رواية كيا

#كيا? #الحلقة_الأولى #بقلم_منى_المجبري __________________ "بسم الله الرحمن الرحيم" فتحت المذكرة كالعادة وللمرة الثالثة نفتحها ونقلب في القصص ولما بنبدا نكتب قصة نستك ويشوش عقلي، بس هالمره غير كان مودي مش حلو وزي العادة لما نتعب من الواقع نتجهه للكتابة ومع كل التشويش اللي مسيطر على خلايا عقلي بديت نكتب أول سطور روايتي الجديدة #كيا ومعناها بداية حياة جديده، مع كتابة كل حرف شعوري يجدد وكأنها بداية حياة ليا؟ وممكن بداية حياة لكم؟ ودائما وابدآ النهاية هيا بداية جديدة لحياة جديدة مع أشخاص جدد وقصص جديدة واحيانآ نهاية وبداية لقصص مدفونه في قلوبنا ! --------------------------------- --------------------------------- وقفت" دينيز" قدام المرايا وهيا تشوف لشكلها كيف قعد ، لعيونها كيف منتفخات من البكاء والهالات إلي تحتهن والجسمها اللي كان يلقبونها بالبانده بسببه كيف وله عود وتفاصيلها اختفنن نزلن دموعهاا ساخنات وبحرقةة وهيا تشوف لكل شبر فيها كيف طافي حست روحها للحظةة انها هالة من الظلام وردت بيها ذاكرتها لليوم إلى تغيرت فيه 180 درجة "2018" طلعت "سلوى" وفي يديها شنطة السفر وهي مزالت تحاول تقنع بنتها "دينيز " أنها تمشي معاها وبعد ثواني طلع عماد ، شافتلهم دينيز والدموع وخدات مجراهن على خدودها وقالتلهم بصوت يشوبهه الحزن والخوف: _ يا ماما وين نمشي بس نمشي لناس يكدبوا ويقولوا حسام غارق ومش لقين الجثهه؟ يقتلوا في ولدهم أنا مستحيل نمشيلهم ومستحيل نعزي فيه مستحيل انتفاول على حبيبي وخطيبي وراجلي المستقبلي مستحيل حسام عايش يا ماما عايش حسام مسيبنش هوا يحبني مش ه يخليني بروحي مش ه يخليني ? وانخرطت "دينيز " في موجة ابكاء يقطع القلب شافتلها"سلوى "بشفقه وحزن وخدتها في حضنها وهي تردد بصوت باكي: _ عارفه موته صعب علينا كلنا صعب أن نستوعبوا وموضوع يقهر عارفه والله أنك مش ه تستوعبي بسرعه بس لازم تصدقي هضا عمره يا روحي وربي هكي كاتب ومفروض تقربي لربي أكثر وتدعيله بالرحمه وربي يصبرك ويصبرنا على افراق بو التبسيمه السمحهه ? خذا "عماد" بنته من حضن امها وحطها في حضنه وبدأ يرتل في أية الكرسي بوقار❤ _«الله لا إله إلا هو الحيّ القيّوم لا تأخذه سنة ولا نوم له ما في السموات وما في الأرض، من ذا الذي يشفع عنده إلا بإذنه، يعلم ما بين أيديهم وما خلفهم ولا يحيطون بشيء من علمه إلا بما شاء، وسع كرسيّه السمواتِ والأرض، ولا يؤودُه حفظُهما وهو العليّ العظيم». وخلاص حبيبتي هذي مشيئة الله ولا أعتراض على ارادة الله ورددي "اللهم أني قد مسني الضر وأنت ارحم الراحمين " توا تريحي وربي يكتبلك كل خير في الى جاي، وأنتِ بنتي الوحيدة منبش نشوفك ذابله هكي حتى المرحوم مكنش يحب يسمع صوتك زعلانه يبال تبكي ،هوا توا قاعد في مكان احسن من الدنيا وبين يدين الله و يشوف فيك متخلش يزعل منك وادعيله بالرحمه شهيد بإذن الله ، ونا مش ه نضغط عليك ونقولك لا تمشي بالغصب عارفك متحبش العزوات ويبال تشوفي الناس لتعزيهم في وضع صعب وتعزي في إلي كنتي24 ساعه تهدرزيلنا عليه وتحكي معاه أنا مقدر الى تحسي بيه بس توا سلم ابنيتي بنحطك عند عمك محمد لين نروح بيش نقعد مطمن عليك ومهما صار خليك قويه وماتنازليش على مبأدك زي ما ربيتك. حضنت" دينيز " بوها بإمتنان على كمية الحب والطاقة إلي **بتها منه وفكت روحها من حضنه وركبت تلبس وتوتي شنطتها بيش اتنفذ كلام بوها بقلب تعبان ومرايف على "حسام" ورافض فكرة موته ، وبعد لحظات ركبوا السيارة وبعد نص ساعة كانت بين أفراد أسرة عمها ومرات عمها" حميده" بعد ما ودعت هلها . ____________?منى المجبري✍✒____________ "وفي مكان ثاني " رفعت منيره شعرها بأهمال كالعاده من هضك اليوم شعرها إلي كانت العيلهه كلها تشهد بجماله وطوله ونعومتهه شعرها إلي كانت تحبه وتهتم بيه من اليوم إلي برد قلبها تجاه كل شيء وهيَ هامله روحها وضحكتها وروحها الحلوه امتسحن وحلن مكانهن الدموع والهالات السوداء، شافت للروشن وردت ذاكرتها لليوم إلي عرفت شعور جديد عليها الشعور إلى قلبلها حياتها وممكن كتب نهايتها بس هل هنهاية بدون بداية! "2018" خشت" منيره "للدار ورفعت اختها "جنى" إلي كانت تبكي بصوت طفولي يقطع القلب خذتها في غمرها وبدت تغنيلها _نني نني جاك النوم أمك قمرة و بوك نجوم وانت ِتميرة في عرجون واحويته في بحرها تعوم سلم بنتي نحكيلها تكبر وتفوز في جيلها ودير احويش ونمشيلها ننى جاك النوم امك قمرة وبوك نجوم نني نني جاك نعاس امك فجرة وبوك نحاس وانتِ اغزيّل بين الناس و وريدة محطوطه في قرطاس و حصوه في عين الخناس قل اعوذ برب الناس وين كانت وين كانت متغذيه في حوش السلطان جايبه لي حجره مليان جوهر وعقيق ومرجان و أني نفرق ع الجيران. برو عليها برو عليها و الموت الشينة ماتجيه و ما ينغم القبر عليها وماتجيني العزاية فيها مايقولوش الناس عليها و مايحطوا لقمة ف إيديها و هدى بنتي برو عليها.. و ننى ننى جاك النوم أمك قمرة و بوك نجوم شافت" لجنى" وابتسمت بحب لما لقتها غمضت اعويناتها، التفتت للباب لقت امها "رابحه" واقفه والبتسامه على وجها وقالتلها: _ نجيلي شبابي إلي ترقد في وخيتها ربي يحفظكن ليا شافتلها "منير "بحب وهي َ تردد: _ ويحفظك لنا يا نور قلوبنا ❤ ردت" رابحه" بحب: _ نوضي سلم ابنيتي حطي وخيتك في مرقدها وديري برمتك السريعه راه خالتك" انتصار" وراجلها وعويلتها جايين اليوم شافتلها منيره بنظرة حيره وتسأل: _ خيرهم؟ غريبه جيتهم وهما يسكنوا بعيد إن شاءالله حوشهم مفيش شيء وموصلش القصف ردت" رابحه" بنبرة مليانه حزن: _ هوا في مكان موصلوش فيه ودمروه وقتلوه فيه شباب زي الورد ومفيش ارض ماشربت دم ه الشباب الي راحو من ورا مؤمرات ناس ما عندها ضمير لكن الدنيا دواره وكله مردود، أي وصل القصف فيهم والحمدالله راجل خالتك محوش افليسات لليوم الأ**د وبوك قاله على الشقه الي مقابلتنا بيشوفها وإن شاءالله تعجبه ويشريها واليوم بيقعدوا عندنا لين يشوفوا شن يصير في الشقهه مسحت" منيره" دمعتها إلي نزلت متأثره بكلام امها ورفعت اختها ومشت وهي تقول: _ ربي يرحمهم ويكتب إلي فيها الخير لخالتي يا رب ويعينهم ❤، بنحط جنونتي ونبدأ نضم ع السريع ونبخر ابتسمت "رابحة" لبنتها وحطت" منيره" وخيتها وعلقت القرآن على صوت الشيخ" ماهر المعيقلي" وبدت اضم? ----------------------------------- سكر" احمد" الشنطه بعد ما حط السكوات و ركب السيارة وولعها وطلع تحت الصواريخ وأثار القصف والخوف إلي مالي الاجواء? "دمار الحرب يُهلكنا أنهُ يفتت داخلنا ويطفئ شموع مُستقبلنا ويسلب أحلام شبابنا ويسرق ضحكات فرحنا ولحظات مرحنا أنه يتسلل لأرواحنا وينتشلها من داخل اجسادنا ويأخذ حياة اطفالنا أنه يرقص على نغمات الكره والفقد والبعد والحقد ويسلب منا احبابنا ،دمار الحرب يُهلكنا "بقلم#منى_المجبري وبعد ما يقارب 4 ساعات كان مدرس قدام العمارة إلي فيها خالته، نزلوا من السيارة وكل شخص يفكر بأحلامهه وأكثر شيء مريحهم أنهم طلعوا من مكان الحرب بدون ما يفقدوا شخص منهم ويذوقوا نار الفقد إلي مهما مرن اسنين مش ه تنطفي?شافت" انتصار" لعويلها وتن*دت براحه وهيَ اتأكد بعيونها انهم كلهم بخير ومفيهمش خدش وقالتلهم بوقار: _ الحمد الله على الصحة والعافية هي اركبوا خالتكم تراجي فينا خلينا نطمنوها وأنت يا "رجب" راجي "سعيد" اكيد توا مروح من العمل بيش تشوف موضوع الشقه هز " رجب" راسه مؤيد لكلام مراته ، وركبوا ولحظات انفتح الباب وخشوا وسلموا واستقبلتهم" رابحه ومنيره" بكل حب ووجهه بشوش، قالت" انتصار" بإعجاب وهيَ تشوف" لمنيره": _ ماشاء الله ما شاء الله البنت كبرت واحلوت آخر مره جبتيها لنا اصغيره ، ربي يحفظها إن شاءالله ويفرحنا بيها وغمزت" أنتصار" لبنتها" فدوى"، ابتسمت" فدوى" ، وردت "منيره "بحشمه: _ ويحفظك يا رب تسلميلي خالتي ☺️ ردت" رابحه "بحب : _ ويحفظلك اعويلتك يا رب وإن شاءالله" ميساء" تجيب ع خير وسلامه ردت "انتصار "وعيونها مليناات خوف: _ يا رب والله عقلي معاها هيَ قالت بتجيب وتطلع عندي بنتي الكبيره عاد واول حفيد لنا ما غباك وهوا هله مسافرين ، إن شاءالله ربي يسترنا معاها ابتسمت "رابحه "بدورها وهيَ تردد: _ إن شاءالله ماهناك إلا السترة ما تفكري في شيء ❤ التفتت" فدوى " وقالت وهي موجهه كلامها ل "منيره "بحشم : _ معلش منيره حبيبتي بنتعبك معايا نبي ندزك تجيبلي الساكو إلي قدام الباب نسيت نخششه وفيه فوني? ابتسمت" منيره" وحطت الوشاح على راسها والتفتتت ماشيهه: _ لا حبيبتي تعبك راحهه فتحت "منيره" الباب ونزلت اعيونها طول لما شافت شخص متكي ع الباب بتعب وهوا بدوره أول ما شافها اعتدال في تصبايته ونزل اعيونه وهوا يردد : _ احم اسف بس بس كنت نبي نعطي هلي الساكو هضا قالت" منيره "بصوت هامس ومتوتر: _ و ونا دزوني نجيبه ش شكرًا خذت "منيره" الساكو بيدين يرجفن وعطاته ل"فدوى" و خشت المطبخ وهي تحكي مع روحها : _ منيره... افف بسم الله كني تقول خابطني ضيء زعما عشان مش متعوده ع الشباب والكلام معاهم؟ بسم الله عليا بسم الله هي خليني نسقي ال****ي خير مانفكر في كلام فاضي? بينما ما نزل "احمد" لباته الي كان يحكي و"احمد" في حوار داخلى _ شن ه البنت زعما من هذي وكنها طشه هكي ومش باين منها شيء؟ حي عليا واني خيرني نفكر هكي من امتى عندي ع ه الوجيج استغفر الله استغفر الله ? وبدأ يعطي ويأخذ في الكلام مع بوه على امل أنه ينسي الي صار ? بس يا ترى هل ه ينسي! _____✍✒منى المجبري??_________ فتحت "دينيز " اعيونها البنيهه على صوت اعياط، ناضت من السرير وطلعت من الدار وشافت أن حوش عمها معبي صبايا وعيطاتهن شافت للمطبخ لقت عمها عند الباب ويبكي، قربت منه وهيَ مصدومه والخوف خذا مجراه وتسلل لقلبها ، شافت لعيونه وللدموع شافلها بشفقهه وهوا يردد: _ عظم الله اجرنا ربي يصبرك ربي يصبرك بوك وامك عطوك عمرهم ضحكت بعدم تصديق وهيَ تردد: _ بابا ماما عطوني عمرهم ؟ عمرهم ؟؟؟ ??????? #بقلم_منى_المجبري✍ يتبع....... رايكم يهمني وديروا متابعه للايميل وسيبوا رايكم في كومنت❤❤