"Bitiwan n'yo ako, mga pangit kayo! Mga amoy tsiko!" umiiyak na sigaw ni Aarah nang bigla siyang hawakan ng mga tauhan ni Lord Raccoon para ilayo kay Clara. Kausap kasi nito ang bestfriend niya at nakakaistorbo na raw siya. "Bitiwan n'yo ako sabi, eh! Kapag hindi n'yo ako binitiwan, isusumpa ko kayo! May lahi akong mangkukulam!"
Hindi na umaasa si Aarah na maiintindihan siya ng mga taong pilit na kumakaladkad sa kaniya palabas sa kuwartong iyon. Pero wala siyang alam na sabihin. Kahit naman siguro maintindihan siya ng mga ito ay hindi pa rin pakikinggan si Aarah. Dahil kahit nga nag-i-English na si Clara ay hindi rin pinapansin. Si Lord Raccoon nga na nakakaintindi at nakakapagsalita pa ng Filipino ay hindi rin nadadala sa pagmamakaawa nila. Para itong demonyo na tawa lang nang tawa sa ka
