صومعة الوهم (طريق الوهم)

الفصل الخامس ((خوف وترقب))

الخوف والترقب شي مؤلم لدرجة لايمكن تخيلها خاصة لمانكون اطفال بعمر الورد المفروض نخاف من گرصة حشرة او خزرة أم لما نسوي شي غلط ...

لكن لما نخاف من شي مانعرفه مثل الموت وفقد الأحبة فهذا شعور ماينوصف واختلاج قلب وقهرة روح ..

دقايق مرت علية يمكن اخذت نص عمري بيها حلكي يبس مااعرف شلون اوصف قلبي المعصور ورجليناتي مااحس بيهم من خوفي على اخواني وامي وابوية

. وكعت على ركبي رغم الارضية مالة السطح ترابة بس توجعت .. حلكي يبس واحس الدم تجمد بعروكي ..

من شدة الخوف والهلع ..

اريد بس اكوم على حيلي ماجاي اكدر ابد ..

حركت رجلية وظليت ازحف مثل الطفل الي هستوة يحبي ..

دشداشتي المهترئة تمزقت وزادت خدوش ركباتي ..

وصلت لمكان الي انزل منه

احنا بيتنا غرفتين مسكوفات بس الحوش او الهول مسكوف بجينكو وحديد وخشب شون ماكان ..

سكفنا عن البرد والمطر بالشتا وعن الشمس والحر بالصيف ..

ظليت ادعي يارب يارب فدواتك لايتأذون ولاينوجعون

يارب بية ولابيهم يارب فدوة رحت لأسمك بجاه حبيبك وابو الايتام مالنا غيرك ..

نزلت بسرعة وكل بايتين سويتهم باية بركضة وسرعة اني نفسي مادري شلون خلصت الدرج

ومن حسن حظي انو الدرج خارجي مو جوة البيت ..

من نزلت شفت امي حبيبتي طالعة من برة وواكفة بلاعباية تصيح وتبجي بصوت مخنوك ومحتارة شسوي ..

يمها ام حيدر تهذي مافهمت شتكول غير تأشرلي تعالي لج تعالي ..

رحت لامي اركض حضنتني حييل وتصرخ يمممه نارة مابيج شي .. ولج يمه اخوتج جوة شلوون بيه يربي شلووون ..

ابوية يصيح بعالي الصوت يارب لطفك ويبجي بقوة ومتونه تهتز ويكول الموت اليه الموت اليه ..

وابو حيدر دخل هو والجوارين يعتون بالخشبات والجنكوات الي كانت مغطية باقي سقف البيت

بس ريم وحمودي وين !!!لايارب فدوة لأسمك لايتاذون

عفت امي ورحت اركض وصلت الهم ظليت احرك بالطابوك الم**ر وازيح الخشبات واباوع لعمو ابو حيدر يحرك بالمبردة و بالغراض

ام حيدر تلطم وتجر بأمي وطلعتها لان ظلت تحوم

ولهناك اباوع ايد زغيرة نمدتلي و طلع حمودي مغبر وصافن وبلا كل صوت من جوة ميز المبردة الحديدي..

و سودة علية حبيبي كلشي ولاوليدي قطعة من روحي حمودي .. اجته امي تركض حضنته قووي وظلت تبجي حييل وظلت تصيح بصوت كله الم ووجع وتكول

بعد ريمه وينها ريمه ..

يارب يارب اني اموت ولاريمة

احس اطرافي انشلت كعدت بالتراب يم امي لااقوة على شيء ..

بس ظلينه نلوب واحنا على هذا الحال ونباوع للجوارين شون يعزلون بالجينكوات والخشبات

كان اكو ثوب ماما خيطته لريم كله كشاكش وردي يخبل لمحته مبين طالع من جوة التراب ..

عرفتها هايه ريم حبيبتي واختي الوحيدة ..

رحت اركض يمهم ولزمت الثوب ضليت اسحل بيها صحت عمو بصرخة يمكن الدنيا كلها سمعتني وانفجعت بيه.. هالوردة الزغيرة مالحكت حتى تتسجل مدرسة كانت تاخذ اقلامي ودومها مسوية روح للبيت بسوالفها ويه حمودي ..

.. يارب يارب هاي مو ريم الساكته وبلا نفس لا لا هاي اني الي راح نفسي وياها وبعد مايصعد وقلبي اي قلبي يمكن سكت ونفسي ضاق واني احضن بيها

ابو حيدر يريد ياخذها مني ..

اجت امي يمي وتخلي وجهه على وجه ريم وتبوس بيها وتبجي ..

ظل ابو حيدر يتوسل يريد ياخذها مني

كتله عمو خليها بحظني هذه ريمة روحي مانطيها عوفها عمو فدوة..

ابو حيدر.. يبجي وياي عمو ..

كال صبري خلي نشوفها ..

كانت باردة اي باردة ورجليها زرك مالها كل حس شعرها الحلو كله تراب ودم وحتى ثوبها اليخبل مابي ورد جوري بي ورد ذبلان يمكن لان ريم ماتضحك ونايمة مثل الملاك بحظني ..

سحبها مني واخذها عمو ابو حيدر

ماقبلت وصحت بقهر.. لا عمو اني اروح وياك..

بلحظتها اجتني قوة غريبة اخذتها منه

وشلتها وركضت بيها وغطيتها بروحي ومسحت تراب وجهها بذيال قلبي مو بثوبي شلون شلتها وشلون صعدت السيارة وية عمو ابوحيدر ماادري بس الي اتذكره قوة قوة غريبة الي دفعتني واقل من لحظات صعدت السيارة وخطوات الارض كلها تحركت وياي

اجت امي بصفي كعدت وبواجينا ملا الارجاء ..

طول الطريق اني حاظنتها ومخليه راسها على ص*ري

واهمس باذنها عفية لاتتركيني ..

وصلنا للمستشفى نزل عمو ابو حيدر فتح الي الباب ظليت اركض اركض بيها..

وتلكونا الاطباء وابو حيدر وامي خبصوا المستشفى خبص واني لابجيت ولادمعت بس حاضنتها

حد ما سحبوها مني وخلوها عالسدية ..

طلعونا برة الغرفة .. وروحي ماهدأت ابد

بس اللوب ..

بعد وقت كالوا عدها رضوض و**ور

جبروها وخيطوا جروحها ..

وميصير ابقى بالمستشفى

اخذني عمو ابو حيدر للبيت ..

.. شفت ابويه كاعد بالشارع لازم بطنه ويبجي

ويمه الجوارين ..

شفت حيدوري كال تعالي يمنه حمودي ابيتنا

رحت وراه .. تلكتني ام حيدر

ام حيدر .. هاا بشريني شونها ريمة

جلنار .. خالة تعبانة ريمة ادعيلها وينه حمودي ..

ام حيدر .. غسلتله وبدلته واكل ونام ..

جلنار .. نعم الله عليج خالة مقصرتي ..

ودتني يمه بالغرفة مكان ماهو نايم ..

ظليت ابوس بي يمه جان رحت مني اليوم .. لشوية سمعت صوت مو غريب عليه ..

لشوية دخلت بيبي ام ابوية ..

دموعها على عيونها تهل ..

حضنتني ..

بيبي .. ولج يمه نارة شلوونج خو مابيج شي ريمة وحمودي شلونه ابوج بعد عيني مااخذت منه حجاية العدلة . .

ام حيدر .. لج عيني حجية ام رؤؤف مصدوم ابو جلنار خطية ميعرف شيحجي ..

بيبي .. اي واالله يخيط ويخربط .. كومي بيبي جلنار كومي امشي وياي للبيت ماخليكم تباتون بالشارع وبيتي موجود ..

ام حيدر .. افا عليج حجية لعد وبيتنه مفتوح الهم والله نشيلهم على راسنة اذا الارض ماشالتهم ..

بيبي .. ماقصرتوا وانعم الله عليكم

يلاه يمه نارة كومي جيبي اخوج وامشينة نروح ..

جلنار .. استغربت كلام بيبي

بيبي تكره امي وصار سنين واحنا ماداخلين بيتهم

...

اخذت حمودي هو نايم شلته على ايدي وخليت راسه على كتفي وطلعت وياها برة ..

شفت خالو حسن جاي من زيارة الامام

اخذ مني حمودي وبوسني براسي

خليت راسي على كتفه والدموع جرت على خدي بعد ماكانت متحجرة بعيني ..

حسن .. حمدلله على سلامتكم بنيتي نارة ..

سمعت بيبي تهمس مبين رجلك خضرة عليهم ..

خالو حسن .. اني هسه رايح للمشفى اشوف امج شمحتاجة ..

هزيت اله راسي..

صعدنه بسيارة عمو اني وبيبي وابوية وحمودي

بيتهم بعد شارعين عن بيتنا ..

وعايشة بي بس هيه وعمتي هنية خطية جبيرة وممتزوجة لان نص عقل ..

وصلنه لبيتهم نزلنه من السيارة .. اجه عمو شال حمودي وسند ابوية ومشينة

دخلنه للبيت .. تلكتنه عمتي هنية ..

عمه ضخمة كلش شعرها مكفش لابسة دشداشة سمائية اكتافها بف وقصيرة عليها وبيها تطريز برتقالي ..

بس شاف*نه من الباب هيه جانت بعد متر عنه تقريبا

وهيه جايه النه ظلت تصفك وتكول

جابوها واجت ويانه جابوها واجت ويانه حتى هدومها ويانا كللللوووش ..

ظلينه فاتحين حلوكنا احنا بيا حال .. وصلت الي شالتني وظلت تفتر بيه فرة معدله خلتني اشوف البيت كله ..

صاحت عليها بيبي لزمتها من ع**ها لج يمه عوفيها عوفيها هيه بيا حال ..

احس بطني ظلت تخبط من هالفرة هاي ..

اباوع حمدودي ظل يكركر ..

كعدنه بالهول ..

راح عمي لبيتهم ورجع جاب النا ملابس ولابوية ..

بدل اخذت ملابسه غسلتهم وشريتهم على الحبل

كبال المطبخ ..

صار الليل .. صاحت النا بيبي بالمطبخ كالت تعالوا هنانه خلوا ابوكم نايم ..

رحنه كعدنه بالمطبخ .. واني بس افكر بريم وادعيلهه الله يشفيها بسرعة وترجع النا . .

دخلنه للمطبخ .. وبيبي عود جاي تحضر عشا النا

اجت عمه هنية .. لزمتها من ايدها وجان تكللها تعااي كعدي هنا انت عروسة لاتشتغلين شي ..

بيبي .. لج يمه عوفيني خليني اسويلهم لكمة اكل ياكلوها سودة عليه وجوهتهم صفر وشحالها ..

هنيه .. اش اش جاي اكلج انت عروسة تعاي كعدي هنا تعاي ..

بيبي .. اوو اخذج على كد عقلج وامري لالله الواحد القهار ..

اجت بيبي كعدت يمنا ..

كامت عمه هنية فتحت الثلاجة وظلت تطلع طماطة ولازمتها بيدها ..

وظلت تقلد اعلانات تلفزيون الشباب

معجون طماطة معجون طماطة هاي الطماطة الحمرة

وتغني وتشمر علينا طماطة واحنا كاعدين بالارض ..

حمودي ظل يكركر واني مدري ابجي مدري اضحك ..

كامتلها بيبي وسدت الثلاجة ..

ودتها للغرفة ..

سوت النا عشى وتعشينه فرشت النا تمددت على الفراش وبس افكر بلي صار اليوم الله قدر ولطف

كعدنه ثاني يوم .. رحت للمطبخ صبيت كلاص مي اخذته جاي اشرب وطليت من باب المطبخ جان اشوف عمه هنية لابسة سروال ابوي الداخلي ومدخلة الدشداشة بي وطالعه كراعينها وتفتر مرة تركض بالطول مرة بالعرض ومره تسوي مثل الجنود الي بالجيش من يلزمون حزامهم ويسون يس يم ويهرولون ..

متت من الضحك طلع المي من خشمي ..

اجت بيبي تدك على ضهري ..

لج بيبي شبيج على كيفج ..

وجان تلمح عمه هنية .. لزمت بطنها وتضحك

راحت الها ركض لج لايشوفج احد من الجيران تخبلتي ..

اخذتها ودخلتها جوة ..

مرت ٣ ايام احنا يمهم باليوم الرابع طلعت امي وريم

جابهم خالو حسن ..

ركضت على ريم شفت راسها مشدد وايدها مجبره

وماتمشي .. شايلها خالو حسن ..

حضنت امي وبستها .. اباوع لملامحها التعب ماخذ منها هواية ..

كعدنا الكل صافن والخوف بعده بينا ...

لحد ما **ر حاجز ال**ت هذا كلام بيبي ..

بيبي .. الخميس نسوي ثواب ان شاءالله هم دفعة بلاء وعن سلامتكم ..

صار يوم الخميس وكعدنا من الصبح نحضر

وعمامي جابو المسواك ونصبنا البريمزات والكدور الكبار .. للعصر اللتموا المعزومين ومن بينهم خالو حسن كعد يم ابوية وظلوا يحجون .

الخال.. والله اني متعجب من مراون

ابو جلنار.. خيره شبيه الشيخ

الخال ..يمعود هالشيخ ممستقر ابد

ابو جلنار.. والله عجيبة كل هالخير وممستقر

الخال ..يا خوية هو سببها الخير العنده

ابو جلنار ..ليش بسم الله شنو مريض وماندري خاف صابته عين

الخال.. لايخوية مرته زعلانة ببيت اهلها وماخذه ولدها وياها لان يريد يتزوج

ابو جلنار ..لا شعجب ليش خاف هيج يهددها

الخال ..لا ياخوية حاجيته وكعدت وياه وحدنا وحلفته كلي خالي اريد وحده زغيرة ممرتاح بحياتي

ابو جلنار ..خاف فترة ويبطل هيج بس يهددها ويريدها تجر عدل وياه خاف مقصرة

الخال ..يخوية يحب وحده مدري يراهق على كبر المصيبة مو هنا المصيبة يحب وحده متجي بكد بناته هيج كللي خواته

ابو جلنار ..تحب احاجي من يجي اليوم للعشا ونشوف بلكي اخوية ابو مدلول يحلها شوية يستحي منهم وهو يحترمهم

الخال.. الله كريم خطية جهاله تبهذلوا ومدارسهم راحت عليهم هالفترة خذتهم امهم وهجولتهم ..

ابو جلنار ..رايح اني مرخصتك خوية اروح اتكرم للحمام لازم كل شوية اروح بسبب الدوا

الخال ..مرخوص خوية براحتك

ام جلنار كنت بالمطبخ الي يصيير بابه مفتوح على طارمة بيت عيالي وسمعت حجي اخوية حسين وابو جلنار ومتت بمكاني ياربي والله مالي خلك هبطات بعدني مامهدت الكلام لبو جلنار شكولة هسا تعقد جلنار يمنا وتتزوج

يبو يروح ياكل قلبي اكل ويظل يلج علية بعدني احجي بقلبي ودخل اخوية للمطبخ

الخال ..ها خوية تردين شي محتاجة شي اشتريلج شي

ام جلنار.. لاسلامتك يخوية بس بس ااه والله ماادري شكلك

الخال.. خوية احجي براحتج من شوكت تخجلين مني اني سندج وعضيدج

ام جلنار.. والنعم حبيبي وسبعة انعام بس ردت اكولك جلنار خطبها مني شيخ مروان

الخال.. بعيون مفتوحة من الدهشة شنووووو انتي من كل عقلج تحجيين صدك لو تتشاقين

ام جلنار.. فدوة لقلبك اسكت علكيف احجي ليسمعك ابوها ويسويلي مصيبة

الخال ..وشوكت كنتي ناوية تكولينا من تعررسيها لو شنو شصاير احجي مو خبلتيني شلون وشصار شنو ماعندج خبزة يابسة ومي تنطيها لهالدرجة وصلت بيج تزوجيها واحد بكدج لو صاير عنده اطفال من زمان كان صار ابنها بكد جلنار وتزوجته مو هسا تحفظ وشطف جهال الشيخ ليش هيج اخويةليش هيج العوز كتلج تشمريها هالشمرة ولج هو اني اخوج شكبرني هجيت من سوالف اختج ام مروان تردين تشمرين جلنار الي جنها زهرة بنص النار ويا نار بيت اختج الي تعرفيها كلش زين متحب بس نفسها وابنها وبناتها والناس كلهم خدم عدها

ام جلنار ..بقهر حقك ماشفت العوز شنو يسوي بينا وهو رادها على سنة الله يعقدها ويحجزها وتبقى يمي لحد ماتكبر وياخذها اني بكدها عندي اها وعيال وبيت شكبره

الخال ..انتي تختلفين انتي كنت يتيمة بينما جلنار انتي امها وذاك ابوها طيب ليش تدفنيها بالحياة وهي عايشة شلون هانت عليج مافكرتي

ام جلنار ..هو حلفلي بالامام عليه السلام وتوجه باكتافه لابوفاضل كال احبها واداريها مثل الوردة ومااظلمها ابد ويخليلها بيت وحد

الخال ..والله مااصدك شتحجين انتي خوية لعني الشيطان زين واوبوها وعمامها ..

ام جلنار ..ابوها عاجز على ساعة يموت واني تعبت منين اجيب بعد الا اكلك ايدية تعبت وتسكطت من الكتابة مالت الاكفان الا اكلك جهالي مايعرفون يميزون بين الموز والخيار تعرف شنو يعني جوع وعطش بعز الحر احنا صايمين وجهه ا بس خدود وعيون خليها تعيش وتفرح وتاكل شبي مروان قابل شمسوي زواج على سنة الله ومو هسا بعطلة الثالث ياخذها واحلى عرس يسويلها ..

ابو جلنار بصياح وصوت كله غضب عرس علة راسج اروح اسوي الج بالنجف بنص المقابر ان شاء الله وادفنج بزفة انتي وابن اختج

اني شنو ابوها لو عدوها لو شنو شلون متكوليلي اني ابوها بنتي من لحمي ودمي تنطيها هالشمرة وهي بعمر الورد ليش ولج

وشال يمة هاون وشمره على ام جلنار من بعيد

الخال ..ياخوية اصبر هسا ماصار شي هو خطبها ولانه موغريب كال لخالته وهسا راح يجي ونفتهم منه.

ابو جلنار .. روحي غسلي وجهج وانة اعلمج ان شاء الله صبريلي عبالج اذا مريض تصيرين رجال بمكاني خير ان شاء الله .

الخال.. يسحب ابو جلنار خوية استهدي بالرحمن هسا جاي هو ونشوفه

ابو جلنار يعني انت كنت تدري ومكتلي

الخال لا والله وحق الحق مااعرف

ابو جلنار .. قبل شوية كتلي يريد يخرب بيته ويريد يتزوج شنو يعني بنتي وامها خرابات البيوت لو شنو ياناس فهموني .

الخال .. لا يخويةوالله ماادري بس سمعت من الحياية تدري بيهن يكبرن السالفة اصبر خلي نشوف هو على جية ماظل شي للعشا

ابو جلنار بوجع .. يصير خير

ولهناك دخل الشيخ مروان وفعلا وياه عمامه وكاعدين عمامي بالاستقبال مالت بيت جدي ويوكف بنصهم ويصيح اني جاي اخطب بت خالتي جلنار من ابوها وخالي حسن ..

كام ابويه على حيلة .

للحكاية بقية ...