعا ما وشبح الفقر اختفى من بيتنا وراح الحزن واني زاد دلالي اكثر ورة ما انقذت العائلة حسب ما ابوية جان يكول بس ميقبل يحجي شلون حتى امي هم متدري شلون يعني محد يعرف اني باي قوة خارقة انقذت العائلة بس المهم اليّ يرجع الفضل براحة ابوية وعائلتي وهذا اهم شي عندي. بعد فترة انفردوا ابوية وامي واني طبعا مثل ما ذكرت من ينفردون اتصنت عليهم حتى اعرف شديصير بعائلتي. حطت امي الشاي بالحديقة وكانوا يسولفون والظاهر ابوية قرر ينقل لامي شلون تغيرت حياتنا وسمعت شهقت امي بالشاي وظلت تكول لابوية: - حجي شنو هذا الكلام؟ بنين طفلة شلون يعني تنطيها لحجي مغوار؟ ابوية شرحلها الموضوع: - شبي حجي مغوار من اكبر تجار البلد وفلوسة محد يكدر يحسبها واولاده كلهم خارج البلد وهو والحجية بالقصر مالتة والحجية حتى حجي متكدر تحجي... نايمة بالفراش وهو رجال ومن حقة يعيش حياته ويتزوج مرة ثانية والرجال ما يعيبة غير جيبة. لطمت امي كعادتها طبعا وردت على ابوية بحرقة: -انت تعرف حجي مغوار اكبر منك؟! يعني اضعاف عمرها ليش هيج نشمرها هالشمرة قابل زايدة علينة. بتنا الوحيدة ماعدنا غيرها ننطيها لرجال اكبر من ابوها؟ لا حجي هالمرة ما توفقت بقرارك لو سائلني قبل لا تنطي الرجال كلمة. ابوية انغث كلش من حجاية امي وصار عصبي يمكن لان يعرف كلامها صح بس بنفس الوقت هو فكر براحة الكل واعتبر زواجي من رجال كبير بالعمر لكن غني هو احسن ضمان لمستقبلي اضافة لكل الاشياء الي العائلة راح تحصلها من هذا الزواج.  صرخ بامي : -منين لعد جنتي تعزمين صديقاتك وتتكاشخين كدامهن لو مو اني موافق على زواج بنين وحجي مغوار؟ لو عبالج اني قاسي وانتي الطيبة؟ بنتي ما زايدة علية بس احنة ما قصرنا وياها بشي. ربيناها احسن تربية وما خلينا اي شئ بقلبها وطول عمرها عاشت مدللة تحصل كل الي تريده، وهسة اجة دورها حتى تدير بالها على أمها وابوها الكبار بشيبتهم وتتحمل لخاطرهم وبس ماريد نقاش بهذا الموضوع وحجي مغوار وافق يتزوجها وتظل يمة عايشة لحد ما يصير عمرها 16 وبعدين يتمم الزواج بس شرطه ان تروح تعيش يمهم حتى تداري الحجية وتدير بالها عليها تعرفين مريضة وماعدها احد. خطية تونسها وترعاها. كالت امي من جوة اسنونها وهي عصبية كلش بس ما بيدها شي تسوي: -يعني خدامة للحجية مرته؟ ما جاوبها ابوية شرب استكان الجاي وتلقائيا امي صبتلة واحد لاخ واني كاعدة اتنصت عليهم وكلشي ما فتهمت بس زواج واني وحجي مغوار اللي شايفته يمكن مرتين بحياتي... بس اعرف عنه تقريبا كلشي. وحجي مغوار رجال كبير بالسن يعني اني من كنت اصغر قبل 6 او 7 سنوات عبالي هو من عصر الديناصورات من كد ما جبير وبرغم عمره الكبير لكن هو رجل قوي جدا وشديد وملامحه سمرة ولحيته بيضة وعيونه حادة معروف عنه تاجر قديم وغني جدا وسمعته كلش زينة بين الناس ويهابوه ويحترموه بنفس الوقت. متزوج من حجية ف*نة وهي انسانة طيبة معروف عنها الاخلاق ومتدينة جدا خاتمة لكتاب الله وتصلي وحاجة بيت الله. وف*نة زوجة مغوار الوحيدة تزوجها على الاغلب بعمر الشباب وبقت وياه على الحلوة والمرة ويقال ان هو ما كان غني من تزوجها يعني كان رجل بسيط. مخلف منها 2 ولد و 2 بنات وكلهم اما متزوجين او مهاجرين تاركين ابوهم وامهم وحدهم. ومغوار عايش وحدة بالبيت العملاق الي يمكله اضافة الى املاك هواي بكل مكان. تزوج الحجية ف*نة برغبة أبو لان جانوا ولد عم وزواجهم مثل اي زواج تقليدي بين الاقارب. ودائما جان ابوية يحجي عنهم وشكد حجي مغوار شريف ومحترم ورغم ف*نة صارلها سنين وسنين مريضة مرض شلل ومتتحرك بس عيونها الا ان الحجي لا عافها ولا تزوج عليها ودائما اهتم بيها وبناتها قبل لا يتزوجون جانن يدارنها بس اخر بنية تزوجت قبل سنة وجان الحجي يجيب ممرضات بفلوس يدارنها.. ودائما ابوية جان يمدح بي من يوم اللي عرفة ويكول هو الوحيد اللي يبيع ارخص من السوك والجملة مالته ارخص شي وطبعا هو يشتغل بهواي شغلات مو شغلة وحدة وحتى يشتغل بتحويل العملات يعني مو مثل ابوية اذا يخسر شغلة يخسر كلشي لا مأمن مستقبلة. المهم اني ما استوعبت بوقتها يعني شنو المطلوب مني بالضبط وما جان عندي ردة فعل لهذا الزواج اللي سمعته من ابوية وامي بالتنصت ولحد الان ما كلولي علي بشكل رسمي يعني ... امي كضت اليوم كلة متنرفزة وحتى ما اكلت شي وحالة من الاكتئاب خيمت على البيت وابوية من يوم اللي اجر المحل خلة بي صانع فهواي وقت يقضي بالبيت خصوصا ورة انتكاسته الصحية الأخيرة. كاعدة جنت بالمرجوحة ومآخذة راحتي اتمرجح واخيل نفسي كأني ممثلة بفلم وعايشة اللحظة وما اشوف غير امي اجت كعدت بصفي على المرجوحة ووجهها ينطي الوان وبعيونها حجي هواي بس كلبها مينطيها تكولة لكن بالنهاية استجمعت كل قوتها وقالت الي بقلبها.