“Ano kamo, anak? Niyaya kayo ni Clint mag-beach resort sa Batangas?” paglilinaw ng nanay ni Mina nang ipaalam niya na inimbita sila ni Clint na sumama sa company outing ng kompanya nito.
“Opo, ‘Nay. Company outing daw po iyon.” Nakita niya ang tatay niya na papalapit sa kanila.
“Ilang araw kayo ro’n, anak?” ang tatay niya na narinig na pala ang sinabi niya sa nanay niya. Kahit kailan talaga matalas pa rin ang pandinig nito kahit nasa mahigit singkwenta anyos na.
“Tatlong araw daw po, ‘Tay.”
“Ah. Dapat mag-enjoy ka ro’n, anak. Sulitin mo ang bihirang pagkakataon na ito. Lalo na at si Clint ang kasama n’yo.” Nilingon niya ang tatay niya. Ano naman ang kinalaman ni Clint upang mag-enjoy siya sa outing na iyon? Pero imbes na kontrahin pa niya ang sinabi ng ama ay sinang-ayunan na lang n
