صومعة الوهم (طريق الوهم)

السابع والثامن ، الباقة الباردة

#طريق_الوهم

بارت٧

نورا ناصر ..

العجز يتصنف ثاني اقسى شعور مؤلم بعلم النفس والروح والوجدان ....

لما تنتظر بحرقة قلب عاجز عن كل شي غير الخوف والترقب ...

لما المدامع تتوقف بمحاجر العين وتعجز حتى عن الرمش

لما الشفاه ماتنبت بأي هذر غير الدعاء والتضرع المحفوف بالأمل ..

ال**ر والجبر شي موهين ولاسهل

لما نبدي نكبر ونعرف شنو معنى الخوف احيانا كثيرة نكون مانعرف يمكن هالخوف من الفقد لو ان نخسر بس شنو نخسر هالخوف ممكن جدا يكون مو بمحله والجاي ممكن ي**رنا اكثر او يزيدنا قوة وصلابة ..

المواقف المؤلمة والقهر يصنعون احيانا كثيرة انسان قوي رغم صغر سنه لان عوده يبدي يشتدي وينغرز بالتربة اكثر

بالضبط مثل الزهور البرية الي تحاول تواجه كل الظروف الصعبة وتثبت نفسها بجذور متشابكه بقوة ....لكن السؤال المهم شوكت ينصفنا القدر...،؟

جلنار ظليت اروح وارجع واعيد خطواتي بحيرة وخوف ايدي مااخذت لا على شغل ولاعلى اكدر اسوي اي شي عين عالباب وعين على حمودي وريم النايمين وعين على ذاك الاب الي ماادري شوكت يصير بخير ويتعافى ..

يارب بجاه شفيعك ابو الايتام اخذ من عافيتي وانطيهم يارب فدوة لأسمك لاتخليهم اهلي واخواني يتوجعون يارب احلفك بعليل كربلاء ع لاتوجع قلبي اكثر عليهم مابية بعد اتحمل اكثر يارب احس نفسي هشة وباي لحظة ان**ر يارب فدوة شافي ماما وخلي ترجع سالمة معافاية بسرعة يارب يارب انت حبيب الفقراء و مالنا غيرك يارب..

كان وقت قريب الغروب والجامع القريب من بيتنا كان ستوه يبدي يمجد سمعت مرة من بيبي وقت الغروب يكون الله سبحانه وتعالى موجه الملائكة يفتحون ابواب السماء وتتوزع وتتقسم الارزاق والارزاق تكون اماعافية اما اموال اما دفع بلاء واذى

وهذا كله يتغير بالدعاء

سويت مثل بيبي فرشت سجادة الصلاة وشعلت شمعة زغيرة بصفي وخليتها بكاسة زغيرة اجواء روعة كانت حسيت بنسمات الهواء الخفيفة وهي تداعب وجهي بعيون كلها امل ياربي ادعوك واتوسلك ان ماما وبابا يتعافون يارب وقريت دعاء العافية

متاملة خير ان ماما مايطلع بيها شي ويكون عارض بسيط لانها تعبت هالفترة يارب فدوة لاسمك كان عدنا فال حلو لما يجي طفل يطفي الشمعة يكولون دعائك يتحقق كون الطفل بريء بعدني ستوني خلصت دعاء كلت اصلي واشيل الشمعة اطفيها لكن واني اتوجه للصلاة ستوني جاي ابدي اجى حمودي طفاها للشمعة ابتسمت وكملت الاذان وتوجهت وصليت ....

كملت صلاة ودعاء كعدت ريم وبابا جوعانين ويردون عشاهم

بابا سالني

ابو جلنار.. امج وين بابا

جلنار ..بابا هسا تجي راحت وية خالو حسن

ابوجلنار ..خير شعدهم

جلنار بعدني محتارة شكوله لبابا

دخلت ماما وخالو حسن وجهها اصفر كلش وشاحب عبالك مابي اي حياة وكوة تبلل شفايفها سلمت وكعدت

رحت ليمها شبگتها امي حبيبتي سلامتج يارب بية ولابيج

ام جلنار.. ضحكت بتعب فدوة ابنيتي شكد حنينة

خالي حسن .. والله يانارة هاي الشغلة بالذاات اسم الله عليج ومترهم بيج ولابيها لازم بس بيها هههه

ابوجلنار ...خير شصاير

ام جلنار.. بخجل ها لاسلامتك ماصاير شي بس اني حامل

جلنار بتعجب.. هههه ماما الله يكومج بالسلامة

ابو جلنار ..يارب امين وتجيبيلنا بعد سند لجلنار

خالي حسن ..امين وتصيرلكم عزوة ويكبرون بجالكم يارب

ام جلنار.. امين يارب

جلنار ..ماما اجهز العشا بسرعة خالو مشتهي شنو عالعشا

الخال ..مشتهي طماطة لاجعة من ايدج الحلوة فدوة لوجهج بس مو تسويها حلوة ..

جلنار.. لاخالو صدك تحجي شلون اسويها حلوة

الخال ..مو هي لازم تصير حلوة من تخلين ايدج بيها كبرت بنيتي وتكول اسويلك عشا وشمشتهي كون الله ينطيني بنية مثلج نار وشرار من صدك جلنار

ام جلنار.. انت دتزوج اول والله كريم عود من لمن تخلف احنا نربيها الك على طبعنا بس ياخوفي لاتطيح بوحده فاهية جنها رماد لانفع ولاشرار .

الخال... لا انتي تخطبيلي على ذوقج انة المن اريدج غير مخليج للكبار انت امي واخيتي

ام جلنار.. استقر والله كريم بعيوني

حمودي... الله ونسوي عرس وناكل كيكة

ريم.. ابوبطن بس همك كرشك وهماتين كرصته كلش قوي

جلنار ..ولج خطية حرام عليج انتي ليش هيج دنغوزة عود

ريم.. اني مو دنغوزة هو حمودي مااحبه يطفر ويعبر عالعمدن على رجليناتي يدري بية مالحك اكومله

حمودي.. جذابة والله ماسويها بعد

جلنار .. خلي اروح اسوي العشا شتردون

ريم وحمودي بصوت واحد اصابع العروسة

جلنار... خوش لعد وية الطماطة اللاجعة

رحت سويت العشاءبسرعة قلمت البتبتة وسويتها اصابع رفيعة هالاكلة اخواني يحبوها ويسموها اصابع العروسة وحضرت صاص امي مسويته من رف المونة دايما تسوي هالشغلات اجبان وصاص ورب رمان ومعجون على كولتها سبع صنايع والبخت ضايع

واني اكولها دايما لا ان شاء الله بختج عالي وماضايع ابدا حبيبتي امي حضرت السفرة وصحتلهم واشوفهم ملتمين وفرحانين..

ريم وحمودي يغمسون اصابع العروسة بالصاص وياكلوها بكل سعادة خلصنا اكل ورحت نومت اخواني

رحت اريد اكمل باقي الشغل اخر جفيتين كانت طلبية لست ايمان ام الرياضيات رادت ٣ جفيات لبناتها مطرزات ونهاية كل جفية حرفهن كعدت اشتغل وجان تطفى الكهرباء واشتغل عالفانوس ميخالف صح بي دخنه شوية بس يمي سنادين الورد بالحوش الارضية حلوة بيها برودة لان رشيتها وفرشت بمها اني وغراضي الخاصة بالتطريز اجى خالو حسن وكعد يمي حبيبي كله هيبة وحنية فدوة لقلبه

كالي بوية حبيبتي اريد احاجيج بشغلة

جلنار تفضل خالو ادلل

الخال حسن.. نارة حبيبة انتي كبرتي بعد وتفهمين الام لما تحمل مايصير تتعب زايد كون تساعديها وتصيرين انتي ام البيت ولو انتي مو قاصرة

جلنار.. اكيد خالو تدلل ماما ماخليها تشيل شعراية لاتوصي حريص بعيني

خالي حسن.. ادري بيج وردة وحبيبة امج واهلج بعد خالج فدوة لقلبج

جلنار ..خالو اني اخلي ماما واخوتي بعيوني لاتخاف عليهم بس خالو فدوة لاتسافر وترجع تعوفنا ماريد اروح لبيت الشيخ

خالي حسن.. لاحبيبة ماسافر اني يمكم ماعوفكم بس خلي يستقر وضعي وافتح مشروعي وان شاء الله حتى تطريز ماتطرزين منتظر اشوف صاحبي ابو سعيد يفيز والشهر الجاي يوصل هو البضاعة ان شاء الله

جلنار.. الله يرزقك خالو حبيبي ويوسع عليك يارب

كملت شغلي ونمت واني بقلبي أمل شلون راح تمر الأيام وشلون حنعيش بس متأملة خير برزق رب العالمين وعلى كولة بيبي ف*ج ربج على ساعة

مرت الايام بسرعة وخالو سافر لبغداد ملتهي ديهيأ لمشروعه حتى يفتح معمل نجارة كونه محترف بشغل النجارة والتهى عنا ومشفنا هالفترة واجى وقت العلاج بابا وماما متحيرة لان بيت الشيخ مروان انكطعت علاقتنا بيهم واني اسقي وردات الصباح شفت امي مهمومة والوحام مأذيها

صارت برقبتي كل مسؤوليات البيت وبدل ماكنت تهتم بس بابا هسا صرت اهتم بماما وريم الي نفسيتها كلش تعبااانة لدرجة دومها عازلة روحها بالغرفة

ام جلنار ...بقهر وحسرة يوم جلنار شنسوي منين نجيب وشلون نعيش

جلنار... ماما ف*ج ربج على ساعة خلي نصبر اكيد الله مايضيعنا

ام جلنار ..باجر موعد سفرة ابوج والدكتور يريد يثكل العلاج هالمرة ابوج مو على بعضه هالايام

جلنار.. ماما خلي اروح لبيت خالة ام حسين بلكي تقبل اشتغل لزوجها بالبيت اطرزلهم

ام جلنار ..اي والله جبتبها صدك واعدني قبل لايوكع البيت وراحت عن بالي الشغلة

جلنار ..هسة تشوفين الله ميضيعنا حبيبتي امي

ام جلنار.. روحي على خالتج ام حيدر واش وخلي تروح وياج لبيت ام حسين بلكي الله عنده شغل النا

جلنار.. لبست حجابي ورحت لبيت خالة ام حيدر

حيل صارلي شكم شهر مشايفة حيدر مدري كعاكيله بعدها سرحها

دكيت الباب لانها دوم مردودة استحي ادخل بسرعة وچان يطلعلي حيدر سبحان الله بالضبط نفس طرزان بس على ابيضاني ونفسهن الطكع الحمرا بخده صيف شتا صاير شوية اطول وكان لابس فانيلة تعلاكه وسلاعيمه مبينة اول مرة هيجي اشوفه وكعاكيله لاطشها دهن مدري مي وشكر مخلص شكر الوجبة كله على راسه ولابس بنطرون مقفل يمكن نفس البنطرون الي لابسة عمي بصورة الشهيد عمي مالة حرب ايران الله يرحمه وصفن بوجهي

حيدر واش .. وهو يمسح على كذلته شلونج ناارة مشتاقلج

جلنار ..الحمدلله انته شلونك

حيدر.. اني زوين الحمدلله بعد روحي

جلنار.. عفية صيحلي خالة محتاجتها بشغلة

حيدر ..نارة ليش بعد متجينا انه قلبي مقهور منج والحسن ع

جلنار.. والله بابا ميقبل اجي ولا يقبل احجي وياك

حيدر ..واش بس انة اشتاقلج كلش والحسن ع

جلنار .. ها ههههه اي ان شاء الله يلا فدوة صيحلي خالة بسرعة

حيدر واش .. حاضر ادللي هسا اصيحها الج چاشنو تظلين بالباب

جلنار ..اي والله مو مستعجلة لازم الحك اروح قبل لايصير الغروب

حيدر ..ها يلا هسا رايح

جلنار.. ظليت واكفة عود شبي حيدر يباوعلي هيج الحمدلله جنه خبل ناس تكبر وتعقل وناس بس طول عالفارغ .

اجت ام حيدر سبحان الله تلعلعل هلا بناارة اكول البيت ضاوي وحيدر كاشخ اثاري نارة يمنا

جلنار...هلو خالة شلونج مشتاقتلج وبوستها

ام حيدر ..ولج شنو كل ماجالج تحلوين جا هو كل اسمر هيج يصير بي عسل مدري دبس .

جلنار.. موبيدي من اشوف ام حيدر تضحك ويكبر وينفرش خشمها تلقائيا اخرب ضحك بعد شوية واوكع من طولي كوة احصر الضحكه

خالة فدوة ماما دزتني تكول اذا فارغة بلكي ترحين وياي لعمو ابو حسين الخياط شوية محتاجين شغل

ام حيدر واش ..عود صدك امج تحجي ليش مااجت هية

جلنار. ها خالة مو ماما متكدر حامل والكانولة بيدها وريتني ماحجيت هالحجاية وجان تطكها هلهولة احس اذني انطرمت الحمدلله والشكر واشوفلك مرة بباي تهوس

ام حيدر كلللللوووووش صلوات ماشاء الله يلا بيها الخير بلكي تجيبلكم بعد فريخ زغير وتكثر عزوتكم

جلنار ..خالة ماما حامل مو تزوجت .

ام حيدر... امشي ام ل**ن يمة فدوة للبنات وعود انتي شتسوين رايحة لابوحسين الخياط

جلنار ...بحسرة خالة اني تعلمت بهالفترة وطورت تطريزي صار حلو كلش معلماتي كلهن يردن يوصني بس الفلوس قليلة ماتكفي واجى موعد علاج بابا ويمكن الدكتور يحددله عملية لو علاج جديد مندري

ام حيدر وجان تفتح زيكها ربي مترد هالفقيرة المسكينة ونلكالهه شغل كومة عند ابوحسين

جلنار.. حبيبتي خالة فدوة لقلبج ..

راحت لبست عبايتها وجتي .. اخذتني ورحنا ..

وصلنا لابو حسين الخياط وسلمنا عليه ولكينا زوجته دتنطيه غدائه يمكن متأخر لان وجه العصر هسا

والمحل متروس اقمشة..

جلنار وام حيدر سلام عليكم

ام حسين وابو حسين وعليكم السلام ياهلا كل الهلا

ام حسين.. هاي منو اليوم يمنا فدوة هاي البنية نارة بنت ام نارة صلوات شلون فريتي بسرعة كبرانة حبيبتي

جلنار.. بخجل شكرا خالة

ام حيدر.. اي صلوات البنات بسرعة يفرن ويكبرن تخبل صايرة

ام حسين.. شلونهم اهلج حبيبتي ريمة وماما شخبارهم

جلنار.. الحمدلله خالة

ام حسين ..عساكم بكل خير حبيبتي

جلنار استحيت افتح الموضوع بقيت واكفة بمكاني . واباوع لام حيدر تقلب بالاقمشة ونست احنا ليش اجينا اصلا ..

تقربت منها سويت نفسي اقلب وياها همست بقرب منها

خالة روحي كوليلهم فدوة استحي اني ..

ام حيدر ..ها اي اي هسه واندارت باتجاه ام حسين وكالت .ها ام حسين متردون وحدة تطرز ترتب المحل تعزل وياكم هاي جلنار نارة وشرار تفيدكم

ابوحسين.. بنية جاي تكبر شنو شلون نشغلها بالمحل

جلنار.. لا عمو اني مااشتغل بالمحل انطيني اطرزلك وماما تخيط بالبيت واجيبهم الك .

ابو حسين ..بس لازم تلتزمين بالمواعيد انة رجال الي اسمي وكلها ضباط يمي تخيط ونسوان المحافظ وعضو الفرقة وشنو موبس تطريز اريد شغل نمنم وبلك وقيراج كلشي وچفيات توزيعة مهر وحنة

جلنار.. اي عمو كلشي اشتغل واجيبهم عالوعد ان شاء الله

ام حسين ..بقهر حبيبتي ودراستج

جلنار ..خالة ارتب وقتي ان شاء الله

ام حسين.. ياصف حبيبتي صرتي

جلنار.. اني خالة السنة ثالث متوسط ان شاء والعام طلعت اعفاء بالثاني

ام حسين ..حبيبتي خالة الله يوفقج ويبارك بيج

جلنار ..فدوة لوجهج خالة تسلمين

ابوحسين ..يلا اجربج اليوم هاي طلبية عندي اريدها لشعبان بولادة الامام الحسين عدنا عرس ابن ابو عباس يعني عندج ٢٣ يومين تلحكين تطرزين بس حرف العروسة والعريس بالانكليزي وماريدج تفشليني انطيج نموذج تسوين مثله والوانج و الباترونات علية وردة ناعمة وياهن شوفي

ها شكلتي .

جلنار .. ان شاء الله عمو بس انته شكد حتنطيني عالچفية .

ابو حسين ..عمو الج هالمرة كلهن الحساب لخاطرج لانج شاطرة انة احسبهن كل عشر چفيات ب ٦٠٠٠ انطيج ٥٠٠٠ والي ١٠٠٠زين هيج راضية .

جلنار .. بفرح الله يوفقك عمو ويرزقك اكيد راضية وتدلل مراح افشلك ابد .

ام حيدر ..صلوات ربج عالنيات

جلنار .. بفرح الحمدلله والشكر

اخذت الغراض ودعت عمو واتفقنا نلتقي بعد ٢٠ يوملان لازم يحش*هن للجفيات ملبس وجكليت ومصقول ملون الله اموت على ذني السوالف .

امشي واني اسرح باحلامي اذا كل عشر جفيات ب ٥٠٠٠ يعني راح يصير المجموع ٢٥ الف الله مااصدك ياربي صدك تف*ج علينا واشتري لماما جبدة وبابا اشتريله علاجه وريم لازم اجيبلها زيت السمج الغالي بلكي الله الكاه بسعر اقل رجليناتها صار فترة مداهنيهن يارب واشتري لحمودي سيارة شفل قهرني ذاك اليوم يباوع لجهال عمو يريد مثلها يارب فدوة لاسمك لخاطر اخواني ارزقني اكثر واكثر بجاه ابو الايتام يارب ماريد اتفشل وية عمو ابوحسين اريد اخلصهن بسرعة يارب

ام حيدر ..يلا نارة خفي رجلج ابوج خاف يحجي عليج مالنا خلك هالخدود الحلوة تموع خاف يعضج .

جلنار .. لاخالة ميموعن اصلا جاي يكبرن ..

وصلنه لراس الفرع صار كدامنه حيدر ..

ام حيدر ..هلا هلا ها حدوري يمة شنو لحكتنا

حيدر ..لايمةبس جبتلكم موطة كوادالوبي التحبوها ويباوعلي .

جلنار ..الله صدك مشتهيتها كانت مشهورة بذيج الفترة هاي الموطة اسمها موطة كوادالوبي على اسم مسلسل م**يكي مشهور وهاي الموطة تصير كلها فانيليا وكاكاو وعالوجه فستق مبروش والكاسة مغلفة بغلاف ذهبي ولماع ..

ام حيدر ..واليوم انقلبت الفريدو يمة مثل ذولي الي بمسلسل كوادالوبي (مسلسل م**يكي)

حيدر ..وهو يعدل ب*عره ونارة تشبه كوادالوبي

جلنار ..ها شبيك حيدر اني شجانبي لكوادالوبي هاي طويلة وشعرها طويل

ام حيدر ..تردين الصدك نارة انتي احلى منها جنج هندية على ايرانية تخبلين ولج .

ظلينه نسولف لحد ماوصلنا للبيت .. اندار عليه حيدر

كال عفية نارة دومج تعالي لينا ..

جلنار ... الله كريم وبقلبي الشكر لله شبيها العائلة ماشاء الله صدك واشين شو قلبوها مسلسل م**يكي ..

وصلت للبيت ودعت خالة ام حيدر وحيدر واش دخلت ولكيت ماما عيونها عالباب .. من شاف*ني فرفحت

كالت .. بشريني يوم

جلنار ..خير ماما كل خير ورزق وعافية الج ولبابا يارب

ام جلنار ..بفرح وتامل صدك والله يمه انتي مرزوقة

جلنار.. ماما اسويلكم العشا بسرعة لازم الحك عندي ايام قليلة يادوب الحك وكلماخلصت بسرعة كلما احصل طلبيات بعد اكثر

ام جلنار.. الله يرزقج حبيبتي ..

سويت العشا بسرعة وكعدت اشتغل واطرز الحرفين والوردة بكل چفية والحمدلله خلصت چفيات

بعدها بايام ..

واندكت الباب اجت بيبي وعمه هنية بالسيارة مانزلت وياهم وعمي ابو علاء يريد يعزمونا من الباب بسرعة سلمو علينا الاسبوع الجاي عيد ميلاد بنت عمي يبووو شكد ريم تحبهم ....

خلصت الطلبية لابوحسين ورحت وديتها اله اتعجب على شغلي وعلى سرعتي بانجاز المهمة ..

داومت ثاني يوم بالمدرسة وبس افكر بعيد ميلاد بنت عمي شراح نلبس بي قضيت طول وقت درس الرياضيات واني صافنة .. صاحتني ست فردوس ..

جالنار حبيبتي من نخلص الدرس تعاليلي للادارة ..

اني خفت شوية بس لااترزل بس ست فردوس تحبني لان شاطرة ومستحيل تسويها ..

انتظرت الدرس يخلص ورحت الها للادارة ..

جلنار .. نعم ست ترديني ..

فردوس .. شبيج صافنة اليوم مو على بعضج ..

جلنار .. ست باجر عيد ميلاد بنت عمي وشوية محتارة باللبس ..

مسحت على راسي بحنية كالت ولايهمج حبيبتي ..

اني عندي قطعة قماش كبيرة وحلوة راح اجيبها للوالدة تخيطها وانت طرزيها تطلع تجنن بلمسات ايديج الحلوة ..

فرحت كلش ..

ست فردوس .. بعد شكد عن العيد ميلاد

جلنار.. ست بعد ٣ ايام

..تمام تلحكون

فرحت وتشكرت منها وحظنتها

الله يخليج الي ست

.. حبيبتي شكم نارة عندي انتي بنيتي الي الله مانطاها الي

رجعت للبيت فرحانة

طلبت من ماما بسرعة تخيطها وفعلا خيطتها ماما ولبسناها طلعنا اني وريم نشبه الاميرات الزغار مثل كارتون ليدي وسارة..

دخلنا لبيت جدوكلها تعجبت علينا

وبيومها كذبت اول واحلى كذبة من سالوني منيلكم هالملابس كتلهم خالو حسن جابها النا من الاردن

بقوا متفاجئين واني وامي وحدة تباوع للثانية ..

بدات مراسيم عيد الميلاد ..

وماسمعت اله صوت ريم وهي تبجي وتعيط

رحت الها سالتها شكو حبيبتي ..

اشرت الي على ملابسها متدمرات كريمة الكيك ..

ظلت تبجي بحرقة ومنا هي اصلا تتنحوس ..

طلعت غيرة بنات وتلفوا فستانها ظلت تبجي نريد نسكتها منكدر ..

اجت عمه هنية .. كالت لج ريم اني شكتلج مو كتلج احرقه الي يبجيج .

ريم عمه دمرن ثوبي عمدا

هنية اني الهن صبريلي

وبعد ما خلص عيد الميلاد وبنت عمي انوسة نزعت بدلتها بالكوة يلا قبلت معتزة بيها ..

سمعناها تبجي .. رحنه وراها شفناها تاشر ع التواليت طلينه نشوف عمه هنيه شامرة ملابسها وشالات البنات كلهن ..

بوقتها نريد نكتم ضحكنا مكدرنه .رجعنه للبيت نسولف ونضحك . .

احلى ايام ومرت بسرعة بتعبها بضحكها

ولدت ماما احلى بنوتة جديدة وصارت عندي اخت زغيرة تشبه الملاك وفعلا سميناها ملاك

رغم دراستي الصعبة ورغم مرحلة الاعدادية بدت تصعب لكن اني ضليت مصرة اكون ايدهم اليمني وسندهم وابن البكر مو بس بنتهم ..

كبرت اكثر وكبرت مسؤوليات عائلتي وشغل التطريز موهلكد صار يكفيني واني مالحك على طلبات البيت لان بابا حالته ابد مو مستقرة والي كمل علينا صارت فترة السقوط والحرب الي خلتنا نضطر نروح وية بيبي لناس بالريف اقارب بيبي وهالفترة شكد كانت صعبة باصوات الحرب على الناس الى انها بالنسبة النا كانت مرة لان دواء بابا انكطع وصعبة علينا نوصل للادوية..

بس الي كان يهون علينا عمة هنية وسوالفها .

فد يوم طلعنا على صوت ا****ر وهو يعيط بعلو صوته ..

طلعنا وصارت كبالنا عمه هنية صاعدة على ا****ر مطلعة رجليها وشايلة دشداشتها ومدندلة رجليها عالحمار..

لو عنده ل**ن جان حجه ولويكدر جان انتحر .

كوة لزمنه روحنا من الضحك ..

وكوة جريناها اني وبيبي دخلناها للبيت مالت اقارب بيبي .وديناها للحمام تغسل ..

صار الظهر مدينا السفرة مرك بتيته باللحم وتمن وتمر وراشي .. ظلت تاكل تمر و تشمر نوى التمر ال**ب علينا بالمرك واللبن وحتى على وجوهنا وتنززنا ..

الكل كام من الاكل ..

غسلنه مواعين وعزلنه البيت وكعدنا العصرية برة بالبستان مقابيل البيت .. نشرب شاي وعمه هنية ياكايمه ياكاعدة وكلساع تسوي شغلة تموتنا ضحك ..

لشوية اندكت الباب .. كامت وحدة من الكناين فتحته

دخلت علينه مراه ..

سلمت وكعدت ..

صبينا الها شاي وكعدت تشرب..

المراه .. عيني ام رؤؤف اني جاية اخطب بنتج هنية لابني شافها وكتل نفسه عليها ..

بيبي .. لاعيني ماانطيها تعذريني ..

المراه .. ليش عيني جاا احنه مو كد المقام ..

بيبي .. لا عيوني مو هيج القصد بس هنية مو مال زواج ..

عمه هنية كاعدة بصف بيبي ظلت تشيل راسها وتركعه بكتفها

لحد ماكامت المراه راحت ظلت تجر بفوطة بيبي وتكوللهه ام الرجولة تزوجتي خمسين واحد وماتخليني اعرس مااحبج ماااحببج ..

بيبي .. ولج يمه هو العرس هين .. تردينه نتفاشل ويا العالم ..

كامت عمه هنية من مكانها واحنه بقينى على كعدتنه وبيبي تمسح دموعها بفوطتها سودة عليه هنية هم تريد عرس ..

ماما .. جاا وحد ياعمه ..

هي لحظات واحنه على هذا الحال حسينه بشي ديوكع علينه من فوك باوعنه عدل ركزنه شفنا طرشي

رفعت راسي ليفوك شسالفة الدنيا كامت تمطر طرشي

وجان اشوف عمه هنية فوك السطح مخليه سطل الطرشي على المحجر وتشمر علينه .

بيبي .. . ولج يمه نزلي شجاي تسوين ...

مااستجابت لندائات بيبي واستمرت تشمر بي

خلصته كله اخر شي لزمت السطل هو والخل مالته وكلبته من فوك السطح واحنا صار مراكضنه مااله والي ..

خلصت الحرب ورجعنا لبيتنا ومرت كم شهر ورجعت الحياة لمدينتنا

سمعنا بوقتها مديرية التربية تقبل البنات خريجات صف الثالث متوسط للعمل ككاتبات بالمدارس ..

قررت اجرب حظي ..طلعت بكل لهفة ورحت للتربية قدمت كوني مخلصة ثالث وتوكلت على الله بس دا امشي واشوف كدامي مؤسسة بشكل بيت ..

وكفت مقابيلها لحظات واني افكر ادخل واشوف بلكي محتاجين وحدة تشتغل اي شي اشتغله ..

دخلت شفت نساء اعمارهم كبيرة وميتحاجن ومتكبرات سلمت ..

وحاجيتهم عفية متحتاجون وحدة تشتغل يمكم ..

ردت علية عجوز لاعيني مو معتازين يلا طلعي

اسلوبها كان مو حلو ابد

كتلها بقهر زين فدوة اي شغلة بس جربوني .

جاوبتني مرة ثانية يطلع عمرها بالاربعين اي نشغلج بالعلاقات والاعلام وطكتها ضحكة ..

جلنار .. كتلها ميخالف اي شي عفية .

صاحو على وحدة اسمها حنان واجت ..

المراه .. عيني حنان هاي البنية خليها تشتغل يمج بالعلاقات والاعلام ..

باوعتني من فوك لجوة ..

كالت وبعصبية واضحة لكن بدون حقد ..

حنان .. لا عيني شوفولكم مكان غير العلاقات والاعلام البنية حليوة جنها جنبذة جورية واشغلها احنا بغابة وهيه شابة حليوة والعيون راح تصير عليها ..

جلنار .. من سمعت كلامها تشجعت وحاولت اتحدى نفسي باوعتلها بتوسل .. كتلها عفية اوعدج راح احافظ على نفسي انت بس جربيني مراح تخسرين شي فدوة ..

طريق الوهم

بارت ٨

نورا ناصر

شكد ممكن نتحمل الأذى الجسدي ...؟

شكد ممكن نجور على انفسنا ...؟

شكد ممكن نتحمل اعباء اكثر من طاقتنا...؟

كله هين ممكن اله وكت يكضي وف*ج حتى لو طال الصبر

لكن اليقهر والي ماممكن نتحمله لمايفيض بينا ونلكى نفسنا بوسط غابة كلها وحوش بهيأة بشر..

لكن ماممكن تتغلب على أمر رب البشر

من يصير بحياتنا انسان بهيأة ملاك مو بشر....

الملاك الحارس عبارة حلوة وتحمل معاني كثيرة لو نجي نشرح معانيها فهي ملاك يحرسنا من السوء او الشر او المرض واحيانا يدفع البلاء عنا،

هالملاك ممكن يكون بهيأة شخص قريب منا والله عزوجل خلاه بطريقنا حتى يساعدنا

ومرة يكون هالملاك بهيأة دعوة أم

واحيانا يكون بهيأة الطاف الهية تحيط بينا وتحمينا وتدفع عنا السوء .....الخلاصة ان الله مايضيع بشر

حنان... اوك اشغلج بس الي شروطي

جلنار ..موافقة

حنان.. غير تعرفين الشروط اول يلا توافقين ليش هيج مندفعة ..

جلنار.. لا ست مو مندفعة بس اني حثبتلج اني استحق الشغل وبجدارة

حنان.. اول شي كوليلي شسمج وليش تردين تشتغلين وشتعرفين تشتغلين وشكد عمرج جايبة وياج وثائقج ومستمسكاتج؟

جلنار ..بلي اسمي جلنار عمري ١٧ طالبة بصف خامس علمي اي شي تعلميه الي اني اتعلم بسرعة والله مراح اتعبج بس انطيني فرصة.

حنان ..وين بيتكم وين وثائقج

جلنار ..هذا واقع حال يثبت اني طالبة بصف خامس ومحتاجة الشغل حتى اعتمد على نفسي مااحب اكعد بالبيت واريد اتعلم اي شغلة تفيدني بالمستقبل

حنان ..شوفي عيني اني تلفونات ماريد، اخذ وعطا وكلام وية الشباب بالاذاعة والتلفزيون ماريد؟ ترحين وياي وترجعين وياي ؟واجازات زمنية ماكو ؟واهم شي لبسج جبب لونها اسود او نيلي مكياج ماكو وياريت لو تتعلمين وحدج مني بدون مااعلمج اني وانتي باوعي علية وشوفي ششتغل وحاولي تطبقيه وتحفظيه الج مهلة اسبوع وراها متبقين .

جلنار ..بحزم .. مراح اخذلج ست ابدا واصلا تليفون ماعندي اطمئني ولبسي هالتشوفينه ومااغيره ..

كنت لابسه عباية اسلامية سودة وحجاب جوزي بي خط ذهبي لافته على الحنك بالضبط مثل مذيعات قناة المنار اللبنانية ..

حنان ...ان شاء الله وبالتوفيق اتمنى تحافظين على وعدج وخليج وياية وفية وماريد يطلع شغلنا ليبرى ابدا خليج امينة وكد ثقتي وان شاء الله مااقصر وياج .

جلنار .. ست وعد جربيني وحتعرفيني وتعرفين تربيتي ان شاء الله اني اهل لثقتج..

حنان .. تمام على بركة الله ..

طلعت من المؤؤسة فرحانة ومتأملة خير

رجعت للبيت تلكتني امي شايلة ملاك سلمت عليها

اخذت ملوكة منها ..

ام جلنار .. الله يساعدج بنيتي بشري ..

جلنار . واني ابوس بملاك واللعبها كتلها ابشرج لكيت شغل ..

ام جلنار .. شنو من شغل احجيلي يمه ..

جلنار.. بمؤؤسسة دينية اعلامية خيرية ..

ام جلنار .. ياالله بس كون شغلة ومابيها تعب الج ..

جلنار .. بعدنا مابلشنه بس ان شاءالله خير ..

رحت لابوية وكتله على االشغل

انطاني محاضرة طويلة عريضة ومن ضمنها اي واحد يخطبج من الدوام اعتبري نفسج مبطلة وكاعدة بالبيت ..

اني مجان الموضوع يهمني الي يهمني اثبت نفسي وبجدارة ..

كانت الايام تمر بسرعة وكنت اباوع واحفظ من ست حنان شتسوي واسوي مثلها

يبدي يومي

ادون ملاحظات واسجل اعداد الارامل والايتام الي يجون لهذه المؤسسة الدينية واكتب معلومات كاملة عنهم

احضر الكاميرات والستاندات وانصبهم

افتح الاضاءة واتحكم بدقة وزوايا العرض

احضر سيناريو مطبوع وجاهز لقائات الارامل وقصصهم وحالتهم ونفسيتهم اجتماعيا

حتى نسجل لهم فديوات تنفع لحتى تنبث وتترتب بعد المونتاج وتعرض بالقناة

بالاضافة الى تجهيز الاحتفالات الدينية من ترتيب القاعة الى طباعة البوسترات الخاصة بالمناسبة الدينية او السياسية الى طباعة وت**يم الدعوات ..

كانت عندي رغبات قوية بكتابة الخواطر واتأثر كلش هواي بالتعبير ونقل احاسيس الارامل وخاصة الايتام اكتب كلام عنهم وعن واقعهم يلامس قلوب حنان ونفسها كانت تتعجب وتجي تريد تعدله تضيف عليه شغلات بسيطة ....

مرت ٤ شهور ذبيت كل جهدي وطاقتي وفعلا كنت احب الشغل رغم التعب والتاخير بين الدوام والمدرسة مرت هالفترة تعلمت بيها كل شي ولحد الان مداخلة التلفزيون والاذاعة كان شغلي يشبه الجندي المجهول بس ست حنان كانت انسانة طيبة بكل معنى الكلمة وعلمتني بدون كلل ولاملت مني .

بيوم الي اتفقو وية بنية خريجة اعلام مذيعة حتى توقع عقد وتقدم البرنامج الي من اعداد ست حنان واخراجها وتصوير شكم ولد بالتلفزيون والاذاعة وانتاجه صار شي غير متوقع والبنية اعتذرت بسبب عقد عمل بقناة معينة خارج المحافظة .

حنان بعصبية ..شلون يعني شباب اني مخلية كل جهدي هالاشهر الفاتت صدك هيج البرنامج يوكف بالله .

اسعد (مخرج) ..لاست بسيطة بس اهدي ويصير خير

منتظر ( مدير التصوير).. ست ليش مندبر اي وحدة من البنات وندربها ليش مو انتي تقدميه

حنان.. لاطبعا اني مااكدر ماعندي هيج جرأة والكاميرا عندي عداوة وياها بعدين اني اكاديمية وشغلتي اعداد مو تقديم .

عبدالله ( مونتاج) .. عندي حل عقلاني يفيدكم بس جاوبوني اول شي من يكتب الاعداد

حنان .. اني احضر سيناريوهات والحوار بس كلام الاطفال والامهات ومشاعرهم هذه مساعدتي جلنار.

عبدالله... هذا هو تاهت ولكيناها شرايكم تخلون جلنار تقدم البرنامج بالبداية بالاذاعة ونسجللها فقط تسجيل واذا مشت امورها واجت عدلة مثل منريد نعلمها تقدم بالتلفزيون

اسعد ...خوش فكرة شرايج بابا جلنار

جلنار .اني بس واكفة واستمع الهم

جاوبته .ها استاذ مااعرف خلي اسال اهلي

حنان ..جربي مخسرانة ياجلنار واني اتصل باهلج شتكولين

جلنار ..تمام ست خلي اتصل بجيران اهلي عالوايرليس

واستأذن من اهلي

واتصلت باهلي وماكنت عدهم معارضة وفعلا بديت احاول اقرا النص وقدمت البرنامج بالاذاعة على اجمل مايكون وباحلى العبارات بحيث الكادر وحتى مدير الاذاعة تأثر وصفقولي بكل حرارة وشجعوني ومااحتاجيت حتى الورقة الي بيها النصوص والحوارات والمقدمة الخاصة بالبرنامج.

بعد نهاية البرنامج

حنان .. وهي تحضني عفية جلنار احسنتي وين ضامة هالموهبة حبيبتي

جلنار ..بفرح ..صدك ست عجبتكم يعني .

منتظر ..جلنار احسنتي تقديمج روعة وكله تلقائية وعفوية

عبدالله ..مايحتاج حتى اقطعه واضيفله شي جميل ومن صدك الحلقة روووعة .

اسعد بفخر.. بس كوليلي من وين جبتي هالعبارات الحلوة عاااشت ايديج يسلم ثغرج

جلنار.. احساس خطوات النجاح الاولى من احلى الاحاسيس لما تقدم على شي تكون خليت اقدامك على اول درجات النجاح وانت تشوف تعب اشهر خلف الكواليس مراح هيج عالفارغ

حنان.. يلا جلنار امشي نوقع عقد وية الاذاعة والتلفزيون وانتي حددي راتبج

جلنار ..ست بكيفج انتي الي تشوفي

حنان ..تعالي ابوسج فعلا احساسي بمحله عاشت ايد اهلج عالتربية الحلوة حجاب واخلاق وفطنة.

جلنار ...تسلمين ست الفضل لله ثم الج اني تعلمت من حضرتج كل شي

حنان... لاتكوليلي حضرتج كافي ولج صارلج ٤ شهور مؤدبة ممليتي هههههه .

جلنار... ههههه لاست مامليت واني فعلا احبج واقتدي بيج من كل قلبي شخصيتج حلوة ست فدوة لقلبج.

حنان ..اعتبريني اختج الكبيرة واني وياج مراح اتركج وفعلا حبيتج ..

كانت لحظات توقيع العقد وتحديد الراتب من احلى اللحظات صح مو قليل ولاكلش كثير بس بديت اكدر اعتمد عليه ويسد جزء كبير من احتياجات اهلي الحمدلله وفعلا بديت اقطف اولى ثمار التعب واجنيهم بعد تعب وشقاء

بيومها فرحتي وفرحة اهلي لاتوصف اشتريت هدايا بسيطة الهم واتفقنا وية عامل جيرانا حتى نرتب البيت وحققت شي بسيط من احلامنا ....

خليت راسي على مخدتي بس مكدرت انام من الفرحة وماريد انطي فرحتي بنجاحي لأي احد والدنيا مو لامتني ابدا

بعدها بايام .. صاحتلي مديرتنا واقترحت علية اشارك بعرافة مهرجان الغدير واكون رمز دعاية للمدرسة كوني امثل الطالبة المجتهدة والشاطرة و كونها مدرسة نموذجية وبنفس الوقت اصغر مقدمة برنامج فالمديرة قدمت طلب وكنا من المدارس الي تشارك بهذا المهرجان ..

وطبعا المهرجان يضم كل الشخصيات السياسية والدينية والاحزاب غالبيتها كانت مشاركة بهذا المهرجان

بيوم المهرجان لبست مانتوا طويل تركوازي بيبي جابته من السعودية لما راحت عمرة ..

وويا حجاب افتح منه ..

اني بطبعي بشرتي صافية وحلوة مهتمة بيها دائما اغسلها بماي الورد الاصلي .. عادة تعلمتها من ماما ..

خليت كحل خفيف ومسكارة وبس لمسة اللون الوردي على شفتي ..

كعدت انتظر حنان تجي عليه بسيارتها

سمعت صوت هورن طلعت بسرعه

شفت سيارة القناة ..

صعدت بيها

شفت حنان معصبة لان سيارتها عاطلة

وصلنه لمكان المهرجان الي كان باكبر قاعة رياضية بالفرات الاوسط ..

صعدت للستيج .. حاولت اقوي نفسي و من كنت اباوع ومن اهم عناصر نجاحي اني اشوف الجمهور ماموجود حتى ماارتبك لان مااسيطر..

الله وفقني وقدمت العرافة بأجمل صورة ورحبت بالضيوف اجمل ترحيب و باجمل العبارات ..

بعد وقوف لمدة ساعتين حسيت بالتعب الشديد وكنت محتاجة ارتاح فعلا ..

نزلت من الستيج توجهت لمكان القهوة

اريد اخذ كوب واروح لغرفة العرافة اعدل حجابي وارتاح واشرب قهوتي ..

صارت عيني بعين شخص مركزت بي هواية لكن ملامحه كانت غريبة ونظراته أغرب

راسا دنكت ..

اخذت القهوة وكفت اسولف ويا حنان شوية ..

واحس بالانظار عليه مجنت اعرف شنو احساسي بلحظتها لان مشاعر مخربطة اهمها الفخر بنفسي والي وصلتله..

بعدها توجهت لغرفة العرافة ..

الي كانت عبارة عن غرفة صغيرة ورة الستيج

بيها نص تخم قنفات وطاولة زجاجية بنصها ..

جذب انتباهي عليها باقة ورد

مديت ايدي تناولتها باوعت الهاا ..

كانت باقة زهور صفرة وعليها بطاقة مكتوب عليها .. ( شما خيلي مهربانيد ).. استغربت العبارة وماعرفت معناها

خليت باقة الورد على انفي استنشق عطرها ريحتها عطر قوي يشبه بالضبط ريحة البهارات المخلوطة عبيرها وعبقها قوي بس مميز حسيت الباقة باردة كلش مبين كانت محفوظة بمكان بارد ..

كنت متوقعتها ورد عباد الشمس

لكن من ركزت اكثر عرفتها وردة النرجس ...

بعدني اشم بيها وفززني صوت رجولي بلكنة غريبة

كال ..عجبتج ؟

..بية حالة من اتفزز راسا اغمض عيوني واخذلي كم ثانية يلا افتحهم ... فتحت عيوني والتفتت

التفت وشفت !!!!!

يتبع .....