Tila balik sa normal o dating set up sina Calix, Meng, at Yñigo simula nang gabing makumbinsi ni Meng si Yñigo. Maliban nga lang sa isang bagay. Dalawang araw na ang nakalilipas simula nang magbalik doon si Yñigo subalit hindi pa rin sila nag-uusap ni Calix. Hinahayaan lang naman sila ni Meng dahil alam nito sa sarili na dadating at dadating pa rin sa puntong magkakausap ang dalawa.
"Meng, may naghahanap sa 'yo sa labas," untag ni Yñigo na bahagya pang iniangat ang kilay na tila nanunukso.
Hindi naman naiwasan ni Meng ang mapangiti sa reaksiyong iyon ni Yñigo. Pinunasan muna niya ang kamay na basa dahil kasalukuyan siyang naghuhugas nang tawagin siya ni Yñigo. Nilagpasan niya si Yñigo na pangiti-ngiti pa rin sa kaniya.
"Wow, alam niya kung sino. Hindi na tinanong sa akin eh," kunwa'y um
