Bahagya kong ibinaba hanggang sa noo ko ang suot kong itim na cap para hindi gaanong makita nang lantaran ang pagmumukha ko. Maging sina Zen ay may sari-sarili na ring paraan para hindi kaagad sila makilala.
Sa ngayon ay hindi kami puwedeng magpabaya at magpakampante nalang lalo na't magpahanggang ngayon ay nandito pa rin kami sa bayan ng San Martin. Kailangan naming mag-ingat dahil hindi imposible na mayroong makakilala sa amin dito sa lugar. Nakakasiguro rin ako na kasalukuyan nang sinusuyod ngayon ng mga tauhan ng sindikato ang buong bayan para lang hanapin kami.
Lumipas pa ang ilang minuto naming pananatili rito sa loob ng isang cafe, bago tuluyang dumating ang mga hinihintay namin. Pagkapasok nilang dalawa rito sa loob ay kaagad silang dumiretso sa table na kinauupuan ko. Mas pinili
