صومعة الوهم (طريق الوهم)

الفصل السادس ... احساس الخيبة

#طريق_الوهم

بارت٦

نورا ناصر ..

إحساس الخيبة إحساس غريب ومحير من أكثر الأحاسيس الموجعة تحيطنا بهالة غريبة وشعور كله إزدواجية وحيرة نكون مانعرف انفسنا راح نقسي على الي نحبهم وخذلونا لو نبتعد عنهم بدون ماننتظر منهم أي تبرير

نكون واصلين لدرجة كبيرة من التوهان العقلي قبل القلبي مانعرف هم ليش خذلونا وشنو السبب الي خلاهم يخذلولنا ...ليش وليش والف ليش

أسئلة مبهمة وغامضة تصير نار لاتطفى ولاتخمد الا بهبة ريح عالية محملة بأجوبة صح مو مثل امنياتنا بس تبقى هالريح هي الي تقرر اما تاذينا وتقلعنا من جذورنا او تأمنا وتطيب خاطرنا

وكف ابوية على حيلة ورفع اصبع السبابة بتهديد

وكال جملته الي دائما يكولها ..

.. اني محترمك لخاطر عمامة رسول الله ..

وتقرب منه شال العمامة بايده وركعها بالگاع ..

وكمل كلامه .. وچان يشيل القندرة وبلش بي ض*ب وين مايوجعه وفقد ابوية اعصابه وانهار وماكدرو يفكونه عمامي يتلاوون وياه

بس هسه بالقندرة وعلى راسك ..

كبت العيطة بالاستقبال ..

عمو الكبير ابوعلاء .. عيب ابو جلنار ترا الشيخ دايس عتبتنه ميصير هيج

خالي حسن... استهدو بالرحمن والعنو الشيطان ميصير هيج

ابوجلنار..مستمر كامش بخوانيكه ويتلاوه وياه للشيخ

الشيخ مروان.. وهو يحاول يفك روحه ماسويت شي غلط وانته رجال وتفتهم شرع الله حللي اربعة وبنت خالتي اني اولى بيها من الغريب

بعده يجر بروحه يريد يبعد ايد ابوية منه

ابو جلنار .. تف عليك اني داز بنتي يمك هي عرضك وبت خالتك شلون تحط عينك عليها بكد

الشيخ مروان ..بصياح .. بناتنا بكدها عدهن طفل واثنين .. والزواج المبكر ستر للبنية

ابو جلنار .. ويسحل بالشيخ امشي اطلع برة امشي لابارك االله بيك ولا بعمامتك

عمي ابو علاء ... عمي صلو عالنبي هي خطبة واحنا بكيفنا نرده لو نقبل هذه زواج ومستقبل مو لعبة

ابو جلنار.. بفرفحة قلب وبصوت م**ور لا نقبل ولاهم يحزنون انة ماعندي بنات للزواج حتى لو خبزة ومي تاكل عندي ماانطيها

الشيخ ...وهو جاي يطلع من باب الاستقبال لاتوكف بنصيبها الزواج ستر وصون للبنية والله تتندمون

خالي حسن.. بوية اطلع مو وكتها هسا

لاتخلي بانزين على النار وتحركنا روح بوية روح الله يخليك كافي تشعللها وماكول غير بس الله يهديك

ابو جلنار... وهو يلهث ولازم خاصرته بوجه كله قهر حسبي الله ونعم الوكيل

خالي حسن ..ابو جلنار ارتاح شوية واشرب مي شوية كول يالله خوية الامور متنحل هيج هونها تهون

ابو جلنار ..بوجع صيحلي جلنار خلي تنطيني علاجي وجع كتلني

خال حسين جلنار نارة وينج حبيبتي

جلنار بخوف نعم خالو

خالي حسين تعالي انطي العلاج لوالدج وانة طالع لبيت خالتج ام مروان

جلنار بتردد وخوف ها اي خالو هسا يتدلل

رحت ركض واني خايفة كلش بس لاانض*ب

جبت علاج ابوية ونطيته اله

وجسمي يرجف ويرتعد من الخوف ..

اخذه من ايدي باوعلي وكال

بنتي فوريلي كفشة الاذرة وجع ذ*حني حبيبة

من كال هالكلمة الاخيرة حسيت باطمئنان وبطلت اطرافي ترجف

دنكت جاي انطي العلاج اخذه وسحبني اله حظني وكام يبجي بقهر وويمسح على ظهري..

.. كال لي حبيبية ابوج انتي نارة قلبي لاتشوفيني اقسي عليج انتي مو بس بنيتي انتي وليدي الي ردته سند بهالدنيا الفانية بوية انتي سندي وسند اخوانج ولاترضين بأي شي غلط ولاتخلين احد يجبرج على شي ماترديه

جلنار ..الله احلى شي من يتبدل احساس الانسان من خوف ورهبة لشعور جديد ممجربته مااذكر شوكت اخر مرة بابا حظني بيها ويمكن اصلا مافد يوم شفته حاظني لو بايسني كنت اشك بابا ميحبني وراح ينطيني للشيخ بسرعة طلعت غلطانة بابا حتى لو يأذيني بسبب مرضه ويذب حرقة قلبه ووجعه بية بس اي يحبني ومو اي حب لا حب بمحنة ومسؤولية يحبني لدرجة ميفرط بية وينطيني لرجال جبير ويزوجني ويخلص مني..

جاوبته ..بابا حبيبي واشبگ بي وابتسم من الفرحة بابا اوعدك راح اكبر واصير معلمة واسندك انته واخواني اني ابنك وبنتك وكلشي وكلاشي وبسته بيده ومسحت دموعه الي جوت قلبي شكد متعذب وشايل همنا بقلبه اويلي حبيبي بابا

ابو جلنار ...الله يرضى عليج بنيتي روحي لامج شوفيها شلون صارت ولاتكوليلها ابوية سأل عليج

جلنار باستغراب ليش بابا

ابو جلنار روحي ومثل مكتلج سوي شوفيها شلون صارت

جلنار حاضر بابا تدلل

رحت للمطبخ الجبير واشوف عمتي الوسطى فخرية (ممرضة ) تضمد براس امي وستوها تريد تمسح الدم على وجهها بجهة الضماد ودتوصيها متتحرك زايد وتظل ضاغطة عالجرح لحد مايوكف النزف وتشوفها تحتاج خياطات لو لا

واجيت ركض اريد اشوفها والزم ايدها واتطمن عليها جرتني عمتي هنية ولج نارة شوفي امج خلصت المعجون وخلته بالميش مالتها وميشت شعرها هاي شنو امج العوبة ..

جلنار مدري شكللها هاي بالله صدك اذا كالو لاعقل ولاراي

ام جلنار تبجي... اني بياحال وياميش بالعافية عليج لاهم لاغم

بيبي.. ولج انتي كل البلا براسج بنية چنها ورد تنطيها لهذا ابو عمامة متخافين الله

ام جلنار بقهر وبجي ..عمة لاتزوديها علية لخاطر الله اني شسويت

عمتي فضيلة الكبرى.. شكو بيها عرسيها وخلي فد شهر شهرين تصير خدامة لاختج ومرته مابيها شي

عمتي الوسطى فخرية.. حرام عليكم كافي تزودوها عليها كل واحد حاير بهمه اني ضد الزواج المبكر لان يقتل طفولتها لجلنار خاصة هي شاطرة وحليوة ونادرة الها مستقبل ان شاء الله بس حتما اكو ظروف جبرت امها تتصرف بهالطريقة

ام جلنار ..ياناس افهموني اني ماكلت تعرس هسا كلي خطوبة وعقد وتكبر شوية تتزوج بنات خالتها بكدها عدهن طفل واثنين ولازمات بيوت عيالهن.

بيبي ..لاعيني شنو هالحجي صدك لاكالو مخج مخ عجم محجر اكلج متعرسيها تكليلي بس خطوبة وعقد اني صح اكرهج مثل دم سنوني بس مااقبل بنية جنها ورد تعرسيها لواحد بكدج المفروض ابنه بطوله عيب والله ماستحى هيجي يفكر وانتي غبرة تسافرين وتعوفيها يمهم احنا ننغز متعرفين تجينا وتخليها يمي عبنج حاقدة وسمج سم عجم ..

ام جلنار .. عمة اني ساكته صار سنين هو منو الي ابتعد عنا وطردنا مو انتي تكرهيني ومتحبيني شكم مرة اجاج علاء ابن ابو علاء وكلج عمي ابورؤوف مريض وواكع ماسالتي منين اجيبله فلوس العلاج

كلفتي روحج تجين تسألين تشوفين ابنج مريض ويريد يموت ويتلوع لو بس تردين تخلين السبب براسي اني صح اصلي عجمية بس ماعفته ولاتخليت عنه بعز شداته اني وجلنار صرنا سند تدرين شلون عايشين تدرين جهال ابنج شياكلون شيلبسون لحد يحكم من برة اني ماكفرت ولا ردت ازوجها ولانطيته موافقة كتله اشور اهلها وابوها وتأملت خير ردت انقذها من الفكر والظيم والجوع

جلنار.. كمت حظنت امي واسكت بيها كافي امي حبيبتي اني موافقة اتزوج الشيخ لاتنقهرين والله واخلي يشتري لكم اي شي ترديه حبيبتي امي وحتى لو اشتغل خدامة ببيت خالتي ام مروان

بيبي... تحاول تمسح دموعها بشيلتها بدون متشوفنا انها تأثرت وبجت وكالت انتي غبرة وثولة المفروض تدفرين الباب وتجين عندي هذا بيت عيالج مو تظلين خدامة لليسوى والميسوى انتي وبنيتج الي چنها الورد

ام جلنار ... عمة تعرفين ابنج وطبعه تدرين يستحرم هو فلوس الورث مالت ابوه مااخذه لاتدخليني بينكم تدرين بي يتخبل من الحرام ودايما يكول فلوس ابوي الله يرحمه كلها مخلوطةبالحرام لان عمي ياخذ ربا..

بيبي .. يلا كومن ناخذ العشا كتلنا الجوع الجهال تفتر خطية كلها انهبطت واني سكري نزل من الجوع الحجي ميخلص ترا

ام جلنار ادللي عمة

عمتي فضيلة.. انتي كعدي احنا نكوم يلا نارة حبيبتي ايدج ويانا

جلنار حاضر عمة

صبينا الغدا والتمينا واشوف الوجوه كلها تباوع باستغراب وناس بتأنيب ضمير وناس بلؤم وناس بشماته ..الاقارب اويلي من يلتمون خاصة بعد قطيعة دامت سنين تحس نفسك غريب بينهم ..

العمات والعمام ونسوان العمام وبنات العمام الكل يباوعون لأمي سودة علية وامي كوة تاكل خطية

خلصنا عشا وعمامي وولدهم راحو للاستقبال ينتظرون الچاي ..

رحت للمطبخ انصدمت بعمة هنية كاعدة بنص كدر الطبخ الچبير الاسود لان كدورة بيبي كلش جبيرة..

عمه هنية تركص وتغني

عبود خطبوله مرة يلا حيو حيو من غير حمرة محمرة يلا حيو حيو وكللوش ..

مدت ايدها تشمر علينا بالغطيات الزغار والطوس وكلاصات اللبن الستيل والخواشيك ماخلت شي ماحاربت علينا بي

ونسوان عمامي وبناتهن مطافر صارن كل وحده بصفحة..

ظلينه اني واخواني ميتين ضحك .. عليها ..

كلهن لبسن بسرعة وطلعن وچان تكلي يلا نارة حاربي وياي بسرعة دخت منهن هن وجهالهن شنو ياكلن ويطلعن مثل الشوك مچلبات ابيتنا

واخذت بيدها من المواعين المغسولة الي مخليها بالجدر الثاني بصفها وظلت تشمر وتغني الى ان فعلا طلعتهم كلهم ..

وبيبي تريد تكوم الها تسكتها متكدر ظلت تصيح ولجن لحكني ولجن تعالن لية رجلية خدرت وشكلت اجيتلها افرك بيها

رادت تكوم لها كتلها بيبي هسا تسكت تعالي اوصلج للحمام ..

عماتي راحن بقينا اني واخواني

حمودي .. نعسان اريد انام

جلنار .. تعال وليدي حبيبي هسا انيمك

حمودي .. جلنار لتنيميني يم ماما اخاف وجهها بي دم

ريمة .. انجب ماما تخبل مابيها دم ومتخوف

وكرصته وهي تجر برجليها

كوة قنعته ونيمتهم يم بيبي ..

سديت الباب وطلعت رحت للمطبخ شفت عمه هنيه غافية وتشخر وهي بوسط الجدر ..

ماكعدتها خاف تخبصني .. ظليت اصفي المواعين واغسل وامسح وانظف لحد مامتت احس ظهري طك وعمة هنية نايمه ..

كمت علكيف كعدتها عمة هنية يلا حبيبتي كومي نغسل وننام

كعدت فركت عيونها نارة اني احبج

كتلها واني هماتين اموت عليج

جان تجرني من شعري ولج نارة لاتتزوجين الشيخ ينام على خوانيكج بليل..

لزمت ايدها الي لازمة شعري بيها

كتلها اخ عمة حاضر مااتزوج بس هدي شعري .

كالت اي عفية بنارةسمعي الكلام ترا اشمرج من فوك السطح ..

كتلها ها موتحبيني شون تشمريني امووت

كامت على حيلها وطلعت من الجدر

كالت تعالي وجان تشيلني تفرني

الله من صدك حسيت روحي افتر مثل الاميرات وغصت باحلام احلام حلوة بعيدة المنال بيها حديقة چبيرة كلها ورد حلو ياسمين ونرجس الله حديقة بيها ماما وبابا وريم بس رجليها تمشي زين عليها وماتعرج وحمودي يلعب بسيارته الحلوة واني صايرة احلى معلمة ...

مرت الايام بسرعة كبيرة لانها براحة وبلاتعب يمكن

اجى وقت لازم نرجع لبيتنا الي خلص وصار لازم نشوفه شلون صار متشوقة اشوفه وبكل لهفة لميت اغراضي وجهزت اخواني وماما لمت باقي الاغراض بوسنا بيبي ولزمتها العبرة..

كالت لامي وهي تبوسها عود كطعي اعرفج طبعج الكطع ماوصيج

ام جلنار.. وهي تبوس بيبي براسها لاعمة ان شاء الله نجي .

رحنا نريد نبوس عمه هنية

ماقبلت تبوسنا كالت وخروا وخروا ماحبكم ماريدكم

اريد ابوسها ابتعدت مني دنكت اخذت خذت احذيتنا

من يم الباب وشردت ..

و تريد نبقى يمها فدوة شكد طيبة وحنينة..

صعدت فوك صعدت يمها شفتها يم تنور الطين القديم بيبي خالته ستوها مطفيته ونازلة كانت تخبز

شفتها شمرت احذيتنا بطن التنور واني واكفة اباوع عليها بذهول ..

يااا عمه شسويتي ..

اشرتلي وهيه معصبة كالت نزلي لااذبج من السطح ..

نزلت اركض مرعوبة لاتسويهه ..

رحت لماما اركض .. تلكتني هاا وين الاحذية ؟

جلنار .. ماما شمرتهن بالتنوور كلهن ..

بيبي .. يااا شوف المخبلة تعالوا اني اطلعلكم نعل ..

ام جلنار ...انعم الله عليج هنية راح نرجع حفااي اني وجهالي..

جلنار ...ماما ميخالف مو خالو حسن راح يطلع يشتري لنا ملابس واحذية خطية متفهم

سحبتني بيبي وشاورتني

بيبي ...هاج نارة حبيبية هاي فلوس اشتري نساتل واليشتهي قلبج ولاتنطين لامج النحسه

جلنار ...ههههه حاضر بيبي ادللي بوستها بيدها وشبگتها

عمه هنية .. ومن فوك انعل ابوكم جلاب بعد لاتجون يلا روحو وشبعتنا محارب وتبجي خطية ..

ريم وحمودي ميتين ضحك ولبستنا بيبي نعل ولد عمي زايدات موجودة بالبيت وطلعنه ..

واحنا نمشي بالطريق حمودي لابس نعال اطول من رجله هههههه وشوية اشيله وشوية يمشي

ريم تتذمر ماريد امشي تعلت عود احنا ليش ماعدنا سيارة اففف راح نرجع للفكر والبيت المصخم

جلنار.. عيب هالحجي حبيبتي ريم والله ماما تنقهر ترا

حمودي ..ريم انتي نحسة ليش تقهرين ماما

ريم.. انته انجب ماعليك اسيود

جلنار.. كافي يلا راح نوصل ماما انطيني عنج حبيبتي

ام جلنار.. بتعب لا ماما حبيبتي انتي بس لزمي اخوتج راح نعبر الشارع

عبرنا الشارع واني لازمة اخوية حمودي بيدي وشايلة ريمة منظري يضحك يمكن بس اني شوف ذولة صدك جهالي مو اخواني ريم مبينة تعبت بس وصلنا عبرنا الشارع وبقى شكم فرع ونوصل غفت على چتفي ضعيفة حبيبتي وعركانة كانت سودة علية متتحمل حتى لو تعاند وتمشي بس لازم تتعب يارب فدوة لأسمك لاتتالم ريم وتطيب بسرعة..

وصلنا وريم غفت خليتها علكيف واني بودي اكمز وية حمودي كتله حبيبي وليدي على كيفك البيت يخبل صاير ابيض ناصع والسنادين الجديدة كلشي بيها حبيبي خالو حسن ممخلي شي مجايبه رشاد ونعناع ورد الصباح الجوري الرازقي ريحان كلشي كلشي اووف يخبلون ضليت اشم بيهم احس اخواني يشبهون من لهذه الورود الزغار يحتاجون واحد يداريهم وينطيهم مي بس مويغرگهم فدوة شكد حلوات وعطرهن يخبل صاير صح ماتشبه الحديقة الي حلمت بيها بس اهم شي ريحتهم طيبة ومن خالو حسن فدوة من كال ادللكم صدك دللنا يارب ارزق خالو حسن واحفظه النا يارب .

ام جلنار ..حبيبة بنيتي بعد شوية يجي ابوج وخالج حسن من بغداد خطية اليوم اخذه للعلاج بمكاني الله يسهل امره يارب

جلنار.. الله يرجعهم بالسلامة يارب

ام جلنار ..ماما اني حنام شوية احس روحي خدرانة ودايخه مدري شبية

جلنار ..سلامتج ماما هسا اسويلج بلنگو (مشروب من حبات الريحان وماء الورد مع السكر يفيد للضعف العام العام يتسوى بكميات وينحفظ وساعة الحاجة ينأخذ منه شوية ويتحلى وينشرب )

ام جلنار ..فدوة لبنيتي الحنينة والله مرات احسج انتي امي مو اني امج

جلنار.. سويت لها البلنكو بسرعة يلا شربي وادللي ماما

ونامي وارتاحي اني راح اطرز كم شغلة لايظل بالج كاعدة وعيني على حمودي

ام جلنار ..الله يحن عليج حبيبة

واني اطرز زهور صايرين على شكل غصن متدلي تشبه وردات الصباح لونهم وردي كانت لطيفة و ناعمة مستخدمة باترونات لتطريز الايتامين هيج كان اسمه

والغصن كان عبارة عن وردات وردي متناثرة على طوله وبيها اوراق خضر ناعمه وعلى جهة واكف بلبل على اخر الغصن وبداية الغصن كانت فراشة سمائي

المنظر مالت الچفية كلش حلوو وبديع كنت اتمنى اصير بمكان هالفراشة من كد مو اني اخفيفة كنت اتمنى اطير بس مو لأي مكان لا كنت اتمنى اطير على ورداتي وبمكان ما بي قهر او تعب الله شحلاة اليوم من يبدي بزقزقة عصافير وريحة ورد وعبير شي مثل الحلم اريد بس جناحات لقلبي المرفرف

دخل بابا وخالو حسن يسنده وجهه متعوب ...

كلش عفت التطريز ورحنا تلكيناهم .. واهلي بيهم

هلو خالو الحمدلله على السلامة ..

بابا .. جلنارة اريد مي وكفشة الاذرة اريد انام ميت السيارة **رتني

جلنار .. حبيبي يابة تدلل وركضت رحت سويتله قوري كفشة اذرة حتى تتهدر ويستفاد منها يشربها منا ينام منا

كعدت ماما من النوم وراحت للحمام العفو وظلت بس تتقيأ وابوية صفن بوجهي شتغديتو شبيها امج خاف متسممة

جاوبته .. لايابة تغدينا ببيت جدو يم بيبي يلا رجعنا للبيت

وكلنا اكلنا وياها تمن كلم (اكلة مشهورة بمحافظتنا الكلم عبارة عن خضروات تشبه الشلغم لونها اخضر من برة وداخلها نسخه من الشلغم ابيض لكن نكهته خاصةوطيبة ينحمس الى ان يصير لونه جوزي وية اللحم ويتطبگ عالتمن العنبر ببهارت معينة فقط دارسين وكركم وبصل محموس ويصير اكلة كلش طيبة فاخرة )

ابو جلنار.. يلا يجوز تعبانة وتخربطت هسا تصير زينة

جلنار يابة روح نام وارتاح مابيها شي ماما هسا اعصرلها ليمون يجوز تلعب نفسها الاكل ثقيل عليها

ابو جلنار.. انة الوجع كتلني وبديت اعرك كودن شربت الكفشة الاذرة يلا يابة اروح انام

جلنار ..نوم العافية يابة

ام جلنار.. طلعت من الحمام احس قلبي انخمط وروحي راحت وافترت الدنيا بية

جلنار.. وكعت علينا ماما واني من هبطتي مااعرف شسوي بس اصحي بيها وماتكعد

....

حسن .. رحت انزل الجنطة من السيارة ودخلت للبيت واشوف ام جلنار واكعة لاحس ولانفس هذه اختي حبيبتي احن وحدة بخواتي ويتيمة مثل بنتي مو اختي يارب لايصير بيها شي ماكو كاطعة النفس انفجع قلبي بيها يارب ماعليها شي ..

صحت على جنار

جلنار بنيتي يلا بسرعة عباية وحجاب لامج ستريها خلي اركض بيها وبسرعة ركضت بيها للسيارة سويت الدرب خطوتين احسها صفرة وشفايفها يابسة احاجيها طول الطريق ماكو حس ابد..

يتبع ..