الجريمه

نصيحة امي

وفي يوم وليلة بفيت عشيقة لجوزي

ورجعته ليا بطريقة سحرية والبركة كانت في نصيحة امي ليا

تعالوا معايا اسمعوا حكايتي والحكم ليكم في النهاية

انا سلوى سنة 30 متجوزة من 8 سنة

اتعرفت علي حسن جوزي في الجامعة وكان بينا قصة حب ولا روميو وچليت ، حسن مصري بس من ام إيطاليا ، وهو واخد كتير من أمه الصراحة وسيم جدا و رشيق ورياضي ،

متعرفوش فرحتي كانت ازاي لما اعترفلي بحبه يومها كنت طايرة من على الارض ،

،ااه طبعا ، متعرفوش البنات كانت بتتمني قربه ازاي او حتى يتكلموا معه ، من وسامته و شياكته و، مش قادرة اقولكم لما طلب ايدي للجواز انا كانت حالتي ايه كنت حاسة اني هيغمي عليا، من شدة الفرح

حسن كان مكافح وطموح جدا ،

وانا عشان بحبه ، وقفت جانبه و ومردتش اقوله مهر وشبكة وقايمة وخلافة ، مع ان ماما كانت رافضة الكلام ده وقالت ده حقوق يابنتي ولازم احافظ علي حقك ، اللي بيجي سهل بيروح سهل ، والراجل لو متعبشي في تكون بيته ، هيكون سهل عليه أن يهدمه ،

بس انا كنت مصرة ومتمسكة به كان وقتها بابا متوفى بقاله سنة وسايبلي مراثي ، اااه هو مش كتير بس وقتها ساعدت به حسن وعملنا مشروع ، وكان عبارة عن مطعم صغير ، وشقتي اللي اتجوزت فيها كانت ايجار جديد ، وجبت عفش عادي جدا ، ومعملتش فرح ولا شهر عسل وكل ده عشان خاطر نوفر الفلوس للمشروع يومها كنت بقول ، ان العفش والشقه والشبكة كله ده هتتعوض ، باارباح المشروع ، ومرت الأيام والسنين وكنت بشتغل مع حسن في المطعم ، كنت بطبخ وانضف وحسن يقدم الطلبات ، ومرت 5 سنين علي المشروع ، والمطعم الصغير بقي سلسلة مطاعم ،

وبقي في شيفات وجرسونات وعمال نظافة في كل مطعم ، لحد ما جالي حسن في يوم وقالى كفاية عليكي شغل لحد كده ، حقك تستريحي بقي ، وتجبلنا بيبي بقي ، يومها فرحت وقولت جوزي وحبيبي وخايف عليا ، اومال اية دماغي مارحتش لاي حاجة تاني ، ولاني بحبه كالعادة كانت كلمة حاضر اللي الرد الاسرع ،

بس اللي حصل كان بالنسبة ليا صدمة عمري ،حسن بقي طول النهار مشغول ، و مابقتش اشوفه ،

طبعا الحوار ده معجبنيش ، معقول بعد ماكنت معاه علي طول ليل نهار يبعد عنى كده مبقتش اعرف عنه اي حاجة ، حتي الاكل مبقناش نتجمع عليه ،كل يوم احضر الغدا والعشى ، لكن لا غدي يجي ، ولا عشي يتعشي مرة يقولي اكلت حاجة خفيفة وتعبان وداخل انام ، ومرة يقولي ماليش نفس و تصبحي علي خير، وانا اتخانق وازعق ، مكنتش بعمل حاجة غير انى بتخانق معاه ، ياما اقعد اكلم نفسي بقي واض*ب اخماس في اسداس ، اقوله يا حسن هو انا مش بوحشك زي ماانت بتوحشني ،يقولي ياااه يا سلوى انتي فاضية وبتدلعي ، يااما تنكدي عليا ، وانا مش فاضي ، عن اذنك ،.وسيبني ويدخل ينام ، انا وصلت لدرجة اني كنت بمسك البوم الصور ومش مصدقة احنا وصلنا لدرجة ده امتي وازاي ، وامتي دخل بيتنا الملل والزهق كده ، امتي بقيت نكدية زي مابيقول ، وفضل بينا الحال على نفس المنوال ، بس زهقت ، واشتقت لايامنا الحلوة زي زمان ، ايام ما كان كل حاجة مقسومة بينا ،

المفروض ان ايام التعب خلاص ،والمفروض تجي ايام الراحة والانتعاش بقي ،ونجني ثمار التعب والشقى ،

لكن اللي حصل غير كده ،حسن انشغل زيادة وكل ما اساله يقولي يا سلوى انا طول النهار بلف على المطاعم مينفعش اسيب تعبنا كدا ، المال السايب يعلم السرقة ، اقوله طب خودني معاك نتغدي في اي مطعم فيهم ، وارجع معاك بالليل ، بس هو كان بيرفض ، لاني بصراحة كنت بغير عليه جامد ، حسن جميل بطبعه

ورقيق ، ومشعره مرهفة اوي ، وكنت كل ماشوف واحده بتقرب منه اتخانق،

روحت زعقت وقولتله ماهي ده مش عيشة الصراحة ،، أنا لا بقيت بشوفك ولا انت عايش معايا اصلا ، انا اوقات بحس انك غريب عني

ان كان علي ساعتين اللي بتنام فيها ، تقدر تنامهم برا عشان تبقي بجملت ،

يومها سابني ومشي واللي حصل انه بعد اكتر وبقي يتعمد يدخل البيت متأخر اكون نمت وينزل بدري قبل ما اصحي ،

مابقتش اشوفه اصلا كانه ماصدق ، وفعلا بقي يبات برا كمان ، وكل ما اجي اتكلم ، يقولى جري ايه يا سلوى انتي ايه مبتزهقيش ، مش ده كان طلبك ، اديني نفذته ،

قولتله نعم قصدك اية بطلبي ده

انت هتهزر يا حسن ولا ايه ،

انا ماينفعنيش الكلام ده انا ريحة بيت ماما ، لحد ماتعرف قيمة الست اللي معاك ، قالي بسلامة انا زهقت منك وكن نكدك ،

وفعلا سيبت البيت ، ورجعت بيت ماما ، يوم اتنين عشر شهر ست شهور ، لكن لا حسن بيسال ولا بيتكلم ، ماما قالتلي ، يا سلوى الراجل مبيحبش الست النكدية ، الست اللي تفضل تستجوبه ، واللي اول مايدخل تقبله بزعيق ، جوزك قضى نص عمره في إيطاليا ،وعادته غير عادتنا، وبصراحة مش عجبني طريقتك مع جوزك

يابنتي الست الشاطرة هي اللي تحتوي جوزها ، مش اللي تخانقوا و تزهقوا وتخليه يكره بيته ، ياسلوي شوفي ايه اللي ناقص في حياتكم وكمليه ، مش تدوري علي اللي تعبك ونقصك انتي وتشتكي بيه ،

الرجل بيحب ياخد حيز من الاهتمام ، سوء في بيته أو في قلب مراته ،

والست الناصحة ، هي اللي تشوف نفسها في الجزء الناقص لاكتمال جوزها ، وتديله الحيز الأكبر من اهتمامها ،

لازم انت تكون الجزء الناقص فيه ، بدل ما يدور على يكتمل بها في حته تانيه ،

من الاخر كدا ابنتي ، الست بتكون زي السفنجة ، للجوزها تمتص تعبه وارهاقه وغضبه ، في الحر تكون له تكيف ، وفي الشتاء تكون دفاية ،

مش عيب انك تفكري وتفنني انك ازي ترجعي جوزك لحضنك ، لا هو بالخناق ولا بصوت العالي ،

ولا سيبانك البيت ، ده مش ذكاء

وانا مربطكيش علي كدا ،

أظنك عمرك لا شوف*نى أنا وباباكى بنتخانق ،ولا في يوم شف*ني سايبة بيتي ، لان طول عمري انا الجزء الناقص في حياة ابوكي ، ويومه مكانش بيكمل غير بوجودي انا وبس،

بصي ياسلوي ، جوزك وسيم ولبق ، وماشاء الله مشروعكم نجح واكيد بقي ميسور الحال ، و معندكوش لا عيل ولا غيره ، يعني حياته معاكي فاضيه إنما برا الله اعلم ممكن جدا حد تاني يملاها ، روحي بيتك وشوفي ايه ورا جوزك بس من غير مطاردة ، الراجل مايحبش الست اللى بتفتش وراه استخدمي ،عقلك يا سلوى وذكاء الست ،

بصراحة قعدت افكر في كلام امي ،

مع اني كنت الاول واخدها علي كرمتي اوي ، واني ازاي اتحايل على حب جوزي ليا ،

واتفنن في اني اخليه يفضل يحبني ، ده هو المفروض اللي يعمل كده ، انا مراته انا اللي ضحيت بعمري معاه ، انا اللي اتنزلت عن كل احتياجاتي ، انا اللي نسيت اجمل ايامي ونسيت اتمتع بشبابي عشان ابني معاه مستقبلنا ، يقوم بعد ده كله ، اهون ليه ، لقيت صوت امي بيرن في دماغي ،

الست الذكية هي اللي تخلي جوزها يحب البيت ، مش يهرب منه ،

كلام ماما غير نمط تفكيري ،

لجهة تانية خالص ، وبعد تفكير عميق اخدت قرار ،

وصحيت الصبح ورجعت بيتي ،بس الغريب ان البيت زي ما سيبته تقريبا يعني حتى مكانش بيرجع البيت اصلا ، يا ترى وراك ايه يا حسن ،

اتصلت به ، رد عليا ،خير يا هانم ،

كلمته بدلع ونحنحة كده وقولتله ، علي فكرة وحشتني ،

رد عليا بجمود بامارة ايه ، سيبناك البيت بقالك اكتر من ست شهور ،

قولتله برده بنفس النغمة ، بامارة اني رجعت البيت ، ومستنياك لأنك وحشتني ، ممكن تجبلنا غداء من بارت النهارده وترجع بدري ، لاني كتير اشتقتلك حبيبي ،

ضحك علي خفة دمي وقالي ماشي ،

علي يا سلوى انا بحبك وحشتيني ،جدا ، بس مشكلتك ل**نك ده ،

ضحكت وقولتله خلاص بقى ،سماح يا سيادة القاضي ، ضحك وقفل السكة،وفعلا رجع بدري وجبلي الغدي ، وحضرته ،واقعدنا وصلحته ، ونام في امان الله ،

اخدت موبايله وفتشت فيه ، ولقيت اللي مايخطر علي بال حد ، الاستاذ مقضيها والدنيا هايصة معاه ، طبعا ماهو لا ضابط ولا رابط ولا ست تمسك زمامه ، ماشي يابن الايطاليه ، هتشوف راح تعمل فيك ايه المصرية ، ان ما كانت تلففك كعب داير ، وتجيبك زاحف على بوزك ، مابقاش انا سلوى بنت ريهام المصرية ،

اخدت كل ارقام الستات اللي بيكلمها ،

وحفظتها عندي ،

ورحت عملت برنامج اقدر اشوف من خلاله جميع الرسائل واسمع المكالمات كمان ، واعرف هو نازل يقابل مين وفين ، كان بيجيب هدايا كنت ابدلها بحاجات عجيبه ،

حسن كان شيك وانيق كدا في نفسه ،بس كان عنده حاسة الشم بعافيه شوية اااه من الناس اللي مش بتشم عشان كدا مامته كانت دايما هي اللي بتختار برفانات وتبعتها له من إيطاليا ، ولما اتجوزنا كنت انا اللي بختاره برفانات ، وكان دايما شايل معاه ازازة برفان في عربيته ويحط منها قبل ما نزل من العربية مش بقولكم ابن ايطاليا، استغليت انا النقطة ده ، روحت جبت مادة من العطار

ريحتها وحشة اوى وحقنتها في ازازه البرفان ،وفي نفس الوقت تخليه يهرش،

، وياعيني عليه اول ما يوصل ولسه هيقعد ويحب في السنورة ، يفضل يهرش ده غير الريحة الكريهة اللي الكل يشمها منه ويشمئز منها ، وياقلبي كان بيسمع كلام ي**ف من كل واحدة يقبلها ، يجرح قلبه الكيوت ، حسن اتعقد وبقي يقول لمامته تبعتله انواع تانية من برا ، وانا برده اغيرها بنفس الريحة ، لحد ما البنات طفشوا منه ،وبقي وحيد يا عيني ،

وبكذا نجح الجزء الأول من الخطة ، وهربوا الصبايا من حولين جوزي جوزي ابو عيون حلوين ،

وحسن بقي كئيب ، ومبقاش يحب يسهر برا البيت ،

بس انا مسكتش لحد هنا ،

لا لسه في باقي الخطة ،

في الوقت ده اشتريت خط جديد وموبايل جديد ،

وابتديت اشتغل حسن ،

وفعلا في الفترة ده كان محتاج حد يرفع معنوياته ، طبعا كلكم هتسالو انتي ليه ما استغلت الفرصة ده ليه ، هقولكم كان ليا غرض وهو اني اديله درس ،يطلع من نفوخه،

المهم شغلت حسن بريم اللي هي في الاساس انا ، .

اشتريت عدسات ملونة ، ولبست بوركة وغيرت شكلي 180% درجة، وكنت بكلمه فيديو ، وطبعا كنت برحتي ده جوزي بقي ،

ووقع فيها بطريقة ، لحد مابقاش يقدر يستغني عني ، طلب مني الجواز ،

طلبت بقي شبكة غالية جدا والمهر مبلغ محترم ، وشقة تمليك ، والحلو نفذ كل طلباتي ، وكنت بخرج كل يوم معاه ،ولا كان بيحس اني انا مراته ، يدوب يقولي غريبة انك فيكي شبه من مراتي بس انتي فين وهي فين ،

هي علي طول مبوظة ، وصوتها عالي ،وتتشاكل ،

كنت بسمع وانا متغاظة ، بس مش عايزة اقولكم اني اتفسحت معاه ، وشفت الدنيا ،

وأخذت هدايا كتير منه كنت كل مااخرج اقف قدام محل مجوهرات ،

ويجيب لي هدايا ،

لحد ما جه يوم الجواز اللي طبعا حسن قالي هيكون عرفي وانا طبعا وافقت ، كنت فرشت شقتي احسن فرش ، واخدت مهري وحطيته في البنك ، وشبكتي سوليتير ، وجه يوم كتب الكتاب ،

حسن لابس ومتشيك ونزل ،.وانا نزلت ورحت انا السنتر وبقيت اجمل عروسة ورحت رايحة شقتنا الجديدة ، وانا لبسة الشبكة وفستان الفرح وحسن اول ماشافني مباقش مصدق نفسه ، وقالي اخيرا بقيتي ليا ، ردت عليه بكل هدوء وبصه في عينه اللي عايزة رصاصة ، بكل حب قولتله انا طول عمري ليك بس انت اللي مش حاسس ، قالي ازاي مش فاهمك ، .قلت له لانك حبيبي وجوزي ياقلبي انا سلوى يا عنيا سلوى ميراتك ،

ورحت قلعت العدسة والب**كة قولته اية فرقت كتير ، زي ما انا ما نقصت حاجة ، بس انت ماكنتش عايز تشوفني بنفس العين اللي شوفت بها ريم ، لان الشيطان ديما بيزين الحرام

حسن كان هيتجنن ،وفضل يضحك يضحك ، ويقولي يامجنونة ،

قولتله اه مجنونة بحبك يا ابو عين زايغة ، يومها قالي ، انا كنت بدور عليكي في كل واحدة اقبلها، وكنت هتجوز ريم ده بزات عشان شبك بس من غير عيوبك ، انا عايز سلوي وريم ،ينفع تعملي ده ،

ضحكت وقولتله المصرية تقدر تعملي اللي مايخطر على بالك

وعشت مع حسن اجمل ايام حياتي بعد ماغيرت من نفسي عشانه ، وبقيت انا الجزء الناقص فيه اللي ماحدش يعرف يكمله غيري

، عايزة اقولكم ان حسن من يومها تاب وصلى بقي يخاف ربنا ، ومبقاش محتاج يعرف ست غيري ،

لاني انا بقيت كل الستات في عيونه ،بقي بيحب يرجع البيت بدري وعرف ان الحب الحقيقي هو اللي يفرق في العلاقة ،

انما الشكل والمظهر ده سهل يتغير ، وربنا رزقني بنوته اسمها قمر أصلها طلعت حلوة لباباها ، وحسن بيحبها اوى و مبقاش يقدر يستغني عني ،ولا عنا ،

حسن عرف الحب الحقيقي أنه أخذ وعطاء وان مينفعش حد ياخد على طول واحد يدي على طول ،

زي ما الست لها دور برده الرجل عليه دور

كل واحد فينا له حقوق وعليه واجبات

قبل ما طالب بحقوقك اعمل وجباتك،

أساس أي علاقة سليمة هي التفاهم

والبركة كانت في نصيحة امي ،

هنا خلصت حكايتي ،

وعايزة اقول لكل زوجة ولكل بنوته اوعي تقولي خلاص انا اتجوزت و تهملي في نفسك ، افضلي ديما متالقة وذات رونق منفرد ، ونكهة خاصة ، لجوزك ،

واحب اقول لكل راجل ، الست هي الست في كل حالتها بس الفرق ، ان في ست جوزها اهتم بيها فبقت مالكة له ،

وفي ست جوزها أهملها ، فاهملت نفسها واهملته ،