Kinaumagahan, gaya ng laging gawi ay maaga akong gumising. Sinimulan ko ang lahat sa pagsasaing. Nagsimula na rin akong maglaba sa banyo dahil gabundok na ang labahin. Sa tuwing sabado ko talaga ito ginagawa dahil ito lang naman ang pinakamaluwag na schedule ko.
Tulog na tulog pa si Jaslo sa kwarto. Tulad ko kasi ay napuyat ‘yan kakalaro sa sala. Na-late naman ako matulog dahil pinilit ko pang magbasa-basa at mag-review. Hindi ko naman kasi pwedeng ipagpabukas na lang ang lahat dahil baka mawala na naman ang momentum ko sa pagkakabisa.
Lumilipad sa kung saan-saan ang isipan ko habang ginagawa ang gawain. May pagkakataong nananaginip ako ng gising tungkol sa kurso at buhay-kolehiyo na tatahakin ko. Gusto ko kasi maging isang medical technologist kaya iyon ang kursong kukunin ko. Hindi lan
