حلات الحب عذابه

مجنونة

نبع الحنان امي .. تگول عليه صلفه وعرمه ومخبله وماخاف من اكبر واحد....يعني اذا حصلت كتله وحده باليوم من اخواني ..مااعتبرها كتله اعتبره تمسد هه هم ارجع اعارك نسوانهم واكتل جهالهم ..

حتى انكتل مره ثانيه يعني عندي عادي .. تعودت ..باعتبار مساج مو كتل ، اما بداخلي لا يختلف عن شخصيتي الي ظاهره للعيان ..

بداخلي فتاة رومانسيه .. طموحه .. حالمة ، اتمنى اعيش مثل باقي البنات .. البس مثلهن اتونس اطلع اسافر .. احب .. انحب اعشق وانعشق ودائما ادور فارس احلامي بداخلي بس ماالگي ..

هو منو يگلبني واخواني ومصايبهم وطلايبهم .. محد يحاول يتقرب مني لان الكل يعرف اخواني شنو..شرانيين يدورون طلايب حتى يفصلون العالم .....

وحتى اذا اجه واحد مايعرف اخواني وتحرش بيه وطلب علاقه .. انه لااراديا اغلط عليه واسبه اخلي يشرد ...

وبعدين اتندم واحاسب نفسي اكول لو منطيته مجال جان حبينه بعض .. بس ارجع واكول يمكن الله يريد بيها صالح الي والولد هالايام متخبلين ع البنات يلعبون عليهم ويملون منهم يشمروهن

مره رحنه سفره مدرسيه لمدينة الال**ب .جاي نتمشه انه وصديقتي.جان يتحرش بيه واحد .طل بوجهي و. گال اويلي ع الشفايف .. انه من يمي گتله انجب () عاد گال تعاي ويامن هي الانجب ...؟

وكفتله كتله عليك غير كام مد ايده و اجه الصواب على اذني طرشها الحقير .. لزمو اصدقائه انه گمت طكيته جلاق ع رجله مااتحملت وراد يهجم عليه والعالم اللتمت ..

واجن المدرسات وكالو شكو ويدرون بيه انه وكحه .. عاد رجعوني للبيت ومن ذاك اليوم محرومه من السفرات المدرسيه هاي من جنت بالرابع والهسه بالسادس وم***ع اروح وياهم وانه بس هاي الفرصه اطلع بيها للمدينه وانحرمت منها شكد توسلت بالمعاونه تسمحلي ماقبلت كالت نور انت وكحه وماتنجرعين ..

ضجت بداخلي بس ماابينت هالشي عليه رجعت اضحك واسولف بنفس اللحظه

مااخذه الدنيا بفطارية گلب وضحك بس بداخلي حزن مضموم ..

من تعامل اهلي الي ابوي متوفي من سنين انه ازغر وحده بين اخواني احلم اتزوج .. بس محد يدگ بابنه حتى اقاربنه .. من وره مصايب اخواني

انا بالفعل اريد اتزوج واخلص من اهلي واخواني واريد رجال سند الي ويطلعني من هالعيشة والله انا حبابة واستاهل

اليوم الصبح طلعت متاخره من البيت للمدرسه رايحه صاحت عليه امي نور نويرره ..بالشارع وجان اكو ولد جاي يمشي رجعت لامي .. گتلهه يمه شبيج عيب تصيحين باسمي گدام العالم فضحتيني

كالت ياا ..جا يمه انت اسمج نويرة قابل شسمج وبعدين ترة نسيتي اللفه مالتج

.. اي يمه بهاي حقج صدگ اهم شي اللفه .. عاد بوستها من راسها وراحت ...طبعا انه اروح امشي للشارع العام اخذ سياره عبريه واروح للمدرسه اخواني بخلاء مايخلون الي خط لا ينطوني مصرف كروه يوميه .. خلف الله على امي تدبرهن الي

رحت ظليت امشي

علاء : باوعت .... هي هاي نور ..الي ابتليت من وراها والله خوش .. باوعتلها وهي بوست امها وراحت تمشي لابسه حذاء رياضي وص*رية مدرسه ..وتمشي سريع شفت امها دخلت للبيت .. ورحت امشي وراها وانه افكر بنفسي واگول .. خلي اروح اشوف شنو عدها ..واعرف صاحبها منو هذا الي ابتليت بمكانه ..هي مبينه وكحه مشيت وراها وعيني مافارگتهه .. خرب يومج نور جسمها كله انوثه .. وصلت الراس الشارع اشرت لسياره وصعدت وصعدت وراها

نور ... حسيت بشخص يمشي وراي بس مااهتميت جنت مستعجله .. صعدت بالسياره صعد وراي الشاب ..

كعدت انه بالاخير هو كعد گبلي .. السياره جان بيهه مره ورجال جبير ومريه عمرها وسط ووياهه ابنها زغير ..

كعدت بالسياره فتحت اللفه مالت امي لگيت بيهه بتيته مسلوكه ومحموسه ووياهه طماطه وبصل كلها حامسيهه سوه .. رجعت لفيتها .. وخليتها بالجيس مالتها ورجعتها بالجنطه ..

وصلت قريب المدرستنه صحت نازل .. كل مره اصيح بعلو صوتي نااازززعللللل منين اجه حرف العين ماادري بس انه هيج كل مره اصيح ..

بس هالمره لا مدري شنو كض ابلعومي و لزمتني بحه ببلعومي وصحت بصوت مبحوح .. عاد اسمع الولد الي صعد وراي صاح يگولون نازل

علاء .. هي صعدت كعدت وره بس شنو بس تحوس وتخروش ..مدري شعدهه صاحت بصوت مبحوح ... انا صحت بمكانها نزلت شفتها راسا طبت للمدرسه ..

رجعت للبيت صرت اشتغل بالبسطيه مال المخضر .. مرت ايام اراقبهه واروح وراها .. رغم مدرسة الولد قريبه ماشفت عليهه اي شي يثير الشكوك ..

فكرت بيني وبين نفسي خلي احقق اتهام اخوانهه الي .. واسوي وياهه علاقه من صدك ابرد نار گلبي .. هيج بشر مايفيد وياهم اله هيج وهم اتسلى وياهه

وهم اطلع فلوسي الي تعبت بيهم ونطيتهم الهم بدون لاتعب ولا جهد واستلموها هيج .. وراحت ببطونهم ان شاءالله تصير سم وزقنبوبت تبيها بيهه...

صرت امشي وراها ومن تجي هي تفوت ع السوگ الي اشتغل بي هم اشوفها .. واباوعلهه وابتسم الهه هي تخنزر الي وترفع تك حاجبهه ..

عاد انه اغمز الهه بمكر .. احسهه تعصب بس السوگ بي عالم ماتكدر تتصرف ..

نور .. مرت ايام اشوف شاب هواي گبالي مرات يتبعني للمدرسه ومرات اشوفه بالسوك يشتغل .. انتبهت على شكله طويل و ضعيف واسمر وشعره كفشه سرح احسن من حظي وعيونه

عسليات ....

عنده لحيه ونضراته ثاقبه ويخزر وحتى من يبتسم مخنزر دائما يباوع الي بعدهه صار يبتسملي وراها تطور ظل يغمزلي ..

ياا انه تخبلت من تصرفاته اتمنيت اتعارك ويا بس فشله ونوب بالسوك والعالم .. عاد اكتفي ارفع حاجبي واخزره ..

مره طلعت حسيت بي يمشي وراي .. وصلت للشارع اشرت لسياره وصعدت .. اشو هذا هم صعد وراي ..

عاد كعدت وره بالكشن الاخير لوحدي .. وهو قبلي .. والسياره بيها نفر واحد كدام .. هو صاح نازل .. كام يريد ينزل .. شمر ورقه زغيره وكعت ع رجليه ... فتحتها مكتوب علاء ورقم تليفون

علاء.. بالليل تحضرت وكتبت رقمي وحتى اسمي بالورقه... شيريد يصير خلي يصير مدام هم مخايفين ع سمعة اختهم واتهموها بهالتهمه .. وبداخلي احس بالظلم .. واتهموني زور .. وانه على كد حالي .. ع الرغم مو عادتي اصاحب لاابد .. عاد شمرته الهه وكع بحظنها .. نزلت انتظرتها تنزل .. نزلت من السياره .. ورايه وهي واكفه يم السياره لازمه الكتب بيدهه وشايله جنطتها لابسه تنوره حصر نيلي ..وقميص ابيض هم حصر .. وشال نيلي رفعت ايدهه شويه وشمرت الورقه بالگاع وباوعتلي اجت عيوني بعيونهه وهي رافعه تك حاجب ومسويه بوز بشفايفها ولازمتهه ضحكه تريد تضحك بس متكدر وداست ع الورقه ومشت

اني حسيت كتبته للرقم يمها لان تاخرت علما نزلت .. شفتها طبت للمدرسه رجعت للبسطه

نور ... من رجعت للبيت .. اخذت الرقم الي سجلته بالدفتر وشمرت الورقه كدامه وانه اخزره .. بس بداخلي شي غريب اتجاهه من اكثر من اسبوع وهو يلاحگني الحد الي خلاني اتعلق بي اريد اشوفه وعيوني تدوره بس كبريائي ماسمحلي انطي مجال .. انه عندي تليفون مرت اخوي انطته الي صح قديم بس يكول الو ويدز مسج اهم شي هذا استفاد منه واراسل صديقاتي ع مود الدوام

واالا اخواني مايطلع منهم شي .. يتمنون يبيعوني وياخذون مكاني فلوس ابد مايهتمون الي .. عاد سجلته بالتليفون بإسم

علياء .. هم خواني مايدورون وراي بس الحذر واجب .. بس مافكرت اتصل بي ابد مرت ايام وكل يوم اشوفه ..مرات اشوفه متكتف وواكف جوه المظله مالت البسطه ومن يشوفني يفز ويسوي حركات ..ويشمر حجي ..ومرات يسولف ويه اليمه ويكرر كلمة نور نورت مااعرف شنو احسه يقصدني بس اتسائل منين يعرف اسمي .. نضراته القويه احس جواها شي خاص اليه ..وبعدهه افكر واكول لاا مجرد اوهام .. حسيت تعلقت بي اليوم الي مااشوفه بي انقهر حييل احسه مااله طعم رغم ماكو شي بينه بس نضرات

بس شي جديد ودخل حياتي .. وغير الروتين الي اني بي .. الزم الفون واتردد اتصل بي خاف يلعب عليه .. ومن اشوفه بالشارع استمر اخزره ومااعبره ابد

علاء... مرت ايام وهي مااتصلت .. ابد مرات اغلس واكول ليش مهتم تولي ومرات لااكوشي بداخلي يجبرني افكر بيهه واريدها تخابر .. انتظرت وانتظرت وهي ماكو ماخابرت فكرت بفكره تجبرها تتصل بيه خابرت على. حسام ورحت البيتهم

علاء..هلا حسام شونك اخبارك

حسام .. هلا علاوي شونك شخبار الدين مالتك فكيته لا

علاء.. بقه شويه وافكه ..رايدك بموضوع اذا تكدر تساعدني ..

حسام .. عيوني الك .. گول خويي

علاء.. انت مو گلت عندك علاقه بكذا بنت بالمدرسه الثانويه الي ع الشارع

حسام .. اي ليش

علاء.. اريدك توصل حجي النور

حسام .. يانور ولك

علاء..شبيك الي اتهموني بان انه صاحبهه

حسام .. هي وين طحت بيها

علاء.. صدفه والله

حسام .. اي وشتريد منها هسه يمعود هذول اخوانها مصيبه .. اترك عنك هاللغوه

علاء.. شيريد يصير يعني .. وانه اسمي صاحبهه شيردون يسوون بعد اصلا هذول مايهمهم الشرف .. اريد اطفي نار گلبي

.. انه عرفت اسمها نور سلام بس بعد مااعرف ياصف تداوم ...بس هي مبينه سادس خامس تداوم عرفت اسم ابوها من الكعده مالت الفصل ..

حسام .. ماشي تدلل اسئلك عنها صاحباتي عود

علاء..الله وايدك الله يخلي الك صاحباتك ويكثرهن هههه

رجعت للبيت بعدها بيومين .. اتصل بيه حسام .. الو علاوي شغلتك جاهزه حبيبي صاحبتي اسمها ورده تداوم بالخامس وعدهه اختهه بالسادس . وتعرفها النور .. وتكول عنها بنيه عاديه ماعدها سوالف علاقات ابد

علاء... اريد اوصللها كلام حسومي فدوه

حسام .. تدلل كول واخليهن يوصلنه الهه

علاء.. ماشي ..

نور ... مره داومت بالمدرسه بس ماشفت علاء ابد حييل حسيت شي ناقصني تعودت ع غمزاته ابتساماته .. مرات ياأشر الي بالتفاحه عود تردينه ..انه اسويله حركات بوجهي بس من ادور اخرب ضحك .. ومن اشوفه گلبي يرجف رغم حتى من اسوي مصيبه بالبيت وخواني يردون يكتلوني مايرجف گلبي هيج .. كنت سامعه بالحب من اول نظره بس ماأومن بي.. اما هسه تخربطت كل موازيني .. بس ماافكرت اتصل بي .. من كنت اباوع الـه حاسه جواته قصه احب اسمعها .. المهم دخلت للمدرسه تلگتني بنيه ويايه بالصف اسمها ريم

ريم .. هلاو نورا شونج

نور.. هلا ريومه بخير انت شونج

ريم .. بخير حبي اكولج بيهه مجال نحجي شويه

نور... ماشي ليش لاء اودي حاجياتي واجي نسولف

ريم .. ماشي انتظرج

نور... رحت خليت جنطتي بالرحله مالتي وطلعت ..واني اتسائل شتريد ريم مني واني معندي وياهه كلام خاص .. هيج مجرد زميلات بالمدرسه .. رحت الها بالساحه شفتها

گتلها ... هاا ريم احجي اسمعج

ريم .. والله ماادري منين ابدي بس حبيت اسئلج انت من وين تعرفين علاء ..

نور..يمه گرصني گلبي هي بس لاتقصد علاء الي شمر الي الرقم .. جاوبتها ياعلاء مااعرف هيج شخص

ريم ....لج هذا الي شمر الج الرقم بالسياره والي اهلج فاصلين منه مليونين لان هو مصاحبج ..

نور .. انه گبيت عليها ..شنو شنو انت شجاي تحجين منين جبتي هالحجي .. وشون تحجين وياي هيج حجي اللزمي حدودج

ريم..اوي واني شعليه بس داانبهج تره ديحجي عليج حبيبج علاوي وبعدين اهلج ليش فاصلينه اذا ماعنده علاقه وياج هاا ليش عود

نور... ردت اخمشها من شعرها بس وكفت بمكاني ولزمت اعصابي بس شنو فُرتُ شكد حقير هذا وهيج ديحجي عليه وبعدين شون يجذب يكول اهلي فاصلينه من طاح حظه ..

بقيت الوب واحرگ بروحي بالمدرسه وبالصف بس صافنه .. وحتى طردتني المدرسه لان گلتلي ليش صافنه گتلهه مايصير واحد يصفن .. گلتلي طلعي بره وزين ماطكتني چلاق عاد طلعت ردت اشرد من المدرسه بس وين اروح اريد يخلص الدوام واروح اله وصدگ خلص الدوام .. باوعت للساعه ب12وربع .. كلت هسه السوگ هوسه شون راح احجي ويا خلي يخف السوگ بلكي اكدر ارزله شي وكفت بره والبنات ينتظرن خطوطهن يجون ويوصلوهن .. الحد ما كلهم طلعوا عاد اشرت سياره .. وصعدت بيهه وگلبي نار اريد اشوفه واحجي ويا .. وصلت للسوگ كلت للسايق نازل .. نزلت .. ناس قليله واغلبهم معزلين وقت ضهر .. مشيت صوب البسطيه مالته بلكي اشوفه وحده .. رحت البسطيه مالته ماشفت احد بيهه بس المخضر موجود هي درجات من خشب .. وخالهه ع الرصيف صعدت ع الرصيف دخلت جوه المظله هو ماكو مديت راسي .. طلعلي من جوه البسطيه الخشب .. شافني ابتسم وگال هله

گتله ووجع.....

...