TATLONG ARW na pero wala pa ring Balita kay Luther si Jianna. Umupa na siya ng private investigator para hanapin ito, sa tulong na rin ni Tita Claudia.
Gayon man, bagaman at napagod na siya sa paulit-ulit na pagtatanong sa papa niya kung may kinalaman ba ito sa pagkawala ng fiance niya, hindi naman siya tumitigil sa tahimik na pagmanman dito.
Sa ngayon, wala pa naman siyang napapansing kakaiba sa ama. Ni hindi ito umalis ng bahay. Wala rin siyang narinig na kausap nito na puwede niyang paghinalaan.
"Nanay, puwede na po ba akong bumaba para kumain po ng breakfast?" tanong ni Gale nang magising na rin ito.
Sandaling tumingin muna siya sa orasan. Mga ganoong oras kumakain ng almusal ang Papa Robin niya. Iyon din ang nakasanayan niya simula noong bata pa siya kapag nandito siya sa bahay.
