# هوس البنوت

هوس البنوت 3

Attrife:

#هــــوس_البنــــوت_3

ﻧﺎﻧﺎ ﻧﺰﻟﺖ ﻣﻦ ﺍﻟﻤﻮﺍﺻﻼﺕ ﻭﻫﻲ ﻛﺌﻴﺒﻪ ﻭﻣﺎﺭﺿﻴﺎﻧﺔ ﻋﻦ ﻧﻔﺴﻬﺎ . ﻭﺯﻋﻼﻧﻪ ﻋﻠﻲ ﺍﻣﻬﺎ ﺍﻟﻤﺨﺪﻭﻋﻪ ﻓﻴﻬﺎ .. ﻭﻓﻀﻠﺖ ﻣﺎﺷﻪ ﻭﻓﻜﺮﺕ ﺗﻐﺸﻲ ﺑﻮﺗﻴﻚ ﻋﻤﺮ ﺗﺸﻴﻞ ﺣﺎﺟﻪ .. ﻭﺑﻘﺖ ﺗﺘﻜﻠﻢ ﻣﻊ ﻧﻔﺴﻬﺎ ﺑﺴﺮﻫﺎ ... ‏( ﻟﻴﻪ ﻳﺎﻧﺎﻧﺎ ﻣﺎﺑﺘﻌﻘﻠﻲ .. ﻳﻌﻨﻲ ﻳﺎﻧﺎﻧﺎ ﻋﺎﺟﺒﻚ ﻭﺿﻌﻚ ﺩﺓ ﻭﺍﻟﺒﺘﺴﻮﻳﻬﻮ ﺩﺓ ﻧﻬﺎﻳﺘﻮ ﻭﻳﻦ .. ﺧﻴﻼﻧﻚ ﻛﻞ ﻭﺍﺣﺪ ﻣﺮﺗﻮ ﺯﻱ ﺷﻴﻄﺎﻥ ﻣﻜﺔ ﺍﻟﻌﺎﻳﺰ ﺭﺟﻢ ... ﻭﺍﻋﻤﺎﻣﻲ ﺑﺠﻮﻧﺎ ﻣﻦ ﺍﻟﻘﻀﺎﺭﻑ ﻋﺎﻳﺰﻳﻦ ﻟﻨﻔﺴﻬﻢ ... ﻭﺍﺧﻮﺍﺗﻲ ﻛﻞ ﻭﺣﺪﺓ ﺳﺪﺕ ﺍﺿﺎﻧﺎ ﺑﻄﻴﻨﺔ ﻭﺷﺎﻟﺖ ﻳﺪﻫﺎ ﺑﺠﻮ ﺑﺠﻨﺎﻳﺘﻢ ﺧﺮﺍﺏ ﻓﻲ ﺧﺮﺍﺏ ﻛﻴﺲ ﺳﻜﺮ ﻣﺎﺷﺎﻳﻠﻨﻮ ... ﺍﺍﺍﺍﻩ ﻳﺎﻧﺎﻧﺎ ﺍﻧﺘﻲ ﺭﺑﻨﺎ ﻏﻀﺒﺎﻥ ﻋﻠﻴﻜﻲ .. ﻭﺩﻣﻮﻋﺎ ﻧﺎﺯﻟﻪ ﺯﻱ ﺍﻟﻼﺯﻭﺭﺩﻱ .... ‏)

ﻃﺒﻌﺎ ﻧﻔﺲ ﺍﻟﺸﻠﻪ ﻗﺎﻋﺪﺓ ﻓﻲ ﻧﻔﺲ ﺍﻟﻤﺼﻄﺒﻪ ﻭﺍﻟﻐﺎﺯ ﻭﺭﺍﻧﺪﻭﻕ ﻭﻣﺼﻄﻠﺤﺎﺕ ﻣﺸﻐﻠﺒﻪ ...

ﻛﺎﻧﻮ ﺍﺭﺑﻌﻪ ﺍﻭﻻﺩ .... ﻭﺍﻟﻴﻼ ﺷﻜﻠﻬﻢ ﻧﺎﻗﺼﻴﻦ ﺍﻟﻌﺪﺩ .. ﻻﺷﻐﻞ ﻻﻗﺮﺍﻳﻪ ﻻ ﻧﻔﻴﺮ ﻻﻓﻌﻞ ﺧﻴﺮ ...

ﺧﻮﺟﻠﻲ : ﺍﺳﻤﻊ ﻳﺎﻫﺎﻧﻲ ﺩﻱ ﻣﺶ ﻧﺎﻧﺎ ﺍﻟﺪﺍﻧﺎ .?

ﻫﺎﻧﻲ : ﺍﺍﺍﻱ ﻳﺎﺍﺍﻫﺎ . ﻧﺎﻧﺎ ﺍﻟﺸﻄﻄﻄﻪ . ﺍﻧﺖ ﻳﺎﺧﻮﺟﻠﻲ ﺍﻟﺤﻠﻪ ﺍﻟﻜﺪﺓ ﺩﻱ ﻭﺍﻟﺠﻤﺒﻬﺎ ﺩﻱ ﻣﺶ ﺍﺳﻤﻬﺎ ﺣﻲ ﻓﺮﻧﺴﺎ ﻭﺑﺎﺭﻳﺲ ...

ﺧﻮﺟﻠﻲ : ﺍﻟﻠﻪ ﻳﺨﺞ ﺑﻄﻨﻚ ﻳﺎﻫﺎﻧﻲ ﺍﻭﻉ ﺗﻘﻮﻝ ﻛﺪﺓ ﺩﻱ ﺣﻠﺘﻨﺎ . ﺍﻧﺖ ﺯﺍﺗﻚ ﺍﺳﻜﺖ ﺣﻠﺘﻜﻢ ﻣﺎﺍﺳﻤﻬﺎ ﺣﻲ ﺍﻟﻤﺤﺒﻪ ?

ﻫﺎﻧﻲ : ﺍﻩ ﺍﺧﻴﺮ ﻣﻦ ﻓﺮﻧﺴﺎ ﻭﺑﺎﺭﻳﺲ .. ﺍﻣﺲ ﻛﻤﺎﻥ ﺷﺎﻳﻒ ﻧﻴﺮﻭﺯ ﻭﻧﺴﺮﻳﻦ ﻣﻊ ﺍﻛﺮﻡ ﺍﻟﻘﻨﺪﻭﻟﻪ ...

ﺧﻮﺟﻠﻲ : ﻫﻬﻬﻬﻬﻬﻬﻪ ﺍﻛﺮﻡ ﺩﺓ ﺍﻣﺲ ﺍﻟﺤﺎﺍﺍﺿﺮ ﺩﺓ ﻻﻗﻴﺘﻮ ﻣﻌﺎﻫﻮ ﻣﺮﺓ ﻣﺘﺰﻭﺟﻪ ﺑﺤﻨﻚ ﻓﻲ ﺭﻗﻤﺎ .. ﺍﻟﻠﻪ ﻳﻬﺪﻳﻬﻮ ﻳﺎﺥ ✋

ﻫﺎﻧﻲ : ﺍﻫﺎﺍﺍﺍﺍﺍ ﻳﺎﺍﻣﺎﻡ ﺍﻟﺠﺎﻣﻊ ... ﻳﺎﺍﻟﺸﺮﻳﻒ ﺍﻟﺮﺿﻲ ...

ﺩﺧﻠﺖ ﻧﺎﻧﺎ ﺍﻟﺒﻮﺗﻴﻚ ... ﻭﻋﻤﺮ ﻣﻦ ﻳﺸﻮﻑ ﻧﺎﻧﺎ ﺑﺘﺠﺎﺭﻱ ﺟﺎﻱ ﻭﺟﺎﻱ ➡⬅⬇⬆ ﻣﻜﺴﺴﺴﺴﺴﺴﺮ ﻓﻴﻬﺎﻭﻧﺎﻧﺎ ﻓﺎﺍﺍﻫﻤﺔ ﺍﻟﻮﺿﻊ ﺑﺲ ﻣﺘﻘﻠﻪ ﺩﻣﻬﺎ ﻣﻌﺎﻫﻮ ﻭﺑﺘﻘﻀﻴﻬﺎ ﻟﻴﻬﻮ ﺍﺑﺘﺴﺎﻣﺎﺕ ﻭﺣﺮﻛﺎﺕ ﺍﻧﻬﺎ ﺯﻭﻟﻪ ﺗﻘﻴﻴﻴﻴﻠﻪ ﻭﻇﺮﻳﻔﻪ ...

ﻧﺎﻧﺎ : ﺍﻫﺎ ﻳﺎﻋﻤﺮ ﺍﻧﺎ ﻋﺎﻳﺰﺓ ﺍﻟﺨﻠﻄﺔ ﺍﻟﺴﺤﺮﻳﻪ ??

ﻋﻤﺮ : ﺣﺎﺍﺍﺍﺿﺮ ﻳﺎﻧﺎﻧﺎ ... ﺍﻧﺎ ﻳﺎﻧﺎﻧﺎ ... ﺍﻧﺎ .....

ﻧﺎﻧﺎ : ﺍﺟﻲ ﻳﺎﻋﻤﺮ ﻣﺎﻟﻚ ﺑﺘﺘﻤﺘﻢ ﺍﻭﻭﻭﻉ ﺗﻘﻮﻝ ﺍﻟﺨﻠﻄﺔ ﻛﻤﻠﺖ ? ‏( ﻭﻫﻲ ﻓﺎﻫﻤﻪ ﻭﺿﻌﻮ ‏)

ﻋﻤﺮ : ﻻﻻ ﺍﻟﺨﻠﻄﻪ ﻓﻲ ﻣﻮﻭﻭﺟﻮﻭﻭﻭﺩﺓ ﺑﺲ ﺍﻧﺎ ﺍﻧﺎ ... ﺍﻧﺎ ﺍﻧﺎ ... ﺍﻧﺎﺑﻌﻤﻼ ﻟﻴﻚ ﻓﻨﺎﺍﺍﺍﻧﻪ ﺗﺨﻠﻴﻚ ﺗﻠﻤﻌﻲ ... ‏( ﻗﻄﻌﺎ ﻓﻲ ﻗﻠﺒﻮ ﻭﺳﻜﺖ ‏) ...

ﻧﺎﻧﺎ : ﺗﺴﻠﻢ ﻳﺎﻋﻤﺮ ﻛﻠﻚ ﺛﻘﻪ ..

ﻃﻠﻌﺖ ﻧﺎﻧﺎ ﻭﻫﻲ ﺑﺘﻀﺤﻚ ﻓﻲ ﺣﺮﻛﺎﺕ ﻋﻤﺮ ﺑﺮﺍﺣﻪ ﺟﺎﻫﺎ ﺧﻮﺟﻠﻲ ﺟﺎﺍﺍﺍﺍﺭﻱ ﻭﺳﻔﻨﺠﺘﻮ ﺗﺘﻔﻚ ﻭﻳﺪﻧﻘﺮ ﻳﺮﺑﻄﺎ ﻭﻳﺘﻢ ﺟﺮﻳﻬﻮ ...

ﺟﺎ ﺑﻨﻔﺲ ﻗﺎﻃﻊ ... ﺍﺯﻳﻚ ﻳﺎﻧﺎﻧﺎ ..

ﻧﺎﻧﺎ : ﺍﻫﻠﻴﻦ ﻣﺮﺣﺐ ﺧﻮﺟﻠﻲ ﺍﻥ ﺷﺎﺀﺍﻟﻠﻪ ﻣﺎﻑ ﻋﻮﺟﻪ ..

ﺧﻮﺟﻠﻲ : ﻋﺎﻳﺰ ﺍﺳﻠﻢ ﻋﻠﻴﻜﻲ ﻭﺍﺳﺎﻟﻚ ﺍﻣﻚ ﺑﻘﺖ ﻛﻴﻒ ..

ﻧﺎﻧﺎ : ﻭﺍﻟﻜﻠﻤﻚ ﺑﺎﻣﻲ ﻣﻨﻮ ??..

ﺧﻮﺟﻠﻲ : ﺳﻤﻌﺖ ﺍﻣﻲ ﺑﺘﺤﻜﻲ ﻻﺑﻮﻱ ..

ﻧﺎﻧﺎ : ﺍﻱ ﺍﻱ ﻛﻮﻳﺴﻪ ﺍﻟﺤﻤﺪﻟﻠﻪ ﻋﻦ ﺍﺫﻧﻚ ﻳﺎﺧﻮﺟﻠﻲ ????

ﺧﻮﺟﻠﻲ : ﻧﺎ .... ﻧﺎ ... ﻧﺎ ?.

ﻧﺎﻧﺎ ﻣﺸﺖ ﺑﺪﻭﻥ ﺗﺘﻠﻔﺖ ﺗﺎﻧﻲ ﻻﻧﻬﺎ ﻋﺎﺭﻓﻪ ﺧﻮﺟﻠﻲ ﺑﺤﺐ ﻳﺘﻔﺎﺧﺮ ﺑﻮﻗﻮﻓﻮ ﻣﻊ ﺍﻟﺒﻨﺎﺕ ﻗﺪﺍﻡ ﺍﻟﺸﻠﻪ ﻭﻳﻈﻬﺮ ﻟﻴﻬﻢ ﺍﻧﻮ ﻫﻮ ﺍﻟﻮﺟﻴﻪ ﺍﻟﻤﺠﻨﻦ ﺍﻟﺒﻨﺎﺕ ..

ﻧﺠﻲ ﺟﺎﻧﺐ ‏( ﺳﻠﻮﺍﻥ ‏) ????

ﺳﻠﻮﺍﻥ ﺩﻱ ﺑﺮﺿﻮ ﻓﻲ ﺣﻠﻪ ﻧﺎﻧﺎ .. ﺿﻤﻦ ﺷﻠﺔ ﻧﺎﻧﺎ ﻭﻧﻴﺮﻭﺯ ﻭﺑﺖ ﻋﺴﻞ ﻛﺪﺓ ﻭﻣﺄﺩﺑﻪ ﻭﺭﺯﻳﻨﻪ ﻭﺭﺍﺍﺍﻳﻘﻪ ... ﺍﻣﻬﺎ ﻭﺍﺑﻮﻫﺎ ﺍﺳﺎﺗﺬﺓ ﻓﻲ ﻣﺪﺭﺳﺔ ﺍﺳﺎﺱ .. ﺍﺧﻮﺍﻧﺎ ﺻﻐﺎﺭ ﺑﻌﺪﻫﺎ ﻓﻲ ﺍﻟﻤﺪﺭﺳﻪ .. ﻫﻲ ﺍﺗﺨﺮﺟﺖ ﻭﺷﻐﺎﻟﻪ ﺧﺪﻣﺔ ﻓﻲ ﻣﺪﺭﺳﺔ ﺍﻣﻬﺎ ...

ﺳﻠﻮﺍﻥ : ﺍﻣﻲ ﺍﻧﺎ ﺍﻟﻴﻼ ﻣﺎﻣﺎﺷﻪ ﺍﻟﻤﺪﺭﺳﻪ ﺗﻌﺒﺎﻧﻪ ﻋﺎﻳﺰﺓ ﺍﻓﺮﻕ ﺷﻮﻳﻪ ﻣﺎﺷﻪ ﻟﻨﻴﺮﻭﺯ ..

ﺍﻣﻬﺎ : ﺑﺎﻗﻴﻪ ﻟﻴﻚ ﺷﻬﺮﻳﻦ ﻓﻲ ﺍﻟﺨﺪﻣﺔ ﻣﺎﺗﺨﺮﺑﻄﻴﻬﺎ ﺍﻟﺘﺰﻣﻲ ﻋﺸﺎﻥ ﻧﺸﻮﻑ ﻟﻴﻚ ﺷﻐﻠﻪ ﺗﻤﺴﻜﻴﻬﺎ ..

ﺳﻠﻮﺍﻥ : ﻳﻤﺔ ﺍﻧﺎ ﻣﺎﺍﺍﻋﻨﺪﻱ ﻭﺍﺳﻄﻪ .. ﻭﺍﻟﻌﻨﺪﻭ ﻭﺍﺳﻄﻪ ﺑﻴﺎﻛﻞ ﻓﻲ ﺑﻴﺖ ﺍﻟﺒﻜﺎ ﺑﺎﺳﻄﻪ .. ﻣﺎﺗﺘﻌﺒﻲ ﻣﻌﺎﻱ ..

ﺍﻣﻬﺎ : ﺍﻣﺸﻲ ﻭﻣﺎﺗﺘﺎﺧﺮﻱ ﻋﺎﺭﻓﻪ ﺍﺑﻮﻙ ﺑﻌﻤﻞ ﻓﻴﻨﺎ ﺷﻨﻮ ..

ﺳﻠﻮﺍﻥ ﻧﻀﻔﺖ ﺍﻟﺒﻴﺖ ﻭﻟﺒﺴﺖ ﻋﺒﺎﻳﺘﺎ ﻭﻃﻠﻌﺖ ﻣﺸﺖ ﻟﻨﻴﺮﻭﺯ ..

ﺳﻠﻮﺍﻥ : ﻛﻴﻔﻚ ﺧﺎﻟﺘﻮ ﺳﻌﺪﻳﻪ ﻭﺣﻀﻨﺘﺎ ﻭﺳﻠﻤﺖ ﻋﻠﻴﻬﺎ .. ﻭﻳﻦ ﺑﺘﻚ ﺍﻟﺒﺎﻳﺮﺓ ﺯﻱ ..

ﺳﻌﺪﻳﻪ : ﺍﻫﻠﻴﻦ ﺑﺎﻟﺮﺍﻳﻘﻪ ﺍﻟﺠﻤﻴﻠﻪ .. ﻧﻴﺮﻭﺯ ﻣﺮﺯﻭﻋﻪ ﺟﻮﺓ ﺣﺎﺿﻨﺔ ‏( ﺫﻱ ﺍﻟﻮﺍﻥ ‏) ﻭﺗﺪﺍﻋﻲ ﻓﻲ ﺍﻟﻤﺴﻠﺴﻞ ﻣﺎﻋﺎﺭﻓﻪ ﻣﺎﻻ .. ﺑﺘﻲ ﺍﻟﺨﻨﻴﺘﻪ ﺩﻱ ﺍﻟﻌﺪﺓ ﻟﻼﻥ ﻣﺎﻫﺒﺸﺘﺎ ..

ﺳﻠﻮﺍﻥ : ﺍﺻﺒﺮﻱ ﺧﺎﻟﺘﻲ ﺍﺧﺪ ﻟﻲ ﻗﻌﺪﺓ ﻣﻌﺎﻫﺎ ﻭﺍﺟﻲ ﺍﺟﻠﺨﻢ ﻟﻴﻚ ﺍﻧﺎ ﺩﻱ .. ﺍﺻﻠﻬﺎ ﻧﻴﺮﻭﺯ ﻣﻠﺴﻠﺴﻪ ﻭﻋﺪﺗﺎ ﻣﺎﻓﻴﻬﺎ ﻟﻤﻌﻪ ..

ﺩﺧﻠﺖ ﺳﻠﻮﺍﻥ ﻟﻨﻴﺮﻭﺯ ﻭﺿﺮﺑﺘﺎ ﻓﻲ ﺿﻬﺮﺍ .. ﺍﻧﺘﻲ ﻳﺎﺑﺖ ﻟﺒﺘﻴﻦ ﺗﻜﻮﻧﻲ ﺑﺘﺤﺒﻲ ﺍﻟﺮﺍﺣﺔ ﻛﺪﻩ .. ﻳﺎﺥ ﺯﻛﺎﺓ ﺟﺴﻤﻚ ﺍﺳﺘﺨﺪﻣﻴﻬﺎ ﻓﻲ ﺧﺪﻣﺔ ﺍﻣﻚ ﻭﺳﻴﺒﻲ ﺍﻟﻜﻀﺎﺑﻴﻦ ﺩﻳﻞ . ﻭﻃﻖ ﻗﻔﻠﺖ ﺍﻟﺘﻠﻔﺰﻳﻮﻥ ..

ﻧﻴﺮﻭﺯ ::: ﻋﻴﻴﻴﻴﻴﻴﻊ ﻣﻨﻚ ﺍﻧﺎ ﺟﻴﺘﻴﻨﻲ ﺑﻮﻳﻦ .. ﻗﺮﺑﻮ ﻳﻜﺸﻔﻮﻫﺎ ﺍﻟﻮﻗﻌﺖ ﺯﻭﻳﺎ ﻣﻦ ﺍﻟﺠﺒﻞ ..

ﺳﻠﻮﺍﻥ : ﻳﺎﺥ ﻛﺪﻱ ﻭﺭﻳﻨﻲ ﺑﺘﻔﻬﻤﻲ ﻣﻦ ﺍﻟﺴﺮﺣﺎﻧﻴﻦ ﺩﻳﻞ ﺷﻨﻮ .. ﺍﻏﻠﺐ ﺍﻟﻤﺴﻠﺴﻞ ﺳﺮﺣﺎﻥ ﻭﻳﻌﺎﻳﻨﻮ ﻓﻲ ﻭﺷﻮ ﺑﻌﺾ ﻣﺨﻠﻮﻋﻴﻦ .. ﻗﻮﻣﻲ ﺍﺭﺡ ﺍﻟﻤﻄﺒﺦ ﻧﻐﺴﻞ ﺍﻟﻌﺪﺓ ﻭﻧﻌﻤﻞ ﺷﻲ ﻧﻔﻄﺮ ﺑﻴﻬﻮ .. ﻧﻔﺴﻲ ﻳﺎﻧﻴﺮﻭﺯ ﻓﻲ ﻋﺪﺱ ﺍﻣﻚ ﺍﻟﺘﻘﻴﻴﻴﻞ ﺩﺍﻙ ..

ﻧﻴﺮﻭﺯ : ﺭﺍﺍﺍﺍﻗﺪ ﻓﻲ ﻋﻘﺎﺏ ﻓﻲ ﺍﻟﺘﻼﺟﻪ ﺍﻣﺸﻲ ﻭﺍﻧﺎ ﺑﺘﻢ ﺍﻟﻤﺴﻠﺴﻞ ﻭﺑﺠﻴﻚ ..

ﺳﻠﻮﺍﻥ : ﻭﺣﺎﻃﺴﻤﻼ ﻣﺎﺗﺘﻤﻴﻬﺎ .. ﻗﻮﻭﻣﻲ ﻳﺎﺍﻟﺒﻘﺮ ﺍﻟﻔﺮﺯﻳﻦ .. ﻗﻮﻭﻭﻭﻣﻲ ﻭﺟﺮﺗﺎ ﻣﻦ ﺍﻳﺪﻳﻬﺎ ﺑﻜﻞ ﻗﻮﺓ ﻭﺩﺧﻠﻮ ﺍﻟﻤﻄﺒﺦ ..

ﺳﻌﺪﻳﻪ ﺭﺍﻗﺪﺓ ﻓﻲ ﺑﺮﻧﺪﺓ ﺍﻟﻤﻄﺒﺦ ﺍﻟﻤﻦ ﺍﻟﺰﻧﻚ ...

ﺳﻌﺪﻳﻪ : ﺍﺭﻳﺘﻚ ﺑﺘﻲ ﻳﺎﺳﻠﻮﺍﻥ ﺑﺖ ﺍﻟﺴﺮﻭﺭ .. ﻛﺪﺓ ﺧﻠﻲ ﻧﻴﺮﻭﺯ ﺗﻐﺴﻞ ﺍﻟﻌﺪﺓ ﻭﺍﻧﺘﻲ ﺍﺳﺤﻨﻲ ﺍﻟﺒﻦ ﺩﺓ ﻭﺟﻴﺒﻲ ﻧﺸﺮﺏ .. ﻣﻊ ﺍﻧﻮ ﺿﻐﻄﻲ ﺣﺎﺳﻪ ﺑﻴﻬﻮ ﺷﻮﻳﻪ ﻣﺮﺗﻔﻊ ﻋﻴﻮﻧﻲ ﻣﻮﺭﻣﻪ ..

ﺳﻠﻮﺍﻥ : ﺳﻼﻣﺘﻚ ﺧﺎﻟﺘﻲ ... ﺣﺴﻲ ﻧﻴﺮﻭﺯ ﺩﻱ ﻣﺎﺗﺠﻴﺐ ﺍﻟﻀﻐﻂ ﻭﺍﻟﺸﻠﻞ .. ﺍﻧﺘﻲ ﻳﺎﺧﺎﻟﺘﻲ ﺩﻗﻴﻬﺎ ﺍﺟﻠﺪﻳﻬﺎ ﺧﻠﻴﻬﺎ ﺗﺨﻔﻒ ﺷﺤﻤﺎ ﺩﻩ ﺷﻮﻳﻪ ﺑﺎﻟﺨﺪﻣﺔ ..

ﺳﻌﺪﻳﻪ : ﺍﺩﻕ ﻟﻲ ﻣﺮﺓ ﺑﻘﺖ ﻗﺪﺭﻱ .. ﺍﻟﺴﻌﻔﻪ ﺍﻥ ﻣﺎﺭﺑﻄﻮﻫﺎ ﻟﻴﻨﻪ ﺗﺎﻧﻲ ﻣﺎﺑﺘﺘﺮﺑﻂ .. ﻋﻮﺽ ﺍﻟﻠﻪ ﻓﻴﻬﺎ ﺍﻟﺨﻤﻠﻪ ..

ﻧﻴﺮﻭﺯ ﺟﺎﺕ ﻣﻦ ﺟﻮﺓ ﻭﻣﺸﻤﺮﺍ ﺍﻛﻤﺎﻣﺎ ﻭﻳﺪﻳﻬﺎ ﺻﺎﺑﻮﻥ ﻭﺗﺮﺩﺡ ﻭﺗﺘﺮﺍﻗﺺ ﺑﻠﺌﺎﻣﻪ .. ﻫﻲ ﻳﺎﺳﻠﻮﺍﻥ ﺍﺑﻌﺪﻱ ﺍﺑﻌﺪﻱ ﺍﻧﺘﻲ ﻣﺎﺷﺎﻳﻔﻪ ﺣﺎﺟﻪ .. ﻧﺎﺭﻳﺰ ﻏﻴﺮ ﺗﺠﻲ ﻭﺗﻐﺴﻞ ﻟﺒﺴﺘﺎ ﻭﺍﻻﺳﺒﻮﺭﺕ ﻭﺗﺮﻗﺪ ﺗﻨﻮﻡ ﻣﺎﻋﺎﺭﻓﻪ ﺧﺒﺮ ﺍﻟﻤﻄﺒﺦ ﺷﻨﻮ ﻭﺍﻻﺗﻐﺴﻞ ﺷﻨﻮ ﻭﺍﻻﺗﻌﺎﺱ ﺷﻨﻮ .. ﺍﺻﻼ ﺍﻣﻲ ﺑﺘﻀﻴﻊ ﺣﻘﻲ ﻣﻬﻤﺎ ﺍﻋﻤﻞ ﻣﺎﺑﺘﺸﻜﺮﻧﻲ ..

ﻓﻲ ﺍﺛﻨﺎﺀ ﺭﺩﺍﺣﺔ ﻧﻴﺮﻭﺯ .. ﻓﺘﺢ ﻣﺤﻲ ﺍﻟﺪﻳﻦ ﺑﺎﺏ ﺍﻟﺸﺎﺭﻉ ﻭﺩﺧﻞ ... ﻃﻮﺍﻟﻲ ﻧﻴﺮﻭﺯ ﺳﺤﺒﺖ ﺭﻭﺣﺎ ﻭﺟﺮﺕ ﻋﻠﻲ ﺍﻟﻌﺪﺓ ﻭﺑﻘﺖ ﺗﺘﻠﻔﺖ ﻟﻮ ﻣﺤﻲ ﺳﻤﻊ ﺻﻮﺗﺎ ﺍﻟﻴﻼ ﺑﻜﻔﺘﺎ ﻭﺑﻘﻄﻊ ﻟﺴﺎﻧﺎ ...

ﻣﺤﻲ ﺍﻟﺪﻳﻦ : ﺳﻼﻡ ﻳﻤﺔ .. ﻛﻴﻔﻚ ... ﻫﺎﻙ ﺩﻩ ﻛﻴﺲ ﻓﻴﻬﻮ ﺻﺎﺑﻮﻥ ﻭﺭﺯ ﻭﻋﺪﺱ ﺍﺩﺍﻫﻮ ﻟﻲ ﺑﺘﺎﻉ ﺍﻟﺒﻀﺎﻋﻪ .. ﺍﻧﺎ ﺣﺴﻲ ﺟﺎﻱ ﻣﻦ ﻋﻄﺒﺮﺓ ..

ﺳﻌﺪﻳﻪ : ﺑﺮﻛﺔ ﺍﻟﻮﺻﻠﺖ ﻃﻴﺐ ﻭﻟﺪﻱ ﺍﻗﻌﺪ ﺍﺷﺮﺏ ﺍﻟﺠﺒﻨﻪ ﺑﺘﺴﻮﻱ ﻓﻴﻬﺎ ﺳﻠﻮﺍﻥ ..

ﻭﻣﺤﻲ ﺍﻟﺪﻳﻦ ﻣﻦ ﺳﻤﻊ ﺍﺳﻢ ﺳﻠﻮﺍﻥ ﺑﻘﻲ ﻗﻠﺒﻮ ﻳﺪﻕ ﺑﺸﺪﺓ ﻭﻣﺎﻣﺮﻛﺰ ﻣﻊ ﻛﻼﻡ ﺍﻣﻮ .. ﺍﻋﺠﺎﺏ ﺍﻡ ﺣﺐ ﺍﻡ ﺷﻮﻕ ﺍﻡ ﻣﺎﺫﺍ ﻳﺎﺳﻠﻮﺍﻥ ..

ﻣﺤﻲ ﻋﺎﻳﻦ ﺟﻮﺓ ﺍﻟﻤﻄﺒﺦ ﻟﻘﻲ ﺳﻠﻮﺍﻥ ﺑﺘﺴﺤﻦ ﻓﻲ ﺍﻟﺒﻦ ﻭﺻﻮﺕ ﺍﻟﺴﺤﺎﻥ ﻣﺎﺍﻇﻬﺮ ﺻﻮﺕ ﻣﺤﻲ ﻭﻫﻮ ﺑﺘﻜﻠﻢ ﻣﻊ ﺍﻣﻮ ..

ﻣﺤﻲ : ﺍﻫﺎ ﻳﻤﺔ ﺍﻗﻮﻡ ﺍﻏﻴﺮ ﻫﺪﻭﻣﻲ ﻭﺍﺟﻲ ﺗﻜﻮﻥ ﺍﻟﻘﻬﻮﺓ ﺟﻬﺰﺕ ....