رواية لم أكن أنتويه حباً فأصبح بالحلال عشقاً الجزء الثاني

الحلقة الثامنه

(ياورد الجناين علينا بتطل وعطره يموج ويفوح علي الكل?، الشمس بدري من الفرحه بتهل بتحيي الطير والورد والفل? والنيل بيرقص? ويقول مواويل ويصبح ويمسي علي ورد النيل? والرزع بيقسم لحنه والنسمة تعدي تسكر ملايين وقلوب? من الحب رماهم الحنين صبحوا حياري وباتوا مساكين... مرفت محرم)

فتحوا العربية وركبوا بعد ما اخدت هويدا ايمن على رجلها ، محدش اتكلم كله قعد ساكت وفرحان?

كانت هي اول من نزل و طلع الشقة بسرعة بحجة تنيم ندى بمكانها

جه يكلمها و هو بيحط حسن على السرير بجانب ايمن ولكنها هربت بسرعة وخرجت من الأوضة وهي متوتره

لاحظت مامتها خروجها السريع وحالتها ، خرج حسام وراها بعد ما نيم حسن بمكانه ليلاقي الأم سميه قصادة

سلم عليها و اعتذر لتأخيرهم، ردت عليه وهي مبتسمه وقالت " لا يا ابني ماتعتذرش المهم انهم اتفسحوا وانبسطوا "

استأذن منهم عشان يلحق يروح ينام لأنه عليه شغل ومواعيد من بعد الفجر..

نامت هويدا و ميرا جنب الاولاد بعد ما صلوا، اما الام سميه قعدت سهرانه عشان تحضر اعادة المسلسل بتاعها الي ضاع عليها بسبب الخروجه..

كانت بتحاول تنام ولكنها مش قادره عقلها وفكرها مش راضي يهدى قعدت تتقلب على السرير يمين شمال مفيش فايده طار النوم من عينيها ، شعر زوجها بيها وهي بتقعد وبتسند ضهرها على وسادتها فتح عينه وقالها " خير يا سمية تعبتي تاني ولا ايه ، ص*رك مضايقك "

هزت راسها وقالت له " متقلقش يا حج انا كويسه كمل انت نوم "

استغرب من حالتها اتحرك وقعد هو كمان زيها وكرر سؤاله " لا أنتي اكيد تعبانه ، مالك يا سمية بصي يا بنت الناس لو في حاجه نروح المستفشى "

ردت عليه بضيق ?" يا ريته تعب نروح المستشفى ويخف ، ولكنه خوف وقلق وضيق"?

حك عينه وقالها " خير يا سمية هو انتي مستوعبه الساعه كام دلوقتي ، وبعدين انا قولتلك قبل ما ننام مفيش حاجه هتحصل غصب عننا وعنك انتي بذات ، كل ما في الحكاية انهم خرجوا يتفسحوا مع بعض و كمان عمتها و بنت عمتها والاولاد معاهم "

ردت سمية وقالت " طبعاً ومين يشهد ليه كلكم اتجمعتوا واتفقتوا عشان تتمموا الجوازه طبعا ما هو ابنكم من فرحتكم نسيتوا مصلحة الغلبانه بنتي، صدق الي قال الي ايده في المية مش زي الي ايده في النار "

حك جبهته بضيق وقال " هتخليني اندم اني وافقت ليها تروح معاهم ، وكمان يا سيتي متزعليش نفسك للدرجة ديه بكرا هبعتله الرفض مع عمرو عشان ترتاحي، وابقي خليها بحضنك اما نشوف هتلاقي احسن منه فين "

اتن*دت بضيق و ردت " شوفت حتى انت بقيت بدافع عنه قدامي و كأني انا الشرانية الي مش عايزه افرح ببنتي ، وكأن مش انت الي رفضته و سرعت من سفرنا "

غمض عينه وقالها " عايزه ايه يا سمية ، ايه الي يريحك وانا اعمله عشان انا تعبت وعايز انام ، بس قبل ما تقرري افتكري كلامك ان البنت فرحانه ومياله للولد ولولا العيبه كانت وقفت قدمنا وقالتلنا

عايزاه ، ولكن معلش ا**ري فرحة الولاد المهم تكوني مطمنه عليها "

اتحرك ونام من جديد وهو بيرفع الغطى عليه كالعادة اما يكون مضايق ، قامت من على السرير وهي بتقول " هقوم اتوضى واصلي ركعتين لله "

...............

بصباح يوم جديد كانت بتصرخ بوجه كريم و بتهدده انها هتفضحه وانه ظالمها ?و ضحك عليها، رد كريم عليها وقال " تفضحيني وضحكت عليكي، اتبقى تقولي الطفل الي ببطنك مني"

ردت عليه بنفس نبرة الصراخ المخلوطه بالبكا وهي بتقول " اي طفل ده، انا اشرف منك ومن عيلتك كلها "

ضحك وهو بيسخر منها وقال " اهو اعترفتي يعني مكنش بينا غير تسالي و كام حضن وخلاص انتهى "

وطت صوتها وقالت " معقول كان كل ده تسالي معقول مكنش حب? "

قرب منها قوي وكأنه هيحضنها، غمضت عينها الي ظفرت بدموعها? مستسلمه له ليقول جنب ودنها " انا مش بتاع حب و جواز " وقبلها على وجنتها و اتحرك ليركب عربيته مبتعد عنها وعن انهيارها وعياطها...

بالحلمية كانت هويدا بتف*ج مرات خالها على مشترياتها و الهدايا ?الي جبتها لاولاد عمها و حبايبها ، ردت ام سعاد وقالت " بس تصدقي اجمل حاجه عجبتني قشارة البطاطس الغريبه ديه? " ضحكت سمية وقالت عندك حق يا بهيه شوفتي طلعتها حلزونيه و رفيعه ومقرمشه ازاي "

دخلت ميرا عليهم الغرفة وقعدت جنبهم وهي بتقول" طلعوا روحي لحد ما اقتنعوا يشاركوا الألوان? مع بعض من غير خناق "

بصت هويدا عليها هويدا وهي بترفع كيس مشتريات مكتوب عليه اسم محل تجاري وقالت " بت يا ميرا عايزين نروح المحل ده تاني، سهام عجبتها بيجامات الولاد هروح ابدل بتاع سيف بمقاس اكبر عشان ينفعه للسنه الجاية و هشتري عليهم اتنين كمان له ولاخوه حسن "

ردت ام سعاد وقالت " وماله نروح تاني اصلا عروضه جميله واسعاره مش هتلاقيها في حته تانيه حتى هجيب لبنت سعاد فستانين?? كمان عشان اما تيجي بالصيف متتحيرش بالهدايا "

بصت سمية على ميرا وقالت" كنتي قستي حاجات ندى احسن تكون مش على قدها "

ردت هويدا عل مرات خالها" متخافيش على اميرة ديه مخرجتش من المحل غير لما قيستها و اتصلت بأمها عشان تختار معاها و جابت مقاس اكبر كمان، ياريتنا عملنا زيها "

ابتسمت سمية برضا وقالت" اصلها متعودة وديما كانت وهي رجعه من الجامعة تنزل هي وايمان يلفوا بوقت تخفيضات المواسم و يلاقوا حاجات جميله وبنص التمن طبعا شربوا مقالب كتير لحد ما تعلموا "

افتكرت بهية بنتها لتقول لهويدا " وسعاد كمان كدة احنا هنا بنحب نعود البنت تعتمد على نفسها و تخرج لوحدها وتواجه الحياه و كل ما تغلط تتعلم و تقوى اكتر? "

دخل الحج جمال الغرفة عليهم وهو ماسك راسه وبيقول" اااه راسي هتنفجر "

سألته بنته بقلق " بابا هو انت اخدت دواء الضغط الصبح؟"

بص على الأكياس و تخطى بعضهم وهو بيعبر فوقهم وبيقول ساخر" انتوا اشتريتوا البلد كلها امبارح ولا ايه "

قعد بمكانه المفضل بعد ما رفعت اخته بهيه الاكياس من فوقه ، كان لسه بيكمل كلامه وبيقول ليهم " والله صعب عليا دلوقتي بقى خدتوا الواد و بهدلتوا معاكم باللف ، ولا قعدتوه بالعربية مع الاولاد و لفيتوا انتوا"

اتكلمت هويدا وهي مبسوطة وقالت" متخفش عليه يا خال هو انا اقدر اضغط على اخويا حبيبي" ?

ضحك? وقالها " لا طبعا ماتقدريش ، انا كده قلبي اطمن عليه" ?

ضحك الكل كررت ميرا سؤالها لباباها عشان تتأكد اخد دواء الضغط ولا لأ طمنها انه أخده بس محتاج يشرب فنجان قهوة ☕لعله يهدي ألم راسه

بالشغل كانت نرمين بتعيط? لزهرة وبتشكي ليها من سليم الي ديما بيفضل عيلته عليها، وكالعادة ماهتمتش زهره ببكاها و غلطتها على جوزها العرفي وهي بتقول لها " ده طبيعي انتي رخصتي نفسك وسمحتي تكون نزوه بحياته وقت ما يحب يهرب من ضغوطه يلجئا ليكي يقضي الباشا وقته و يهدي نفسه عشان يقدر يرجع يكمل حياته تاني يعني انتي مجرد وسيله ولستي غاية ضيف موسمي مش اساسي بحياته"

بكت نرمين أكتر وهي بتقولها " حرام عليكي انتي بتعملي فيا كده ليه ، لعلمك احنا بنحب بعض و هو قالي انه محبش حد قبلي واني اول حب بحياته، اصلا انا غلطانه اني بفضفض معاكى انتي عمرك ما هتفهمي علاقتنا بكرا تشوفي اما يسيب الكل ويلجئ ليا ونعيش مع بعض قدام العالم و الناس"

ردت زهره عليها و قالت" انا مش مصدقه انك بتفكري بالطريقة ديه، رغبتك انك تعيشي الحياة ديه عمت عينك، ياريتك انتظرتي نصيبك الي يحافظ عليكي ويقدرك و يمسك ايدك قصاد العالم كله ويفتخر انك زوجته "

صدمتها نرمين اما ردت عليها وقالت لها" هو انتي غيرانه مني ولا ايه ، ليكون حبه ليا و اننا مع بعض ضغط عليكي لدرجة انك قررتي تفرقينا?، وانتي بتتصنعي دور الاخت الناصحة "

وقفت زهرة وبصت ليها من فوق لتحت? وقالت " خسارة يا نرمين، بجد خسارة "