ألمي وملاذي

البارت الاول

السلام عليكم ??

★#ألــــمـــي_ومــــلاذي★

★البارت الاول 1 ★

★#الكاتبه_تبارك_السراي★

-أحسِبني بَغداد إحتِويني.

وعِيشني وسَافِر بروحيّ.

مأمِن بـ ايدَك وطن..!

إحتَلني مَدري أحمِيني كَيفك

جايلَك آنا وجروحيّ

وأدريّ مَتخيبليّ ظَن .

♡♡♡♡♡♡♡♡♡♡♡♡♡♡♡♡♡♡♡♡♡♡

رهف..

سـنـة 1991

الكل ملتم يسمع اخبار وخايفين حيل بداية احداث بوش دخلت علينة مرت خالي شاكر وبيدها صينية الدبس والراشي وخلتها كبال الصوبة رفعت راسي صارت عيني بعين خالي شاكر ابتسم وصاح يلة هجووم.. علة صوت ضحكتنة والتمينة اني وبنتة مها ولدة سيف ويوسف ناكل ونضحك ويا خالي سلمان ختصاص ضحك ومقالب بعدة مامزوج مقابيلة كاعد خالي سلطان يرزل بسلمان لان حيل ايضوج من سوالفة ومقالبة وخالي شاكر يهدئ بيهم.. خلصت اكل وركضنة اني والجهال لحوش بيت جدي اهل امي كلش جبير وبصفة بيت مابي حاجز هذا البيت كاعد بي خالي شاكر هوة ومرتة وجهالة التلاثة والبيت الثاني خالي سلطان ومرتة حامل.. والفوك خالي رضوان هم هوة ومرتة.. والباقين سلمان وحاتم وفاضل وحميد مامزوجين كاعدين وياهم..

اني البنت الوحيدة الاهلي اجيت بعد انتظار تسع سنوات دللوني بحيث شأطلب يوصلني لهذا تولدت عندي شخصية عنودية وبنفس الوقت مرحة بس مااخاف من اي احد ولااحسب احساب احد وبرغم عمري 13سنة بس الهل يوم اهلي معتبريني طفلة..

لعبت الى ان تعبت وهلكت صاح علينة خالي شاكر دخلنة والتمينة على تلفزيون نباوع مسرحية وصينية الكرزات مقابيلة ناكل ونباوع ونضحك كل احنة مندمجين..

دقايق ودك تلفون البيت كام خالي سلمان فتحة وضل يسلم شوية والتفت على امي الكاعدة تباوع ويانا واسولف ويا نسوان خوالي..

سلمان: ام رهف حماج يعقوب يريدج..

باوعت امي بوجوة خوالي وكامت اخذت التلفون من خالي والكل وجهو انتباهم عليها خاف اكو شي..

ام رهف: اهلاوسهلا بيك خوما صاير شي..

يعقوب: باقرب وقت لازم تجين للبيت ام رهف الوضع مو زين وبوش راح يض*بنة وحتمال كيمياوي مااكدر اضحي بيكم انتو وصيت ابو رهف..

ام رهف: وين نروح مااكدر اتحرك بدون ابو رهف بعدة ماراجع..

يعقوب: ام رهف اخوي ضابط وهذا واجبة عندة انذار ماينزل هسة لاتعبيني وجيبي رهف وخلي نطلع لاتخاطرين بحياة بنتج الوحيدة هايي..

ام رهف: هاي هية مسافة الطريق اني يمكم..

سدت التلفون منا واجتي خلت ايدها على وجهه وبجت صاح بيها خالي سلطان..

سلطان: اه ليش تبجين صاير شي ابو رهف بي شي احجي..

ام رهف: لالا بس يعقوب يريد يطلعنة يكول الوضع مو زين..

رفع ايدة وأشر وهوة يرد عليها مستغرب..

شاكر: اي وليش تبجين بعد..

ام رهف: شلون اعوفكم هنا واروح اني كلبي ماينطيني..

شاكر: منو كال احنة راح نبقة.. مثلكم راح انلم غراضنة ونطلع قابل انضحي بجهالنة..

سلطان: لا تخافين ولايضل بالج علينة روحي مودعة بالله..

خوالي وعمامي ولد عم يعني امي ماخذة ابن عمها بالبداية جانت تكرها وماحبتة ابد بس شوية شوية بدت تتعلم علية بعد معانات...

طلعنا لكينة عمي يعقوب بالباب سلم ودعناهم ودانا البيت جدي البيت الساكنين بي احنة وعمامي.. بيت د*كورة قديم ت**يمة حوش جبيرر وداير مداايرة غرف وعلى جهه مطبخ وبصفة الصحياات.. لكيناهم كلهم مخبوصين سلمناا وفتت اني وامي الغرف*نة لمت ملابسي وملابسهاا وعمي يعقوب يصيح..

يعقوب: اخذو كل التحتاجو احتمال نتأخر اكثر من شهرر..

طلعت امي وسألت عمي..

ام رهف:اي صدك ما كتلي وين راح نروح..

يعقوب:رايحين الكربلاء هناك امان شوية وعندي صديق راح يستقبلنة..

دخلت امي ماقصرت لمت نص الكنتور واني كاعدة افتر وامي من الاصل ابدا مامعتمدة علية اهم شي راحتي عدها..

اجني كوسترين بالباب والكل التمو راح ويانا..

يعقوب عمي الرابع بالتسلسل بين عمامي السبعه بس هوة دائما شايل مسؤولية الكل حباب ومرح حيل..وراح ويانا عمي داود هادئ الى درجة وخجول..عمي جلال الجبير ماراح وبقة بالبيت..وعمي قحطان ثاني واحدبلتسلسل اخذ عائلتةواهل مرتة وطلع للنجف عندة صديق هناك..عماتي اربعة اجتي ويانا بس عمتي سعدية مزوجة فلهاذا اخذت وياها حتى حمواتها..نريد نطلع وطبكت سيارت خال ابوية هوة وعائلتة وخوات زوجتة..نزلو همة وجنطهم رتبو الجنط والنسوان صعدت اني من شفت بنتة زمن صديقتي الروح بالروح فقدت كعدت وياها نسيت نفسي هلكد ماسولفنة وضحكنة..

طلعتنة صارت باليل الجو اضلم وهدووئ مخيفف الكل سكت اخذتني امي الحضنها بقوة احس تريد ادخلني بين اضلوعها..شوية وغفيت ماادري بنفسي ماكعدت غير الفجر الضوة بدا يطلع وينكشف الطريق كدامي دقايق وكفنا كبال فندق جبير يصير مقابيل بيت صديق خالي سيد خلدون..ولان احنة هوايي اجرنا فندق كامل صح تعبان بس ضطرينة نزلنة الكل تعبانين وجوعانين الة اني نايمة الطريق كلة وشتغلت عندي حاسة الاكتشاف ضليت افتر بالفندق عبالك من هذني الفلام كارتون قديم حيل وصغيرر مابي لا مطبخ لا مكان كافي انشر الملابس معانات صارتلهم وفوكاها الجوع..

صاح عمي يعقوب:رايح اجيب اكل الكم واجي رتبو وضعكم وتحملو شلون مكان ادري المكان تعبان بس اخذتة لان سعرة مناسب..

وكفت مقابيلة وصحت:عموو اجيي وياك مو راح تروح..

دنك ولزم خشمي بكل قوتة وضل يودي براسي يمنه ويسرة ويحجي ويضحك..

يعقوب:اي تعاي وياي ليش ماتجين بس مو اسويلي مصيبة اعرفج اني كلج مصايب..

ضحكت على كلامة ورديت بعفوية واني العب بصابيعي..

رهف:يعجبني خوفكم مني..بس والله مامتقصدة اخبث عليكم احب اضحك وياكم بس مرات تنكلب السالفه. وصير صدك..

يعقوب:المهم حالين تكعدين عاقلة وبدون مقالب وسوالفج التعبانة سمعتيي..

رهف:اي كلش زين سمعت يلة اجي وياك..

يعقوب:تعااي هوة اني اكدر اكول لا غير ابتلي على عمري..

طلعت ويا والضحكة شاكة حلكي ويانا صديقة خلدون نفتر على مطاعم معزلين المخابز معزلين المحلات كلها معزلة ماكو غير ابو القراطش هذا العبالك خبز بس هوة مثل الجبس اخذ كمية حتى انسد بيها الجوع..من رجعنا الكل ضلو يحجون لان جوعانين بس من شرحلهم الوضع استسلموو وكعدو ياكلون بيهن..

اكلت شوية وعفتهم وطلعت اكتشف بلمكان هاي هوايتي الماكدر ابطل منها افتريت بالممرات مال فندق ماخليت غرفة ما كتشفتها الفندق كلة مغلف فايبر رجعت لكيت عمي يدور علية بسرعة صاح..

يعقوب:وين جنتي تعاي فوتي جوة لاضيعين ومابينة حيل صدمات امشي كدامي..

رهف:وين رايحة هوة دافتر بالفندق واشوفة موتدري بية مااعرف اكعد لازم العب..

يعقوب:رهوفة مو وكت لعب اني اروح وياج واشتريلج دفاتر والوان وقصص حتى متملين الوضع مو زين عموو حبيبتي سمعي كلامي..

هزيت براسي وفتت للغرفة لكيتهم يرتبون بالغراض اني كعدت اباوعلهم..شوية وصاحني عمي يعقوب..

يعقوب:كومي خلي اندور اكل لليل وبطريقي اشتريلج كم شغلة ادري بيج ماتكعدين راحة..

ضحكت وكمت وياا ضلت امي توصي بيةالزم ايد عمي ومااعوفه واني اكثر شي اكرها من احد يوصيني تجيني حالة العناد...طلعنة اول ماشفت مكتبة فلتت ايد عمي وركضت جبت تلاث كتب قصص ودفترين والوان خشبية ومائية هنا ارتاح كلبي وكدرت استقر خليتهن بعلاكة وطلعنة افترينة على محلات ماكو اكل ابد الوضع متأزم حيل بكربلاء اخذنة بس طحين وجولات ورجعنة الكل منتظرر انفوت بيدنة علاليك الاكل بس من شافونة بس كواني الطحين الكل خابت امالهم اتفق عمي ويا النسوان كل يومية يرحون البيت صاحبة خلدون يخبزون ابيتهم وجا**هم جولات ومن دخلهن عمي ابو الفندق ضل يشيل بروحة ويركعها كل شوية وصايح لاتحركونة استررو علية يمعودين الفندق مغلف فايبرر..

الكل حاير شلون يعيشون هيج شلون ياكلون الة اني كل همي شلون اتونس اطلع العب واركض زمن بكلشي وياي سيطرت عليها شكللها تكلي صار لان الكل حذر مني ويعرفوني من اريد اخبث على احد يعتبرو خوش اخذ كتلة ورزاله من عمامي السبعة...حتى البجي ماجنت ابجي اعتبرة ضعف بس من اريد اخذ حقي من احد يزعجني هنا ابجي وهنا عمامي يتخبلون يحيرون شيسون حتى اسكت..

ضلينة بالفندق هل فترة وكل يومية امي وعماتي يعجنن ونروح البيت خلدون كلش جبير وحلو وراقيي بي بستان كلش جبير من يروحن استغل الوضع واخذ زمن واروح وياهن نلعب بالبستان اول يوم جهالهم ضوجوني ثاني يوم ماخليت واحد ماهددتة من اني موجودة م***ع احد يفوت للبستان نضل بس اني وزمن مانخلي لعبة منلعبها..

وبيوم كاعدة العب قريب على عمتي وامي الديخبزن وام خلدون كاعدة يمهم يسألنها وجاوبهن..

ام رهف:شعجب سيد خلدون مزوج بعد؟

تن*دت وردت عليها بتعب...

ام خلدون:والله ياام رهف شكد حاولت ويا قافل مايقبل..الله يرحمها خلت **رة جبيرة بكلبة..لاتنسين بت عمة وربو سوة حبها من كل كلبة ومن عرف حبلت ماتتخيلين شكد فرحو ثنينهم ون**رت فرحتة بيوم موتها كل ضحكاتة جذب..

ام رهف:ابو رهف دائما يذكر ويدعي الله يصبرة..

أم خلدون:الحمدلله على كل حال هاي سنة الحياة ماتت مرتة واجتي بتة نسخة من امها ومامخليها معتازة الاحد اني ربيتها وتعبت عليها شنسوي بعد..

ضلن يسولفن اني عفتهن واريد ارجع للفندق وصار بوجهي سيد خلدون بتسم بوجهي واني هم بتسمتلة نزل راسة المستواي وكال..

سيدخلدون:ها رهوفة وين رايحة؟

رهف:راجعة للفندق مليت هنا..

سيدخلدون:تعاي وياي اني ارجعج لاطلعين وحدج ابد..

هزيت براسي وطلعنة قبل لانوصل رفعت راسي وسألتة بفضول..

رهف:عمو انتَ ليش متزوج بعد زوجتك الماتت..

وكف عن المشي وباوع بوجهي بصدمة شوية وكال..

سيدخلدون:شمعرفج بهل سالفة؟

رهف:قبل شوية سمعتها وصار عندي فضول اسألك..

ابتسم واكف مقابيلي ورد بجدية..

سيدخلدون:اذا بيوم من الايام شخص عزيز حيل حيل عليج اخذو وكالو انبدلة بشخص ثاني راح توافقين رهوفة..

صفنتلها وضليت افكر ثواني ورديت بعفوية..

رهف:طبعا واكيد مااقبلها..

سيدخلدون:واني هم مااقبلها فماريد ازوج الهل سبب..

رهف:براحتك بعد..كلتها وعفتة ودخلت جوة..

موقع الفندق مقابيل الامام العباس (علية السلام)والهل سبب كل يومية نروح انزور..وبيوم الدنيا عصر سبحت على سريع وبدلت وطلعت اني وامي الكل شوية تستعجلني حتى نرجع قبل الغروب..واني كل شوية اعاند واكعد اخر شي طلعن اني وزمن كدامهن وهنا يمشن ورانة نسولف ونضحك مندمجات وهنا يدردمن دخلنة للامام زرنا وطلعنة للصحن كعدنا اهناك راحت مرت خال ابوية جابتلنة خبزايتين حارات حيل كعدنا ناكل بيهن ونسولف ومانحس غير مرت طيارة من فوك الامام وبثواني انض*بت صاروخ فوك الصحن مباشرتا..نخبصو العالم شي تصرخ شي تركض والكل اينادي دخيلك ياابو فاضل نجينة احنة بحضرتك..اني كلبي ضل يدك اطبول ورجلي صارت خيوط من الخوف حضنت امي وضليت ابجي احتمي بيهاا..هية ض*بة وهية الطيارة مثل الندفعت وكعت بالصفحة الخلف الامام على بستان فارغ..علت صوت الناس وهمة يصلون على نبي جانت معجزة وماوكعت بالصحن اجتمعو الناس الكل يصلي صلات الشكر اني من الخوف خلصت صلاة وكتلها الامي..

رهف:يمة بعد مااكدر خلينة نرجع حيل خايفة..

كومتني امي ورجعنة للفندق من الخوف والهبطة لفيت راسي ونمت من وكت الاول مرة...

للعشة كعدني البنات تعودنا كل يومية نجتمع داير مداير الصووبة ونضل نسولف قصص ومغامراتنة شكد ماتعذبناا وعانينا بس بنفس الوكت تونسناا حيلل جمعات الاهل والكرايب غير عن كل الجمعات مميزة دائماً عندي..

حضرنا دفاتر وكلمن دفترة وقلمة ومنتظرين نقرر هل مرة شنلعب..

رهف:خلونة نلعب حيوان جماد نبات.

زمن:يلة الكل يخطط دفترة..

كعدنا نخطط ونتفق منو اول سطر والثاني شنو كملنة وبديت صحت بصووت حتى يبدون وياي وميكولون بديتي قبلنة..

رهف:حرف الفاء...ولان هوة حرف حافظتة كلش فزت عليهم بعدها الهاء عقلي جمد من وصلت حيوان بحرف الهاء..فازو علية واني هنا صعدت عندي الخبالات شلون يفوزون علية صرخت بيهم نرجع نلعب اختاريت حرف الحاء اول ماخلصت اني من شفت نفسي فزت ضحكت بعلوو صوتي وسديت دفتري وكمت من يمهم حتى ميفوزون علية وارجع انقهر وانام مقهورة ميصييررر عيبب انام مقهورة..

رحت تعشيت وفات علية ابن خالت زمن عمرة عشرين سنة اسمة زين اخذ من كدامي الاكل بدون مايحجي حتى ولايسلم واخذ الخبز وباوعلي بطرف عينة واني مبحلقة عيني مصدومة من تصرفة يعني معقولة مشافني اكل واني حتى بدون غدة فار دمي من تصرفة وعتبرتة تقليل من احترامييي حلفت انتقم منعندة واشوفة ويامنو لعب..

نمت واني ارسم خطة ابالي علية اتوبة وحلفت مااخلي ياكل بعد من الوجع..كعدت الصبح لكيت الريوك جاهز اكلتلي لكمة رفعت راسي شفت الساعة ورجعت نظراتي على زمن اشرتلها براسي تلحكني هية ماتكدر تكول لا مشيت على اطراف اصابيعي واني اشررح اسوة بية البارحة وشلون قهرني ولازم انتقم وزمن تضحك خايفة خاف يكشفنة..فتحت باب الغرفة النايم بيها على اقل من مهلييي ودخلت لكيت اختة صغيرة عمرها سنة ونص نايمة يمة وبيدها ممة سحبتها من ايدها ومديت ايدي الزمن..

رهف:غسليها وخلي بيها حليب وجيبيلياها بسررعة اريدج طلقة تعرفين شنو طلقة.

صفنت بوجهي وهية خايفة..

زمن:رهف والله اذا حس علينة يلعب بينة طوبة استري علية والله ابوية يموتني بس يسمع..

خليتها تخلص كلامها ونطيتها خزرة من هاي الزينة وهية راحت مثل الطلقة دقايق وجابتلياها واني كاعدة بمكاني بدون اي صوت..

اخذتها من ايدها وبحكم اني اعرفة نوومة كلش ثكيل خليت الممة بحلكة وهوة مثل الجهال ضل يشرب بيها واني وزمن ماتحملنة وجوهنة نكلبت حمررر من الضحك خليتة يخلصها واني مستمرررة اضحك علية وخرتها من عندة ودفعت زمن وطلعنة كعدت بصف عمتي ولا كأن شييي صاار اني اصلا فقيرة وممسوية شي واليحجي اندمة رهف على سن ورمحح يااب...

ماكو ربع ساعة وطلع للحمام لعبانة نفسة ومايكدر يحجي ركضتلة امة وهوة يتلووة من بطنة ويصرخ..

ادريس:هاي كلة من اكل البارحة هاية رهف خلت عينها على اكل..

وجهوو نضراتهم اتجاهي واني نزلت دموعي وحجيت بصوت مقهوور..

رهف:هاي فوك مماخذ اكلي ومخليني بلا عشة ولا غدة وتحجي بدال متعتذذررر..

رد علية عمي داود وهوة يخزررة بعيونة....

داود:على اي اساس تاخذ اكلها ولك ماتستحي انت تخلي عقلك بعقل هل طفلة هااي..

ادريس:يا طفلة صدك جذب غير عمرها 13سنةة البكدها مزوجات ومخلفات شنو ماتكدر اسويلها ماعون ثانييي..

داود:رهف طفلة ومانقبل تلزم الطباخ مرة الثانية م***ع تاخذ اكلها سمعتنييي..

هزز براسة واني مسحت دموعي وكلبي ارتاح على اخيررر هم اخذت حقي وهم تررزل الف الحمدلله..

بعد اسبوعين ودخل علينة عمي يعقوب وجههة اصفر وبس يعارك اول مفات صرخ بعلو صوتة..

يعقوب:بسرررعة كووموو لموو غراضكم راجعين البغداد..

ردت علية عمتي سعدية بخووف وقتربت حيل من يمة حتى منسمع ونخاف..

سعدية:خيرر خومااكوو شي..

عاط بيها يستعجلها تلم الغراض بسرعة من خوفنة حتى مجادلنة ولا سألنة اكثر لمينة الغراض قليلة والنص الثاني مكفت السيارة خليناهن بيت سيد خلدون ونزلنةة..صار بوجهي سيد خلدون بتسم بوجهي ودعنة وطلعنة بالسيارات طلعنة الظهرر..شوية شوية بدا عمي يحجيلهم لان الجوو مخيف والعالم بالشارع هووسة بس ماجنت افتهم شيحجي..

يعقوب:علكت الدنيا والمعارضة بكل مكان وصايرة كاتل ومكتول ادعوو نطلع منها بسلامات..

الجوو تكهرب وفجأه لزمتني عمتي سعدية وغطت وجهي بعبايتها حيل حتى مااشوف الشارع بس شنو الشاافو كلهم ضلو يصارخون ختلست السمع ..

ــ العالم مشمررة بالشاررع..

ـ الشارع كلة دماايةة..

حتى عالم معلكةة ومشنوقيين..غمضت عيني بكل قوتي ونمتت مااريد اسمع اكثثرر..ماكعدت غير من وصلنة العصرر دك الباب عمي وفتحة عموو جلال وفوتوونة بسررعة نززلت بس وضع بغداد ماكو امان ومتخرربط...

فتت سبحت وكعدت افتر بالبيت وندك تلفون صاح عمو يعقوب على امي وكاللها اخوج سلطان يخابرر..

بعد ماسلمت علية طلب منها تجي ويا الان راح يطلع الشهربان يم صاحبة فلاح امي رفضت وتعذرت منة لان صار فترة مسامعين اي خبر من ابوية وتفكيرناا كلة يمة بس عمي يعقوب اصرر تاخذني امي وتروح وطمنها هوة بس يسمع شي يخابر خالي سلطان وينطي علمم ضلت امي حايرة بس مااكدرت ترفض اكثر..نفس الجنطة اخذناها وداناا عمي يعقوب البيت جدي..من شافو امي وشافوني حضنوناا ورحبوو بيناا دخلنة جووة كعدنا وصبولنة العشة حتى نرتاح ونمنا..

وقبل لايطلع الفجر طلعناا اني وامي وخالي هلال وعائلتة وخالي شاكر وعائلته وخالي سلطان ومرتة واهلها..عددنا هواي رحنة بمنشأه الة كفت احنة والغراض..تأخرنا بالطريق اول ماوصلنا على طول الطريق مززارع ودووانممم كلها زررع تابعة الصاحب خاليي..

سلطان:هذا كلة الصاحبي مو دونم وانما دوانمم مزوج تلاث نسوان وكلمن مخليها بيت ولده كبار بانيلهم كلمن بيت يريد يزوجهم همة بابت عرب بس ناس ونعم منهم طيبين حيلل ماريد صوت وحدة يطلع اريدكم ترفعون راسيي مو تفشلنااا..

تلكانا الرجال ويا نسوانة من باب البستان سلمنة ومن بعد السلام صاح على نسوانة يدلوونه..

ـ فرغتلكم بيتين حتى تاخذون راحتكم وماتضايقوون وان شاءلله مانقصر وياكم..

سلطان:ماتقصر ابو احمد ونعم منك ومن اصلككك..اني اخليهم امانة يمك رايح كم يوم وارجع..

ابو احمد:لايضل بالك خوية بعيوني اشيلهم..

سلطان:سالمة عيونك خوي. اودعناكم..

مشينا للبيت بيت بصف بيت احسن بهواي من الفندق اخذتلي فرة اكتشف المكان وارضيي فضولي كعدنا اني وامي بيت واهل مرت خالي اخذو البيت الثاني لان هواي..صحيات وخدمات ومي كلها موجود حتى ساكية مال مي قريبة من ينكطع المي نروح هناك نغسل هدووم..

اول اسبوع الي اكعد من الصبح واروح للزاوية الخصصتها الي والغراضي ودفاترري اكعد هناك واباوعع على ح*****ت ومرات اكتب لو ارسم وللعصر نلتم اني وبنات خوالي وبنات الفلاح ابو احمد 7وبنات عمهن نلتم مانخلي سالفة مانسولف بيها بس حيل فقيرات وعلى نياتهن..

مرات امل واطلع من كل عقلي اونس نفسي اركض وره الدجاج اخبلهن وحتى الهوايش ماسلمن مني اركض وراهن وحصررهن وعوفهن واني فاطسة ضحكك..

شكد مااول اسبوع تونست بي شكد ما ثاني اسبوع مااعرف حوبتمن طلعت بية..

جنت نايمة كعدتني امي تريكنة سووة وطلعت لكيت بيت ابو احمد مخبوصين خبص وهنا شلون يسكت الفضوول لازم اررضيي..فتت البتهم وصحتت..

رهف:امل تعااي يمي اريدج..

امل:ياا هلا برهووفة تعااي فووتي يميي..

رهف:شوو مخبوصين شعدكم اليووم..

امل:اليووم عيدد اخوية احمد اليوم يرجع من بغداد بعد تعبب وتوسلل من بدت الحرب الهل يووم..

رهف:ليش شعنده بغداد هوه..

امل:هوة كلية هندسة صار هواي هناك كاعد بيت اقاربنه حيل خايفين علية تدرين الاوضاع مو زينة بغداد ابوية اصرر علية يجيي..

هزيت براسي واني عقلي يض*ب اخماس بسداس شدعووة هلكد مخبوصين انوب زاد فضولي اشووف المخبوصين علمودة..

كعدت فرد كعدة منتظررتة يدخل علينة الاستاذ احمد عشتوووو..ساعة واشوف من بعيد سيارة خالي سلطان ركضت بتجاها مشتاقتلة حيييل وبس اريد اشووفة..شمرت نفسي مقابيل السيارة امأمنة على نفسي وادري بي يعرف شلون يوكفها..

نزل من السيارة وهوة يضحك حضني مثل الطفلة وباس راسي..بس ماشفت ذاك الشخص الخازرني بالسيارة ويااا...

يتبع....

هل ياتررة رهف راح تبقة بهل دلال لو يحصل الع**سسس..انتظررونيي شاركولي القصة وشوفوني تفاعلكم البطلة اتابع ويانا.. تصويتكم يسعدني احبكم..