أحببت بطل خيالي أضغاث أحلام

زواج

فريحه ١٣

كانت ايام صعبه علي فريحه خصوصا بعد موت جدتها واللي كانت كل عائلتها بعد موت ابوها وامها

مراد كان بيزورها كل يوم

لحد.ما في يوم عمها سألها ؛ مين الراجل اللي كل يوم كان بيجي العزا ده حتي وقت الدفن كان موجود

فريحه : ده ده ممثل ..قصدي زميل في الشغل

عمها : والممثل وله الزميل في الشغل كل يوم يكون هنا ليه . ويجيب الكلام والناس تسال مين اللي بيجي لبنت اخوك

فريحه : يا عمي مراد مكنش بيجيلي لوحدي. كان بيجي ويقعد في عزا الرجاله. والراجل كتر خيره وقف في وقت شده معانا

عمها : والعزا خلاص خلص. مش عايز اشوفه قريب من البيت .. والا هتحصل مشكله ، مش ناقص حد من أهل البلد يجي يقولي بنت اخوك ماشيه علي حل شعرها مع واحد غريب

فريحه. : قطع ل**ن اللي يقول عليا كلمه. انت عارف أخلاقي كويس يا عمي . مش هسمح لحد يكلم كلمه بطاله عليا

عمها : يبق تقطعي من الاول رجله عن البيت . انتي مش هتمشي تقطعي ل**ن اللي رايح واللي جاي وتقولي زميلي في الشغل

...

وهما بيتكلمو الباب خبط وكان مراد

فريحه لعمها : انا هكمله يا عمي .. وهفهمه

عمها : بدل ما هو جه برجله انا اللي هفهمه .تعال اقعد عشان في كلمتين واقفين في زوري ولازم اقولهم

مراد قعد وهو مستغرب من أسلوب عمها : خير في ايه .. حصل حاجه يا فريحه

العم : كلامك معايا .. اولا متشكرين علي وجودك وقت العزا والدفن . بس خلاص العزا خلص وياريت متجيش هنا تأني. عشان كلام الناس كتير وكلهم بيسالو عليك وفريحه بنت .

مراد : انا بعتذر لو تسببت اي إزعاج. عن اذنكم

خرج مراد. وفريحه كانت محرجه من كلام عمها اتصلت بمراد

فريحه : مراد انا اسفه . كل بلد وليها عادات وتقاليد .. عمي كان كلامه ناشف بس هو خايف من كلام الناس اتمني متزعلش .. انت وقفت جنبي الفتره اللي فاتت وانا حقيقي مديونه ليك

مراد : انا فاهم يا فريحه هي يقصد ايه وعشان كدا مجدلتوش . المهم دلقوتي انا عايزك تكوني قويه وحاولي ترجعي الشغل هتشغلي وقتك

فريحه : هحاول . مع اني مليش نفس اعمل حاجه . بس علي رايك هشغل وقتي . بقولك انت هتسافر أمتي

مراد ؛ كمان عشر ايام ، الاجازه كانت شهر ونص

فريحه : بسرعه كدا . انت ملحقتش تتفسح وله تشوف كل الاماكن . حاول تطول شويه .

مراد : هحاول واشوف . المهم هستناكي بكره تيجي نكمل الجوله السياحيه وياريت مترفضيش لان المرشد اللي معايا رخم اوي ومش فاهم منه حاجه . انا كلمت الشركه وقولتلهم انك هترجعي . مش هقبل اعذار يا فريحه

فريحه : حاضر . هشوفك بكره . باي

قفلت فريحه مع مراد. محتاجه وجود مراد في حياتها .. الغريبه انها مش بتحس بالأمان غير معاه . بعد موت جدتها لو مكنش مراد معاها كان ممكن حصلها حاجه ..

فريحه : يا تري انا عايزه اكون جنبه عشان هو بيفكرني بمهاب وله عشان مراد بيهون عليا اللي بيحصلي . اذا كان دي وله دي . فانا عايزه اكون معاه وخلاص.

...... في اليوم التاني اتوجهت فريحه للفندق وخرجت مع مراد علي الاماكن السياحيه .. وهما في المركب قاعدين

فريحه : بعد شويه هتتحرك المركب وهنروح اسوان

مراد : مفكرتيش تسافري قبل كده يا فريحه . بلد نفسك تزوريها

فريحه : لا . بس حتي لو فكرت هسافر فين. انا بحب شغلي وكمان هنا بلدي فيها اهلي . لو سافرت هسافر اعمل ايه

مراد : تسافري تشتغلي . انا عاجبتني فكره الحلم اللي كنتي بتحكيلي عليه. وعايز اعمله فيلم . ايه رايك تكتبي افكارك أو تسجليها واديها لحد يعملها سكريبت

فريحه : انت مش قولتلي أن ده اصلا فيلم وان انا بتخيل احداث

مراد : احم . هو انا قولت كدا . أمتي . محصلش علي فكره انتي بتتخيلي

فريحه : لا حصل يا مراد. انت قولتلي أن ده فيلم وقت انا شوفت صوره مني السكرتيره وقولتلي أن دي اسمها روزي . متكدبش .انا فاكره كويس انت قولتلي ايه.

مراد ؛ انا عندي اسبابي وقولت كدا عشان متفضليش واقفه عند نقطه واحده . حبيت اساعدك .

مش قصدي حاجه وحشه .

فريحه : خلاص متتكلمش يا مراد. انا مش عايزه اشوف وشك تاني . انت بتستهر بيا. انا هنزل من هنا ومش هتشوف وشي

مراد : انتي يا مجنونه افقي مكانك . المركب اتحرك . رايحه فينا . انتي زعلانه عشان بساعدك . انا غلطان عشان قولتلك الحقيقه. خليكي عائشه علي ذكري مهاب بتاعك ده.

فريحه : ملكش دعوه بيا. روح سافر بقي وخلي مني تضحك عليك . تستاهل

مراد : الاوهام دي في دماغك . مفيش حد اسمه مني وله امي اسمها صافي وله عندي اخ اسمه سيف . وانا مش مهاب اصلا ..انا مراد منير . فوقي لنفسك

فريحه قعدت طول الرحله في المركب مش بتكلم مراد رجعو علي الاقصر وسبته

في البيت كانت قاعده

عمها : سعيد ابن الحج عمران طالب ايدك يا فريحه وانا وفقت

فريحه : وافقت ازاي يا عمي ..من غير ما ترجعلي . وكمان تيته لسه متوفيه . انا مش عايزه اتجوز ومش موافقه .

عمها : انتي هتلاقي زي سعيد فين . ده عنده اراضي وعنده شركه ده غير الفلوس اللي في البنك . اي واحده في البلد تتمني تجوزه وبعدين أنا عايز استرك واطمن عليكي في بيت جوزك

فريحه : لا يا عمي . انت عايز تبيع البيت وتاخد نصيبك . وطول ما انا هنا مش هتعرف تبيعه لأن الناس هتتكلم وتقول شوفو عمل ايه في بنت اخوه . لو انت حابب سعيد اوي وشايفه مناسب جوزه لوحده من بناتك. انا مش هتجوز

عمها ض*بها بالقلم : اتكلمي معايا كويس يا قليله الادب . عايزه تروحي وتيجي ومحدش يحكمك . مش عايزه تتجوزي ليه يا بت . بيقولو غلطتي مع حد في القاهره وعشان كدا رافضه تتجوزي وكنتي بتتعالجي اما سابك

فريحه : واللي قال مين . مراتك يا عمي . اللي مش بتحبني وعايزه تسؤ سمعتي وخلاص . مراتك اللي مفروض انت تحميني منها ومن اي حد وتقولهم بنت اخويا متعملش كدا .

العم : انا قولت اللي عندي . سعيد هيجي يقرأ الفاتحه وهنلبس الدبل من غير فرح وبعد الاربعين بتاع جدتك هنعمل الفرح

فريحه : مش موافقه يا عمي . انا مش هتجوز سعيد ..والله ما هتجوز غيره. انا اللي هختار شريك حياتي ، ولو عايز اسيب البيت عشان تبيعه . انا هسيبه واشوف شقه قريبه من شغلي

العم : مش هتتحركي من هنا غير علي بيت جوزك يا فريحه. الهبل اللي في دماغك مش هيحصل . عايزه تعيشي لوحدك .عشان تحطي راسي في الطين .

فريحه : هتجوزني غصب عني . هي دي الامانه اللي بابا وصاك عليها قبل ما يموت

العم : مفيش خروج من البيت غير علي بيت جوزك . وهنشوف كلمه مين اللي هتمشي انا وله انتي .

فريحه طلعت علي اوضتها بتعيط من تحكمات عمها. واسلوبه

مراد كان مضايق أن غلط قدام فريحه وقالها أنه مكنش حلم . بس هو عايزها معاه في تركيا . حاسس بمسؤوليه تجاهها. او يمكن تكون شفقه علي حالتها

خد الموبيل واتصل بيها مردتش .

فريحه كانت بتفكر ازاي تخرج من المشكله اللي هي فيها . مفيش. غير حل واحد .

اتصلت بمراد اللي رد بسرعه : الو . علي فكره مش اسلوب . اتصل بيكي ومترديش عليا . مش بحب حد يتجاهلني

فريحه : انا عايزاك في موضوع تاني من فضلك اسمعني ولو عايز ترفض .ليك حق . بس انا محتاجه مساعدتك وصدقني اللي هيحصل هيكون سر بينا . ارجوك اسمعني

مراد : في ايه . قولي اقدر اساعدك بايه

فريحه : عمي م**م يجوزني .. وحابسني في البيت ومش عايزني اخرج .

مراد : بلغي البوليس . مش من حقه يعمل كدا

فريحه : مقدرش . ده عمي برضو . هي مراته اللي يسامحها .. مش بتحبني وبتحاول تبوظ سمعتي قدامه . عشان كدا اسمعني كويس انا عايزه منك ..

..... بعد ما قالت لمراد هي عايزه ايه قالتله يفكر كويس ومش عايزه تسمع رده دلوقتي

....

عمها ومرات عمها وبناته كان في الشقه مع فريحه عشان مترخجش وله تتحرك

مرات عمها : انتي يا سنيوره . سعيد جاي يوم الخميس وهيقرا الفاتحه ومفيش اعتراض

فريحه : انتي ليه بتكرهيني كدا . عملتلك ايه

هي : عشان شايفه نفسك احسن من بنتي.. بتبصلنا من فوق. علي ايه مش عارفه . اللي كانت بتحميكي ماتت خلاص . ودلوقتي ملكيش حد يقف جنبك

فريحه : طيب اسمعي يا مرات عمي . انا مش هتجوز سعيد ده. ريحي نفسك. روحي جوزيه بنتك

هي : هتشوفي يا فريحه . هتتجوزي وتعيشي زي الجزمه في بيته وه**ر عينك

دخل عمها : في ايه صوتكم عالي ليه

مراته : الحقني . بنت اخوك عايزه تمد ايدها عليه وكمان شتمتني بالفاظ اول مره اسمعها .. البت دي عايزه تتربي

فريحه : كدابه يا عمي .. والله ما عملت لها حاجه ..

مراته : شوفت بطول ل**نها عليا ازاي . شوفت تربيتكم .انا بنتي عمرها ما تقف قدام حد أكبر منها وتتكلم بالاسلوب ده .

دخلت بنته : بابا .. الحق . الممثل اللي اسمه مراد منير ، بره وعايزك في موضوع.

العم : انا مش قولت الزفت ده ميجيش هنا تاني .

فريحه : اسمعه الاول يا عمي . ولو سمحت كلمه كويس

العم : في ايه في دماغك يا فريحه

خرج عمها ..

ومرات عمها بتكلم بنتها : تفتكري جاي يتجوزها

البنت : مستحيل . مراد يبص لدي . هسيب تركيا ويجي ياخد دي. ازاي يا ماما.

مرات عمها : البت فريحه دي مش سهله اكيد سحرتله

.... تفتكرو فريحه طلبت ايه من مراد ؟؟.

يتبع

فريحه ١٤

فريحه قاعده بتفتكر قبل ما مراد ما يجي . هي عملت ايه

كلمته في الموبيل وحكتله أن عمها عايز يجوزها

: مراد انا عايزه اسافر واشتغل معاك . ولو علي السينايور بتاع الفيلم أن بعرف اكتب .. الدكتوره النفسيه كانت بتشجعني أن أكتب وأخرج كل المشاعر عن طريق الكتابه . انا ممكن اكتبلك الفيلم ومش عايزه فلوس . بس عايزه تيجي لعمي وتقوله أننا هنتجوز مجرد بس اما اخرج بره مصر هنتطلق ومحدش هيعرف حاجه . عارفه أنه طلب مجنون بس انا محتاجه ابعد عن هنا. معنديش حد هنا وحابه ابدا في مكان جديد . مش عايزاك ترد دلوقتي. فكر. ورد عليا بعد ما تفكر. منتظراك

قفلت مع مراد وقررت اكتب اول مقدمه من سيناريو الفيلم . يمكن يوافق

كتبت صفحتين وبعتهم ليه وطبعا باللغه التركيه . نسيت اقولكم اني بعرف ( تركي وانجليزي وفرنساوي ) ..

بعدها اتصل بيا وهو مبهور بالنص

مراد. : تحفه بجد . انتي ازاي عندك الموهبه دي وساكته . ابعتي الفيلم بسرعه متشوق اقرأه كله

فريحه : مش هبعت غير اما تنفذ اللي قولتلك عليه . انا مش بضغط عليك . بس انت الوحيد اللي واثقه فيه انه هينقذني .

مراد : انا مش موافق علي الجنان ده . انا مشهور . انتي عارفه لو الصحافه عرفت هيحصل ايه

فريحه : انت مكبر الموضوع . اي ممثل ممكن يتجوز وبعدين انا اصلا مش هقول لحد وهنتطلق الموضوع هيكون سري جدا ..

مراد : برضو مش موافق ..والسيناريو اصلا وحش . ومش عاجبني .

قفل في وشي الموبيل . كان اخر امل ..

..

عم فريحه قاعد مع مراد

مراد. : انا طالب ايد فريحه.

العم. : كنت واثق أن في بينكم حاجه. وياتري بقي لو انا وافقت هتعيشو فين

مراد : هنكتب الكتاب وهاخدها ونسافر تركيا . انا كنت جاي هنا سياحه وخلاص اجازتي خلصت

العم : اممم . وهتدفع مهر كام

مراد : اللي تطلبه هدفعه . بس ياريت تكتب الكتاب بسرعه عشان معاد اجازتي وطبعا عشان ظروف موت نينه قمر .. الموضوع هيكون علي الضيق. مش هنعمل فرح

مرات عم فريحه شاورت لجوزها استاذن من مراد وخرج

: عايزه ايه يا وليه ..مش شايفاني بكلم الراجل .

هي : متوافقش . اياك توافق . بقي دي تتجوز واحد ياخدها تركيا وتسافر وبنتي انا عايز تجوزها لواحد من هنا. البت دي هتتجوز سعيد . انت ناسي أنك واخد منه مهر ٢٠ الف

العم : هاخد من مراد اكتر وكدا ه**ب . هدفه ال٢٠ لسعيد واخد الباقي ليا واض*ب عصفورين بحجر واحد .

هي : بس برضو . مش هتتجوزه . انا بقولك اهو البت دي لو اتجوزت مراد .هسبلك البيت وامشي

العم : اعملي اللي يريحك . انا هشوف مصلحتي هطلع من الجوازه دي بقرشين واروح اتجوز عليكي .

دخل لمراد : كنا بنقول ايه . اه افتكرت المهر انا عايز ١٥٠ الف جنيه مصري قولت ايه

مراد : موافق. هنكتب الكتاب أمتي .. ايه رايك بكره عشان فريحه تلحق تجهز ورق السفر وتسافر معايا

العم : نقرأ الفاتحه

مراد قرأ الفاتحه واتفق علي كل حاجه . وتاني يوم كتبو الكتاب بدون احتفالات عشان موت الجده ..

. وفريحه راحت تعمل جواز سفر وبتجهز نفسها عشان السفر

بعد ايام ودعت البلد وجمعت حاجاتها وسافرت مع مراد علي تركيا وهي بتتمني تكون حياتها هناك اسهل. في الطياره ✈️

مراد : خلصتي السينايور . انا كلمت المنتج وعاجبه المقدمه وعايز كتابه الفيلم تخلص في اسرع وقت

فريحه : انا كتبت نصه بس محتاره في حاجه. تفتكر النهايه هتكون ايه . بفكر تلاقي البطل في الحقيقه ويحبها ويتجوزو ويخلفو وتكون نهايه سعيده

مراد : لا. انا ضد النهايه دي . هي حتي لو شافت واحد شبهه البطل هتتجوزه وتحبه عشان شبهه .. يعني انتي مثلا قولتي أنك اضيقتي عشان مهاب اختارك لانك شبهه مراته اللي ماتت

فريحه : انا كنت فاكره كدا. بس هو حبني لشخصي .. وبعدين انت مش مهاب ومعشتش حياته عشان تحكم عليه

مراد : اه صح . مهاب ده اللي هو خيال في مخك .. انتي فاهمه بتفكري ازاي . بجد مش طبيعيه. لعلمك انا وفقت علي الجنون اللي قولتيه عشان الفيلم وبس . يعني دماغك متروحش لبعيد

فريحه : عارفه أنه عشان مصلحتك وافقت .. عشان كدا بحاول اخلص الفيلم بسرعه . واشوف هشتغل ايه . انا معايا لغه واقدر اشتغل في مجال الترجمه

مراد : مش هتشتغلي غير اما تخلصي الفيلم الاول. مش عايز اي حاجه تعطلك . انتي هنا لمهمه محدده. وزي ما اتفقنا انتي شريكتي ومؤلفه الفيلم الجديد . ياريت الموضوع التاني ميطلعش بينا

فريحه : مفهوم طبعا . انت كمان ياريت متقولش لحد . مش يمكن احب واحد تركي واتجوزه وابدا حياتي .. انا حاسه ان تركيا هتكون وش الخير عليا

مراد : هتفضلي تحلمي كتير . احنا في الوقع. انتهبي لشغلك هو ده اللي هيفيدك . بلا حب بلا وجع دماغ .. ركزي في الفيلم وياريت النهايه تكون زي ما قولتلك شايفها هتكون احسن وافضل

فريحه : اوك . تمام مراد بيك . النهايه هتكون زي ما انت عايز. سبني اريح شويه قبل ما اوصل.

.... بعد ساعات وصلت الطياره لتركيا

في المطار

مراد : لو في زحمه . وصحافين .. هتمشي وتستنيني في اخر الطريق . عشان منتهوش من بعض وحد.يشوفنا وتبدأ المشاكل

فريحه : زحمه ليه. انت هتعملي فيها مشهور . مفيش الكلام ده هنا في تركيا .

مراد لسه ليخرج من البوابه كان في صحافين كتير بيصوروه وناس واقفه بتحاول تتصور معاه

فريحه : انا مستقليه بالواد ده . شكل الناس بتحبه . جته ق*ف في حلاوته

خدت شنطتها وخرجت بره ومشيت الطريق زي ما قالها .. شويه وكان في صوت عربيه بتزمر

فريحه : هنبدا بقي المعا**ه .يا جماعه انا عارفه اني حلوه وزي القمر . ارجوكم كفايه . دماغي صدعت . وبعدين في الناس دي

بتبص وراها كان مراد في العربيه ومكشر : انتي مش سامعه كل ده ..عامله انادي والسواق يدوس علي الدري**يون نعمل ايه تاني عشان تقفي

فريحه : افتكرتك متحرش وبتعا**ني . معرفش انك مراد . اللاه

مراد : اع**ك علي ايه . اركبي العربيه هتشليني

فريحه : قصدك ايه . انا حلوه انت بقي اللي مش شايف ده مسؤوليتك. روح قيس نظر . لكن انا زي الفل وقمر اربعتشر

مراد : اركبي .. وكفايه رغي .

فريحه : متزعقش انا هركب بمزاجي .. افتحلي الباب عشان أنا ليدي .. فين احترام المراه

مراد : اتزفتي اركبي . أما تكوني مراه ابق احترمك ..انتي شكلك ارجل مني

فريحه : وبعدين في الراجل اللي هفتح دماغه ده . طيب والله ما انا راكبه العربيه. غير اما تنزل انت وتفتحلي الباب وتشيلي الشنطه كمان. يا كدا يا اما مش هركب

مراد كلم السواق وقاله يتحرك بالعربيه .. فريحه شافته بيمشي . جريت وراه : مرااد . انا بهزر معاك يا باشا . ادب سيز مراد ..

....

طبعا مراد وقف العربيه بعد ما سمعها بتتاسف

وصلو علي البيت كان في مكان هادئ . البيت كبير وشكله جميل

فريحه : بيتك حلو اوي . ذوقك حلو .

مراد : اوضتك في الدور التاني . اول اوضه ليا . انتي هتكوني في تاني اوضه . هنا مفيش شغالين كل واحد يخدم نفسه. بتيجي شركه بتنضف البيت يوم الخميس . اوقات بتصل بمكتب يبعتلي شغاله لو في حفله أو اي ظروف .

فريحه : يعني البيت ده كله ومفيهوش شغاله . انت بخيل اوي . ده مهاب كان عنده ١٠ شغالات

مراد : مش عايز اسمع مهاب ده تاني . ولعلمك اسم الشخصيه هيتغير . انا مش هيكون اسمي مهاب . استحاله

فريحه : لا .معلش . انت جاي دلوقتي وتعارض . انا كتبت نص الفيلم ومعنديش استعداد اغير فيه

مراد : هتغيري غصب عنك .. مش برضاكي

صوت الباب بصلها : اطلعي علي فوق ومش عايز حد يشوفك هنا

فريحه : بتستعر مني .. طيب انا هامشي . هروح اقعد في أي فندق يلمني . انت فاكرني قليله في البلد ده انا معايا ٣ الف جنيه . اقعد في افخم فندق

مراد : فريييييحه . اطلعي علي فوق . حالا

جريت اول ما زعق .. وهو فتح الباب

دخل مدير أعماله (اللي هو سيف )

مراد بيكلمه تركي : اخبارك ايه يا حسن. مش كنتي تيجي معايا ..كنت هتتبسط اوي من جو مصر

حسن. : المره الجايه . المهم انك غيرت جو. عشان نبدا شغلنا. عندك اعلانين هيتصورو . وكمان لازم تحضر افتتاح مطعم .. وفي حفله توزيع الجوائز أخر اسبوع

مراد : اهدا شويه يا حسن. انا يادوبك لسه واصل ..

فريحه كانت واقفه علي السلم ومصدومه : ده سيف . هو سيف بس مراد قالي أن ملوش اخ. سيف ده طالع منين هو مراد بيكدب عليا

حسن لسه هيمشي شاف فريحه : انت جايب بنات تتسلي بيها . طيب مش كنتي تقولي اجي معاك. ذوقك حلو وغريب . ممكن نتعرف يا حياتي

فريحه رجعت لورا بخوف : ابعد عني

مراد استغرب تصرفها : حسن ابعد عن فريحه دي مؤلفه الفيلم الجديد وجايه من مصر عشان الشغل

حسن : انت هتعمل فيلم جديد . ازاي معرفش وانا مدير اعمالك .

مراد : الموضوع جه بسرعه وانت مكنتش معايا عشان اقولك .

حسن : والمؤلفه هتقعد هنا في بيتك ، غريبه

مراد : صديقه وضيفه وجايه للعمل. اتمني مضيقهاش

حسن : تمام. هنتقابل كتير

خرج حسن .. مراد : فريحه انتي خايفه ليه ، حسن مشي

فريحه : ده مش حسن . ده سيف اخو مهاب . خلي بالك منه ده شر . كان هيقتله.

مراد : اهدي بس ده مجرد تشابهه اكيد شوفتي صورته علي السوشيال ميديا ..

فريحه : لا . أما متاكده أنه سيف . صدقني يا مراد. انت مش عايز تصدقني ليه

مراد. : جسمك بيترعش كدا ليه. فريحه انتي تعبانه

بس فريحه اغمي عليها. اتصل مراد بدكتوره

فوقت فريحه. اللي اول ما شافتها صرخت برعب

. فريحه : انتي بتعملي ايه هنا. ابعدي عننا

تفتكرو فريحه شافت مين ؟؟

.....

يتبع