Prologue

Walang ibang pangarap na gustong makasama habang buhay si Gino Hernandez kundi ang nag-iisang babaeng nagpatibok ng kaniyang puso. Si Abigail Gutierrez. Ang babaeng kayang pahintuin ang kaniyang mundo. Ang babaeng nagbibigay sa kaniya ng inspirasyon. Ang babaeng simula first year highschool ay minahal na niya. Ang babaeng pangarap niyang makasama habang buhay.
Hindi naman siya binigo ng kaniyang dedikasyon at pagpupursige na makuha ang pangarap niyang ito. Ang makamit ang pinakamagandang sagot mula sa pinaka-magandang babae sa kaniyang mga mata.
Pagkatapos niyang mabayaran ang kotse at bahay, bumalik mula sa tinatrabahuang cruise ship si Gino upang ligawan si Abi na nang mga panahon na iyon ay wasak dahil sa kakatapos lang ng malungkot na yugto ng buhay nito. Nakipaghiwalay kasi ang kasintahan niyang halos limang taon ang kaniyang pinagsamahan na si James.
Pagkalipas lang ng tatlong buwan ng pagsusuyo at panliligaw sa dalaga ay sinagot na rin naman siya nito. Dahil sa sobrang mahal na mahal niya si Abi, nagpropose kaagad siya rito, at mabilis ang mga naging pangyayari. Sa taong din iyon ay kinasal silang dal'wa.
Nakamit na ni Gino ang nag-iisa n iyang pangarap. Ngunit ang tanong, masaya ba siya? Masaya ba silang dal'wa? Mahal pa ba nila ang isa't isa? Kung si Gino ang tatanungin, hindi naman nagbago ang pagtingin niya sa kaniyang asawa. Mahal na niya ito mula pa no'ng first year highschool pa lang sila, at magpasaminutong ito, wala siyang ibang minahal kundi siya.
Ano nga ba ang nangyari sa dalawa, at papaanong naging Battered Husband, si Gino?