Nagising si Carson dahil sa narinig na tilaok ng mga manok sa paligid. Bumangon s'ya at nakitang gising na rin si Jessa na nasa kabilang katre. Banig ang kanilang hinihigaan at hindi naman s'ya nanibago. Nakita n'ya ang ilang kasama na mahimbing pa rin na natutulog.
"Mabuti gising ka na," nakangiting sabi ni Jessa nang makita s'yang bumangon.
"Kanina ka pa gising?" Tanong naman n'ya rito.
"Mga 30 minuto na rin. Lumabas na ako at may kape sa kusina, pumunta na lang daw tayo roon. Bumalik ako para may kasabay," anito.
"Sumabay ka na dapat sa kanila," sambit n'ya rito. Gusto n'ya rin kahit papaano ay maging komportable sila rito. Lalo na s'ya. "Tara na?"
"Hindi ko pa alam kung paano at ano ang mga ugali ng mga taga rito," mahinang sabi naman ni Jessa nang makalabas na sila sa bahay
