صومعة الوهم (طريق الوهم)

الفصلان الثالث والرابع

#طريق_الوهم

بارت ٣

نورا ناصر ..

يكولون الحياة اكبر واحسن معلم بالدنيا تعلمنا بالتجربة وبالبرهان والدليل والنتيجة ..

نكدر نكول تشبه بشكل قاسي معلم الرياضيات

لما يبدي يعلمنا واحد + واحد يساوي اثنين..

وياخذله وقت كبير لحد مانتعلم واحنا بنعومة اظافرنا وبعدين فجأة يعلمنا شي جديد شي يبعث الأمل حتى لو طريق جديد المهم طريق يطلع نفس النتيجة لما يبدي يعلمنا

صفر + اثنين يساوي اثنين .....

الشيخ مروان .. بعيون مفتوحه ونظرات غريبة

رحتلج فدوة شهالطول شهالفرة الحلوة شلونج يانارة شلونج ياام خدود الرمان صدك من سماج نار بوية شو دتكبرين وتحلوين يوم عن يوم ..

اني صفنت بوجهه يا شبي الشيخ اليوم ..

ببرائة وارتباك كتله .. ااا شلونك شيخنا خالو شلونك اااا اااسفة ماادري المجر مفتوح وبي فلوس جاي اعدله

طكها ضحكه شكبرها وكرشه الزغير يهتز

فدوة الج الشيخ وفلوس الشيخ وقاصة الشيخ...

اني على رسلي هماتين ضحكت على ضحكته

وسالته بعدم فهم وبابتسامة شنو يعني قاصة ؟

وهو يتقدم باتجاهي كال .. تعالي لي اعلمج القاصة وضمي شعرج ولفي روحج انت كبرتي وصايرة تنكطين ملح ..

وصل الي وكمل كلامه ..

كال قاصة يعني مكان نخلي بي فلوس ..

بعدني مصفنة شوف ابو كرش وكريعة هماتين كنتوره يختلف مو مثلنا

كال .. تحبيهن مو؟

كتله .. منو ؟

كال .. الفلوس

كتله اموت عليهن

طكها ضحكة ..

كال شتسوين بالفلوس ..

كتله واني اعدل ب*عري المزعج يتسرسح من ربطتي لاني دوم اغسله طبيعته يحتفظ بالرطوبة ويظل يتسرسح ..

واني اعدل بحجابي

رحت ليغاد يم المكتبة وظليت اعدل بالكتب وارتب بيهن ..

كتله اي كومة شغلات اريد اشتري ثياب لاخواني جاي الشتاء ..

ومااخلي بابا يتوجع بعد ابدا

واشتري لماما فستق مشتهيته من زمان واصبغ بيتنا مثل بيت ام سلمان جوارينا لان بيتنا كله صخام ومو حلو ووو بعدني استرسل بالكلام ..

شلت راسي لكيته صافن بوجهي مثل واحد ديفصلي ملابس نفس نظرات الخياط ابو حسين الي بشارعنا .

كال تتدرين انتي عقلج جبير

كتله شلون شكبره اكيد مو بكد عمامتك . .

ضحك

وكال ...وقلبج اكبر

كتله لا مو حلو ماريد قلبي يكبر يصير سمين مرعبل ..

..والله راح ينطيج على كد نيتج

كتله لا ماريد بكد نيتي اريد اكبر من نيتي واشتري نفاخات وشعر بنات ..

وانت حيل تشبهيني

كتله

لا خالو بكل عفوية لا لا ..

مدري منين جبتها بساعتها هالجملة انا لاشبه احدا ابدا

كال ليش ولج ام لسان...

كتله لانك تشبه سندباد

كال اني ولج نارة تشبهيني بسندباد ه الله يلعن ابليسج يابوية الضحكه راح تطلع من خشمي ..

كتله على كولة بيبي اتفل بحلك الشيطان

كال لا.. نارة لا لازم من نضحك نباوع لاظافرنا ونكول بينا وبين نفسنا اللهم لاتمقتنا بعد ضحكنا هذا

كفارة للضحك الزايد لان الضحك من ابليس وخاصة اذا بي قهقهة..

واني دعبلت لزمت بطني من الضحك حجيت بقلبي والله انت ياشيخنا الواش مو حيدر ابن جوارينا .

كلي يلا رددي وراي حتى تتعلمين اللهم وشال راسه عينه عليه كال نارة باوعي لاظافيرج..

كتله اي.. حسيت بذاك الوقت الوائلي ويعلم بيه لان بابا يسمع الشيخ الوائلي الله يرحمه من الاذاعة لان كان ممنوع بس هو يظل يدور بالراديو يطلعله ويسمعه ..

كتله بضحكه اللهم امقتنا بعد ضحكنا..

طكها ضحكه ..

وبهالاثناء كبت العيطة ومنسمع غير العركة الزينة كلي ها نارة والله استجاب دعائج عاش ل**نج بوية خوش انمقتنا..

ونزلنا نركض واشوف امي وخالتي الي تشبه امل طه وامي يمها بكد سنفورة وبناتها جنهن جيوش الاشرار ا****عة الي هجمو على عدنان ولينا هههههه مدري شسوي وحجي بينهن وعار ومعيار ..

ام مروان... ولج غبرة لو ماحنا جان كتلج الجوع

امي تكلها بدموع.. انعم الله عليج خالة

الشيخ مروان صلن عالنبي انتن خوات ..

ام مروان عوع اختيش كاسرة وجوهنا مدري وين تودي الفلوس عبايتها مسحتلة وغبرة وطبخها زفر ..

ام جلنار .. على شنو هذا كله خو كليلي اللحم زفر والله خية بيدي نظفته ..

ام مروان يا يعني نتبلى عليج انتي وبنتج الغبرة فاهيات بس ل**ن وبوخه . .

الشيخ مروان يمه طبخ خالتي لايعلى عليه وهذا اللحم وخلاه بحلكه .. لعبت روحه..

ام جلنار لاخالة صدك جذب فدوة هسا اطبخه من جديده واعدل بهاراته واكش زفرته

ام مروان... دروحي عيني والله غبرات مدري منو ضاحك عليجن وخلاجن تصدكن طبخجن طيب انتي والجلحة بنتج

ام جلنار .. عيني بنتي جلنار ماعليها هاي شو منو من بناتج لعبت بالكدر وكشفته امهات نفس الدنية مايصبرن وخلت زفرته تبقى جوة .

ام مروان .. عيني انتي فالحه بس تكابلين رجلج السكط وتعالجيه ماتعرفين كلشي تسوين .

الشيخ مروان .. يمه عيب هالحجي وحرام ابو جلنار مبتلى والمؤمن يبتلى بالمرض والعافية .

ام جلنار .. رجلي مو سكط رجلي مريض الله ابتلاه بمرض وان شاء الله يطيب ويوكف على حيله .

ام مروان.. اي ان شاء الله يطيب ويلمج ويلم بنتج لاتروحن تاخذن عالخدمه بالبيوت .

ام جلنار .. نعم الله عليج خية اني اخدم بالبيوت اني اطبخ كل خميس واساعدكم بثواب الموتى امواتنا تعرفيهم امنا وابونا رحم الله والديج يبنت امي وهيج عيشة بهيج مذلة ماينراد ..

ولفت عباتها ونست حتى اني موجودة..

صدك متت قهر من شفت امي ودموعها وتدافع عننا وعن كرامتنا وعن ابوية صدك كبرت بعيني..

نزلت من اخر باية بالدرج اريد الف ربطتي عدل واطلع واسمع بنتها لخالتي الجبيرة

ام تقوى كلش ايمان وتقوى بعد عيني تكلها صليها (يعني كف بكف حركة دليل على الانتصار)..

ام نور بنت خالتي الازغر .. يا ولج حرام عليج خالة ام جلنار فقيرة ويتيمة هسا تطلع حوبتها بيجن .

ام تقوى.. دروحي خلي نزوجه بت عمنا على مزاجنا حتى الخير كله النا ..

ام نور .. ميخالف بت عمنا نزوجها للشيخ مروان

بس ليش ولجن مكيدة شكبرها وعركة وهزة بدن علمود لحم انتن مزفراته شسويتن ولجن ؟!

ام تقوى .. ماسوينا بس ضلينا كل شويةنكشفه وحتى يجزر ومايستوي ويصير زفر ..

ام نور .. حوبتها راح تطلع بيج لو ببناتج خالتي واعرفها والله تشور يتيمة..

ام تقوى.. اي من عين باجر تشور بينا

كانت شورت بنتها برجلها من يحط الغبرة جلنار مسويهن مدامغ ..

لهناك صرت بكل قوتي وكفت كدامهن وهن بهتن بوجهي ..

ام تقوى.. جلنار حبيبتي فدوة شلون وجه وين جنتي..

ام نور .. حبيبتي جلنار شبيج تلهثين وخشمج طك دم..

جلنار .. مابيةشي بس ماما حوبتها متروح هدر والا اكول للشيخ عليجن وطكيتها ركضة

وهاي كانت اول مواجهة الي لخاطر امي وخواني وابوية اهلي الي افديهم بقلبي وروحي

واحن عليهم واسوي اي شغل لخاطرهم مثل روحي معلقة بيهم مو بس قلبي ..

وطلعت اركض واشوف الشيخ ينفت منلحك بأمي

كلي نارةابقي اني اخلي احمد يوصلج( ابن خالي الثاني)

كتله لامشكور ...واستمريت امشي .. وهو وراية سمعته ..

كلي صبري ولج لاتوكعيني مالحك اركض شنو شادة برجيلج بوية شنو جنج ريح الهاب تفرين فر ..

وكفت كباله كتله يلا امشي على كيف بس خاف منلحك بأمي ..

كال لا نلحك هياته الدرب شمرة عصا ..

اني بية حالة خشمي من انقهر بسرعة يطك دم وراها بشوية بسرعة يوكف

ظل يباوعلي .. لزم خشمي ومسحه بحنية ورأفة..

كالي نارة شبيج ترجفين..

كتله امي اعز من روحي ليش هيج خالة سوت

كلي اكو شغلات الكبار يسوونها الزغار ميعرفونها يانارة..

كتله بس امي طبخها طيب ..

كال اي طبخها طيب لاتنقهرين ..

استحيت لان نظراته خجلتني ...

كتله اني رايحه وره امي..

وطكيتها ركضة لحكت عليها تركب فورتات واريد ابجي مااكدر العبرة مت**رة بقلبي شعور يقهر من اني زغيرة واريد ادافع عن امي مااعرف شسوي صايمة واركض والهث..

لحكت بيها الحمدلله شادة جروخ امي ..

مبينة وجهتها الامام ع حتى تفرغ همها هو ابو الايتام واحسن من كل الاقارب صعدت بصفها خليت ايدي على ايدها وراسي ميلته عليها بالسيارة بالاخير كاعدين

وحاجيتها ماما ..

امي مجاوبت بس صوت نشغاتها ..

رجعت حاجيتها .. يمه حبيبتي

كالت عوفيني شجابح وراية..

كتلها شلون اعوفج اروح وياج خاف يصير بيج شي...

حضنت ايدي..

وكالت يا بعد امها الحنينة ...

كتلها ماما ترا بنات خالتي هنه فتحن الجدر ...

كالت ادري بيهن ..

كتلها طبخج طيب والله لاتنقهرين ..

وصلنا لحرم الامير ودخلنا نزور ..

ام جلنار .. بصوت مبحوح وكله ألم

يامولاي جيتك لحضرتك وقلبي نار لاتردني خايبة اريد الرزق والعافية وجبرة الخاطر يامولاي انت شفعينا لرب العالمين طفي هالنار الي بقلبي نار القهر والذل يامولاي بردا وسلاما على قلبي وقلب كل مؤمن ومؤمنة ..

جلنار بحضرة الامام ع الريحة الي تملي المكان تشبه الورد والحضرة كلها بالعطر الي ترس ريتي بودي احبسه ومايطلع ..

ضيوف وناس من كل مكان تختلف لهجاتهم بس يجمعهم الأمل والدعاء الثريات الي بالحضرة نفس الزيارة والناس الي تروح وتجي ناجيت رب العالمين وتشفعت بالامام لانهم وسيلتنا يامولاي بعيون مليانة دموع وصوت اقرب للمناجاة والترتيل مولاي اني احبك واحب ماما وبابا فدوة مولاي برد قلب أمي بجاهك عند الله وخلي الألم يطلع من بابا ويجي بية مولاي ماريد اتزوج الشيخ اريد اكبر واطير مثل ذيج الحمامات الي بحضرتك ..

الله احلى شعور من تشوف الحمامات تلكط حبوب الحنطة ورزقها على الله ياحمامات هم تجوعون لو تعطشون بهالحضرة جاوبتني مرة جبيرة كاعدة على وحده من لولواين الصحن (الليوان مكان مثل القبب المقوسة مبنية بطريقة حلوة ورسوم كلها تجنن وخطوط وايات قرانية وتصير بيها باية عريضة او دچة مرتفعة عن الارض) ..

كالت.. لايبنيتي الحلوة الي بحضرة ابو الايتام مايجوع ولايعطش ..

ابتسمت لها بكل برائة يعني اني اذا جبت خواني هنا مايجوعون حتى لو تزوجت الشيخ وكبرت حجيتها واني جاي اتوكأ او انتچي بكف ايدي ولاحتني برودة المرمر ..

كالت شسمج حبيبة ..

كتلها بيبي اسمي جلنار

اني العلوية فضة يمة ..

العلوية فضة .. بيبي انتي جاية وحدج

جلنار... لابيبي ذيج ماما هناك حجيتها بعبرة

العلوية فضة ...امشينا ليها

جلنار ...وتمشينا وانتقلنا لليوان يبعد ٣ لواوين عنا يصير مقابل باب الضريح ..

وصلنا ليم امي

العلوية فضة لزمت امي وظلت تحاجيها ..

حبيبة لاتبجين كافي بنتج تباوعلج خطية ..

ام جلنار .. حجية رحم الله والديج عوفيني قلبي موجر

العلويةفضة ..بجيتي وفرغتي همج كافي يمة الله يعرف بقلبج هذا ابو خيمة الزركة مايردج خايبة ان شاء الله ..

جلنار .. اي ماما فدوة لاتبجين عيونج صارت حمر اني يمج امي حبيبتي واتعلم التطريز واساعدج بعد منروح لبيت خالة ..

ام جلنار ..تعالي لحظني حبيبتي بنيتي

العلويةفضه ..يمه تكضي ماتظل هيج الدنيا ماتدوم لابفرحها ولابحزنها والله يبرد نار قلبج ..

ام جلنار ..خالة رحم الله والديج هاي احلى دعوة

العلوية فضة.. بنيتج الها طريق وف*ج وتذكريني بنتج مرزوقة والها شأن بس ديري بالج على قلبها ..

جلنار بعدم فهم .. ماما راح اوكل الحمامات

ام جلنار بابستامة وصفنة ...روحي ماما حبيبتي بس خليج كدام عيني هنا لاترحين بعيد ..

جلنار حاضر ماما ..

ام جلنار ..علوية شنو شفتي ؟!

العلوية فضة .. يمة اني طريحة من الامام ع واشوف بنيتج الها مستقبل بس ديري بالج على قلبها

ام جلنار ..علوية دخيل بختج شنو نصيبها مو زين يعني خوفتيني هاي بنيتي اختي وصديقتي مو بنيتي محد يحس بية بكدها شايلة قلب ام بعمر طفلة هاي روحي ..

العلوية فضة .. بنيتج هي سندج وسند بيتج كله تذكري حجايتي بنتج راح تكبر والها طريق وف*ج الله كله عن طريقها بس ديري بالج على قلبها وادعي الها..

ام جلنار بصفنة ..يارب امين تف*ج علينا وتغير حياة هالطفلة يارب انته تعرف كل تعبي وسندي بنيتي يارب طمن قلبي عليها ..

العلوية فضة .. ادعي لبنتج الله يوفقها والدعاء يغير الحال والمكتوب يايمة تشوفه العين ..

ام جلنار ..ان شاء الله ادعيلها

جلنار واني اتنقل من ليوان ليوان تعدى واحد من الگوام (جمع كلمة گيم خادم بالحضرة الشريفة للامام ع) لابس جلباب زي خاص بيهم رصاصي مثل جبة عمتي الممرضة ههه وفوق راسه طاقية يصيحولها طربوش احمر .

الگيم ..ماتكعدين بس تفرفرين انتي وربطتج

جلنار ..عمو ابو كرش شبيك علكيف حجيتها

بصوت مسموع عمو ماافتر جاي اوكل الحمامات

الكيم ..وانتي شكو توكليهن خادمة بالصحن وانة ماادري

جلنار.. اي خادمة بالحضرة ياريت

الكيم ..امشي ولج شنو ل**ن لو ساطور وشكو تخنزرين بعيونج يلا كعدي واذا افتريتي املص اذاناتج

جلنار ..اي مبيض والله افتر واوكلهن شعليك بصوت ناصي..هههه

وبصوت مسموع اي عمو ان شاء الله

بعدني جاي اوكلهن ماما صاحت لي يلا ماما خلي نرجع للبيت راح يصير الغروب وهسا ابوج ياكل قلوبنا

جلنار ..بفرح اي ماما بس يلا خل نرجع تلكينه بعده ماكاعد لاناكلنا كتله ..

ام جلنار... لاماكو كتل بعد اني يمج مااعوفج

ايدي بيد امي احلى ايد حظنت ايدي واحلى حب حب امي بعد روحي امي صعدنا بالسيارة للبيت وماتركت ايدها ابدا ولاهي تركت ايدي كانها تكلي بنيتي العمر كله اني وياج واحميج ماتدري اني الي افديها بروحي كمت احميها واسندها بكل شداتها لانها قلبي مو بس امي ..

طول الطريق واني اشوف الشجر احس نسمات الهوا تلعب باوراق الشجر وتحركهن ويسلمن علية من بعيد احب اوراق الكالبتوس وهالمنطقة متروسة ريحة نارنج ورد الصباح والرازقي والمحمدي واحلى شي من اشوف الهوا يداعبهن ويتمايلن والرارنج احسه راح يوكع على شوية وتتلقى الارض وذاك عصفور حلو واكف عالشجرة وبصفه عصفورة يتناكرون ..

رجعتنا من الحضرة تمرنا على بيوت حلوة وشوارع احلى الله شكد حلو لو يصير بيتنا مثل هذا البيت العالي لا ماريده عالي اريده زغير وبي حديقة ومرجوحة حلوة واخلي فرحة يصير عدها كتاكيت زغار وتربيهم مثل ما اني ادير بالي على اخواني ادير بالي على فرحة وكتاكيتها الله الله

ام جلنار.. يلا ماما نزلي حبيبتي

جلنار ..وصلنا يلا ماما حاضر

ودخلنا لبيتنا والحمدلله بابا نايم واخواني نايمين وبسرعة كمت اراجع واجباتي قاريتهم الحمدلله ومتحضرة ...

كلت لامي اكوم اسوي العشا

ام جلنار.. هاج هاي فلوس جيبي بسرعة بيضات من ابو جواد حيصير الغروب .

جلنار ... اخذتهم و طلعت وشفت حيدر واش

حدوري يلعب دعبل براس الفرع وكفشته الشكرة وكعاكيله صايرة شكبرها

حيدر واش .. ها نارة شلونج ماشفتج الصبح مالحكت عليج

جلنار اي مو رحنا لبيت الشيخ

حيدر واش وشبيج مقهورة ابوج باسطج

جلنار.. لا ولك مابسطني بس جوعانة وبطني تقرقر

تعرفني من اجوع انقهر

حيدر واش ..يخسا الجوع نارة تعالي اكلي يمنا حجاها وهو يمسح خشمه بردان بلوزه المخطط جنه

حمار وحشي وهو ابيضاني طلع يخبل .

جلنار.. لا ولك امي حتسويلنا كوكو (اكلة بيض وخضار اكلة قديمة يخلط اابيض مع الخضروات بصل اخضر وكرفس وشوية طحين حتى تكبر الطاوة وتكفينا)

كال هاا ..

مشينا وصلنا لابو جواد وكاعد يتسامر هو وعجوزه

جلنار .. شلونك دامبي العجمي ...

ابو جواد .. گولنار انته تربية سز ادب سز اخلاق سز

جلنار ..شبيك عمو العجمي هسا مو زين اريد اشتري بيضات منك

ابو جواد ..هاك هذه بيضات يلا اشمر الفلوس بالصينية

حيدر واش.. بيضات زينة عمو بداعت مرتك تماضر

جلنار ..وانت لاتشمر البيض دامبي

ابو جواد ..امشي اخلاق سز انته گولنار والله فالله اشمرهن عليك

جلنار ..لا جيبهن لاتشمرهن حباب يلا العفو ترا مااشتري منك بعد

اخذنا البيضات ورجعت للبيت وماما محضرة خطية الخضرة دتثرمها وبس طكت البيضات بالكاسة دتخبطهن طلعن فاسادات وبيهن دم اخذتهن بكاستهن درتهن بالجيس ورحت اركض شايلة هم العشا وبكل حرقة اخذت حيدر واش وياي امشي ولك واش

حيدر ها نارة شبيج ..

البيضات فاسدة..

واروح ركض واشمرهن عليه هن وجيسهن

وكبت عركة شكبرها بيني وبين ابو جواد

العجمي يريد اوكل اخواني بيضات فاسدة

واطكها ركضة ودرب الفلتة ماكو احلى منه بس شلت هم شلون شكول لامي خطية نست جزدانها ببيت الشيخ وكمت احمس بروحي وشلت عيني ياربي يامولاي الحمامات مايجوعن بحضرة وليك مولاي ابو الايتام ..

اني ماريد اخواني ينامون جوعانين مثل الحمامات فدوة ربي ولهناك اشوف حدوري بيده بيضات من بيتهم بيضتين كبار من دجاجاته وهاي كانت احلى دعوة تستجاب بسرعة واخذتهن منه حدوري تطلبني فلوسهن

حيدر وهو يحك بكفشته.. لاتبجين اجيبلج بيضاتنا كلهن

جلنار... شكرا حدوري

دخلت انطيهن لأمي وداحجيلها على حيدر جابلنا بيضات ..

دخلت امه تعيط بسم الله عائلة واشة (الواش يعني مخبل )

ظلت تصيح يم عتبة بابنا .. البشارة البشارة ام جلنار ...

#طريق_الوهم

نورا ناصر

بارت ٤

العلاقات الطيبة مثل حبات الرمان وحده تسند الثانية من برة و منظرها كلش حلو ولونها أحمر بديع لكن من جوة أغلبها حب يابس قابل لل**ر .....

جربتو تحسون انفسكم مرصوصين مسنودين واحد يسند الثاني مثل حبات الرمان الي يشوفها من برا يكول الله شكد مرتبة بعناية فائقة وشكد حلو منظرها ولونها الاحمر الرماني البديعي حلو هالاحساس من تنسندون بأخ او صديق او روح تحيطكم مثل الملاك ..

. لكن جربتو الاحساس الغريب لما تفرطون اول حبات الرمان شلون تتناثر الحبات الباقية بسرعة على الأرض وتتناثر ...

مؤلم كلش هالأحساس ويقهر لما ندرك متأخرين شكم حياة وروح تفرطت مثل الرمان بس ألطاف رب العالمين الالهية تحيط بينا وممكن جدا هالحبات توكع على ارض طيبة وتكبر وتثمر ونحصد احلى حبات الرمان .

ام حيدر واش دخلت علينا تصيح

بيت ام حيدر ناس طيبين وعدهم خير من الله شايلين قلب وحمية ماكو مثلها

ام حيدر مرة طويلة رفيعة تشبه مرة بباي وخشمها شكبره (اقرب نقطة دالة) على كولة عمو المختار ابو فاضل ..

يعني الي يتيه بيتنا بس تكوله وين بيت ام خشم يدليك و احنا صايرين بصفه

دخلت علينا هي وتجر بذيال دشداشتها النيلي وايديها كلها عجين بس شنو تخيلتها بهاي صيحتها راح تكول هاكم سبينااااغ وتحطنا بسفينة بباي وتشرد بينا الله وتخلصنا من بيت الشيخ ..

ام حيدر واش ..بعياط البشاارة البشارة البشارة ام نارة البشارة ولج نارة ..

ام جلنار بعد قلبي ام حدوري شنو البشارة ..

ام حيدر شتنطيني يلا جيبي البشارة ..

جلنار ..ها خالة شكو

ام حيدر .. اصبري يمكموعة خلي اطلع البشارة من امج ..

ام جلنار .. احوكلج النفنوف الي ترديه

ام حيدر ..واحمر كون هيج اوج وج بي يمه واطلع اخبل

ام جلنار ...بعيني دحجي عاد مو فتيتي قلبي شلون بالله

ام حيدر .. اخوج حسن خابر

ام جلنار .. صلوات يمه عضيدي

جلنار من سمعنه الخبر الدنيا ماوسعتنا اني واخوتي ظلينه نكمز وفرحانين ..

وامي احتارت شتسوي ظلت تروح وتجي ودموعها بعينها فرحانة و تبجي دموعها عشرة عشرة وتحظن بية ..

طبعا خالو حسن من زمان ماسمعنه اخباره هو مسافر ..

ام حيدر .. هاا شلونها البشارة خية ام جلنار ؟استاهل النفنوف الاحمر زين يمته تخلصي ..

ام جلنار .. على كيفج على رزقج لاتستعجلين بس كوليلي شنو كااال الج ماناوي يجي ..

ام حيدر .. اي كال فد كم شهر ويجي ان شاءالله

ام جلنار .. الف الحمدلله الف الحمدلله ..

ام حيدر .. يلله اني اروح الجدر على النار ..

ام جلنار .. مشكورة خية وماقصرتي ..

جلنار .. رجعت حضنتني امي وتتشم ب*عري واني محاوطة خصرها بايدية وراسي على ص*رها

ام جلنار .. يمه هانت مايظل تعب هسا يجي خالج هاي نيتج الطيبة ماما جلنار اويلي قلبي اخوية شكد مشتاقتله ومحتاجته .

جلنار بفرح ..صدك ماما حيجي ويبقى يمنا مايروح بعد ونسويله عرس وافرح بعرسه فدوة لقلبه خالو حسن الحنين .

ماما.. اي اكيد جاي ويبقى يمنا مااخلي يروح بعد عضيدي هذا وروحي معلكة بي

بهالاثناء دخل ابوية ..

ابو جلنار ..ها خير شكو تصيحن فرحنا وياجن

ام جلنار .. شكومك عيني !!

ابو جلنار .. غير على صواتجن ..

ام جلنار .. ها ماكو شي العفو صوتنا طلع بس حسن دبيسة خابر وكايل بعد جم شهر ويجي ..

ابو جلنار متفاجيء ..صدك يارب خير هيج وينطيج المقسوم من فليساتج ونرتاح

ام جلنار.. خلي يجي سالم غانم والله كريم

ابو جلنار.. الله كريم ومايتخلى عنا ولايكطع بينا بلكي صبرنا ونلنا

ام جلنار .. الصبر مفتاح الف*ج .

يلا جلنار غسلي لاخوانج ماما ..

جلنار .. حاضر ماما ادللي

دخلت اخواني للحمام اول واحد حمودي غسلتله وطحتله فرك من الفرحة وقرقرته من ليفت كعب رجليناته وهو يضحك مكركر ولك حمودي لاتطفر مي علية تنكعني ملابسي ..

حمودي ..نارة حبابة خليني اطبش بالمي الدافي حبابة

جلنار ..ولك حمودي مو اريد المي يكفي بعد اختك وماما

حمودي كلش قنوع صح مشاغب شوية بس يقنع بسرعة ويسمع الكلام

ريم دكت الباب عابت لك حمودي اريد نارة تغسلي بسرعة يلا فضنا يوووه ماما ماما تعالي لحمودي لزك بالحمام

جلنار ..ولج اصبري عاد خلي الفلفه بالخاولي خلي ينشف شعره شبيج ثبرتيني ترة

ريم.. اووف يلا ماعلية يلا هسا تطلع حمودي يلا يلا وتدك عالباب خبصتني

حمودي واثناء مدنطلع من الحمام .. كال مااطلع حميسة

ريم ..هاي شنو طالع حلو حمودي وكرصته خطية بمتنه وبزروره

جلنار ..ولج عوفي حمودي خطية حرام عليج

حمودي.. بفحطة الا اكول لماما عليج

جلنار.. ولج مسمومة موهيج الله يلعن بليسج

ريم بضحكة كلها مكر وانانية اني مو مسمومة

جلنار ..يلا حبيبي حمودي اكعد هنانه مو تطلع للشارع وتوصخ نفسك زين فدوة وليدي الورد

جلنار.. اصيح لريم يلا ريومة وين لابدة

ريم ..هياتني بالحمام تعالي يلا غسليلي بسرعة

جلنار.. مسمومة ولج انتي ليش هيج نحسة خبصتيني

ريم ..احب اغسل بس مااحب حمودي مو كتلج غسليلي قبله

جلنار ..غير انتي تنبل وسنة يلا تمشين

(ريم عدها رخاوة برجليها وعدها نحاسة شوية)

ادللي نوب اجرج من شعرج واكعدج سحل للحمام وظليت اقرقر بيها (دغدغة )

تحسست وعبست وجهها لان دغدغتها برجليها

كالت.. تدرين ماحبهن دغدغيني برقبتي وبطني

جلنار.. بالم حبيبتي ريومة سعلوة

ريم هههه اخ بطني ههههه بطني هي على عنادك حمودي وتطبش بالمعجنة الكبيرة (طاسة كبيرة تشبه حوض الحمام)

جلنار غسلتلها لريومة حبيبتي وبقلبي حسرة عليها شوكت تتحسن وتكوم تمشي اسرع يارب شافيها ماريدها تصير انانية يارب خلي قلبها خالي ابيض مثل الورد الابيض..

احلى شعور لما اكون امهم واني زغيرة احس نفسي مثل فرحة لما تكف على جهالها وتحميهم بس يقهر من اشوفهم يتألمون يارب لاتوجع قلبهم ابدا هذولي روحي وكل عمري فدوة الهم ..

طلعتها من الحمام وكعدتها بالهول . مشطت الها شعرها وشديته الها ..

يوم ثاني داومت .. ومن رجعت من الدوام شفت الشيخ طالع من عدنه وكفت بمكاني وهو صار مقابيلي بابتسامته المرسومه على محياه بشغف ونظراته المليانة لهفة ..

انضاف اله خجلي وحيائي حتى يرسم مشهد مليء بالمشاعر المتباينة ..

جلنار .. شلونك خالو

الشيخ مروان .. هلا نارة شلونج .. مو كتلج لتكولين خالو .. بس هذا الشي الي مااحبه بيج ..

رجعت دنكت راسي غير كلمة الخالو مجاي تطلع من ل**ني شسويله ..

سمعته يحوس باوعتله طلع فلوس وحط بيدي ..

كال يلله نارة اني اروح وباسني على راسي ..

دخلت جوة اركض .. شفت ماما بالمطبخ ..

رحت سلمت عليها ..

سألتها ماما شنو عنده الشيخ مروان جاي هنانه احنا موبعدنا ماخلصنا شغل ..

ام جلنار .. جاي يتعذر من الي سوته امه .. يلله بدلي ملابسج حبيبتي لاظلين بيهن ..

جلنار .. صار ماما ..

ومرت الايام .. بعد مارحنه لبيت الشيخ بس هو استمر يتردد علينا بزيارته الي ماتخلو من نظراته الي الي ماجنت اكدر افسرها ..

قبل الامتحانات النهائية باسبوع كنت خايفة وبس افكر بالنتيجة ..

رحت لماما يلا حتى نتعشى وننام باجر خميس ماما وخايفة شوية ..

ام جلنار.. ليش ماما انتي شاطرة واي نتيجة تجيبين لاتخافين انعفيتي او مانعفيتي تبقين انتي بنتي الشاطرة الحليوة .

جلنار تصبحين على خير امي

ام جلنار وانتي من اهل الخير يروح امج

اليوم خميس اخر اسبوع تقريبا من الايام الي تسبق الامتحانات النهائية واكيد لازم مدرستنا تسوي رفعة العلم ..

الجو حلو اليوم والمدرسة تجنن احلى مدرسة برأيي واحلى يوم والفرحة مالمتني اني بسدريتي النيلي المهترية من الغسل والكوي بس نظيفة تخبل وشعري الواصل لنص ظهري صح خفيف ويتطاير بس تمري حلو وتض*ب عليه الشمس يكومن يتطايرين ذيول الحصان ( تسريحة مشهورةبذاك الوقت فرك الشعر من النص وكل جهة بجهة ويصيرن اثنين ذيول حصان)

ظليت اعدل ب*عري احس روحي طايرة مثل ساندي بيل بس مو شكرة ..

احلى شي من اني واكفة بنص صديقاتي واشوف المديرة ست انعام تكول اسمي بعلو صوتها جلنار رؤوف..

بقيت صافنة .. ٣ مرات صاحت يلا استوعبت اني اسمي ضمن الي انعفو من الامتحان النهائي بجهدهم بصف الثاني متوسط وصفقتلي المدرسة كلها بيومها لوحة فنية ماريدها تخرب بأي شي طايرة كنت طايرة وروحي طايرة وياي ..

صاحتلي مرشدتي معلمتي ست فردوس حبيبتي جلنار انتي مثل الزهرة البرية تنجح وتمد نفسها وتقويها رغم ظروف القاهرة وهاي احلى هدية الج انطتني قران زغير وربطة حلوة وجبة تخبل كلها ورد وهي مطرزتها وكلتلي الج مستقبل باهر ياوردة حضنتني احلى حضن ماانساه لليوم رجعت للبيت فرحاانة وفرحتي ماانطيها لأي احد .. اي اني فرحانة وشاطرة ومابقى شي وادخل الثالث .. واكبر بسرعة واعين ماما وادخل معهد معلمات واصير احلى معلمة انكليزي مس جلنار الله شكد حلوة الأحلام ناقصها بس تتحقق ..

وصلت لبيتنا واشوف سيارة بالفرع تخبل

دخلت للبيت واشوف احلى شي صارلي بحياتي سندي وحبيبي خالي حسن

صار مقابيلي شهكت فدوة خالي

وتقدمت اله واحظن بي وشالني فرني بيده

خالو ..ولج سمني شوية جنج عصفورة

بوسته حبيبي خالو وابجي ممصدكه شلونك خالو

وامي كاعدة تلكط التمن تباوعلنه ولج كبرتي وبعدج تتعلقين بخالج اثكلي شوية

يمه ماعلية هذا خالي الروح فدواتك خالو لاتروح ابقى يمنا ان شاء الله حبيبتي

جلنار ..وين صوغتي ها اريد توتو

خالو .. ولج ام ل**ن جبتلج جنطة بيها كارتونة توتو وتنورة كابوي وقراصات بعد تدلل بنيتي شكم نارة عندي

جلنار .. حباب ابقى يمنا لاتروح

خالو .. ان شاء الله ولج شنو هالجمال صايرة شحلاتج لو عندي وليد احجزج اله .

جلنار .. خالو استحي والله

وبهالاثناء صحى ابوية من النوم خليته يسلم على خالو واني رحت للمطبخ اساعد امي ..

ابو جلنار .. حياك الله ابو علي

حسن ..الله يحي اصلك مشتاقين شلون صارت صحتك

ابو جلنار .. هالي تشوفه اروح افتت الحصو كل فترة ببغداد وارجع

الخال.. الله يشفيك بس ليش وجهك مطعون وازرك صاير

ابوجلنار .. حيلي راح والله الموت الي احسن وجع ماينحمل

الخال ..لاتكول هيج ياخوية الله يشفيك ويخفف وجعك لخاطر هالجهال منو الهم

ابو جلنار ..بحرقة قلب ابو علي اني عالة عليهم صاير

الخال ..لاتكول هيج المرة الاصيلة توكف وية رجلها ومرتك بنت اصول تشبه امي الله يرحمها

ابو جلنار ..شنو ذنبها تتحمل رجال عاجز لايحل ولايربط مبارك عايش عالمسكنات

الخال ..تهون ان شاء الله وتتعافى بلكت الله يرزقني اود*ك للاردن

ابو جلنار.. اي والله واردها الك ان شاء الله بس اتعافى واوكف على رجلية من جديد

الخال ..انته زوج الغالية وابو الغالية نارة ..

ابو جلنار بدمعة وغصة .. جلنار تكول اسم على مسمى صدك نار شايفها شلون صايرة ام للجهال بغياب امها

الخال ..صدك فدوة لقلبها بنيتي من يومها سباعية

ابو جلنار.. بس اني تريد الصدك موزين وياها واشوفها احسن مني هالزعطوطة

وبجى ابو جلنار بحرقة قلب رجال غيور على اهل بيته عاجز عن توفير لكمة و**وة وملاذ امن ..

الخال.. ياخوية صدك تحجي ياما شبعنا كتل من ابهاتنا انة صح ماارضة على بنيتي تنمس ب*عرة بس انت ابوها لاغلطت لازم تأدبها .

ابوجلنار ..والله تريد الصدك البنية درة لاقلب ولاجلاوي اض*بها منا تجي تحطلي العلاج منا بس اني ماشوف دربي من الوجع ياخوي

الخال ..بقهر ميخالف خلي استقر وانة ادللهم هي والجهال بس هالبنية جنها وردة ياخوية ديربالكم عليها ترا بعدها طفلة

ام جلنار .. يلا مابقى شي ونتغدى مسويتلكم احلى سبزي من الي يحبه قلبك ياخوية جمدته من الشته

جلنار رحت للدولاب طلعت قطعة قماش زغيرة بيضة مثل الچفية مطرزة عليها ورد ناعم واسمه لخالو (حسن) ورحت اشوف خالو واكف يم المغسلة يتوضى

جلنار .. شوف خالو اني شكد احبك ومانسايتك ابد اموت عليك

الخال .. بفرح فدوة رحت لبنيتي ولج شوكت تعلمتي

جلنار ..تعلمت من ماما شوية شوية واول شي تعلمته الورد لانك تحبه وسويتها الك

الخال.. حبيبة امج وخالج انتي صدك من كال البنات حبيبات اريد الله ينطيني بنية مثلج وردة وجمارة

تعالي بعد خالج شوفي شجبتلج صوغات من الي يحبها قلبج صوغات مخصوصة الج ها

جلنار.. بفرح فتحت الجنطة واشوف نستلة توتو كارتونة جبيرة وص*رية كابوي وقراصات ودفتر زغير يخبل بي رسومات فاتحة ورد بنفجسي واوراق ريحتها تخبل والدفتر بي قفل زغير ومفتاح

جلنار ..خالو شنو هذا الدفتر

الخال.. هذا دفتر تكتبين بي ذكرياتج او شي تحبيه او تتعلميه بكيفج

جلنار ..وهذولي الوردات شنو اسمهم الي بي

الخال .. بعدج تحبين تعرفين كلشي عن الورد

اسمهم ورد التوليب الاصفر وورد اللافندر والياسمين والكاردينيا

جلنار.. الله خالو فدوة خلي نزرع منهم

الخال.. ان شاء الله بس خلي الله يرزقني وازرعلج احلى منهم

جلنار ..فدوة خالو احبك عفية لاتعوفنا بعد ماما دايما تطلع صورتك وتشمها وتبوسها وتبجي

الخال.. لا هذا هو جاي ابقى ان شاء الله وانتم وياي

ام جلنار.. وهي بالمطبخ يلا بنيتي بسرعة اكيد خالج وابوج جاعو تعالي وياي اشيل المواعين للسفرة وودي الخضرة بطريقج

جلنار حاضر ماما ادللي

ام جلنار.. يمه رحت فدوة للبنات سبعة واگول گليلات

جلنار ..وهي تنقل المواعين ههه بعد قلبي أمي

الكل عالسفرة البسيطة بس جامعتنه الابتسامة والامل والروح الحلوة والنية الصافية صح الاكل خالي من اللحم بس كان اطيب اكل واحلى لمة

خالو وماما ظلوا يتعازمون عالحكاكه (تصير ارضية الجدر تمن م**ب اله طعم ونكه خاصة اذا كان تمن عنبر)

هالجمعة الحلوة سرح كل شخص بيهم باحلامه واماله

ابو جلنار يتبسم من زمان مملتمين هاللمة الحلوة وبقلبه يحجي ويكول الله مايكطع عبن اني مو كاطع اذا متت الهم سند هاي خالهم اجة وانة مالي عازة اصلا

جلنار.. الله خالو راح يدافع عن ماما ومايخليها تخدم ببيت الشيخ

محمد .. الله خالو راح يشتريلي سيارة شفل جبيرة

ريم ..الله خالو راح يشتري لي دواء لرجلية

ام جلنار ..فرحانة ومتأملة خير بجية اخوي يارب كون حسن ينطيني فلوسي واشتري مكينة خياط واسوي عملية ابو جلنار وارتاح

الخال.. يارب لاتحرمني من لمة اختي الحلوة وجهالها يارب قدرني اسعدهم وادير بالي عليهم

احيانا كثيرة اللحظات السعيدة تمر بسرعة كبيرة لدرجة مانحس بيها لكنها تبقى تعادل عمر خاصة اذا كانت اللحظات سعيدة برفقة الي نحبهم وهم روح وملح حياتنا رغم بساطتها وهالسعادة مامكن تنشرى بفلوس وكنوز الدنيا الأهل والطيبة الجمعة الحلوة والاهم النية الصافية بس للأسف احيانا السعادة ماتدوم.

جلنار بعد ماكملنا غدا خالي حسن ودعنا وطلع يزور

وماما راحت لبيت ام حسين زوجها خياط تريد تتفق وياه علمود الخياط وبلكي يعرضلها بمحله تحوك قطع رجالية مثل لفاف وهيج شي للمعلمين لو المدرسين لانه محل ابو حسين معروف

اخواني ديلعبون بالحوش ريم وحمودي

وبابا نايم بالغرفة رحت شفته وغطيته بسرعة يبرد صاير خاصة من ياخذ العلاج ..

اخذت سلة الملابس وصعدت فوك اشرهم

واني على هذا الحال سمعت صوت هز البيت هز عبالك الدنيا انقلبت .. وكومة تراب صعدت ليفوك ..

لطمت ص*ري وصرخت يايمه وكع بيتنا

نزلت جسمي بالكاع وكعت على ركبي

بدون ارادة مني

واني روحي كلها تتمنى تروح يم اخواني وابويه

واشوف شصار بيهم

ول**ني يلهج

اللهم لااسألك رد القضاء وانما اسألك اللطف فيه ..

يتبع ..