رواية ديسباسيتو

الفصل الثالث

#7ديسباسيتو?

#خياليه100%?

#fulla_Ali

قلت ليها مشكورة يا ميرو طمنتيني ...شكراً ليك. ..شكراً شكريا ..سلام نمستي وبكل اللغات بقول ليك شكراً

قالت لي : سلام نمستي ما معناها شكراً يا ب***ة الأنعام..كدي انتي اصبري اسمعي كلامي بالاووول ..

قلت ليك سجمممك كيف تخافي من واحد تافه كده ! اوعك اوعك تستسلمي فاهمه ! انتي ترتيل الطيب بتها لي نجاة ..اوعه اسمع مننننك كلمة حقت خوف او إستسلام ..نسيتي عملتي شنو في إسحاق الزفت !! ( دا واحد تافه وقليل أدب ..وريتو الجن الأحمر لمن سافر نيالا بي سببي )

ونسيتي نفيسه السمينه ( دي قرت معانا في الاساس كانت بتهرشنا وبتشيل فطورنا تاكلو بس انا يوم جنيتي قامت علي ومسكتها دقيتا دق العيش وندمتها وسففتها التراب وبقيت اهرشها لمن خليتها تتنقل مدرسة تانيه ..اتاري السجل بتاعي حافل ..والسبب حضرة الصول معالي خلتني ابقى وحش she created a monster)

حتى هشام اخوي انتي أدبتيهو .......

سمعت صوت لووب دللل وهي قالت: آآي

طبعاً هشام لبعها ..خ*ف منها التلفون وقال لي بنبرة جاده : اسمعي هنا ..لو اي زفت طين عاين ليك نظرة ما ياها كلميني...اقسم اجي اعدمو الروح ..

طبعا هشام اداني احساس بالقوة ما عادي ..واصل كلامو ويا ريت لو ما واصل : انتي ما براك ..اخوك لسع عايش ما مات ..

اخوي !!! اخوي يا هشام!! خوخه في نص فاخورتك الكبيرة دي .!! ياخ انا بحبك افهم !!

قلت الكلام دا في نفسي ورديت ليهو بصوت واطي : حاضر ..

???

جا يوم السبت ..اليوم الموعود..جهزت نفسي وطلعت انا وانصاف..أشرف أصر انو يوديني بس قلت ليهو لازم اعرف الطريق براي عشان اتعود..

المهم..انصال طبعا كليتها في السوق..قبل ما تمش اول ركبتني..ياخ لو شوفتو كمية الطلبه !! صفصف قالت لي احمدي ربك هو الليله السبت..في كليات ما شغالين..يعني بكرة اتوقعيهم أكتر من كده..

بعد مشت شويه كده والهايس اتحرك..

تاني الكمساري طقطق اديتو خمسه رجع لي تلاته جنيه..قلت ف نفسي مواصلاتهم رخيصه ياخخخ

بعد يمكن زي عشرة دقايق كده وصلنا ..الناس كلهم نزلو وانا نزلت معاهم..

البنات دخلو بي اتجاه والاولاد باتجاه..

انا مشيت محل البنات..يلا الحرس الفي الباب قعدت تستجوب فيني وين بطاقتك يا أستاذة؟؟

)تحية للحرسات الصعبات ههه)

قلت ليها انا جديده..

قالت لي الطلبه الجداد كلهم بطاقاتهم طلعت..

قلت ليها انا اتنقلت عشان كده..

اتجادلت معاها كدااا ..المهم في النهايه اتخارجت منها المرة اللئيمه دي ..وقت طلعت طبعا ما فاهمه حاجه..والبنات الكانو معاي فص ملح وذاب ..

انا م فاهمه نظامهم كيف..وانا واقفه متحيرة في عربية سنتافي حمراء فاقع لونها جات والناس الجوه مشغلين اغاني عالياً صوتهااا

والشي القاظني انو العربيه دخلت بدون ما أسيادها ينزلو ويمرو بالحرس..عرفت انو في تفرقة عنصرية طلابيه حاصله..

العربية دي جات ادتني هواااء! وحات رحمة امي لمن وقعته!

في بت جات جاريه رفعتني وقالت لي يا ساتر!! بس ما تكوني اتعوقتي!

قلت ليها لالا انا كويسه..

قالت : اصلاًود السفير دا متغطرس ..أسي مفترض ينزل يعتذر مننك

قلت ليها ما مشكله حصل خير..عايني ..انا بقرا في هندسه قسم النوويه..وانا جديده ..ممكن توصفيها لي ؟؟؟

قالت لي بعد شهقت : بتقري مع ناس ديسباسيتو !!"

قلت ليها لالا ما بسمع اغنية ديسباسيتو..

قالت لي لالا قصدي مع مدريدي !!!!

هنا قلبي اتدردق دردقت تحت رجولي..وبلعت ريقي وخشمي جفه ..بالله زي الأكلته تلاته بسكويتات ورا بعض..

قلت ليها بعد تمتمه :ااا ا اي

قالت لي : السنتافي الحمراء الغريبه الهسي مرت بينا دي حقت مدريدي..والناس المعاهو وهو كلهم سامنهم قروب ديسباسيتو..تيمناً بي مدريدي ود السفير السوداني الإسباني

طبعا حاسه بي نفسي واقفه في واحد من كواكب المجموعه الشمسيه ..وانو الأ**جين مقطوع وكده..

لكن استجمعت قوتي وقلت ليها : اسباني ولة ياباني انا مال اهلي ..ارح وصفي لي انا عندي محاضرات..

قالت لي انتي العربيه الجيتي بيها من السوق وينا ؟؟؟

تاني واصلت : لكن صح انتي جديده ..يلا بكرة لو جايه الجامعه..العربيه الجيتي بيها حتنزلكم برة وتنتظركم جوة.وقت تمرو بالحرس بتجو تركبو تاني بدون ما تدفعو... اوعه تدفعي تاني بتزعليني منك ها!!. .وتقولي للكمساري يوقفك في هندسه تمام؟؟ ( تحية لكل زول بقرا تواوا ...وضاق شلهتت المواصلات ..قولو سلام .وابعتو لي ادد بلييييس )

طبعا طلعت كيشه وحاتكم..شكرت البت بعد ما ركبتني واحده من الهايسات واتكلمت معاهو لزوم حافلتي فاتتني وكده..عشان ما يشيل مني قروش ..وكلمتو ينزلني في هندسه..غايتو ما قصرت معاي

???

طول الطريق ماف آيه ما قريتها...لغاية البت الجمبي لكزتني عاينت ليها بخوف ..هي زاتها لمن اتخلعت قالت لي الكمساري بتكلم معاك ..عاينت للكمساري قام قال لي د*ك كليتك ..

نزلت ونزلو معاي كم نفر..سامعاهم بتوشوشو..ما اشتغلت بيهم اكيد بقولو ي حليل البت ما بقيت مشهورة عاد بالعملتو ..

المهم ..جيت بي جمب الكافتيريا في زول وقف قدامي ...

رفعته راسي عاينته ليهو لقيتو منو ؟؟؟؟؟؟

لقيتو منوو!!!!

ياهو ياهو زاتو ..مدريدي زفت الطين!!

تعالو اوصفو ليكم..

يلا انا عشان شاماهو حأقول ليكم شيييين وقبييييح..لونو قمحي كده..ملامحو أجنبيه أجنبيه وشعرو ملونو ..السواد غالب لكن فيهو شوية حمار (افتحو الحاء والميم ما تبشتنو لي الروايه )بالله زي المريخابي

معضل طبعا ..طويل ..جسمو رياضي..صراحه هو وجيه بس انا حأقول شين عشان انتو عارفين ..عامل زي الغول

طبعا فرقة ديسباسيتو جات وقفت وراهو..والطلبه شايفاهم بدو يتجمعو..والقريب نادا البعيد..

غايتو ج*س شمارات !!

طلع النضاره الشمسيه وقال لي : ترتيل الطيب عمر ..كيفك.؟؟

م عارفه عرف اسم جدي كيف ..هو انا قاعده أنساهو بعد مرات

رديت ليه بقوة ما عارفه جاتني من وين : انا كويسه..وحضرتك ؟؟

ضحك لغاية بانت انيابه..مسك دقنو وقال :احيي جراءتك ..انا كويس..

رديت ليهو وانا حاسه خوفي راح : والوقعه كيف ؟؟ عساك ما اتعوقت ؟؟

هنا ملامحو اتغيرت..انا قلت حيض*بني خلاص..

عاين في السماء مسسسافه اظن استغفر ربو واتصبر ..تاني رجع عاين لي : الوقعه ؟؟! سبحانه ربي..الوقعه صحت وحش جواي كان نايم في سبات ليهو حكاية بتاعت سنه كاامله.وهو جعان اتخيلي ؟؟

طوالي شهقته شهقت الاستهتار د*ك وقلت ليهو : حرامون عليييكاااا..وخاليهو جعان ليي !!!؟؟؟؟

يلا خليهو يفطر وما تنسى كباية الشاي..وغمزته ليهو وقلت : ولا بحب البارد؟ وزحيت منو..

طبعا انا اتشهودت ..اتوقعت تحت اي لحظة يهجم علي..

الناس ديل وقفو وفتحو خشششمهم زي كبوت العربية..وفي واحدين اتصدمو تقريباً ..استغربو من حاجتين ..عدم خوفي..ومن برود مدريدي ..

???

دخلت الحمام طوالي..

غسلت وشي وانا بررجف وبرجف ..قلبي دا عمل لي اضاني **م من صوت ض*باتو العاليه..

استغفرت ربي ..ولاني في الحمام ما قريت ولا آيه..هديت شويه وطلعت بره

قلت ربنا معاي ماف حاجه بتجيني طول ما انا صاح..

دخلت القاعه لقيت الدكتور شغال..وجن نادتني قعدت جمبها..

اللهم حضرت المحاضرة..بس والله العظيم الدكتور دا بقول شنووو !! ما عارفه الله يجازيك يا مدريدي زفت الطين ..

???

بعد المحاضرة..الناس طلعو انا فتشت وجن دي فوق وتحت ما لقيتها..كمان اتصلت عليها تلفونها مغلق..

اللهم اتوكلت مشيت الكافتيريا..اصلا كنت جوعانه

بعد ما اشتريت مشيت كبيت شطة ..قبل م أزح في بتين جو

قامت واحده رشت لي شطة في عبايتي ..قالت : اووبسس..سوري ما شوفتك..

ودنقرت لي جمب اضاني وقالت : البرش مدرديدي بي عصير انا برشو بي الشطه..

وضحكت هي وصحبتها ومشو..

م اتمالكت نفسسي و طوالي شلته ماعون الشطه وقلت ليها بصوت عالي : وانا البرشني بالشطه بحممو بالشطه..واا شوو رشيتها وحممتها كلها

البت صرخت وقالت والله ما اخليك

م كضبت ختيت الفطور وقلت ليها تعالي ..انا بوريك ما تخليني كيف ..

الناس طوالي حاجزونا..يلا تتزكرو حنان ؟؟؟ بااس

حنان جات مسكتني وجرتني طلعتني من محل الشكله..وانا نفسي قايم وهايجه ..بالجد الوحش الجواي هو الصحى ما الوحش بتاع مدريدي

حنان جابتني تحت شجرتهم

شوقي قال : دي جريتيها من وين !!! ومالا عامله كده

حنان : اتشاكلت مع هديل ومنن ..بي الله ويايمين جريتها من هناك

أروى طلعت منديل وقشت لي الشطه ..: هديل لي عملت كده !! وسخت ليك عبايتك

حنان ضحكت وقالت : وهي قصرت !!؟ ياخ حمممتها بالشطه كولها هههههه

قعدو يضحكو وقالو لي أتاريك ما هينه .

احمد قال : البت دي شبه ديسباسيتو بس..رائيكم شنو نضموها ؟

شوقي : احسنت قولاً.

في واحد ( الود السلم لي وقت مع وجن ) قال : مدريدي يا ناس هوووي نسيتوهو ؟؟

في صوت قال : نحن محتاجين بت في القروب يا وليد ..و ترتيل خير الاختيار ..

طبعا اتلفته ودي كانت آخر شخصيه اتوقعها ..

توقعاتكم

#صلو_عليه

بقلم :

#fulla_Ali

#8ديسباسيتو?

#خياليه100%?

#fulla_Ali

قبل م نبدا الحلقه لازم اوريكم الحصل شنو يوم الخميس عشان تحكمو معاي طيبة مدريدي وراها ( إن ) ولا لا

مدريدي كان واقف وهو ماسك كباية العصير بي يد والتلفون بالتانيه..والولد راكع ليهو وخلاص قرب يبوس جزمة الجزمه ده..

انا ما حسيت بي روحي إلا وانا ماسكه جزمتو وبس رفعتهااا لي فووق

هو من الخلعه فقد توازنو و وقع على ضهرو...والعصير اتدفق فيهو و وشو اتملا..

قام بسرعه ورفع يدو عاوز يض*بني ..انا صرخت وغطيت وشي بي إيدي ..الحمد لله الاسمو وليد دا مسك ليهو يدو..وقال : من متين انت بتمد إيدك على بنات !!!!

يلا مدريدي هاج وقال : دي دي دي ما بت !! انا بوريها لكن وبدا بتوعد وعاوز يهجم علي ..بس وليد مسكو وقال : يااا وجن سوقيها وامشو الاستراحه ..

..

يلا دا الحصل يوم الخميس..

اسي بي زمتكم..مفترض ردة فعلو تكون بالبرود دا ؟؟؟

انا برلمتو في القاعه وسط زملانو..وكمان احرجتو جمبه الكافتيريا وسط كل الطلبه ..معقوله بس ردة فعلو تكون كده !!!

يلا نواصل...

التفت وشوفتو دا مدريدي زاتو ...ومعاهو كريم ( طبعا كريمو دا جنوبي ..ياخ عثثثل وحتعرفوهو في الاحداث الجايه )

وليد : انت جادي ؟؟؟

أروى : كلامو صح..تويتي دي انا حبيتها ياخ

) احييي انا من اسم تويتي دا )

مدريدي : خههههه تويتي ؟؟؟ المهم ..ترتيل ولة تويتي دي بقت جزء من ديسبايسيتو وتحت حمايتنا أكيد وغمز بي عينو... وااااي ..

كريم : واللهي بت دا انا اتكيفت منو شيديد..اتمنى تكون سعيده معنا

كلامو عجبني وربي ( تحية لكل جنوبي ..انتو الزيت ياخ )

انا صراحه ما كنت مطمئنه ..بس لازم اقعد في بيت الملك عشان أكون بآمان..عشان كده قلت موافقه

احمد ضحك وقال : هو انتي يعني فكرتي ؟؟ انتي عارفه انو اكتر من 1000 نفر بتمنو مكانك دا ؟؟

ما اهتميت بي كلامو ..قلت ليهم ماشه افطر عن إذنكم..طلعت منهم ومشيت الكافتيريا

حنان : مفتريييية

اروى : هههه أحلى حاجة.

وليد عاين لي مدريدي وقال ليهو : ناوي على شنو انت !!

اكتفى بي إبتسامه غبششششاء باهت لونها ما مفهومه نهائي..

كريم : ولد دا خطير.تويتي اعمل حسابا هههه

احمد : ههههههه فتحت حساب مع البنك الخطأ هي ..

شوقي : ييييك كتمت

حنان واروي يتضاحكو ساي..كل واحد فيهم أخبث من التاني

م عارفه داسين لي شنو..بس ربنا يستر ...

???

مشيت الكافتيريا ..شوفت وجن واقفه مع الاسمها منن دي ..وقت شاف*ني ارتبكت كده..وجات علي : وينك انتي ؟؟

عاينت لي منن وعاينت ليها وقبل ما افتح خشمي قالت : منن قالت لي انتي اتشاكلتي معاها هي وهديل ..وحممتي هديل بالشطه .

قلت ليها اااي حصل ..

.طوالي عيونها دمعو وقالت : يا ترتيل عليك الله الناس ديل ما قدرك ..ما تورطي نفسك معاهم..مدريدي لو ختاك في راسو حيكرهك الجامعه...

( البت دي رقيقه ج*س رقه !! ياخ كن لمو رقتها و وزعوها لينا كلنا نحن البنات كان كف*نا )

قلت ليها : ما تخافي علي..بعدين يا وجن عندي ليك خبر..

واصلت كلامي وقلت ليها مدريدي اضافني لي قروبهم حق ديسباسيتو ولة الجن الاحمر دا..

طبعا اتخلعت..: انتي جاده !!

قلت ليها يب..بس يا وجن ما متطمنه

وجن : ليك الحق..ا****عه ديل خبيثين..بس انتي اعملي حسابك .

وواصلت بمرح : بعدين كونك معاهم دا بضمن انك تكوني بي آمان..وماف بت من المعجبات بي مدريدي تقدر تهبشك..كده بقيتي عندك حصانه زي حنان و أروى

ما اشتغلت بي كلامها وشلت فطوري ومشينا..

حضرنا المحاضرة التانيه وطلعنا زي الساعه 3:34 مساء كده..وجن قالت عاوزه توصلني لكن رفضت..لانو هي زاتها الوصلتني يوم الخميس..طبعاً عربيتها كيا بيضاء وعندها سواق .انسسسو بسسس ..اقعدو لي انتو .

انا غايتو مشيييييت ركبت مواصلاتي واتشلهته تماام في الشمس الحارة ديك..

اربعه كده وصلت ..

لقيت عمتو مضيوفه ..ضيوفها في القطية قاعدين.. كانو عاملين جبنه ولمه ظريفة انسو بس..

القطيه جوة كلها تراثيه..عناقريب مضروبات بلون احمر حق العديله والزين ولة الزيت ما عارفه ..المهم ..وبنابر بنفس اللون..والترابيز فيها شكل المخابر حقت العديله والزين..والأرض مفروشه رمممله..حسيت نفسي في معرض ..

يلا القطيه دي ما بتنفتح الا وقت يجو ضيوف لي جبنه وكده..

المهم سلمت عليهم ومشيت استحميت وصليت الضهر والعصر جمع تأخير ..

عمتو قالت لي لو جوعت آكل..بس الصراحه ما كان عندي نفس..

شربت من الجبنه فنجانين ونمت على كده

صحيت بعد المغرب على صوت صفصف..لقيتها يا داب جات من الجامعه..غايتو ناس طب ديل تعبانين

قمت اتوضيت وصليت المغرب ..بعدها عمتو ختت الغدا وجينا قعدنا كلنا في السفرة.

فرح شايلاها حبوبتها وبتأكل فيها ..عامله شغل في الصينيه..ضحكتنا ضحك

انا الاكل مشي بي وين ما عارفه..

بعد الآكل غسلت ليهم العده..وجيت راجعت شويه..تاني وقت مليت اتصلت بي ميرو وحكيت ليها الحصل

قالت لي امرهم مريب ا****عه ديل..يلا اوعك تثقي فيهم اوعااك..

قلت ليها ماتوصي حريف

بس السؤال البطرح نفسو..هل انا حأقدر ما انخدع بيهم ؟؟؟؟

ولا هم فعلاً حبوني وما حيعملو لي شي؟

م معروف

نشوف

???

تاني يوم خلصت محاضراتي ...ومشينا انا و وجن نشتري الفطور ..كان معانا واحده اسمها سحر

كريم ناداني ..قلت ليهم تعالو معاي

وجن قالت لي : دي قواعد القروب..ماف زول غريب بمش ليهم الشجرة الا كن نادوهو ..قالت كده وساقت سحر..ما عارفاها شجرة نيم ما عرفتها شجرة المؤتمر الوطني....لكن صراحه انا خفت تكون زعلت مني

المهم مشيت عليهم

سلمت ليهم ...اتونسنا كداا

وأحلى حاجه حبوها فيني وحبيتها في نفسي انو انا ما بسمح ليهم يتعالو علي..وما بحسسهم اني مبسوطه عشان ضموني في القروب بتاعهم ..محسساهم انهم ناس عادييين زيهم زي اي ناس تانين.. وووين الجديد؟؟! فعلاً هم بالنسبة لي مجرد ناس عاديين فاكنها في روحهم وعاملين فيها انهم واو رهيبين..

في عز الونسه تلفوني دقة..وانتو عارفين نغمة الصيني العجيبه ديك..

ياخ ناس الكافتيريا سمعوها وبدو يتاوقو..وللعجب ناس النشاط.

احمد قال : سمعتك (بضم السين)

اروي قالت :يييييييك ..هو دا لسع عايش

م اشتغلت بيهم ورديت بس ماف زول رده ورقم غريب ..( طبعا دي حركات مقصوده عشان ديل يضحكو في تلفوني..اما منو عملها وليشنو ما معروف )

غايتو ما سلمت منهم..شمتو فيني شماته الجن..

كريمو شالو وقال : سورونا معاو سييلفي هههه وكلهم ضحكو

قلعته منو تلفوني وطلعته ليهو ل**ني : نننننن ظريف..زرافه تنطحك يا كريم

طبعا العبارة عجبتهم

وقعدو يضحكو..

حنان : خلاص يا تويتي عبارتك دي قص ونسخ ولصق بعد دا..سرقناها

قلت ليها اسرقو سااي ..المعجم ملان..وكل ما تحتاجو برمي ليكم

طبعا لحظة **مت..كل ما يقولو يهينوني انا بديهم في راسهم بالتقيل

قلت ليهم بالإذن ..ماشه اشوف صحباتي

شوقي: محاضرتك الساعه كم ؟؟

قلت ليهو 11:34

قال لي يييييك ..وماشه لي من اسي ؟؟

قلت ليهو هو انا ما عندي شغله غيركم..في حاجات تانيه اهم..ومشيت خليتو فاتح خشمو زي الكبوت

م ابتعدته كتير أتلفت وقلت ليهو : اقفل خشمك عشان ما يجيك جفاف

احمد قال : لا الله الا الله !! دي شنو دي دي مصيبه

كريمو : الجو بقأ سكن فجأه (سكن دي سخن بالله انتبهو لكلام كريم )

شوقي : ما عجبني لي نفسي والله

أروى : لا دي خطيرة..بتتغدا بينا قبل نتسحر بيها

اما مدريدي دا بس قاعد يبتسم..ما معروف إبتسامه اعجاب..ابتسامة خبث ..المهم ..ابتسامه شفافه لا لون لها ..ودي اكعب انواع الابتسامات

???

يوم الاربعاء المساء ..حاولته اتصل بي ابوي بس ما رده لي

عشان كده كتمتها جواي ونمت علي كده..

تاني يوم وانا مآشه علي الجامعه برضو اتصلت عليهو ما ردة

م حسيت بي نفسي الا دموعي دي جاريه ..مسحتها بسرعه قبل زوول يشوفها

المحاضره شغاله بس ولا فاهمه منها ولا شي عشان كده طلعت .

مشيت تحت شجرة ديسباسيتو..لاول مرة تكون فاضيه ..قلت اكيد بكونو في محاضرة.. تاني تلفنته لأبوي ..الخط فصل ..وبما انو ماف زول بيجي الشجرة انا اغتنمته الفرصه ..وقعدته ابكييي بحرقه

بكيت لمن الله غفر لي..قلت حرام عليك يا ابوي والله حرام

اي أب بكون قاسي ما عارف لشنو ..

رفعت راسي بخلعه لقيتو..

لقيتو دا مدريدي زفت الطين !

بالجد البني آدم دا ما قادرة افهموو..اتخيلو

مده لي منديل !!

حلفت كن أشيلو ... ما عارفه لشنو ما اشلتو بس قلبي ما متطمن لمدريدي ولا لي مناديلو

عايزه امشي قال لي : واافضيحتك لو زول شافك طالعه من شجرتنا وانتي بتبكي..

عاينت كداا.. .ما لقيت خيار فعلا ما عايزة يقولو انهم زلوني وطلعت من الشجرة وانا ببكي... قعدت تاني

مده لي المنديل شلتو طوالي

طبعا كنت محتاجاهو .لانو لازم اظهر معالم وجهي الاخفتها الدموع والحاجه البتتطلع من الانف ديك..

...

بعد هديت شويه سألني المبكيك شنو ؟؟؟ وابوك عمل ليك شنو!!!

قلت ليهو : عاين..انت آخر انسان انا اثق فيهو ..وكمان متوقع مني احكي ليك مشاكلي الخاصة !!!! وابوي ما تجيب سيرتو في ل**نك فاهم !

وقمت خليت ليهو الشجرة بثمارها ( مع انها شجرة نيم هههعع)

مشيت الاستراحه نومممته ..

والحمد لله ارتحت وهديت شويه

المحاضرة التانيه كنت مصحصحه فيها..حضرتها وفهمتها..

وجن دي والله عثل..بالرغم من ابتاعدي عنهم الا انها نهائي ما زعلت مني..واحللي حاجه انها بتضحك في وشي من لما اعاين ليها

بريئه براءه عجيبه ربنا يحفظها..

باقي اليوم دا ما ما مشيت على الشجرة..قررت امش البيت لاني كنت مصدعه شديد ..

طبعا دا الخميس..وانا نايمه حسيت في زول بجرجر فيني : قومي !! قوومممميء

فتحت عيوني لقيت انصاف قاعده في سريرها ومغلوبة على أمرها ..مرة ترقد مرة تقوم ..وتتثائب

امجد : ياخ ما تخليكن **لانات كده..عاينو ابو حميد صاحي عيب عليكم

طبعا جاني احساس لمن تنوم يوم 31/12 و يصحوك قبل 1/1 بكم دقيقه كده..امجد دا مجنتر

قلت ليهو اها في شنو

قال لي : الليله الخميس ..انا جهزت حاجات الرمرمه جمب الشاشه هناك ..عشان حنحضر فلممممممممم

#صلي_علي_محمد

#9ديسباسيتو?

#خياليه100%?

#fulla_Ali

طبعا مسسسساهرين لي 3:34ص

وكلو من أمجد دا !! الله يآزاوو

حضرنا فلم رعب اسمو the conjuring )الشعوذه( اظن كلكم بتكونو شوفتوهو..يلا دا كان اووول عرض

ياخ ما بقدر اوصف ليكم كمية الرعب الأنا حسيت بيها...انسسسسسو بسسس

بعد ما خلاص قفلنا و اي زول مشى سريرو ..تلفوني ضرب..

طبعا اتخلعت .دا منو الحيض*ب لي الزمن دا ؟؟؟

لقيتو رقم غريب..وصفصف اصلاً ناممت بدرري و ولا تمت الفلم زاتو..حضرناهو انا وامجد واحمد الفصعون الما بخاف ..

م عرفت اتصرف كيف .المهم اتوكلت ورديت بصوت الو

_الو ..كيفك..

_ بخير..منو؟؟

انقرو لقيتو منو......

انقرو منووو

قال لي انا #مدريدي

اما كيف لقى رقمي ...و منو اداهو ليهو ولشنو ضارب لي الزمن دا فدا ما عرفتو للآن..

قال لي : بس ما اكون ازعجتك؟؟

قلت ليهو بصوت اقرب للهمس : لا..

طيب ما أكون صحيتك من النوم..

قلت ليو لا ما صحيتني ..كنت بحضر فلم.

قال لي بشهقه : the Conjuring!!!!

_اااااي ...

قال : بوو...لزوم يخوفني وكده

_رديت ليو بي : وا وا وااي..بس بأستخفاف كده. طوالي الأهبل قعد يضحك .

قلت ليهو :بطل سخافه انت عاوز تصل لشنو ؟؟؟

رده لي بعد مسسسسافه ودي كانت آخر كلمة اتوقعتها..

_عايز أصل لقلبك..

م كذبت طوالي قلته الخط والتلفون وجدعتو تحت المخده

والله العظيم قلبي دا بدق دق! ياخ انسو بس

واتملكني خوف ما عادي.. الخوف الخفتو من كلمتو دي الفلم ما خوفني ليهو...

من كتمت النفس الجاتني خلاص قلت حأموت ..بس في نص قسمات وجهي الخائفه..ظهرت خيوط ابتسامة..

وأعوذ بالله من الابتسامه الذي دي...

???

صحيت الساعه 9:34ص

لقيت البيت قايم قاعد..شغالين نضافه

صبحت عليهم وصبحو علي..انصاف دي كن شفوتوها تمممموتو من الضحككك رابطه نصها بي طرحه ما عارفه الفايده شنو اظن عايذه تحاكي المصرييين ( هوي صحي المصرين ديل دايرين يشيلو منننا حلايب وشيلاتين !!!؟ الله يستر بس )

قلت ليهم ليييي ما صحيتوني أساعدكم !!!

عمتو قالت لي نحن زاتنا خلصنا ..بس خلينا ليك المطبخ..استعجلي اتسوكي واشربي الشاي عشان تطلعي لينا الفطور

قلت ليها : جدا ..بس انتو عندكم فطور محدد لليوم ؟؟

قالت لي لا..على زوقك

المهم..اتسوكت و شربت الشاي..وربطت نصي ذي إنصاف ودخلته المطبخ. المطبخ مرتب أكتر من حياتي..المهم

قررت اعمل عصيده بي نعيميه..ياخ العصيده والنعيميه حب حياتي..مستعده آكلها العمر كلو وعلى مدار اليوم

قطعت بصلتي وحمرتها ..بس للأسف ..روب ماف

سألت عمتو قالت لي امش بيت حجه فاطمه بتبيع روب.بيتها ما بعيد ...و سوقي احمد يقدمك

طبعآ احمد حللف كن يمش معاي قال بحضر مسلسل وقت المغامرة حقت فين وجيك ديلك...

الا قلت لي

امجد يمشي معاي ..قال لي كويس..لبسته توبها حق الهزاز وشلته جردل طحنيه صغير كده..ومشينا ..

اتونسنا كدااا في الشارع...

لغاية وصلت البيت ..امجد انتظرني برة..

المرا ملتني كلام...بعد شوية في بت صغيرونة جات وسوست ليها في آضانها ..قالت ليها : سمح بالحيل..

البت عاينت لي وابتسمت ومشت..عثثثثثل كن شوفتوها..ربنا يحفظها

المرا ست الروب

تتكلم وتتكلم وترغي وترغي..وحاتكم زهجته...والروب شغاله تخج فيهو وتخج وتخج قالت لي لسع عليهو شويه...

لمن امجد دخل ناداني ..قلت ليهو لسع..

قال لي بتعرفي ترجعي براك ؟؟؟

قلت ليهو اااي بعرف..قال لي خلاص عشان انا مستعجل عندي مشوار..

بعد شوية البت تاني جات..المره دي سلمت لي..امرها مريب حيرتني ..انشغلته بي تلفوني رسلت لي أميره رساله الجمعه ( شوفتو انا قديمه كيييييف هههععع)

المهم المرا كبت لي الروب..صلحت توبي وحاسبتها وطلعت

وانا ماشه سمعت صوت بوري..زحيت من الطريق بدون ما اعاين

تاني سمعت صوت البوري برضو زحيت وتاني سمعت صوتو

لغاية زهجت واتلفت عشان اردح ليهو..

واتلجمت وقت شوفتوو

تفتكرو منو ؟؟؟؟

???

#شندي_الحوب?

**تحية لي ناس شندي المعانا هنا ف القروب..انتو الزييييت ❤ **

معالي : يعني هسي نحن حنسافر السعوديه !!! واي يا فرحتي وااي

الطيب : اي يا معالي..بس لكن........

معالي : لكن شنو يا راجل ..ما تقول لي الفي بالي صح!!

الطيب : اي ..لازم ترتيل تمش معانا ما حأخليها هنا!

معالي : طيب سوق ترتيل..لكن لعلمك..لا انا لا واحد من عيالك ..ماف زول حيمش معاكم انت وبتك

الطيب : يا معالي عليك الله اقفلي الموضوع دا..بعدين تلفوني دا لي زمن ما لاقيهو..

ما سألتي لي الاولاد ء؟؟

جاتها ربكه كده..بس قالت ليهو : ا ا انت ع عاوزني انسى الموضوع صح !؟؟ بس انا كلامي واضح ما بغيرو..

قالت كده ودخلت غرفتهم

اما الطيب انشغل بي تفتيش تلفونو..تحت السراير وفوق تربيزه الكتب ..عسى ولعل يلقاهو

مسكيييين ما عارف انو تلفونو مع مرتو ال*قربه الفقرية النكديه المكاديه معالي زفت الطين!

???

قضروف السعد ??❤

وقت أتلفت لقيتها عربيه..سنتافي حمرا

طلع منها مدريدي..كان لابس تيرينك رمادي وفلينه سوداء..والعضلات ما يدوكم الدرب..وقت شوفتو قلبي عممل شششششحح صراحه كده الولد دا ما شبهه السودان..شبه ناس اسبانيا بس..والله أعلم

وقف قدامي وفي وشو ابتسامه بيضاء ..ناصعاً لونها..ساحراً لونها ..وسيماً لونها ..نهائي ما قدرت احدد اللون..

سرحت فيهو سرحة الجن ..لغاية طق طق لي بي اصابعو : فوقي

وانا يا داب فوقت قلت ليو :اي

قال لي هو شنو الاي..ما منتبه موش ؟؟

طبعا الخجل كتلني

قال لي جمعه مباركة عليك

والله العظيم الولد دا ما طبيعي..معقولة يتغير 180° كده ¡¡¡

رديت ليهو علينا وعليك تتبارك

قلتها ليهو وتحركت من قدامو..قام مسك يدي ❤

والله جسمي دا تلج..وخلاص نشلت موية..وبديت ارجف..سحبتها منو سريع سريع وقلت ليهو بخلعه : انت مجنون ! اسي لو امج.....

قال لي : امجد ؟؟ م تخافي امجد اسي في قلب السوق

قلت ليهو وانت بتعرف امجد من وين !

قال لي : امجد ..احمد..اشرف..انصاف..ولفة بوراي وقال : اميرة..هشام .

هنا انا عقلي عاوز يطير..دا بيعرف اي حاجه عني ! يمكن فرشتي لونها كيف عارفها !

قال لي : البت الهسي جات للمرا البتبيع الروب انا رسلتها ..عشان تأخرك وامجد يزهج ويمش

التفته عليهو وعاينت ليهو بثبات وقلت ليهو: انت عاوز تصل لشنو بالضبط كده !!!؟

قال لي وعيونو في عيوني ما رمش ولا لحظة : كلمتك..هدفي قلبك

طوالي اتحركت من جمبو..عيوني كلها دموع..ما عارفه لاقيت منو في الشارع وما عارفه وصلت كيف

المهم دخلته المطبخ وختيت الروب وجري على الحمام..بكيت لمن الله غفر لي..انصاف يا حليلا .

تنادي فيني وتدق وتدق

وعمتو زاتها جات ..ويسألو فيني سااي

قلت ليهم ماف حاجه

آماني : دا امجد زعلك صح ؟؟

فجأه امجد جا وقال : هووووي امجد مالو ؟؟؟!

#صلي_علي_محمد

#To_be_Cont..

هووي لحظة بس..قبل تمشو الحلقه ال10 ..عاوزه منننكم طلب ....متابعه في حسابي #fulla_Ali لانها مهمه لأستمراري...

بقلم :#fulla_Ali