PROLOGUE
355 Words
Ubos na ubos na ako! Ibinigay ko na ang lahat sa’yo pero wala kang ginawa kundi saktan ako! Binalewala mo ang lahat!”
Sa gitna ng malawak na karagatan, kasabay ng matataas na alon ay ang mataas ding boses ni Delilah. Kasing lalim ng dagat ang kanyang nadaramang hinagpis na matagal niyang itinago. Sa unang pagkakataon, sa kanilang unang paglaot sa dagat, ibinuhos ni Delilah ang bigat ng kanyang nararamdam. Katulad ng mabibigat na patak ng ulan, bumagsak ang mga gaperlas na mga luha niya na mabilis ding naglaho dahil sa ulan. Halos hindi siya makahinga habang binibigkas ang mga salitang iyon.
“Magsalita ka!” bulyaw nito sa kanyang asawang basang-basa na rin. Umiiling lang ang kanyang kausap, ngunit mababakas din sa kanyang mukha ang lungkot at pagsisisi dahil sa kanyang mga nagawa sa kanyang asawa.
“Oo! Nagkamali ako, Delilah! Wala na akong maidadahilan pa. Alam kong marahil hindi mo na ako kayang patawarin pa. Pero h’wag mong iisiping hindi kita mahal,” sumbat ni Pepe. Tumayo siya at hinawakan ang mga kamay ni Delilah. Mabili naman itong binitiwan ng babae.
“Lintik na pagmamahal ‘yan! Pagmamahal na pwede sa lahat? ‘Yan ba ang pagmamahal na tinutukoy mo?! Asawa kita, Pepe. Hindi ka damit na pwede lang ipahiram sa lahat! Hindi ka pagkain na pwedeng tikman ng lahat!”
Tila mga kulog at kidlat ang mga salitang pinakawalan ni Delilah dahilan upang ma-pipi ang kanyang asawa.
“Alam mo, Pepe, hindi ka lang nagkamali ng isang beses, dalawa o tatlo. Baka nga tama ang sabi nila. Baka ikaw talaga ang mali. Ikaw ang maling tao para sa akin!”
Patuloy ang pagbuhos ng malakas ng ulan kasabay ng pagbuhos ng matinding emosyon mula sa mag-asawang nasa gitna pa rin ng karagatan at hindi alintana ang bagyong nararanasan nila.
Ilang beses na ring binagyo ang buhay ni Delilah dahil sa mga pinagdaanan niya kay Pepe.
“Pagod na ako, Pepe.
Nakakapagod din pa lang mahalin ka.
Ayaw ko na!”
Ito ang mga mapapait na salitang huling binitiwan ni Delilah bago ito tumalon sa dagat at tuluyang nilamon ng masungit na dagat.
- Writer
