صومعة الوهم (طريق الوهم)

#طريق_الوهم بارت ١ نورا ناصر ... لكل امرء من اسمه نصيب اسمي جلنار وفعلا النار ماانجلت من روحي ابد وظلت تاكل بية سنين وسنين ... ويكولون النار تخلف رماد .. اني امي كانت نار لكن ماخلفت رماد .. خلف*ني الي وكنت احر من النار .. كانت الدنيا ليل نايمه بفراشي على الارض بصف الحايط متغطاية ببطانية كان لونها سادة رمادي غامق ومو كلش سميكة لكن متعودة عليها وعلى البرد الي اعتاد يكون عليه جو بيتنا الصغير ٤٥متر بهذا الوقت من السنه .. سمعت امي تبجي وصوت شخص مألوم موجوع كمت بسرعة اتوكأ على الحايط وامشي .اريد بس اوصل واشوف شبيها امي.. . كهرباء طافية بس الفوانيس مشعولة ..والظلام طاغي على زوايا البيت وجدرانه الا من الاماكن القريبة من الفانوس او اللالة .. طلعت من الغرفة الي اني بيها وصلت لعند الهول شفت ابوي يتلوى ركزت بوجهه متزهمر اباوعله يتدحرج بالكاع ديناشغ و كوة يجر بروحه .. وكفت يم باب الغرفة الي يطل على الهول واتف*ج والالم يعصر قلبي .. واسمعه يصيح اشتروني راح اموت .. عمامي كانوا يمه شفتهم لفوه ببطانية اسمعهم يحجون يكولون نودي للمستشفى .. كنت طفلة صغيرة بوقتها مشاعري كلش باهته وحيل صفرة كنت مثل المضيعه شي و ال**ت كان محاوطني بهالة كبيرة مابجيت بس حضنت اخواني اثنينهم وسكتت شعوري مثل الخايفة كلش لكن بدون فزع وبهدوء .. طلع ابوية كلياته شبه متوقفة عن العمل وظل يصارع وية المرض .. كبرنا برعاية اب مريض هو يحتاج رعاية وام شبه ميته فقيرة مظلومة ضاع شبابها على وقت وتعبت .. ماكنت اعرف الفلوس ليش نجمعها وليش لازم ندفع كل شي نحصله للعلاج والاكل .. صار مثل تبادل الادوار داخل البيت امي اخذت مكان ابويه هي الي تشتغل وتصرف وتجيب وتودي .. واني اخذت مكانها وصرت ام صغيرة لاخواني .. كانت امي تحوك وتطرز وتشتغل ابيت الشيخ ابن اختها الي كان ميسور الحال .. مشى الوقت وامي بين المستشفى وبين الشغل مالتها الي يادوب يوفر الفلوس مالت الادوية وبين الحياة الي كانت بعز الحصار والي كان يكوي بينا من اشوف على وقت كبرت كلش.. فد يوم اندكت الباب .. طلعت اشوف منو شفت ابن خالتي الشيخ .. سالني وين الوالدة .. اشرت اله على البيت .. كال صيحيها .. دخلت جوة .. ماما شيخ مروان يريدج بالباب .. طلعت اله امي ودخلته .. جان ابن خالتي بنفس عمرها تقريبا لان امي اصغر اخواتها واخر وحدة تزوجت منهم .. رحت ضيفتهم وكنت اسمعهم يحجون بشغل معين .. كنت صغيرة لكن ذكية وشاطرة حيل .. بعد ماتكلم ويا امي طلع .. سمعت امي تصيحني رحت الها نعم ماما .. تعالي ماما احاجيج .. كعدت بصفها .. كالت ماما تعرفين احنا محتاجين فلوس حتى نعيش .. اني بس اهز الها براسي بقبول .. طلعت قطعة قماش بيضة كالت باعي هذي يسموها اكفان .. احنا راح نشتغل بيها حتى نحصل فلوس .. جلنار .. ماما شنو يعني اكفان وشيسوون بيها ؟ امي .. حبيبتي هذي يكفنون بيها الميت واحنا لازم نكتب عليها سور من القران الكريم وادعية واريدج تساعديني هسه صرتي تعرفين تكتبين وتقرين .. اخذتني للغرفة الثانية .. فرشت نايلون وفرشت عليه القطعة البيضة الي يسموها الكفن .. وطلعت مثل اقلام الخشب ووياها طاسة ستيل مقوسة وخلت بيها زعفران وظلت تكتب على الكفن سورة ص ويس وادعية اخرى .. وصارت هاي شغلتي اني قضيت بيها ساعات هواي شغلها كلش متعب واني طفلة الكفن الواحد يتطلب شغل اسبوع كامل .. كنت بس اريد اخلص لدرجة تجيني ساعات من التعب انام عالكفن .. طلع ابوية من المستشفى وصارت امي تداريه وتعتني بي كنت اني اراقبها شنو تسوي .. واتعلم منها .. كعدت من الصبح شفت امي مخليه عبايتها على راسها اشرت الي بنتي اني رايحة لبيت الشيخ مروان ديري بالج على ابوج وانطي العلاج تعرفين شون تنطينه اله تمام .. جاوبتها اي تمام .. -سباعية بنيتي ويعتمد عليها رحتلج فدوة ماوصيج بعد .. ضحكت بوجهها شجعتني كلماتها .. ودعتها وطلعت .. رحت سويت ريوك لاخواني .. وسخنت مي كفشة الاذرة لابوية يشربه لان زين الكلياته .. وديته اله وشربه .. رحت لمحمد وريم شفتهم مفترشين الارض وجاي يرسمون كتلهم مااريد اسمع صوتكم رايحة اشتغل .. ماانتبهولي .. كررت كلامي .. رفعوا راسهم وهزوا ببرائة وطفولية .. طليت على ابوي جان يصعد الدرج وينزل حتى يوكع الحصو الي بكليته .. ... طلعت برة عندي سندانة وبيها ورد الصباح رحت سقيته .. عندي بطة اسميها فرحة .. رحت الها للقفص انطيتها اكل .. خبز منكع بمي وزواد خضورات .. رغم البؤس المحاط بيه ورغم اكفان الموتى الي اشتغل بيهم بيدي وهذا مص*ر رزقي .. احب الحياة احب الورود واحب اهتم بيها .. رجعت دخلت للبيت .. اخذت الكفن ورحت للغرفة الثانية فرشته اخذت طاسة الي بيها الزعفران وكعدت اكتب تخللت لانفاسي ريحته الطيبة .. وانهمكت بالكتابة واني على هذا الحال .. سمعت صوت ابوية يصيح بصوت مبحوح وتعبان من الالم والوجع .. تركت الي بايدي وطلعت اركض وادور مص*ر الصوت .. لكيته كاعد بصف باب الحمام يتنفس بسرعة والشعور بالالم مبين على ملامحه دشداشته الجوزية مبهذله ومفتوحة الازرار وصايرة على صفحة مبين كتفه منها .. وكفت بمكاني كتله هاا يابة .. شال النعال وشمره عليه اجه بنص وجهي وتحديدا على خشمي هسه انت شامر شامر وكعه بغير مكان اله على خشمي ظل يصيح ولج شتنتظرين ماانطيتيني الدووة .. تقربت منه كتله يابه بعده مو هسه موعده جيت اسنده واكومه من مكانه ض*بني على ظهري بكل قوته حسيت ظهري انقسم هم مريض وهم قوي .. ابتعدت عنه لان خفت لايض*بني اكثر .. صاح بيه ولج وين تردين توديني روحي جيبي الابرة جاي اكلج اااالالم راح يموتني .. جلنار .. يابه عفية ميصير كعدتك هنا عفية الارض باردة موزين عليك .. هد ويريد يض*بني مشاف يمه شي يلوحة وفردة النعال الثانية مو يمه .. كتله صار صار راح اروح اجيبها .. رحت اركض للثلاجة .. طلعتها وجبتها لحد مكانه واني خايفة انض*ب .. دائما عنيف وياي يض*بني باي شي كدامه اعرف ليش هيج يتصرف لان يحس بالنقص والعجز ويشوف امي تصرف عليه فوكعت براسي .. انطيته الابرة بالكانوله .. وبعدت عنه كتله تريد شي بعد .. اشرلي بكف ايده بمعنى روحي .. ابتعدت عنه لزمت خشمي ينزف دم من ض*بة النعال لان ثكيل .. مسحت الدم وظليت انتظر امي بباب المطبخ وابجي .. سمعت اخواني يتعاركون رحت ركض فاككتهم فتت من يم الحمام ابوية ماكو كايم من مكانه .. رجعت للغرفة الثانية اكمل الكتابة على الكفن وشوية احس عيوني بعد ماتنفتح وتغوش دخت كلش ونمت .. ماوعيت الا على لمسة امي تكعدني .. رفعت راسي اباوع الها امي .. هاا ماما شو نايمة حضنتها وظليت ابجي .. ماما ابويه ض*بني وخرت من حضنها كتلها شوفي خشمي .. لزمته توجعت .. كالت ياا هذا مورم .. ماما حاجي بعد ميض*بني .. ماما شحاجي هو ابوج ومريض وتعبان يلله كومي جبت النه اكل من بيت الشيخ يوسف .. كمت وياها والوجع موتني .. بمرور الايام خشمي صار بي مثل الانحراف بسبب ذيج الض*بة .. ومشت الايام واني كمت انطوي على نفسي كانت اول ايام اشتداد عودي توني بلغت وصرت بنية حليوة ونازكة .. سمرة خفيف كلش بدأ ابوية حتى لو يوكف على رجليه شوية يض*بني على اتفه شي من انطي الادوية لومن اض*به الابرة بالوريد شنو يصير كدامه يض*بني مثلا النعال او الشيشة الفارغة مالت الدواء حتى كنت مااعرف ليش يض*ب وشنو السبب مثلا عركة بين اخوية واختي الزغار وتطيح براسي .. بيوم استلام النتيجة كنت طالعة الاولى وانطوني هدية جوراب وقراصة رجعت اركض وفرحانة حيل بالنجاح والهدية سوا .. وصلت لباب البيت شفتها مفتوحه صارت مقابيلي امي تبجي وخشمها احمر وعيونها مورمة مبينة شابعة بجي.. تقربت منها رفعت راسي اباوع لوجها حضنتني .. همست الها والغصة تارسه ص*ري خير ماما شكوو ابوج يابنتي يصعد وينزل الدرج علمود يوكع الحصوة مااشوف اله وكع من فوك الدرج .. مسحت دموعها ونزلت غيرهن وكملت حجيها وهي تبجي بغصة ياعيني عليه ماكدر يلزم نفسه .. وفعلا هو ضخم وطويل وهي ناعمة .. لج يمه وكع وتأذى وشبه فقد الوعي .. راكضت لبيت عمج اجه واخذه للمستشفى .. لزمتها من ايدها ببرائة .. وكومتها من عتبة الباب .. كتلها يلله ماما امشي ندخل متفيد وكفتج هنانه .. دخلنه جوة .. وظلينه ننتظر جيتهم من المستشفى .. اباوع امي مانشفت دموعها من البجي ولكمة مخلت بحلكها .. تفور خطية وتلوج حتى ماكدرت افرحها بنجاحي وبقت فرحتي ناقصة .. شفتها لبست عبايتها . كالت لي ماما حبيبتي اني رايحة ورى عمامج اشوف شنو ابوج راح يصيربي شي انتي وردة بنيتي ديري بالج على اخوتج .. هزيت راسي الها روحي ماما واطمئني طلعت واني ابتديت الم الملابس واحمي الاكل وصبيته لاخواني.. محمد وريم وبس يلعبون ويتعاركون وكل شوية افاككهم .. وره المغرب يله اجت امي.. صاحتني تعالي ماما حبيبتي .. رحت الها شفت الدمع مغرك عيونها .. كالت اني رايحة اروح ابوج حالته تعبانة راح اودي لبغداد لازم يبدون بعلاج تفتيت الحصى .. عينج على اخوتج .. هزيت راسي الها ودمعت عيوني .. ظلت تمسح على شعري وتبوس بيه .. كامت لمت جنطة لابوية والها ودتنا لبيت الشيخ .. اخذت الفلوس منه مالت العملية وراحت ماما لبغداد نمت الليل بس افكر بيها واتذكر دموعها وابجي .. يوم ثاني كعدت الصبح شفت مرة الشيخ كاعدة تشرب جاي بالمطبخ .. كالت هذا ريوك الج ولاخوانج خلصي حتى تشتغلين هزيت راسي كتلها اي .. ريكت اخواني .. و استلمت اني الشغل .. بيت الشيخ كبير قرابة الف متر ظليت اكرب واشتغل .. جيبي هذا ودي ذاك .. للظهر شفته اجه واني بالطرمة جاي اغسلها سلمت عليه ضحك بوجهي .. وباسني على راسي كال هلا بالهندية ودخل .. سمعت صوت مرة الشيخ تصيحني جلنار تعالي امج تريد تحاجيج سمعت امي رحت اركض .. تدعبلت بنص المي وكعت كمت انكت بملابسي .. وكملت ركضتي .. شاف*ني مرة الشيخ ملابسي مبللة ظلت تباوعلي ولازمه سماعة التليفون الارضي كالت هاي شنو بانزعاج كتلها ووكعت .. انطتني السماعة وراحت .. اخذتها منها .. صحت ماما .. . -ها بنتي شلونج وشلون اخوتج .. -الحمدلله ماما ابويه شلونه -ابوج مايتحسن بسرعة .. وظلت تبجي تكطع القلب .. لا جنت اعرف اواسيها ولااعرف اشيل الهم عنها هو هنا اني وياها واحد .. واثنينه شركاء بالهم .. سديته منها .. اجت مرة الشيخ انطتني قائمة اعمال جديدة .. وظليت اكرب ولاارتاحيت .. واني من فقاريتي او لان اشوف امي تنظف بندارة ويمدحوها اني هماتين اركض وتنظيف وشغل صرت نسخة امي المصغرة ... ٣ ايام متت بيهن .. واني عمري ١٢سنة بس مارحمتني .. ظليت احس بالشيخ من مرات يشوفني اتلقاه يبوسني براسي ويكلي ناره انتي وردة وندورة.. و كنت الاحظ انه هو مايمدحني كدام مرته بس بيناتنا.. خلصت ال٣ايام اجت ماما علينه انطوني اجرتي مال الخدمة . ورجعنه لبيتنا .. اول ماف*نه شفت ابويه وعمي يمه وجه ابوية اسود مزهمر شكله مخيف .. هو بدون شي عيونه مخنزرات وجان يون من الالم .. اخواني من شافوا صاروا خرسان واني بقيت واكفة بمكاني .. اخذتنه امي للغرفة الثانية كالت ابقوا هنانه وبدون صوت ابوكم تعبان ... واستمرت الايام ماما تطلع الصبح ترجع بليل قريب الغروب عد اني استلم شغل بيتنا من ريوك اخواني للتنضيف وملابس وكل شي .. واذا اندكت الباب ماافتحها ماما متقبل وابوي لا حول ولاقوة .. دخلت ماما وكالت بقهر غديتي اخوتج اي ماما .. عشيتيهم .. اي ماما .. وابوج اخذ دواه .. اي ماما .. كالت وشنو بعد شطفتي ونظفتي وحفظتي وكامت تبجي وتدك على رجليها ونهايتج خدامة مثلي لو تغيرين مصيرج بيدج .. وانهارت كلش وتبجي ووكعت علينا حلكها يابس .. انضاف لقهري قهر جديد كنت قبل من بابا يتخربط اعرف انه مريض يتوجع وابجي على بجي ماما واحضن اخوتي بس ماكنت اعرف شنو يعني قهر طفلة مهمشة مثل الانسان الالي تحب تتقرب لامها بس ماتدري هالشي يمكن يضرها لان امها شخصيةضعيفة ماتلحك تشوف وجهها بالمراية .. ظليت اكعد بيها وابجي .. ماما حبيبتي اكعدي .. مجانت تكعد ابد رحت ركض للمطبخ وسويت مثل ماشوف ماما تسوي لبابا وارجف وابجي .. طلعت كلاص وخليت بي ماي وشكر .. خليتلها مي وشكر بحلكها وهم ماكعدت .. بسرعة لبست جورابي بالمقلوب ورحت اركض لبيت جيرانه .. دكيت الباب طلعت خالة ام علي .. كتلها واني اناشغ وابجي .. فدوة خالة الحكي ماما مااعرف شبيها .. دكت على ص*رها كالت ياااا .. ركضت قبلها وهي تبعتني .. اجت كعدتها وسوتلها جاي نومي بصرة وحلته كلش.. وبقت يمنه شوية وراحت .. بقيت مكابلتها وابجي واخوتي هم وابوية يباوع الها بعيونه القاسية ويدك على رجله .. بقت امي لليل يلا حاجتني .. كعدنا اني وياها بالغرفة الثانية .. كالت انتي لازم تساعدينا وتتزوجين الشيخ مروان .. ضحكت خجلانة .. كتلها شنو اتزوج ماما عيب مااعرف شجاوبها .. كالت راح يسألج ابوج كوليلة موافقة ماشي .. بجيت كتلها ماما ومدرستي .. ... ماكو مدرسة بعد يدللج ويشتريلج موز واسوارات انتي تحبين الاسورارات . ... لا حبابة امي مااريد والله استحي ... بنتي اذا سالج بابا وعمج كولي اي موافقة خوش ؟؟ #طريق_الوهم بارت ٢ نورا ناصر .. الطفولة احلى مرحلة بالحياة حتى لو كانت قاسية وحتى لو جارت علينا الدنيا وكبرتنا قبل الاوان خاصة لماتكون الطفلة مثل الزهرة الي تنمو بنص الشوك كل شوكة تحيطها تحاول تمنع عنها الأذى وبنفس الوقت تخنكها وماتخليها تغادر مكانها لحد ماتستنزف طاقتها جلنار يازهرة بوسط النار شراح تسوي بيج الأقدار ... امي .. اذا سالوج ابوج وعمج كولي موافقة ماشي .. رفعت روحي صرت مقابيلها و ايديه بحضنها لزمت طرف ثوبها قوي كلش قوي.. عيوني المدمعة بعيونها التعبانة والمرهقة .. كتلها لا ماما عفية الا المدرسة احبها كلش .. فدوة مااريد اتزوج اوعدج اشتغل اكثر اساعدج بالصوم والصلاة .. ( الاستيجار .. الصلاة والصوم عن الموتى مقابل المال ) ... ظلت تمسح على راسي بحنية .. كالت هو كال بس يعقد عليج وتبقين يمنا هنا من تكبرين يتزوجج .. كنت طفلة حتى مااعرف شنو يعني يعقد كلت لا ماما والله عيب من خالة نداء اخذ منها زوجها .. امي .. يابنتي هو اول وتالي يريد يتزوج سواء انت او غيرج اني اريد راحتج ياامي هناك يمه راح ترتاحين شوفي مرته شون مرتاحة ومدللة . جلنار .. اني مااريد اصير مرته عفية جنه سندباد محلوو .. ضحكت على برائتي بضحكة متعوب وجارت عليه الايام .. تمددت وقلبت نفسها صفح وخلت ايدهه جوة راسها واستسلمت لنوم عميق جدا بعد نهار متعب .. اما اني صفنت .. وسرحت بتفكيري شون الي شافه بيه الشيخ مروان ورادني بعدني صغيرة شنو الي يعجبهم بالصغار مو لازم اكبر يلله اتزوج فكرت هواي .. شفت امي غفت واني بعد مااعرف شكد نمت . يوم ثاني كعدت وهيه جانت كاعدة من الصبح تكمل شغلها من خياطة او تطريز او حياكة .. ومن اكعد اني هيه تروح لبيت الشيخ المعمم مروان ابن اختها (ابن خالتي) .. تخدم عدهم حتى لو مريضة تروح .. وكالعادة ريكت ابوي واخواني لميت البيت ونظفته .. رحت سقيت وردة الصباح .. ورجعت على فرحة بطتي الصغيرة خليت يمها الاكل الي شلته من البارحة وخليته كدامها تاكل وترفع راسها امي تكول جاي تدعيلج ظليت امسح على ريشها بايدي الناعمة .. بعد دقايق سمعت صوت اخواني وعركتهم رحت فاككتهم .. ومن شغلة لشغلة .. وكت الغدا سويت محروك اصبعه .. ااحمس البصل وشوية حلبة وكركم وملح واخلي مي يفور ويقلب قبل لايتهدر اذب خبز يابس زغار وكمع **ون يابس من يتنكع مرات يذبل ويصير مثل ثريد الالباقلاء بس احيانا يبقى كمع **ون يابس يصير يشبه العظم هذه اكلة الفقراء الطيبة محروك اصبعه.. بعد ماكملته صبيت لابوي وحدة واحنه كعدنه ناكل بالمطبخ .. بطيبة قلب الام الي شايلته اريد اونسهم اخذت كمع **ون وخليته بين اسناني كتلهم شوفوا شون هذا العظم مين**ر وظليت اعضعض بي .. ظلوا يباوعون ويضحكون تحمست زايد ... الله الله شوفو العظم شلون طيب يخبل.. شفت اخوية محمد يقلدني اخذ الكمع وخلا بين اسنانه ورص عليه قوي .. هي لحظات مااشوف الا الدم ينزل من حلكه .. اثاري طك سنة ..وظل يصيح ويبجي .. اخذته اكود بيه لازمته من اكتافه وركض للحمام واسمع ابوية يصيح وراية شكوو ولج شبي محمد .. كتله ماكو يابه بس ديشلع اسنان .. غسلته ونضفت حلكه .. ورجعت للمطبخ .. شلت الصينية وغسلت المواعيين .. صار الليل وامي مااجتي .. واخواني جاعوا وابويه يصيح اريد عشه .. رحت اخذت ركية جانت موجودة جوة الحِب (الحِب إناء مصنوع من الفخار) غسلتها خليتها بالصينية وشيفتها وكعدنا ناكل .. خلصت اني بسرعة كتلهم رايحة اسبح طبيت للحمام سبحت وانكطعت الكهرباء .. لبست ملابسي بسرعة وطلعت .. ابوي بالعادة ينام من وكت .. ظليت ادور عليهم ماكو هما .. ظل بالي كلش.. سمعت صوت ضحك ظليت ادور المص*ر .. صعدت ليفوك .. وجان اشوفهم ماخذهم الواهس ويشمرون ركي ع الجيران .. فد فرحانيين ويضحكون .. ظليت اضحك طليت من فوك شفتهم اكثر شي مستلمين بيت ام محمود ا** مربع والمرة طالعه برة تصيح وتتكاون ويا ام حيدر جيرانه مقابيلنه .. ام محمود .. لج عيني متلزمينه لابنج هذا شون بلله .. ام حيدر .. ياعيني دكوولج مو هو والله مو هو هذول جهال ام جلنار الي شمروا عليكم .. ام محمود .. لا عيني هاي سوالف ابنج واش خطية بيت ام جلنار نايمين .. خليتهن يتكاونن .. سحبت محمد وريم من ايديهم نزلتهم جوة .. طببتهم بالحمام غسلتلهم واني احجي احسن هيج خليتوا الجيران يتعاركون .. واحد ظل يباوع للاخ ويضحكون .. خزرتهم بس مسيطرت مكدرت امثل دور الام العصبية طكيتها ضحكة .. طلعت نشفت ايديهم .. شفت امي جاية .. مدده رجليها وكاعدة تعصر بيهم .. وعبايتها يمها .. التعب ماخذ هواي منها .. وانفاسها سريعة .. رحنه يمها بوستنه كلنه وحضنتنه وكالعادة ظلت تسألني على الي صار باليوم كله .. امي .. جلنار باجر نروح لبيت الشيخ مروان عدهم شغل حتى نعزل مساعدات الارامل والايتام .. جلنار .. ان شاءالله ماما اروح وياج صار الصبح .. دزينه على بنت عمي مياسة اكبر مني بسنتين تبقى يم ابوية والجهال .. ورحنا اني وامي .. دخلنه لبيت الشيخ .. تلكانه هو من باب الصالة .. سلم على امي.. كال هلا خالتي .. ورد سلم عليه بابتسامة وكالعادة يسميني الهندية كال هلا بالهندية .. ضحكت كتله شلونك خالو .. عبس وجهه عبوس مصطنع كال بعد لتكولين خالو وباوع لامي كال عود كبريها الي خالتي .. اني مجنت فاهمة من كلامه شي .. شفته يضحك ويا امي ويشاقة سرحت بتفكيري لبعيد وافكر بكلامه .. دخلنه جوة .. كعدنه وظل يتحاسب ويا امي انطاها فلوس مال الشغل .. وهواي كرر جملة ابرينة الذمة !! وكانه يكولها عن ندم .. جان احساسي يكول هيج .. بعدها انطاهه قائمة باسماء عدد من الاموات للصيام عنهم والصلاة مقابل فلوس .. كملت محاسبة وراحت على شغلها واني هم على شغلي .. بوقتها جانت زوجته ماكو بيت اهلها لانها من غير محافظة .. دخلت للمطبخ اعزله لان امي كملت طبخ وبقى عليه تعزيله .. شفته دخل وراية .. دائما يدلع اسمي كلي ناره الوردة رحتلج فدوة كليلي بيضةبالدهن جوعان بس خففي الدهون .. كتله ادلل خالو .. مو كتلج لتكولين خالو وضحك .. اني ضحكت ودنجت وهو طلع .. رحت خليت خاشوكة كوب زيت ومسحت الطاوة بكلينس و قليتها ونصيتها صار زيتها قليل .. خليتها بماعون وخبز وصينية وديتها اله للصالة كاعد .. ... من دخلت عليه كال هلابالفلفل.. استحيت وبعد شوية وجهي يصير بالصينية حسيت بي يمدحني براحته لان مرته ماهية كمت اضحك .. نصيت نفسي وخليت الصينية كباله ... اريد اروح صاحني .. التفتت اله .. نعم خ .. وسكتت . باوعني ابتسم .. مد ايده بجيبه وانطاني فلوس بنفسجية مااتذكرها شكد رفع نفسه صار بمستواي و باسني براسي وعيونه تلالي.. كال رحت فدوة لام ل**ن الدافي.. خلص اليوم ورجعنه للبيت ميتين تعب .. شفنه مياسة بنت عمي مطنكرة بوزها واصل لراسل الشارع . اكيد تعبوها الجهال وطلبات ابوية .. امي .. بنيتي خو ماتعبوج .. مياسة .تحجي وهيه مبرطمة ... طلعولي قلب بصف قلبي والله ياعمه . طلعت امي جزدانها وانطتها فلوس هاج هاي عمه مشكورة مقصرتي .. هي شافت الفلوس وتلاشى عبوسها بلحظة خمشته من ايد ماما كالت شكرا بسرعة وراحت تمشي اسرع وتقلب بيها بسعادة .. ضحكت عليها ودخلنه جوة للبيت .. كنت فرحانه كلش بالفلوس الي انطاها الي الشيخ صحت لمحمد وريم .. راح اروح اشتري من عمو ابو جواد .. همه كيفوا وارتسمت ابتسامة عريضة على وجوههم .. رحت صوب المطبخ .. امي دتحضر النا الاكل .. كتلها ماما اليوم الشيخ مروان انطاني فلوس رايحة اشتري لاخواني وارجع .. دخلت شعري المسرسح بحجابي وكالت بسرعة لتتاخرين مدام ابوج نايم ليكعد يسوينه سالفة .. هزيت راسي بقبول كتلها اي ماما اوعدج مانتأخر .. طلعنا من البيت صار كبالي حيدر واش مثل بيب بيب يركض ويسحب الخشم هههههه خشمه يخر صيف شتا اشكر وشعره كفشة .. بس دمه حامي وعنده غيرة يتخبل اذا ابوي يبسطني .. التحق وياي و مشينه.. ظلينه نكمز طول الطريق اني وحيدر واش .. واهم شي نشتري النبك .. من عمو ابو جواد البقال العجمي اوووف ابو جواد.. بس وصلت يمه انطيته فلوس .. ها عمو نبكات حلوة بروح جدك المسموط اقصد بروح مرتك . ابو جواد .. خفت الج وعابتلج ادبسز وتربية سز انتي كولنار.. لانه هو عجمي تصير لهجته ثقيلة والجيم يحولها گ.. جلنار .. يلا انطيني النبكات .. شمرهن علية ووكعن براسي وعنجر راسي لانهن يابسات وبسرعة ساغت روحي وعيوني حومرت.. وحدوري حبيبي بصفي .. كال انا خوك صدك تبجين نارة ليش تض*بها عمو عجمي .. كتله جيب ربعك حتى نحارب .. راح يركض مثل بيب بيب وجاب ربعه من راس الفرع وحاربوه بالحصو.. واني شفت السالفة حمت طكيتها درب الخيانة والفلته العظيمة وعفته يتقاتل وياه وبيومها فشخوه هو ومرته ههههههههههه سودةعلية.. واني ابيتنه سمعت امه تبسطه يم الباب وتكوله هم شجراية وهم بيك البلة .. ظليت مدري اضحك مدري ابجي على شجراية لانه انبسط بسببي .. بليل اندكت الباب فتحتها شفته حيدر واش جابلنا ماعون تمن وقيمة وخضرة .. اخذتها منه وكتله ها واش اسم دلع لحيدر.. كلي اسكتي ولج اموته اليدنالج اشعل عشيرته ههههههه حسيته بطلي بلحظتها .. اخذته منه ودخلت جوة .. فرحانه بالقيمة .. خليته بالمطبخ وصار عليه هجوم من كل جانب .. محمد وريم .. صاحت امي بيهم ولكم خلي يجي ابوكم بالاول .. شالته منهم وخلته كبال ابوية وكعدنه ناكل بس بخوف .. يوم ثاني راحت امي لبيت الشيخ مثل كل يوم واني بقيت الملم بالبيت اسقي ورداتي .. وكعدت اكتب بالكفن .. وسمعت صوت صايح ابويه .. طلعت اشوف شكووو .. مااشوفه اله شالني ليفوك والله وصلني للبنكة ورجع ض*بني بالكاع .. حسيت ت**رت ت**ر لزم شعري كطعه تكطع موتني من الض*ب كلها هاي واني ماادري على شنو .. الى ان سمعته يسب بيه ويغلط ويصيح بعلو صوته ولج عايفتهم وييين **روا نظاراتي لج كلبة انوووبه تاخذيهم يمج بالغرفة افتهمتي .. بس ظليت اهز براسي وعيوني مفتوحه على اوسعها .. حتى صريخ مااكدر اصرخ والالم بكل انش بجسمي .. لزمت زاوية وظليت انشغ بس بدون بجي بس الوجع جان جبير كلش جبير بجسمي وبروحي .. اقتربوا مني محمد وريم ويمسحون على جسمي ..مثل ديعتذرون الي بصورة غير مباشرة .. بعد وقت من كعدتي .. شفت هواي شعر واكع من شعري .. كمت اجر بروحي جر اسوي الغدا خاف لاانكتل بعد مرة ثانية .. نومت اخواني ورجعت .. كعدت وحدي واكتب بالكفن ظليت اجر بالخط واتونس بي واكول بالياء خطيته كلش حلو كنت اعرف شنو يعني كفن بس مشايفة ميت ولا مدركة لحجم الشغل الي اشتغله هدفي ارضي امي واحن على اخواني هدفي شلون افرحهم وبس رغم الكتلة الي اكلتها من ابوية .. طلعت وكت الظهر صبيت اله غده اخذته للهول مكان ماهو كاعد ممدد رجل ومثني رجل الثانية .. بعدها اثار الض*ب توجعني براسي وايدي وكل جسمي الي ركعه بالكاع .. قدمته اله الغده والخوف متملكني ومحتل كل خلية بجسمي .. وباي لحظة خايفة ليض*بني واموت جوة ايده .. خليت الصينية بالكاع وارجف ورحت بسرعه .. انتظرت امي اجت .. تلكيتها من الباب .. باوعت الها بعيون دامعة بس منزلت على خدي لكن احس عيوني نار وتحركني .. خليت ايدي على راسي وشوفتها شعري شلون مشلوع من جهة كصتي .. كرفصت وصارت بمستواي .. كالت مو اكولج اقبلي بالشيخ مروان هو خلاصج يابنتي .. ظليت اناشغ بس بدون بجي والدمعة محجرة بعيني وتحركني .. ظلت امي تمسح على مكان المشلوع من شعري وتبوسه وصارت بوساتها ولمساتها اله علاج .. ايد امي الخشنة المتعوبة فززت ضميري وخلتني اانبه ووياه صوت قوي بداخلي يكولي ياجلنار تعبين امج وتحملينها فوك طاقتها .. اكتفيت اشكي .. ودخلنه اني وياها .. للبيت .. بعده ضميري يانبني اريد ارتاح كتلها كملت الكفن وخلصت صلاة مال يومين عن الميت الفلاني .. باستني على راسي عفية بنيتي .. اخليلج غده ؟ لا بنيتي تغديت ابيت الشيخ مروان .. الفين عافية على قلبج ماما .. مرت كم يوم .. اخذتني امي لبيت الشيخ رحت وياها .. اشتغلت ونضفت ومن بين الشغل جان لازم ادخل لغرفة الشيخ انضفها .. دخلت وبديت ارتب مكتبته للشيخ نزلت جوة ميزه شفت اكو جرارة حديد جبيرة تلمع وبيها مفتاح ومردودة بابها . اول مرة اشوف مجر بي باب لاهو كنتور لاهو مجر زغير ظليت اباوع الها مستغربة وفاتحة عيوني .. فضول قاتل اريد اعرف شنو بيها .. وبهالاثناء سمعت صوت باب انفتحت شلت راسي شفت الشيخ كبالي عيونه كلها استفهام ومفتوحه على وسعها وبيها ابتسامة غريبة .. رفعت جسمي ارجف مستحية وخايفة .. طبك الباب وراه وتقدم باتجاهي وهو مبتسم .. يتبع ..