العاصي (الجزء الثالث )

الفصل الثالث

#نكمل

....

فى يوم كنت فى الجامعه قاعد مع فريده

فريده : ايه يابنى انت خلاص اتعقدت من البنات ولا ايه

انا : ليه بتقولى كده

فريده : انت من بعد يمنى ورافض الارتباط

انا : لا مش فكرة رافض الارتباط .... انا بس مركز فى الشغل وفى الدراسه

فريده : ياعم انت شغلك ودراستك ماشين كويس جدا ... ايه المانع من انك ترتبط

انا : ايه جايبالى عروسه انتى كمان

فريده : ليه هو فى حد تانى جايبلك عروسه

انا : لا مفيش حد اصلك بتفكرينى بياسمين ايام ماكانت تزن عليها علشان اخطب يمنى

فريده : بصراحه جيبالك عروسه وانت عارفها كويس وهى بتحبك بقالها اكتر من 3 سنين

انا : ياه من 3 سنين وانا معرفش

فريده : لا انت عارفها بس بتستعبط

انا : طب سبينى استعبط شويه

فريده : لحد امتى هتفضل تستعبط كده

انا : بصى يا فريده انا مكانش ليا علاقات فى مصر هنا غير مع اتنين وهما ندى ويمنى .... ندى كانت واطيه .... ويمنى الله يرحمها ويسامحها كانت اوطى من ندى بمراحل .... علشان كده تلاقينى خايف ارتبط باى واحده اليومين دول

فريده : وانت هتقارن ريهام بندى ولا الزفته يمنى

انا : انا عارف ان ريهام مختلفه عن الاتنين وانا معجب بيها بس انا معرفهاش كويس علشان ارتبط بيها .... ايوه انا قعدت معاها اكتر من مره ومانكرش ان فى راحه غريبه بحسها وانا معاها .... راحه عمرى ما حسيتها غير مع امى وابويا .... كل ما اقعد معاها بشم ريحة والدى كل ما اكلمها احس انى عاوز اكلمها اكتر وبينى وبينك الاحساس ده مخوفنى

فريده : مخوفك ازاى

انا : خايف تطلع واطيه زى ندى ويمنى .... وساعتها انا هتدمر بجد

فريده : يادى ندى ويمنى اللى عملولك عقده .... بقى تسيب احساس جميل زى ده علشان مجرد هواجس فى دماغك

انا : طب انا هسالك سؤال

فريده : اتفضل اسأل

انا : انتى بتحسى بايه وانتى قاعده مع ابراهيم

فريده : بحس انى عاوزه الوقت يوقف وميتحركش

انا : طب وابراهيم بيحس بايه

فريده : هو ابراهيم اصلا عنده احساس ده جبله ..... اكلمه عن الحب يكلمنى عن الفيزياء الحراريه .... اقوله امتى هنتجوز يقولى اكيد هيجى يوم ونتجوز .... اقوله ايه اكتر حاجه بتحبها فى حياتك يقولى الفريزه والمقشطه ويشرحلى الفرق بينهم .... ده يوم عيد ميلاده جبتله هديه وروحت اديهاله لقيته قاعد قدام مكنه الفريزه ومطنشنى .... ابراهيم بيحب الفريزه اكتر منى

انا : هههههههه .... ابراهيم ده نكته

فريده : يا عم ده رفعلى الضغط وشويه وهيجيبلى السكر

انا : ليه كده

فريده : انت عارف ان فى اجازة الصيف اتقدملى

انا : ايوه عارف

فريده : قبل ما يجى يتقدم بكام يوم كان فى مشكله فى الكهرباء فى الشقه وجبنا كهربائى صلحها وفى اليوم اللى جيه فيه علشان يتقدملى حصلت نفس المشكله سابنى وساب ابويا بيتكلم مع ابوه وقام علشان يصلح العطل ....وقتها والدى قاله مفيش عده فى البيت تصلح بيها .... التنح طلع حاطط عدة كهرباء فى شنطة العربيه ومارتاحش غير لما صلح العطل

انا : ههههه طب دى حاجه كويسه

فريده : عارف ابراهيم بيفكرنى بمين

انا : بيفكرك بمين

فريده : بيفكرنى بفؤاد المهندس فى فيلم عائلة زيزى

انا : ههههههه مش للدرجه دى

فريده : انا خايفه شهر العسل نقضيه فى المصنع اللى بيتدرب فيه

انا : صحيح هو بيتدرب فين دلوقتى

فريده : بيتدرب فى مصنع صقر بتاع الاجهزه الكهربائيه

انا : انتى متاكده

فريده : ايوه متاكده

انا : ومين اللى خلاه يتدرب هناك

فريده : انت ناسى ان امانى قريبتى تبقى مرات مهيب صقر ..... ده غير ابراهيم صاحب مهيب صقر وشريكة فى شركة البرمجه يبقى ابن عم ابراهيم خطيبى

انا : طب تمام

فريده : خلينا فى المهم

انا : ايه هو المهم

فريده : هتعمل ايه مع ريهام

انا : مش عارف سبيها للظروف

فريده : حاضر يا سيدى هسيبك على راحتك

وانا قاعد مع فريده بتكلم وتليفونى رن وكانت المدرسه بتاعة سليم

انا : الووووو .... ايوا انا .... انت بتقول ايه ..... طب انتوا فى اى مستشفى .... مسافة السكه واكون عندك..... مع السلامه

بعد كده بصيت لفريده : انا قايم ماشى

فريده : خير فى ايه

انا : لا بس فى مشكله فى الشغل

فريده : طب ابقى طمنى

سبت فريده وجريت بسرعه على المستشفى اللى فيها سليم واتعمل التحاليل اللازمه والاشعه المطلوبه وبعظ كده قعدت مع الدكتور

الدكتور : فين والد سليم

انا : والده متوفى وانا اخوه الكبير ووصى عليه .... ليه فى ايه يا دكتور طمنى

الدكتور : سليم حالته خطيره

انا : ليه فى ايه

ياترى ايه اللى هيحصل مع سليم .... ده اللى هنعرفه الحلقة اللى جاية

______________

وقفنا الحلقة اللى فاتت لما سليم تعب فى المدرسه ونقلوه على المستشفى وعملوله التحاليل والاشعه اللازمه وبعد كده قعدت مع الدكتور

الدكتور : فين والد سليم

انا : والده متوفى وانا اخوه الكبير وصى عليه .... ليه فى ايه يا دكتور طمنى

الدكتور : سليم حالته خطيره

انا : ليه فى ايه

الدكتور : عنده فشل كلوى .... الكليتين شغالين بكفاءه ضعيفه جدا مش معديه 30 %

انا : انت بتقول ايه ده لسه صغير

الدكتور : للاسف الحاله صعبه وهنلجاء للغسيل الكلوى

انا : ده صغير على البهدله دى

الدكتور : الحل التانى ان احنا نلاقى متبرع وناخد كليه نزرعها فى سليم

انا : وانا موافق ومستعد ادفع من مليون ل 10 مليون بس سليم يقوم بالسلامه

الدكتور : المشكله مش فى الفلوس

انا : امال المشكله فين

الدكتور : سليم فصيلته B- ودى فصيله نادره جدا واحتمالية اننا نلاقى متبرع دى حاجه شبه مستحيله

انا : انا نفس الفصيله ومستعد اتبرعله

الدكتور : بجد

انا : ايوه يا دكتور

الدكتور : طب احنا هنعملك شوية تحاليل علشان نتاكد ان كليتك تنفع

انا : لو ينفع يا دكتور اسفر سليم بره مصر اعمله العمليه هناك

الدكتور : لا مفيش لازمه للسفر .... العمليه دى بقيت اسهل ما يمكن ومش مستاهله سفر وعلشان تتطمن اكتر الدكتور اللى هيعمل العمليه لسه راجع من لندن من كام شهر بقاله هناك اكتر من 15 سنه

انا : طب تمام .... يلا يا دكتور شوف شغلك علشان نعمل العمليه

الدكتور : اتفضل معايا

وعملت التحاليل ومستنى النتيجه تظهر وتانى يوم فى المستشفى قاعد مع الدكتور

الدكتور : احنا كده قطعنا الشوط الاصعب

انا : يعنى ايه يا دكتور

الدكتور : يعنى التحاليل اثبتت انك تنفع تتبرع لسليم

انا : طب هنعمل العمليه امتى يا دكتور

الدكتور : لسه شويه

انا : لسه ليه يا دكتور

الدكتور : لازم نعمل تجهيزات ليك ولسليم قبل العمليه

انا : طب شوف شغلك يلا

الدكتور : انت هتقعد فى المستشفى من النهارده علشان نجهزك للعمليه وعلى اخر الاسبوع هنعمل العمليه

انا : معنديش مانع .... بس هستاذن حضرتك اروح اقضى كام مشوار وارجعلك تانى

الدكتور : اتفضل خلص مشاويرك براحتك وفضى نفسك على الاخر علشان مجرد ماتدخل المستشفى مش هينفع تخرج منها

انا : حاضر يا دكتور .... بس هنقعد فى المستشفى قد ايه انا وسليم علشان ارتب امورى

الدكتور : هتقعدوا من اسبوعين لتلاته

انا : تمام يا دكتور عن اذنك

الدكتور : اتفضل

خرجت من عند الدكتور وروحت على الجامعه علشان اقدم شهاده مرضى علشان الغياب وبعد ما خلصت فى شئون الطلبه كنا فى البريك قولت اروح اقعد شويه مع العيال ودخلت الكافتريا لقيت فريده وريهام بس قاعدين

انا : اذيك يا فريده .... اذيك يا ريهام

فريده وريهام : ازيك يا دياب

فريده : فينك يا بنى مختفى كده بقالك يومين وقافل تليفونك

انا : لا ابدا عندى شوية مشاكل فى الشغل

ريهام : خير فى ايه

انا : لا مشكله بسيطه واتحلت خلاص

فريده : طب تمام ... اهم حاجه تكون كويس

انا : ان شاء الله هبقى كويس

ريهام : مالك يا دياب كده شكلك متغير

انا : متغير ازاى يعنى

ريهام : مش عارفه بس حاسه انك مخبى حاجه .... او فى حاجه مديقاك

انا : لا بس يمكن علشان مطبق من امبارح من غير نوم

فريده : طالما مطبق من امبارح ايه اللى جايبك الجامعه النهارده

انا : جيت علشان اقدم على اجازه

فريده : اجازه ليه

انا : علشان مسافر

فريده : هتسافر فين وليه

انا : مسافر امريكا

ريهام : ليه فى ايه

انا : لا عادى فى واحد عزيز عليا جدا مريض ولازم ازوره

ريهام : مين ده

انا : ده يعتبر فى مقام والدى ... كلمته من كام يوم لقيته تعبان علشان كده قررت ازوره

ريهام : هتتاخر هناك

انا : مش عارف .... بس لو الموضوع بسيط هرجع على طول اسبوعين تلاته بالكتير

ريهام : طب لو لا قدر الله طلع حاجه كبيره

انا : يبقى مش هرجع واحتمال اكمل حياتى هناك

فريده : لا انت لازم ترجع احنا منقدرش نعيش من غيرك

انا : سبيها للظروف محدش عارف الخير فين .... وبعدين فين الزفت خطيبك من يوم ما اشتغل عند الزفت اللى اسمه مهيب صقر وانا مش عارف اشوفه

فريده : ده على اساس ان انا بشوفه .... وبعدين انت مش ناوى تنسى اللى بينك وبين مهيب صقر ده حتى بقالكم كتير مشفتوش بعض

انا : انا مش عاوز اشوفه وياريت كمان هو يفضل بعيد عنى انا مصدقت انه ابتدى ينسانى

فريده : والله مهيب صقر طيب وغلبان بس الظروف اصعب منه وكفايه اللى حصل لابنه

انا : اللى حصل لابنه ده هو السبب فيه

ريهام : قصدك ايه يعنى

انا : لا متاخديش فى بالك ..... بس مهيب صقر عملى حاجات كتير وكلها حاجات اوحش من بعض .... كل مره بيحسسنى بعجزى قدامه بيعمل كل اللى عايزه من غير ماحد يقدر يكلمه فى نفس الوقت اللى مبيسمحش لحد غيره انه يعمل اللى هو عاوزه .... حاجات كتير انتى مش هتفهميها

ريهام : ازاى مش هفهمها

انا : علشان تفهميها لازم تكونى عارفه مهيب صقر كويس .... لكن انتى زيك زى اى حد هنا فى الجامعه يدوب يسمع عنه من كلام الطلبه والدكاتره .... كلهم بيتكلموا على مهيب صقر الاسطوره اللى محصلتش .... كلهم بيتكلموا على مواقفه فى الجامعه وقد ايه بيساعد الناس وبيمدلهم ايده بالخير لكن ميعرفوش الوش التانى لمهيب صقر .... هو اه بيمد ايده بالمساعده للناس لكن بالايد التانيه بي**ق حياتهم وبيمص دمهم ..... مهيب صقر بيعيش على دم الناس

ريهام : للدرجه دى انت شايفه وحش

انا : انا اكتر واحد اعرفه كويس

فريده : خلاص يا اخوانا كفايه كلام كده علشان مش ناقصين مشاكل وانا هروح اشوف ابراهيم فى الورش وارجعلك

انا : واحشنى والله

فريده : خليك هنا هنزل الورش اشوفه واجيبهولك

انا : بدل ما تروحى اتصلى بيه

فريده : لا الورش فى البدروم ومفيش شبكه تحت

انا : اه نسيت طب روحى هاتيه

فريده : ربع ساعه واجيبهولك

بعد ما فريده مشيت

ريهام : مالك يا دياب

انا : مفيش حاجه زى ما قولتلك مطبق ومش نايم كويس

ريهام : بس دى مش الحقيقه .... وايه حكاية سفرك المفاجأه دى .... انا واثقه ان انت فى حاجه مخبيها

انا : معلش يا ريهام انا مش قادر اتكلم دلوقتى

ريهام : بس انا قلقانه عليك

انا : متقلقيش انا كويس

ريهام : انت ليه كده

انا : كده ازاى يعنى

ريهام : احيانا كتير بحس انك مش بتحب تقعد معايا ولا تتكلم حاسه انك عاوز تبعد ليه ده كله

انا : علشان خايف

ريهام : خايف تحبنى ولا خايف انى ائذيك

انا : الاتنين اذى بالنسبالى

ريهام : حبك ليا اذى

انا : انا بقيت اخاف من الحب

ريهام : ليه ده كله .... كل ده علشان اتخدعت فى اتنين ملهمش لازمه

انا : لا الاتنين مش فارقين بالنسبالى ولا بفكر فيهم اصلا

ريهام : طالما كده ايه المشكله

انا : عارفه يا ريهام انا هقولك كلام اول مره تسمعيه منى

ريهام : كلام ايه ده

انا : انا صحيح معرفكيش كويس ... بس بحس معاكى براحه غريبه عمرى ما حستها غير مع والدتى الله يرحمها .... بشم فيكى ريحة والدى .... بحس بيكى من قبل ما اشوفك ... مجرد ما ابص فى عيونك بعرف اذا كنتى زعلانه ولا فرحانه .... عيونك دايما بشوف فيها ابويا ... مش عارف ايه السبب

ريهام : طالما حاسس كل الاحساس ده ناحيتى ايه اللى معطلك

انا : خايف تروحى منى زى كل اللى قبلك وافتقد الاحساس اللى انا حاسه معاكى

ريهام : اروح منك ازاى يعنى

انا : اصل كل حد اتعلقت بيه راح منى ... امى راحت منى وانا صغير ... ابويا اللى عشنا انا وهو لبعض راح منى فجأه .... ندى اللى افتكرت انى بحبها سابتنى فى اول مشكله ... يمنى الى خطبتها طلعت بتستغلنى علشان مصلحه قذره زيها .... ده غير اخر حاجه حسيت انها عوضتنى عن كل الوحش اللى شوفته شكلها كده برضه هتروح منى .... علشان كده خايف انتى كمان تروحى منى وارجع اعيش لوحدى تانى ... انا بنى ادم اتكتب عليه انه يفارق كل احبابه

ريهام : ياه كل ده جواك ومخبيه

انا : عادى

ريهام : بص يا جدع انت .... انا بحبك ومش هسيبك مهما حصل ومش هاممنى انت شايفنى ازاى كل اللى يهمنى انى اقولك على اللى جوايا من ناحيتك من غير **وف .... هاه قولت ايه

انا : انا كمان بحبك .... بس ياريت ناجل اى كلام فى الارتباط دلوقتى

ريهام : ليه يعنى

انا : بعد ما ارجع من السفر نبقى نتكلم

ريهام : مش هتقولى مسافر ليه

انا : بعد ما ارجع هتعرفى كل حاجه

ريهام : وانا هستناك واعمل حسابك هتصل بيك كل شويه اتطمن عليك

انا : تليفونى هيبقى مقفول

ريهام : طب هتطمن عليك ازاى

انا : ممكن تكليمنى على الفيسبوك

ريهام : انا مش معايا الاكونت بتاعك

انا : ابقى خديه من فريده لانى مش فاتح الاكونت دلوقتى

ريهام : كده تمام

بعد كده فريده جات هى وابراهيم وقعدنا شويه مع بعض وبعد كده رجعت الشقه وانعام كانت موجوده

انعام : ازيك يابيه .... وسليم عامل ايه

انا : تمام كويس

انعام : طب هو فين

انا : لسه فى المستشفى

انعام : حضرتك مش بتقول انه بقى كويس ليه قاعد فى المستشفى

انا : لسه هيعمل عمليه وبعد كده هيبقى كويس

انعام : عملية ايه بعد الشر

انا : سليم عنده فشل كلوى وهنزرعله كليه جديده

انعام : ياضنايا يابنى .... الواد لسه صغير على البهدله دى ... هو هيلاقيها من فين ولا من فين

انا : امر ربنا بقى

انعام : طب وهتجيبوا كليه من فين .... الحجات دى مش بالساهل كده

انا : انا اللى هتبرع بكليتى .... وخلاص عملنا التحاليل وطلعت انفع اتبرعله

انعام : للدرجه دى انت بتحب سليم

انا : سليم ده اغلى حاجه فى حياتى كلها .... مستعد اديله عمرى كله بس اشوفه كويس

انعام : مع انك مش ابوه ولا تعرفه

انا : سليم ده عوضى عن كل الايام الوحشه اللى انا شوفتها فى حياتى

انعام : نظرتى فيك مخيبتش

انا : قصدك ايه

انعام : لا ماتاخدش فى بالك .... انت بجد طلعت قد الامانه

انا : امانة ايه مش فاهم حاجه منك

انعام : ليه هو سليم ده مش يعتبر امانه عندك لحد ما تلاقى اهله

انا : عارفه يا انعام .... انا فى الاول سليم صعب عليا لما لقيته فى الشارع وقولت اخده عندى لحد ما الاقى اهله بس مع الوقت حسيت ان سليم ده يبقى ابنى وخايف من اليوم اللى اهله هيظهروا مش عارف هقدر اعيش ازاى من غير سليم

انعام : متخافش انت عمرك ما هتفارق سليم حتى لو ابوه ظهر

انا : ازاى يعنى .... اكيد ابوه لو ظهر هياخده منى

انعام : وتفتكر سليم هيسيبك حتى لو رجع لابوه

انا : مش عاوز احسبها كتير .... لانى خايف من اليوم ده

انعام : متخافش .... صحيح مقولتليش عملت ايه مع البنت اللى بتحبها وبتحبك

انا : انتى مين اللى قالك الموضوع ده .... انتى بتتصنتى عليا لما بتكلم فى التليفون

انعام : لا يابنى ده سليم هو اللى قالى .... وقالى كمان انه خايف انك تسيبه لو اتجوزت

انا : انا مقدرش اعيش من غير سليم ... واللى هتجوزها لو اعترضت يبقى تغور فى داهيه متلزمنيش

انعام : اصيل يابنى

انا : سيبك من الكلام ده دلوقتى وخلينا فى المهم

انعام : خير

انا : عاوزك تجهزيلى شنطه وتحطيلى هدوم ليا انا وسليم علشان هرجع المستشفى ومش هخرج منها غير بعد اسبوعين او اكتر ده كلام الدكتور

انعام : حاضر

انا : واعتبرى نفسك فى اجازه لحد ما اتصل بيكى ومرتبك ماشى زى ما هو

انعام : خيرك سابق يابنى .... انا مش عاوزه اجازه ... انا هاجيلكم المستشفى كل يوم اتطمن عليكم

انا : لا متتعبيش نفسك وبعدين انتى بقالك فتره مشوفتيش الاولاد روحى اقعدى معاهم شويه

انعام : ولاد مين

انا : ولادك انتى .... ايه نسيتيهم

انعام : اه اولادى .... لا اولادى قاعدين عند ابوهم دلوقتى

انا : هو ابوهم فين

انعام : فى سوهاح

انا : بيعمل ايه فى سوهاج

انعام : احنا اصلا من سوهاج .... وامى تعبت مش قادره تراعى العيال فبعت العيال لأبوهم

انا : طب ده كلام .... كنتى جبتيهم هنا يقعدوا معاكى والشقه كبيره زى ما انتى شايفه

انعام : معلش يابيه كده احسن وبعدين العيال مش مع حد غريب دول مع ابوهم

انا : على العموم بعد ما اخلص عملية سليم لينا كلام فى موضوع عيالك ده

انعام : انا هدخل اجهزلك لقمه تاكلها وعلى ما تتغدى اكون جهزتلك الهدوم

انا : لا مليش نفس اكل حاجه دلوقتى

انعام : لا مينفعش لازم تاكل وتتغذى انت داخل على عمليه كبيره

انا : طب بسرعه علشان ارجع المستشفى

بعد كده رجعت المستشفى واخدت ادويه الدكتور كتبهالى وبالليل كنت قاعد مع سليم

انا : ايه ياعم سليم انت لازم كده تقلقنى عليك

سليم : انا خايف يا دياب

انا : متخافش يا حبيبى انا قاعد معاك ومش هسيبك

سليم : يعنى انا هخف وارجع العب معاك تانى

انا : هتخف وهنلعب ونتفسح ونعمل كل حاجه انت عاوزها

سليم : يعنى انت مش هتتجوز وتسيبنى زى بابا ماسابنى

انا : ليه بتقول كده يا حبيبى .... انا مقدرش استغنى عنك

سليم : انا سمعتك بتتكلم فى التليفون على واحده وبتقول انك بتحبها

انا : طب ما انا كمان بحبك .... وبحبك اكتر من اى حاجه فى الدنيا

سليم : بابا كان دايما يقولى ان بيحبنى اكتر من اى حاجه فى الدنيا وبرضه سابنى

انا : مين قالك ان باباك سايبك .... هو اكيد بيدور عليك ومش عارف يوصلك

سليم : بابا لو كان عاوز يوصلى كان هيعرف .... انت متعرفش بابا ممكن يعمل ايه

انا : ازاى يعنى

سليم : بابا معاه فلوس كتير وبيشتغل عنده ناس كتير اوووى يعنى يعرف يوصلى

انا : الفلوس مش كل حاجه يا سليم ..... وبعدين انا قصرت معاك فى حاجه

سليم : لا انت مقصرتش فى حاجه بس ماما واحشانى واخويا واحشنى وجدى وجدتى كمان وحشونى وعاوز اشوفهم

انا : اكيد هيجى يوم وتشوفهم يا حبيبى

سليم : انت فين اهلك يا دياب .... باباك ومامتك واخواتك

انا : بص ياسيدى انا معنديش اخوات وبابا وماما عند ربنا

سليم : طب خالك او عمك فين

انا : موجودين

سليم : هما فين انا مشوفتش حد فيهم

انا : مسافرين يا حبيبى ..... وبعدين بقى كفايه كلام كده ونام علشان تخف وترجع تلعب تانى

سليم : ماشى ... تصبح على خير

انا : وانت من اهل الخير يا حبيبى

_____

.*######