Hindi maipinta ang mukha nina Lily at Amanda habang pinapanood nila akong mag-empake ng mga damit ko.
Isang maleta lang muna siguro ng damit ang dadalhin ko. Pajama na pang-isang linggo at pang-isang linggo na work clothes.
Sa linggo, kukuha ulit ako ng panibagong mga damit pati na mga sapatos.
"Bakit naman ganiyan ang itsura niyong dalawa? Akala ko pa man din support niyo ako dito," nakanguso kong baling sa kanila.
"Nasabi nga namin ito kagabi, pero hindi naman namin inakala na sa unang araw ninyo na magkasintahan makikipag-live in ka na agad," reklamo ni Lily.
"Ang bilis!"
"Galing ni Kevin at napapayag ka niya agad."
"Hulog na hulog ka na sa tao."
Napakamot tuloy ako ng kilay. Hindi ko alam kung mahihiya ako sa kanila o matatawa ako sa sarili ko. Parang ang bilis nga. Hindi
