Yearbook (R-18)

Chapter 19

“LET’S PLAY, ‘THE CLOSET GAME’ AT EXACTLY 3:00 AM! Nasa listahan na rin ang dalawang taong imbitado para sa aking laro!” pagpapatuloy ng boses sa audio habang isa-isang nagslide sa screen ng laptop ni Ike ang mga Graduation Pictures nila ni Kathleen Tan, “Pamilyar ba kayo sa The Closet Game?”

Napalunok ng sariling laway si Ike.

“Para laruin ito, ang tanging kailangan n’yo lang ay posporo at bedroom na may aparador! Pwedeng-pwede n’yo itong gawin sa mismong kuwarto ninyo. Pero dahil nabigo ang unang Stranger’s Challenge ninyo, magdadagdag ako ng konting twist! Gagawin n’yo muna ang unang step ng ‘The Midnight Game’. Ito ay ang pagpahid ng dugo sa inyong white card. Remember, bawal pahiran ng ibang dugo ang card kung saan nakasulat ang inyong pangalan. After ninyong magawa ito, iiwan ninyo ang inyong card sa labas ng pintuan ng kuwarto kung saan ninyo gaganapin ang ‘The Closet Game!’ The room must be in complete darkness. Kung may ilaw man ang closet na napili ninyo, make sure na naka-turn off ito. The next step is…pumasok sa loob ng closet, at isara ito. At dahil dalawa kayong gagawa ng challenge, kailangan na magkahiwalay kayo ng closet. Bawal ang magkasama! Stand in the darkness for approximately two minutes, facing the closet door. Pagkaraa’y maghawak ng isang palito ng posporo, at sabihin… ‘Ipakita mo sa akin ang liwanag o iwan mo ako sa gitna ng kadiliman!’ I repeat, ‘Ipakita mo sa akin ang liwanag o iwan mo ako sa gitna ng kadiliman!’ Listen very carefully. Kung nagsisimula kayong makadinig ng kahit ano, sindihan ang posporo immediately! Kung wala naman kayong marinig, huwag kayong magsisindi pero huwag din kayong lilingon sa inyong likuran. Kung hindi n’yo man magawang sindihan ang inyong posporo sa oras na makarinig kayo na may bumulong sa inyo, you will feel something grab you into eternal darkness! Remember, Keep the match lit. Huwag na huwag ninyong hahayaang mawala ang sindi nito. Kung accidentally itong mamatay, magsindi ulit ng panibago. Holding the lit match in front of you, buksan ang closet, dahan-dahang lumabas roon. Isara muli ang closet, at huwag na huwag kayong lilingon muli rito. Kung maiwan ninyong nakabukas ang closet during night with the lights off, you will see the demon watching you with two red eyes that glow like matches! Start the game exactly at 3:00 am. Para tapusin ang laro, kunin ang inyong mga white card at sunugin ito sa labas ng inyong bahay. Remember, isang beses lang ninyo dapat gawin ito. Kapag nagawa ninyo ng tama ang larong ito, you will be safe! And an unexpected gift ang ibibigay ko sa inyo! Ngayon, tatanungin kita, Mr. Vela? Are you willing to take a risk for a Stranger’s Challenge?”

Mariin na tinitigan ni Ike ang screen ng kanyang laptop. Kahit tapos na ang naturang video, naglo-loading pa rin sa kanyang utak ang mga narinig niya. Dumagdag pa sa pag-iisip niya kung paano nga ba niya kukumbinsihin si Kathleen na sumali sa challenge na ito. Kung nahirapan si Samuel na pakiusapan si James, mas mahihirapan siya lalo na kay Kathleen. Ganoong alam naman niyang masyado na itong abala sa nalalapit nitong kasal. At isa pa, maski noon pa man ay ilag na siyang makipag-usap rito.

Si Samuel, almost two weeks na niyang hindi nakikita o nakakausap man lang. Ilang beses na niyang sinusubukang tawagan ito pero hindi pa rin niya ito makontak. Hindi tuloy niya maiwasan ang mag-alala kung totoo nga bang nasa Batangas ito ngayon. Ganoong alam niya sa kanyang sarili na hindi naging successful ang ginawa nilang ‘The Midnight Man Game.’

Nasaan nga ba talaga si Samuel ngayon?

Hindi na alam ni Ike kung makailang beses na siyang nagpalakad-lakad sa loob ng kanyang kuwarto hanggang sa mapagdisisyunan na lang niyang pumunta sa bahay nila Samuel. Gusto rin niyang makumpirma kung totoong nasa Batangas nga ba talaga ang kaibigan. Pero pagkabukas na pagkabukas palang ng malaking gate ng mga Mortiz, ang step-sister nitong si Jazz ang kaagad na bumungad sa kanya.

“Wala si Kuya Samuel, nasa Batangas!” mataray na tugon ni Jazz.

“Kailan siya uuwi?” tanong naman ni Ike.

“I don’t know!” napakibit-balikat ang dalagita, “Wait, wala ka bang cellphone? Bakit hindi ikaw mismo ang magtanong sa kanya ‘yan?”

“Hindi ko makontak,” tugon ni Ike.

“Well, hindi ko na ‘yon problema!” mataray na sabi nito, “Lagi naman niyang tini-turn off ang cellphone niya para hindi siya ma-contact ni Daddy!”

Hindi na nakakibo pa si Ike. Naalala niya, ganoon nga pala ang ugali ni Samuel kapag gusto nitong makaiwas sa ama nito.

“O, sige… Kung wala ka nang itatanong, pwede ka nang umalis!” pagtataboy na ni Jazz.

Napabuntong-hininga na lang si Ike. At wala na siyang nagawa pa nang pagsarhan na siya ng gate ni Jazz. Nakadama siya ng pagkainis. Hindi niya masisi si Samuel kung bakit mabigat ang loob nito sa step-sister nito. Eh, parang pinaglihi yata sa sama ng loob ang babaeng iyon. Ang taas ng level ng katarayan!

Napakamot na lang ng ulo si Ike hanggang sa mapagdesisyunan na lang niyang bumalik sa kanyang sasakyan. Sa muling pagkakataon ay dinial muli niya ang cellphone number ni Samuel. At tulad ng dati, out of coverage area pa rin ang number nito.

Napatingin si Ike sa kalsada. Naalala kasi niya na malapit lang sa subdivision na ito ang bahay na tinitirhan ni Kathleen. At dahil naroroon na rin naman siya, maglalakas-loob na siyang kausapin si Kathleen. Malakas talaga ang kutob niyang nasa panganib si Samuel. At pakiramdam pa niya, magagawa niyang mailigtas ang kaibigan sa oras na gawin niya ang ‘The Closet Game.’ Pero paano naman niya ipapaliwanag ang lahat ng ito kay Kathleen? Paano nga ba niya makukumbinsi ito?

“Bahala na,” bulong na lang ni Ike sa kanyang sarili saka na niya inabante ang kanyang sasakyan patungo sa bahay ni Kathleen.

Hindi naman siya nahirapang magpakilala sa guard na nakaduty sa bahay ng mga Tan. Dahil ang totoo, matagal na ring magkaibigan ang Daddy niya at si Congressman Erwin Tan. Kung ang Mama naman niya ang tatanungin, gusto nito si Kathleen ang mapangasawa niya. Pero nagpapasalamat na lang siya, at hindi siya ang napili ni Congressman Tan para sa nag-iisang anak nito.

Aaminin ni Ike, kahit mayaman at makapangyarihan ang angkan ng mga Tan ay hindi naman gaanong biniyayaan ng kagandahan si Kathleen. Kaya naman nauunawaan din niya si James kung bakit ito noon ay kumasa na makipagpustahan kay Samuel para ligawan si Aimee.

Si Aimee, kahit anak lang ito ng isang kasambahay ng mga Ramos ay sadyang angat ang kagandahan nito sa buong campus. Kaya nga, hindi rin lingid sa kaalaman niya na may nararamdaman ring insecurity si Christine rito lalo na't may talino ring tinataglay si Aimee. Pero nasira lang ang dalaga nang magsimulang kumalat sa buong university ang s*x Video nito kasama si John. At simula noon, wala na silang naging balita tungkol sa dalaga. At walang sinuman sa barkada niya ang nagtangka pang magtanong kina James at John kung nasaan na nga si Aimee?

Isa si Ike sa mga napagbintangan na nagkalat ng video, at dalawang buwan siyang nasuspinde. Pero dahil maimpluwensya ang angkan na pinanggalingan niya, nagawa siyang ipaglaban ng kanyang magulang. Nagawa niyang maka-graduate.