من أجل حبي

الجزء الثالث

ريم بعصبيه : يحرق الي يحرقه انا مش هتجوز العريس ده سواء كده او كده انا النار هتحرقني فا مش هتفرق المهم مش هعمل الي هما عايزينه .

سلمي : ماتفكريش في نفسك بس يا ريم فكري في اخواتك وخصوصا عبد الرحمن هيبقي قاتل وانتي هتكوني السبب ده مش كافي انك ترجعي عن الي في دماغك.

ريم : ياريت تفكري فيا شويه يا سلمي زي ما بتفكري في اخويا بس .

ودخلت عليهم فريدة هانم : يابنات بتعملو ايه .

وقفت ريم وسلمي : ريم ولا حاجه يا امي كنا بندردش بس يا ماما .

فريدة : امال كنتو بتتكلمو بصوت مش مسموع ليه كده .

سلمي : كنا بنتكلم عن الي هنلبسه بكره في الخطوبه.

يلا هسيبكم انا واروح الفندق.

فريدة : الناس هتيجي بكره بليل يابنتي ابدأي جهزي نفسك.

ريم : ماشي ياماما هبدا دلوقتي .

فريدة : سابتها وطلعت لكم قلقانه من جواها .

الحسن راح يفتح الورشه ومعاه محمود وعنود كانت ورشه كبيره اوووي كلها مكن وترابيزات .

تليفون محمود رن برساله تانيه من ريم : أمي م**مه المره دي علي الجواز ة دي يا محمود مش هتتنازل عن الخطوبه احنا لازم نتقابل بسرعه .

محمود بعت رساله : ياروحي وانا كمان عايز اكون جنبك لكن دلوقتي مع بابا مش عارف اتكلم هتصل بيكي بعد مانخلص .

حسن : حزين علي شكل الورشه الي فات علي قفلها عشرين سنه من يوم ما اتسجن ما اتفتحش ازي قاسم ما اهتمش بيها هو كمان .

عنود : والله يابابا كل الي كان بيعمله انه بيبعت فلوس يعني كتر خيره لكن الورشه ما اهتمش بيها واحنا محدش بيفهم في المجال ده .

حسن : مش مشكله ياولاد الي حصل حصل بقي احنا هنبدأ من جديد نوضب المكان ونصلح المكن تاني ونشتغل طالما مع بعض ايد واحده هنرجع احسن من الاول .

محمود وعنود : اكيد يا بابا طبعا ايد واحده .

نزل حسن وولاده السوق وكل أصحاب المحلات والورش عارفينه وفضلو يسلمو عليه ويرحبو بيه وكل كان مستغرب من حاله وازي وصل لكده وهو كان راجل زي الجبل ما يهزه الريح ولكن عشرين سنه من عمر وصحه وحبسه تهد اجدع جبل .

وصل حسن ومحمود وعنود لكافيه كان زمان قهوه قبل ما يتحبس لكن بقي كافيه شيك اوي وعلي اعلي مستوي قعدو هما التلاته وطلبو حلويات وقهوه وقعدو سوا يفتكرو لما كان بياخدهم وهما صغيرين يقعدهم في نفس المكان وبعد ماخلصو كلام واكل وشرب قامو مشيو وراحو يقعدو في مكان تاني لسه علي حاله من عشرين سنه قهوه بلدي كان بيحب يقعد فيها مع صحابه لكن عنود سابتهم وراحت تشوف الي وراها هي بتدرب عشان تقدر تمارس مهنتها كطبيبه أسنان.

دخل محمود وحسن القهوه وكل العمال جم يرحبو بيه ويسلمو عليه ويقوله له حمدالله علي سلامه الخروج . لكن في تربيزه في آخر القهوه قاعد فيها خليل اخو فريده مرات عزام وابنه قاعدين بيلعبو دومينو.

عبد الرحمن بيرفع كوبايه الشاي من علي الترابيزه وبيشرب منها ويرفع عينيه يشوف الحسن ومحمود قدامه لكن محبش يلفت الانظار لي وفضل ساكت كأنه شخص عادي .

خليل : حمدالله علي السلامه ياعم حسن .

الحسن : الله يسلمك يا بني .واختار ترابيزه في نص القهوه وسحب الكرسي اعد ومحمود قدامه .

عبد الرحمن مش طايق نفسه ولا طايق خاله عشان اتكلم معاه وفضل باصص علي حسن .

حسن ومحمود طلبو من القهوجي شاي .

عبد الرحمن مكنش متأكد اذا كان هو فعلا ولا لا شكله اتغير عن زمان وسال خاله هل هو ده الحسن الي قتل ابوه .

خليل : اه يابن اختي هو ده حسن الي قتل ابوك.

حسن : تلعب طوله يا محمود .

محمود بابتسامه : نلعب يا حج وماله وطلب الطاوله من الصبي الي في القهوه .

الحسن : هنخلص وبعدين نعدي علي عمك قاسم .

محمود اتوتر وقاله لا يابابا عدي انت عليه انا مواعد واحد صحبي وهروحله معلش.

حسن: خلاص يابني ماشي انت خد راحتك هروح لوحدي .

اما عند عنود فاراحت للمستشفي الي بتدرب فيها كانت مستشفي شيك اوي وكبيره مبني ضخم مكون من خمس أدوار بمساحة كبيره جدا فيها كل التخصصات . عنود داخله من البوابه بتاعه الدخول الرئيسي لا بسه بنطلون جينز كحلي وبلوزه بيج بكم وشوز وشنطه بيج وسايبه شعرها علي كتفها طويل لايق عليها انها تكون دكتوره فعلا داخله مبتسمه ومتفائله اليوم مميز غير اي يوم لان باباها موجود خلاص .

كان في مؤتمر في المستشفي وكان من ضمن اللجنه نادر عزام .

عدت عنود وطلعت علي العياده بتاعتها فوق .

نادر كان بيتكرم من لجنه الآثار لانه كان عامل جدار المستشفي علي شكل مدينه اثريه وكأنه متحف مش مجرد سور ورئيسة اللجنه بتسلمه درع من الدهب الخالص من هيئه الاثار .

اما في القهوه كان عبد الرحمن يستشيط غضبا انه شايف قدامه الحسن وابنه قاعدين ومبسوطين وهو اتحرم من ابوه بسببه قام وكله غضب وحاول يجر شكلهم وشاط الكرسي برجله .

الحسن : خد بالك وانت ماشي يابني ابقي ركز .

رجع عبد الرحمن : انت بتكلمني انا يا راجل انت .

الحسن : اه بكلمك انت خد بالك وانت ماشي .

عبد الرحمن : انت قولت يا بني صح.

الحسن : بقولك ايه الزم حدك واعرف انت بتتعامل مع مين وماتخلنيش ازعلك وانت عيل اد ولادي احترم نفسك وخد بعضك وامشي .

مشي عبد الرحمن بعد ما الناس اتلمت وخليل اخده وطلع بره المكان خالص .

حسن بيسأل محمود : مين الولد ده تعرفه .

محمود: لا والله يابابا معرفهوش .

الحسن: امال ليه عمل كده فكرته يعرفك وفي بينكم حاجه.

محمود : لا يابابا انا مش بعمل مشاكل بيني وبين حد تلاقيه واحد عايز يعمل اي مشكله وخلاص مع أي حد .

الحسن باستغراب : بس هو كان ماشي مع خليل صح.

محمود بتأكيد : اه يابابا .

الحسن : اه انا كده فهمت ولو الي في دماغي صح وده حصل من اول يوم ليا بره السجن يبقي احنا ورانا شغل كتير .

في المستشفي كانت عنود بتشتغل بايديها لأول مره عشان تقدر تاخد شهاده مزاوله مهنه وكان نادر بيمشي في المستشفي لمحها من بعيد وقف يتف*ج عليها سارح في ملامحها فضل واقف لحد ماخلصت الامتحان الي كان هيحدد مستقبلها .

وهي خارجه من الاوضه لقت نادر قدامها اتلغبط وقالها انا اسف بس كنت معدي من هنا سمعت صوت الفضول خدني اني اعرف ايه الي بيحصل خصوصا ان الباب كان مفتوح انا اسف .

عنود : لا ولا يهمك ده كان اختبار اخير عشان اقدر اخد شهاده واقدر اشتغل رسمي كدكتوره والحمدالله نجحت وهستلم الشهاده كمان كام يوم وشك حلو.

فضل نادر يتكلم مع عنود كتير هي عن الطب والاسنان وهو عن الاثار والمتاحف وجاله تليفون وقام عشان يرد بعيد عن عنود وكان خليل هو المتصل وحكاله عن الي حصل في القهوه وخلصت المكالمه وبيبص وراه يدور علي عنود كانت مشيت .

اما محمود وريم اتقابلو في جنينه كبيره واسعه كلها شجر وورد اول ما ريم شافت محمود اترمت في حضنه وفضلت تعيط وهو فضل حاضنها جامد لحد ماطلعت من حضنه ومسكت ايديه وبدأت تجمع كلامها.

ريم : أمي المره دي م**مه ومصره جدا علي العريس ده يا محمود انا مش عارفه اعمل ايه هيعملو خطوبه وهيجوزوني راجل لا انا اعرفه ولا انا عايزاه.

محمود : لا طبعا مش هيحصل مش هسيبك لحد انا انتي ليا وبس يا ريم انا محبتش في حياتي غيرك لا يمكن تكوني لغيري اصلا مش هقدر اتخيل .

ريم بدموع : طيب عندنا حل تاني يا محمود ومعملنهوش هنعمل ايه هاه هنعمل ايه في عيلتي وعيلتك انت يعني ماتعرفش ان لو انا لبست الدبله دي مستحيل هتطلع من ايدي تاني .

محمود كان حاطط ايديه علي خدودها محاوط وشها بايديه ولما سمع الكلام ده زعل ونزل ايديه من علي خدها وهي فضلت تعيط ورفعت ايديها وخلعت سلسله كان محمود جايبهالها وحطتها في ايديه وهي دموعها مغرقه وشها .. وقالتله ماتنسانيش ممكن وسابته ومشيت .